بحب بنت اصغر مني بسنة من زمان وانا عندي 17 بس مش عايز اكلمها إلا وانا كويس ماديا وأخطبها أو يبقى ليا عين احجزها حتى بس انا برضو لسة تالتة ثانوي وعلى ما ابتدي حياتي العملية هتكون هي اتجوزت و في الاخر هيبقى صعب اجهز نفسي برضو يعني لو ربنا كرمني بطب مثلا وانا عارف إمكانياتي مش اقل من ١٠ سنين عشان ابدا اشتغل في المجال دا مع اعتبار أنه هيوفرلي فلوس كويسة وتفكيري برضو بيروح لحتى تانية انا عندي ابن عمي اكبر مني بسنتين مهتمش بالتعليم من اعدادي هو كمل اه بس بيعدي اي كلام كدة مع أنه شاطر واشتغل في مجال الالعاب والكلام ده وحاليا مشاء الله عايش معاه ايفون 15 وبي سي بحوالي 100 الف و موتوسيكل كويس أنه مش كارهلو بس نفسي ابقى زيو هو عايش العيشة الي بحلم بيها مع أنه كان أبوه يعني على قد حالو يعني زي معظم الشعب هو كان عايش عيشة صعبة جدا ماديا ومعنويا من أهلو وحاول ينتحر قبل كدة وانا حاليا بمر بنفس الظرف المادية والمعنوية حتى داخل تالتة ثانوي ومش معايا فلوس احجز مش عارف بقا اعمل زيو واختار اي مجال أتعلم فيه ولا ايه ولا اكمل دراسة والبنت الي بحب هتروح عليا واتخرج وقبض ٣ أو ٤ أو حتى ١٠ آلاف جنيه الي هو برضو ميكفيش انك تشيل مسؤولية بيت وتعيش العيشة الي نفسك فيها خصوصا أن ابوك كبير في السن ومعماش حساب لنا الي هو كل واحد يعمل لنفسو انا تايه جدا مش عارف اعمل ايه وعندنا في بلدنا في ناس بتسافر دول افريقيا وبتاجر هناك الي مش ياكل بيروح سنة بييجي يشتري احدث العربيات ويبني ويشتري اراضي ومعظمهم محضروش ابتدائية يعني مش عارف الواحد يعمل ايه
مشكله بس حلها بسيط في آيه في القرآن تقول " لا يكلف الله نفسا الا وسعها " بس كدا انت لو بتحب حد فدا مشاعر بس يؤسفني اقولك ضعيفه وهتتفكك مع الزمن ودي الحقيقه مهما كانت البنت فيها الصفات الجميله من دين وخلق ومسئوليه فربنا ما خلقش جيل واحد ولا بنت واحده بص للدنيا حواليك هتلاقي في كل وقت الحلو والوحش فهي الدنيا مش بتقف على حد بعينه وبردو عايز اجبلك من الاخر واطمنك لو هي من نصيبك الدنيا كلها هتقف معاك من توفيق وكرم ربنا ليك ومفيش حد هتنفع معاه الا انت بس لو مقدره ليك لو غير كدا فربنا عنده الاحسن بس دا في حاله انت واثق إن ربنا عنده الاحسن ليك هيديك الاحسن بكتييير وياما بنشوف قصص على ان ناس بعد اما تشوف ناس على حقيقتها بعد لما يتجوزوا من غيرهم تحمد ربنا انهم ما حصل نصيب ودا لان ربنا عارف اللي يناسبك مش انت.... بس لو في حاله بقى انك حبتها وعشت القصه دي مع حالك دلوقتي فمفيش خسران غيرك انتي اللي اهلكت مشاعرك وضيعت وقتك فمتخدعش نفسك لان والله المشاعر ببتنسي والنصيب موجود كدا كدا بس شد حيلك اولا في دراستك ولو مكتوبالك هتتجوزها من أول سنه في الكليه فحابب ابشرك ما تقلق
تم النشر الخميس، ١٨ يوليو ٢٠٢٤
اول حاجه انت لازم تحمد ربنا انك قادر تكمل رغم كل الضغط دا بس كلامك دا بيدل علي انك شخص ناضج يعني بيعرف يفكر كويس بس ممكن السبب الوحيد اللي مخليك متوتر ومش عارف تاخد قرار هو خوفك وقلقك وكمان الضغط اللي أنت فيه اول حاجه انا بنصحك بيها تحاول بقدر الامكان تفضي دماغك من كل الضغط وتصلي ركعتين استخاره وركعتين قضاء الحاجه وإن شاء الله ربنا هيرشدك للاصلح ليك واللي فيه الخير وبتمنا ان ربنا يوفقك وتحقق حلمك ويكتبلك البنت اللي بتحبها ويجعلها من نصيبك بإذن الله
تم النشر الخميس، ١٨ يوليو ٢٠٢٤
السلام عليكم ورحمة الله وبركاته ومغفرته . اولا ما شاء الله علي أخلاقك وان حضرتك فاهم انك مينفعش تدخل للبنات الناس الا من الباب بس الفكره لسه المشوار قدام حضرتك طويل اوووي انا عارفه ان في ناس بتتجوز فن ال18 بس اصبر ان الله مع الصابرين كمل تعليمك لحد متتخرج وادعي ربنا في كل صلاة انها تكون من نصيبك ولو مكنتش من نصيبك قول الحمدلله لان تتدابير ربنا احلي واجمل بكتير ثانيا الفلوس عايز ربنا يرزقك تعايش مع ذكر الله خلي لسان حضرتك دايما رطب بذكر الله ولئن شكرتم لأزيدنكم صلي قيام الليل وادعي الله عز وجل في علاه ارفع يديك وتضرع اليه وخلي يقينك بالله كبير انو هيرزق حضرتك والله وبالله وتالله يستحال ان يردك الله خائباً وقلبك مليان باليقين وياريت فضلا مننساش ان الله يرزق من يشاء بغير حساب والسلام عليكم ورحمة الله وبركاته
تم النشر الخميس، ١٨ يوليو ٢٠٢٤
أهلا يا صديقي ... أنا مقدرة جدا مشاعرك تجاه البنت اللي بتحبها وحرصك أنك تكون كفء عشان ترتبط بيها ٣ ثانوي هي سنة مصيرية في حياتك .. نصيحتي ليك ابذل أقصى مجهود ليك في السنة دي وانت في الكلية اتعلم مهارات تساعدك تشتغل بدخل عالي ولا تكتفي بالكلية وادعي ربنا كتير يكتب لك الخير في السن ده ١٧ سنة بتبقى متخيل أن الحب اللي انت بتحبه هو أفضل حاجة والشخص اللي عايز تكمل معاه لكن لما تتفتح ليك مجالات أكثر وتدخل الجامعة وارد جدا رؤيتك تتغير وتلاقي نفسك بتروح لشخص مختلف ودماغ مختلفة وبيكون خيار عقلاني أكثر لأنك بتكون نضجت الخلاصة خلي علاقتك بالله موصولة دايما بالدعاء والصلاة ثانيا ركز عالسنة الجاية هي من أهم السنين في حياتك ثالثا اتعلم مهارات تساعدك تبدع ويكون ليك فرص عمل أفضل وربنا يرزقك الخير يا صديقي
تم النشر الخميس، ١٨ يوليو ٢٠٢٤
بما انك داخل تالتة ثانوي فمن الاولى انك تنتظر شوية تعليمك مهم خلص ثانوية عامة بإذن الله وإن شاء الله تدخل الكلية إللي بتحلم بيها وكل حاجه هتتيسر بإذن الله وتشتغل وتكون جاهز بشكل رسمي تتقدم لها ما دام نيتك خير ادعي ربنا كتير ومتيأسش بس اهم حاجه ركز فى ثانوية عامة ومتشغلش بالك بأى حاجة تانية وربنا يقدم إللي فيه الخير ليك يارب ويراضيك بإللي تتمناه
تم النشر الخميس، ١٨ يوليو ٢٠٢٤
أول حاجة، الله يعينك ويقويك على كل اللي انت بتمر بيه. واضح إنك عندك طموحات وأحلام كبيرة، والدنيا دايمًا بتحط في طريقنا تحديات علشان نشوف هل احنا جاهزين نواجهها ولا لأ. بالنسبة لحبك للبنت، أنا فاهمة إنك عايز تكون في وضع مادي كويس قبل ما تتكلم معاها، وده حاجة محترمة منك. لكن حياتك العملية لسه في بداية الرحلة، ومش لازم تحط ضغط كبير على نفسك من دلوقتي. كمل دراستك وحاول تطور نفسك في المجال اللي بتحبه. دخولك طب هيكون فرصة عظيمة لكن مش الشرط عشان النجاح المالي أو الاجتماعي. النجاح مش مربوط دايمًا بالمهنة نفسها لكن بالإبداع والاجتهاد اللي بتحطه فيها. بالنسبة لابن عمك، صحيح انه عايش حياة انت بتحلم بيها دلوقتي، لكن كل واحد فينا عنده رحلته الخاصة وظروفه الخاصة. النجاح مش بس في الفلوس، ولكن كمان في الرضا الداخلي والسعادة اللي بتشعر بيها في حياتك. شوف المجالات اللي بتحبها وحاول تستثمر فيها وقتك ومجهودك. ممكن تحتاج تختبر حاجات مختلفة لحد ما تلاقي شغفك وتبتدى تعيش العيشة اللي انت بتحلم بيها. وبالنسبة للأسرة، انت بتحاول تأمين نفسك ومستقبلك عشان تقدر تعيش حياة كريمة وتدعم عيلتك. ده شيء طبيعي ومحترم جدا، بس لازم تتذكر إن الطريق مش سهل وبيحتاج وقت وصبر. ما تخليش الضغط ده يحطمك، خدها بخطوة بخطوة واعمل اللي تقدر عليه النهاردة، وربنا يوفقك في المستقبل. حاول كمان تجدّد علاقتك بربنا وتدعي كتير، لأنك مش لوحدك في الرحلة دي. دايمًا فكر إنك تستحق الأفضل واشتغل بجد لتحقيقه، ومتاكد إنك قادر توصل لأحلامك إن شاء الله.
تم النشر الخميس، ١٨ يوليو ٢٠٢٤
انت اعمل اللي عليك واجتهد وقرب من ربنا جامد ولو ليك خير ف البنت اللي بتحبها اكيد ربنا مش هيبعدك عنها ثانيا انك تفكر ف البيزنس وكدا وانت داخل تالته م هينفع اوي الصراحه ممكن تتعلم مجال جانب الدراسه مثلا ساعه ف اليوم حاجه حلوه عبال متخلص تالته تكون مثلا طورتها وكدا وتبدء تشتغل بيها
تم النشر الجمعة، ١٩ يوليو ٢٠٢٤
دلوقتي انت داخل ع مرحلة صعبه مش هضحك عليك واقولك سهله الصراحه عايزه مزاكره اول باول ومتفكرش ف اي حاجه تشغلك عن دراستك عشان يوم النتيجه متقعدش تندم لا قدر الله
تم النشر الجمعة، ١٩ يوليو ٢٠٢٤
لعرض السؤال في فدني اضغط هنا