عملت move on كتير وكل مره بفشل
كان الحب الاول وضيعت عليه مشاعرى وطاقتى من بعد ما بقيت بنصح اللى حواليا بقيت انا اللى محتاجه النصيحه عشان حاسه انى بقيت مريضه بحبي ليه
فات سنه وسبع شهور و اربع ايام ومش عارفه انساه للعلم انه خطب و هونت عليه عادى للعلم كمان انى عملت كل حاجه تخليني انساه وحاولت اكرهه بس معرفتش
ياريت لو فى حل عشان الموضوع ده موقف حياتى كلها
مش المفروض انك تحبيه او تكرهيه .. لان الشعورين نفسهم هيعودوا عليكي بالسوء .. الوعي نص الطريق وعيك بنفسك انك كنتي في علاقة خطر، وعارفه أن النهاية مش في صالحك ابدا، وعيك ده نص الحل، والحلول التانية محتاجة مجهود، لكن في الحقيقة هي تستاهل كل المجهود اللي ممكن يتعمل علشان تبقي كويسة. نظرتك للأشياء هي نتيجة واقعك الحزن بيغطي على حاجات كتير مش كده؟ ممكن يكون الواحد مش شايف كل حاجة صح؟ يعني لو فيه حد في حياتك مش سوي نفسيا، وشخصية سامة بمعنى أصح، ممكن تقولي " ليه بيحصلي كدا، ليه الشخص ده في حياتي، هو انا عملت ايه لكل ده، هو انا استاهل ده" غالبا ممكن يحصل كدا خصوصا في بداية الصدمات، لكن في جانب مش متشاف، أو مش واضح، أو مش عارفين نوصله". الجانب ده أننا رسائل في حياة بعض، الشخص الغير سوي ده رسالة آه، رسالة تخليكي تفهمي، رسالة تخليكي هنا بتسألي السؤال ده، رسالة تخليكي أقوى، أقوى بكتير من أي وقت فات، أعرفي الرسالة، وافهميها لأنها هتخليكي شخص مختلف تماما. أقبلي اقبلي الفقد، من الحاجات اللي بتصعب حاجات كتير علينا هي أننا مش قادرين نتقبل، فكرة صعبة مش كده؟ هي آه صعبة لكن مش مستحيلة، ما هي لو كانت مستحيلة كان زمان الناس كلها ماتت ورا اللي بيحبوهم،لكن بيعدوا، وبيكملوا، وبيعيشوا. حب النفس ازاي متحسيش بالندم بعد ما سبتي العلاقة؟ طيب أسمحيلي اسالك سؤال، هو ليه أصلا تحسي بالندم بعد ما تنفصلي تماما عن علاقة سامة؟ يعني ايه الندم في كده؟ ايه مثلا ندم انك مش هتلاقي زيه، طيب ومين قالك أننا عايزين حد زيه، إذا كان هو في الأساس مش سوي، هل انتي عايزة شخص بالشكل ده في حياتك، عايزة بهدلة، هو هل الحب بهدلة؟ اكيد لا، اكيد الواحد بيحب وعايز احترام، عايز تقدير، عايز تفاهم، عايز مودة، عايز رحمة، اكيد مش عايز بهدلة. حبي نفسك وقدريها لأن السؤال ده يبان منه حاجه مهمة جدا وهي مشكلة في عدم تقدير النفس، وحبها، استثمري فيها، لأنها اغلى حاجة. لا..... أتعلمي تقولي لا. لأ للظلم، متظلميش نفسك، لأ للكره، حبي نفسك، حبيها واحترميها لأنها تستاهل، لأ للاستغلال والابتزاز، أتعلمي تقولي لأ. "المشاعر المكبوتة لا تموت". -فرويد الإنكار عمره ما كان ولا هيكون حل، خدي وقتك في الحزن، خدي وقتك في البكاء، الحزن له قدسية زي الفرح، بل إن الحزن مشاعر عظيمة لأنها الطريق أو النفق اللي بيكون في آخره النور. مينفعش تقسي على نفسك وتعنفيها "وتقولي، لأ مش انا اللي ابكي، مش انا اللي ازعل"... لأ وليه متزعليش، ازعلي لان من حق أي إنسان أنه يحس بالمشاعر ديه، المشاعر المكبوتة مش هتموت هتفضل جواكي، لحد ما يحصل موقف ما، وتنفجري فيه، وعلى فكرة ممكن ساعتها الموقف ده يكون ميستاهلش، ازعلي، وابكي، وخرجي كل اللي جواكي. الأعذار وما ادراكي ما الأعذار؟ بلاش الاعذار الغير منطقية، بلاش تخلقي اعذار زي ما بيقولوا من تحت الارض علشان تصدقي الشخصية ديه تاني، صدقي اللي قدامك، صدقي الحقيقة اللي انتي شايفاها، فتحي عينك. مش إحتمال الشخصية ديه ترجع تاني؟ اه، احتمال طبعا ترجع كل شيء ممكن، كمان ممكن يرجعوا بعد ما انتي تكوني تمام، بعد ما انتي تكوني خلاص قطعتي الصفحة، طيب هما ليه بيرجعوا تاني؟ علشان من جواهم كدا بيقولوا، ايه ده هو كدا خلاص، ازاي نسيت بالشكل ده، ممكن الكبرياء اللي جواهم والأنا تخليهم لا يتقبلوا الرفض ده، فيرجعوا علشانهم هما، وعلشان يحسوا بالاستحقاق أو المشاعر اللي بيتغذوا عليها منك. بلاش شخصية بديلة الدخول في علاقة تانية بعد الانفصال، مش هتعالج ابدا اي شيء، بل هتضرك انت والشخص الاخر. استبدلي العلاقة بالرياضه، بالشغل، بالمذاكرة، بالكورسات، أتعلمي حاجة جديدة نفسك تتعلميها من زمان، العبي رياضة تخرجي فيها طاقتك، اعرفي ناس جديدة ولذيذة وايجابية، اخرجي بره غرفتك، بره الكومفورت زون بتاعتك. تعملي إيه كمان؟ من الحاجات اللي هتساعد جدا في انك تنسي أو تتعافي هي انك تفرغي كل مشاعرك في الكتابة، أو انك تحطي لحد مقرب، بل بالعكس اوقات الكتابة تغني عن الكلام مع حد، لان اوقات كتير الواحد بيكون محتاج يطلع كلام محدش يعرفه غيره وبس. اقطعي علاقتك بكل صفحاته على السوشيال ميديا، عمرك ما هتعرفي تتعافي وانتي لسه بتراقبي صفحاته على الميديا. من الحاجات المهمة أننا نعرف أن العلاقات ممكن لا تدوم. للاسف ناس كتير بتكون عامله توقعات خرافية جدا، طموح العلاقة بيكون عالي جدا، لدرجة أنها بتدخل في حالة إنكار بعد كدا. مش شرط علاقة الصداقة تدوم. مش شرط الارتباط يدوم، مش شرط يتحول لخطوبة، مش شرط يتحول لجواز. مش شرط يعني من حق اي حد في العلاقة أنه يخرج منها، احنا مش أملاك لبعض، انتي شخص كامل متكامل وهو شخص كامل متكامل. كل مرحلة من مراحل الحب، سواء في الاول كانت ارتباط أو جواز أو خطوبة، هي مرحلة مُكملة للأخرى، ومش معنى كدا إننا منعملش احتمال أنها متكملش، طبعا ممكن متكملش، وطبعا احنا محتاجين سياسية التقبل، وسياسة الرفض. أتمنى لك السلامة
تم النشر السبت، ١٠ يونيو ٢٠٢٣
التعامل مع الألم: لا تخف من التعبير عن الألم والحزن الناجم عن انتهاء العلاقة. ابحث عن منافذ للتعبير عن مشاعرك، مثل الكتابة في مذكرة أو مشاركة الأحاسيس مع شخص مقرب يمكنك الثقة به. اكتشاف الذات: ابدأ في اكتشاف نفسك واهتماماتك وأهدافك الشخصية. ركز على تنمية مهاراتك ومواهبك، واستغل الفرص لتحقيق نجاحات جديدة في حياتك المهنية أو الشخصية. الانخراط في أنشطة جديدة: قم بتجربة أنشطة جديدة وتحديات مثيرة للاهتمام
تم النشر الأحد، ١١ يونيو ٢٠٢٣
كنت بمر بنفس التجربه وفرقت معايا الي عملته جدا لما حسيت اني خلاص ميؤس مني ف اني اعمل موڤ اون وخلاص بقي كنت بصلي دايما ومواظبه ع الازكار كنت بحاول الهي نفسي على حاجا تفيدني اكتر من اني افكر فيه كنت بنزل جيم وانزل اتدرب كيك بوكسينج ونزلت اتدربت ف صيدليه ست شهور واشتغلت وحاولت اعرف ناس جديده وكل مره بيجي ف بالي بقعد استغفر واغمض عيني عشان مفتكروش ودلوقتي حرفيا بيلف ورايا عشان ابصله ولا هوا ف دماغي اصلا الي يهون عليه دمعتي وزعلي واكتر فتره مريت فيها بحاجات مش حلوه ف حياتي يبقي ف ستيت داهيه بجد
تم النشر الأحد، ١١ يونيو ٢٠٢٣
للاسف دي الحياه بس حاولي تشغلي نفسك باي حاجه وهتنسي بجد
تم النشر الأربعاء، ١٤ يونيو ٢٠٢٣
الارض فيها8 مليار نسمة يعني هو واحد من 8 مليار نسمة وربما لو كملتي معاه كنتي هتندمي كتير وعسى أن تحبوا شيئا وهو شر لكم هذه آية من القرآن الكريم
تم النشر الأربعاء، ١٤ يونيو ٢٠٢٣
حطي دلوقتي شروط و بعد وضعها قيمي هل الشخص اللي فات كان متماشي معاها و لا لا
تم النشر الأحد، ١١ يونيو ٢٠٢٣
الأهم دلوقتي انك ازاي متقعيش ف نفس الغلطة ناين اولا انا لو محدش شروط للي يجي يتقدمون اول حد هيخبط علي الباب هقبل بيه للزم شروط تبقي محددة و تبقي مؤمنة بيها
تم النشر الأحد، ١١ يونيو ٢٠٢٣
اختي الكريمه..احمدى الله علي كل حال وتعرفي وكوني علي يقين أن الله شايلك الافضل وصدقيني سوف تكتشفي مع الايام أن هذا الحب كان مجرد وهم وعندها سوف تعلمين انك في مرحله النضوج الفكرى ..عليكي بالعمل وتطوير من نفسك سواء في استايل لبسك أو عملك وأقطع وعد علي نفسك انك اذا احببت احد هو أن تحبي نفسك فقط اجتهدى في عملك واذا كنتي لا تعملين..كوني ملكه في نفسك وافتحي قلبك لمن يستحق ..وذلك بعد أن تختبرى اخلاقه جيداا
تم النشر السبت، ١٠ يونيو ٢٠٢٣
لعرض السؤال في فدني اضغط هنا