بابا دايما بيستغل ماما و بياخد فلوسها و مش بيرضى يجبلها اي حاجه و بيقعد يطلب منها تشتريله حاجات و لما جيت كلمته بيقولي مش معايا فلوس رغم ان بيروح يشتري لنفسه حاجات كتير و عمره ما بيفكر حتى يجيب وردة و ماما بتقابل ده بصمت دايما و لما اجي اتخانق معاه او معاها على صمتها بتتخانق معايا انا المشكلة مش في حاجه على قد منا بقيت شايفة بابا حد اناني و بيستغل بس حتى علينا و مبقتش عارفة احبه و بيبقي نفسي يتغير عشان فعلا مش قادره اتعايش مع اني اكون مبحبش ابويا
مساء الخير يا جميلة.....دى مش مجاملة ...انتى بجد جميلة اوى اولا احب احييكى على جمال روحك ونفسيتك وعلى انك شخصية سوية وعارفة الصح من الغلط انك ترفضى عدم تقدير بابا لماما فى مسأالة الانفاق ....ده شىء يحسب ليكى. ممكن انتى تكونى اللى تقدرى ماما وتحسسيها دايما انك مقدرة تعبها وانها متحملة المصاريف انتى كل ما تقدرى هاتلها حاجة ولو بسيطة ...هتفرح اوى وهتعوضيها عن تصرفات بابا بالنسبة لبابا ...هو بنى ادم وعندة عيوب وكلنا بنستحمل عيوب اللى بنحبهم وبنصبر عليهم وندعيلهم يتغيروا وممكن ده اللى مامتك بتعملة ولذلك بتسكت . مش كل صفة وحشة هنقابلها بالكره . الحب بيجى معاه تحمل وصبر وانتى واعية وبتحبى بابا وماما وهتقدرى تتحملى وتدعيلهم يكونوا احسن بتعاملك الحلو ان شاء الله
تم النشر الجمعة، ١٨ نوفمبر ٢٠٢٢
اهلا بيكي واتمنى أنك تكوني بخير . هسالك سؤال، هل الوالد علطول كدا، ولا ديه فترة معينة ؟ لو هو علطول كدا، يبقى الكلام نظريا والدك مش هيتغير، ومن الواضح أنه شخصيته هي كدا. ممكن يتغير ولا لا ؟ ده سؤال نتيجته بتتضمن حاجات كتير أولهم أنه يكون هو نفسه عايز يتغير، ولو هو مش عايز، مفيش حاجه هتحصل. لو انتي عايزة تفهمي الوضع اكتر، حاولي تقعدي مع والدتك، ولكن مش قاعدة خناق، قاعدة تفاهم، تحاولي تفهمي منها ايه اللي بيحصل بالظبط، حاولي تكوني هادئة في نقاشك معاها علشان الأمر ميكونش معقد اكتر. لو ماما في الاخر وصلتي أنها متقبلة الأمر، مظنش انك هتعرفي تغيري الوضع اوي. فيه حاجات الواحد مش هيعرف يغيرها لأنها مش في ايده، بس اللي ف أيدك أنك تشتغلي على صحتك النفسية انتي، تتقبلي واقع والدك. وتحمي نفسك ديما من الاذى تحت أي شكل من الأشكال. حاولي مع والدتك مرة تاني، ولو الأمر بقى على ما هو عليه، تقبلي الوضع الحالي، لحد ما تشتغلي ويبقى ليكي مصدر دخل ليكي لوحدك وتصرفي على نفسك. أما موضوع كرهك لوالدك، أنا متفهمة أنه شعور مش سهل عليكي، ولكن في الدنيا محدش بياخد كل حاجه، ديما في مشاكل، منغصات، منعطفات، ديما في شيء ممكن يعرقل الطريق. مش هقدر أقولك حاولي تحبيه، أو حاولي متكرهوش، لانه أمر صعب، بس لو تقدري تسامحي يبقي أحسن ليكي كتير. أهتمي ديما تبقي أحسن، حبي نفسك، أتعلمي كويس، اشتغلي، اعملي ليكي حياة، خلي في حياتك ناس إيجابية تساعدك انك تبقي ديما فوق، تساعدك ديما أنك تبقي احسن. وفيه حاجات كتير بتتعوض، وزي ما قولتلك محدش بياخد كل حاجه. أتمني ديما أنك تبقي بخير وفي أحسن حال
تم النشر الثلاثاء، ٢٠ سبتمبر ٢٠٢٢
بصي ياجميلة لو باباكي دي طباعه وشخصيته من يوم ما اتجوز الست الوالده يبقي غالبا شخص نرجسي يعني شايف أن الكون متحور حوالينه بس وغالبا بارضو هتلاقيه مسيطر عليها في الأفكار والكلام وطباعه حاده وبيستحقر ارائكم وبيقلل منكم التعامل مع الشخصيات دي بيكون علي الأد من غير تفاعل زياده وبدون ما تدوسي علي الحته الي بتوجعه كبريائه يعني ... علاقته بوالدتك ملكيش فيها طالما راضيه وقانعه، إنما متحبهوشي فالقلب بايد الله لكن واجب عليكي طاعته وبره وابعدي تماما علي الدخول في جدال أو نقاش لانك هتخسريه
تم النشر الجمعة، ١٨ نوفمبر ٢٠٢٢
لعرض السؤال في فدني اضغط هنا