أولا لازم تعرف عموما فقة اليوم والليلة يعنى ايه أقل القليل اللى مطلوب منك بحيث تكون اديت حق اليوم ده عليك بأقل القليل! .. لازم يكون فى توازن مينفعش تخلى حاجة واحده تاخد اليوم كله على حساب باقى الحاجات وكل واحد حسب استطاعته بردو .. يعنى على سبيل المثال هقولك خطة كويسة ممكن تمشي عليها ١ الصلاة على وقتها .. ٢ السنن زى ١ سنة الفجر .. ٢ صلى الضحى( لان فى كل سلامى_ كل عظمة فى ايدك ورجلك _ عليهم صدقة وصلاة الضحى مجزئة عن جميع الصدقات المطلوبه منك على سلامياتك فكده تكون اديت حق الله وشكره على نعمه وفضله ) كأنك بتاخد نفسك من زحمة الدنيا وسط المدرسة او الكلية او الشغل وبتقول يارب انا الدنيا مشغلتنيش عن ذكرك ...٣ ورد القرآن وليكن صفحة فى اليوم مع قراءة تفسيرها يبقى كويس جدا وابقى كتر على قدر استطاعتك ووقتك وحط فى بالك القليل الدائم أفضل من الكثير ومتقطع اللي مش قادر عليه ..٤ ركعة الوتر والافضل تكون قبل النوم ولو خوفت تنسى او تكسل فممكن بعد العشاء..٥ أذكار الصباح والمساء ٣ القراءة العامة والخاصة .. ** القراءة العامة تكون عن ٣ حاجات تقرأ او تسمع حاجة عن الله وحاجة متعلقة بنفسك وحاجة متعلقة بالاخرين ..عن الله يعنى ممكن تقرأ حاجات عن صفات الله مثلا او اي حاجة عن علاقتك بالله .. وحاجة عن نفسك مثلا مهارة معينة عندك ممكن تقرأ عنها ازاى تنميها او تشوف مثلا صفة معينة عندك ولتكن الكسل حتى وتقرا ازاى تتخلص منه مثلا او اى حاجة ليها علاقة بيك ..وحاجة عن الناس زى مثلا ازاى تتصرف مع شخص غضبان وتهدأه او تقرا عن بر الوالدين وهكذا وده كل ده يكون فى حدود ربع او نص ساعه ايام الانشغال ٥ او ١٠ دقائق عن كل واحدة ف ال٣ حاجات كفاية (يعنى متقعدش اليوم كله بتقرأ عن دول وتسيب الباقى خلى بالك كويس جدا من النقطة دي لانها بتكون وسيلة من وسائل الهروب من المذاكرة او الشغل المطلوب على فكرة ) ** القراءة الخاصة وهى دي المذاكرة او شغلك او المجال اللى تم استخلافك فيه (انت اتخلقت عشان تعبد الله وتعمر الأرض وتعمير الأرض فى عمرك ده بيكون بمذاكرتك وبعدين شغلك إن شاء الله ) والمذاكرة او الشغل هى اللى المفروض النصيب الأكبر من وقت اليوم فيها ٤ الرياضة (لانك بتأدي حق جسمك عليك ) واضعف الايمان تكون ٥ دقائق بس جرى او تنطيط فى المكان او لو يوم صعب جدا جدا وهلكان فيه ومش قادر تمشي ارفع رجلك لفوق ونام على ظهرك لان الوضع ده بيحمي من دوالى الرجل خصوصا للنساء وكأنك بتقول لجسمك أنا مش ناسيك مهما كنت تعبان ده فى حالة الجيم او لعب الكورة او أى رياضة حقيقية هتكون صعبة عليك.. ٥ الترويح عن النفس بس بشرط الترويح ميكونش بيهدم اللى بنبنيه بمعنى متروحش مع شلة صحاب وحشين وتقعد معاهم وتاخد ذنوب وتقول انا برفه عن نفسي ! يعنى نقى أي حاجة فيها ترفيه ونفس الوقت أقل ضررا كل النقط اللى فاتت المفروض متاخدش في يومك كله ٣ او ٤ ساعات والباقى يكون فى القراءة الخاصة( المذاكرة او الشغل ) والنوم والأكل والحاجات الاساسية .. ثانيا بقى نظم اللى قولته فى دماغك او جدول براحتك ..واعمل جدول للمذاكرة وليكن جدول من دلوقتي لحد رمضان تلم فيه جزء كويس من المتراكم وجدول تانى من اول رمضان لاخره تلم فيه الجزء الباقي وتراجع وخليك عارف المنهج هيتلم بالاجبار تجبر نفسك على ده وتحارب رغبتك انك مش عايز تذاكر بس تقعد على الكتاب وتتمشى شوية وتقعد شوية وتغير مكانك شوية المهم تتصرف بحيث انك تذاااكر وده أجره عظيييم ده اسمه جهاد ومن أعظم انواع الجهاد هو جهاد النفس واعرف ان المذاكرة وطلب العلم طريق من طرق الجنة** "من سلك طريقاً يطلب فيه علماً سلك الله به طريقاً من طرق الجنة، وإن الملائكة لتضع أجنحتها لطالب العلم رضاً بما يصنع، وإن العالم ليستغفر له من في السموات ومن في الأرض، والحيتان في جوف الماء، وإن فضل العالم على العابد كفضل القمر ليلة البدر على سائر الكواكب، وإن العلماء ورثة الأنبياء، وإن الأنبياء لم يورثوا ديناراً ولا درهماً إنما ورثوا العلم، فمن أخذه أخذ بحظ وافر"** فدى عبادة عظيمة وخصوصا لما تجاهد نفسك ورغبتك وتعبك وتكمل مذاكرة رغم كل ده وتنفع بعلمك ده نفسك والناس .. استعن بالله وربنا يوفقك وينفع بيك يارب
تم النشر الأربعاء، ٢٨ فبراير ٢٠٢٤
3 تعليق
الصلاة متحسبش وقتها وصلى براحتك وبخشوع ومتستعجلش عادي ... القراءة الخاصة أقصد كل واحده ف التلاته ٥ دقائق او عشرة يعنى كلهم على بعض ربع او نص ساعة ايام الانشغال ،مجرد معلومة واحده وتطبقها تكفى جدا ومع الايام هتلاقى نفسك عرفت حاجات كتير اوى وطبقتها اول بأول ..اى حاجة تقرأها حاول تنفذها بمجرد م عرفتها ..المهم التطبيق والعمل مش القراءة وخلاص عشان متبقاش كل المعلومات دي حجة عليك وانت تبقى عرفت الصح ومعملتش بيه ... كمل زى م انت كل حاجة وديما اشتغل بقدر استطاعتك يعنى متقللش عادى بس لو فى يوم لا قدر الله بعدت وبدأت تتكاسل متحاولش تقل عن اللى قولته ..اللى قولته هو أقل القليل لكن ممكن تكتر ..بس ناقصك المذاكرة وده مهم جدا لحياتك وآخرتك لانك هتتسأل عنها بردو فزود على يومك المذاكرة لو خليت اليوم نصه اللى قولناه ونصه التانى مذاكرة هيبقى هايل او حتى اقل من النص كويس بردو..يعنى لو ٦ ساعات فى اليوم فكويس خالص لكن بتركيز وحط فى بالك انك محتاج تلم المنهج وتذاكر أكبر قدر فى أقل وقت وحاول بتركيز عشان تنجز ولو لقيت نفسك بطيئ متحبطش وكمل بكل تركيزك لكن مش مجرد قاعد على الكتاب وخلاص المهم "الجودة والاتقان" وخلى المذاكرة داخلة من اول اليوم لاخرة يعنى ال٦ ساعات قسمها على مدار اليوم مش تخليهم كلهم ع بعض فتلاقى نفسك زهقت او نعست وقفلت الكتاب ونمت بعد ساعه! وفى اليوم الواحد عندك عافيتين يعنى وقتين كبار وتقدر تنجز فيهم كتير وحط معظم مذاكرتك فيه والباقى قسمه اللى هو من (الفجر للضهر أو من العشاء للفجر) نام فى واحد منهم وذاكر فى الوقت التانى وطبعا الافضل تذاكر وقت الفجر لان التركيز بيكون فيه اقوى حاجة ،ذاكر ف الوقت ده مثلا ٤ ساعات وهيتبقى ساعتين كمان من ال٦ بتوعنا ممكن تقسمهم على باقى اليوم براحتك وبردو حسب ظروفك واللى يريحك اكتر امشي عليه ..بعد م تذاكر الدرس تقفل الكتاب وتسمع على نفسك لقيت نفسك نسيت افتح بص ع المعلومة واحفظها تانى واقفل وسمعها تانى وهكذا .. المسائل او المعادلات او الكلمات لو لغة تانية E مثلا سمع كل ده بالكتابة والباقى احفظ وسمع شفوى عشان تنجز..حل كتير و كتب الوزارة ومذكرات المدرس بتاعك (او الملخص اللي بتذاكر منه) وامتحانات السنين السابقة لهم الاولوية وركز عليهم هم اهم حاجة فحل كل اسئلتهم مرة واتنين وحتى لو السؤال اتكرر ٥٠ مرة سمعه شفوى كأنه اول مرة مهما كنت حافظه كله على السريع ولو عملت كده والتزمت هتطلع من الاوائل مش مجرد مجموع حلو
تم النشر الأربعاء، ٢٨ فبراير ٢٠٢٤
بس هوه فعلا الصح اني في دراسة بدي معظم وقتي للدنيا وبسيب ٢٠٪ للدين بس هي بتيجي معايا ٥٠ ٥٠ أو أقل بحاجة بسيطة تنصحيني اعمل ايه؟
تم النشر الأربعاء، ٢٨ فبراير ٢٠٢٤
هوه بس في مشكلة أن نقط دي كلها معرفش اعملها في ٤ ساعات أو ٥ نقط دي انا ممكن اعملها في ٨ ساعات عشان صلاة فروض في مسجد عقبال اذان وإقامة وتقيم صلاة كل فرض فيه نص ساعة يعني ٥ فروض ٢ ونص ،وورد قرآن انا اصلا عندي ورد جزء في اليوم وبقرأه مش اقل من ٥٠ دقيقة عشان اقرأ بطريقة صحيحة ده غير حفظ قرآن مش اقل من نص ساعة في اليوم و قيام ليل انا اصلا برضو بقيم ليل كل يوم بصلي ركعتين شفع وركعة وتر وكل ركعة بقرأ ربع من قرآن وأذكار صباح مع بسبح وبحمد ربنا في نص ساعة بحاول أنجز فيها بس بتيجي معايا في نص ساعة وأذكار مساء في ربع ساعة لو مش هحَمِْد ربنا ورياضة ٢٠ دقيقة وقراءة العامة في ساعة عشان في تلت نقط كل نقطة ربع ساعة أو تلت ساعة ده لو انا فاهم صح أن كل نقطة ربع ولا تلت ساعة
تم النشر الأربعاء، ٢٨ فبراير ٢٠٢٤
لعرض الإجابة في فدني اضغط هنا
عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك