انا عندي ١٤ سنة أو خلاص داخل ١٥ والحمدلله مستقم يعني وكده ومش من بعيد اوي يعني حوالي ٧ ولا ٨ شهور كنت بعمل ذنوب كتير وانا صغير بس كنت بتوب كتير مكنش فيه الي يفقهني في دين أو الي ياخدني من ايدي يعني في دين بداية بدأت ان انا فعلا كان عندي صدق وحرفيا مفقهش حاجة في دين يعني انا مكنتش حافظ الفلق ،حمدلله ربنا هوه الي هداني والله بجد اول ما بدأت التزم كانت البداية ان ربنا كرمني اوي وفي يوم كده خت صدق والعزيمة اني اصلي الفجر في المسجد وتقريبا عملتها صليت في مسجد باقي الفروض عشان كنت بلتزم في مسجد بس في بيت مكنتش بلتزم لقيت دنيا اتيسرت اوي روحت اشتركت في أكاديمية قرأن كنت سمعت عنها في مرة كده من سنة ولا سنة ونص وسبحان الله انا فاكر اول ما سمعت عنها قلت انا لازم اشترك فيها في الأجازة وأكاديمية جمبي هنا قولت ما اجرب وفي نفس وقت هلتزم في حفظ قرآن واكيد هلاقي ناس هناك نفس اهتماماتي طلعت أكاديمية محترمة اوي وسبحان الله بعديها بفترة كده مش طويلة بدأو يدو دروس تربوية في أول مكنش فيه نشاطات غير قليل اوي وللأطفال بس سبحان الله يعني كانت متيسرة اوي معايا وبعديها بعد كام درس بقيت مع مجموعة هدف بتاعها تبقا قادة تنفع المسلمين وشدوني في دين جدا الأاكاديمية بفضل ربنا وانا بقا يعني بقيت بحب اتفقه في دين اكتر يعني حتي لو علي موبايل بقعد اتفرج علي مقاطع دينية ومحاضرات ومش عارف وبتاع ومن هنا عرفت اني كنت نايم في العسل وشيطان طبعا مسابنيش اتفتنت في دين للأسف وجالي وساوس قهرية بسبب مكايد شيطان ده غير كلام اهلي عليا اني كده هدخل في تطرف ومش عارف ايه فالحمدلله يعني البيئة مش قد كده صراحة في البيت مع اني مش فاهم ايه الي دخل تطرف في دين الأكاديمية الي بروحها اصلا في نادي معروف ومكان موثوق اساسا يعني وشيخ هناك موثوق برضو وعرفت الإلتزام ده ثبات فيه مش اي حد بيثبت فيه ولو فعلا عشان تبقا قائد أو تنفع مسلمين أو الأمة لازم تبقا ناجح دين ودنيا فأنا محتاج استشارة من حد أو ينصحني نصيحة ازاي أنجح دين ودنيا عشان اثبت في الاستقامة لأني في جانب دراسي مش قد كده ومتراكم ورايا منهج وازاي برضو اثبت مع الأوراد اليومية بتاعتي لأني لاحظت مع الفتن الي جاتلي دي الهمة بقت في نازل وطبعا الخشوع بقا في نازل جدا بسبب وساوس قهرية الي عندي لأننا خلاص يعتبر في الفاينل احنا في شعبان انا لازم الحق نفسي قبل رمضان
أولا لازم تعرف عموما فقة اليوم والليلة يعنى ايه أقل القليل اللى مطلوب منك بحيث تكون اديت حق اليوم ده عليك بأقل القليل! .. لازم يكون فى توازن مينفعش تخلى حاجة واحده تاخد اليوم كله على حساب باقى الحاجات وكل واحد حسب استطاعته بردو .. يعنى على سبيل المثال هقولك خطة كويسة ممكن تمشي عليها ١ الصلاة على وقتها .. ٢ السنن زى ١ سنة الفجر .. ٢ صلى الضحى( لان فى كل سلامى_ كل عظمة فى ايدك ورجلك _ عليهم صدقة وصلاة الضحى مجزئة عن جميع الصدقات المطلوبه منك على سلامياتك فكده تكون اديت حق الله وشكره على نعمه وفضله ) كأنك بتاخد نفسك من زحمة الدنيا وسط المدرسة او الكلية او الشغل وبتقول يارب انا الدنيا مشغلتنيش عن ذكرك ...٣ ورد القرآن وليكن صفحة فى اليوم مع قراءة تفسيرها يبقى كويس جدا وابقى كتر على قدر استطاعتك ووقتك وحط فى بالك القليل الدائم أفضل من الكثير ومتقطع اللي مش قادر عليه ..٤ ركعة الوتر والافضل تكون قبل النوم ولو خوفت تنسى او تكسل فممكن بعد العشاء..٥ أذكار الصباح والمساء ٣ القراءة العامة والخاصة .. ** القراءة العامة تكون عن ٣ حاجات تقرأ او تسمع حاجة عن الله وحاجة متعلقة بنفسك وحاجة متعلقة بالاخرين ..عن الله يعنى ممكن تقرأ حاجات عن صفات الله مثلا او اي حاجة عن علاقتك بالله .. وحاجة عن نفسك مثلا مهارة معينة عندك ممكن تقرأ عنها ازاى تنميها او تشوف مثلا صفة معينة عندك ولتكن الكسل حتى وتقرا ازاى تتخلص منه مثلا او اى حاجة ليها علاقة بيك ..وحاجة عن الناس زى مثلا ازاى تتصرف مع شخص غضبان وتهدأه او تقرا عن بر الوالدين وهكذا وده كل ده يكون فى حدود ربع او نص ساعه ايام الانشغال ٥ او ١٠ دقائق عن كل واحدة ف ال٣ حاجات كفاية (يعنى متقعدش اليوم كله بتقرأ عن دول وتسيب الباقى خلى بالك كويس جدا من النقطة دي لانها بتكون وسيلة من وسائل الهروب من المذاكرة او الشغل المطلوب على فكرة ) ** القراءة الخاصة وهى دي المذاكرة او شغلك او المجال اللى تم استخلافك فيه (انت اتخلقت عشان تعبد الله وتعمر الأرض وتعمير الأرض فى عمرك ده بيكون بمذاكرتك وبعدين شغلك إن شاء الله ) والمذاكرة او الشغل هى اللى المفروض النصيب الأكبر من وقت اليوم فيها ٤ الرياضة (لانك بتأدي حق جسمك عليك ) واضعف الايمان تكون ٥ دقائق بس جرى او تنطيط فى المكان او لو يوم صعب جدا جدا وهلكان فيه ومش قادر تمشي ارفع رجلك لفوق ونام على ظهرك لان الوضع ده بيحمي من دوالى الرجل خصوصا للنساء وكأنك بتقول لجسمك أنا مش ناسيك مهما كنت تعبان ده فى حالة الجيم او لعب الكورة او أى رياضة حقيقية هتكون صعبة عليك.. ٥ الترويح عن النفس بس بشرط الترويح ميكونش بيهدم اللى بنبنيه بمعنى متروحش مع شلة صحاب وحشين وتقعد معاهم وتاخد ذنوب وتقول انا برفه عن نفسي ! يعنى نقى أي حاجة فيها ترفيه ونفس الوقت أقل ضررا كل النقط اللى فاتت المفروض متاخدش في يومك كله ٣ او ٤ ساعات والباقى يكون فى القراءة الخاصة( المذاكرة او الشغل ) والنوم والأكل والحاجات الاساسية .. ثانيا بقى نظم اللى قولته فى دماغك او جدول براحتك ..واعمل جدول للمذاكرة وليكن جدول من دلوقتي لحد رمضان تلم فيه جزء كويس من المتراكم وجدول تانى من اول رمضان لاخره تلم فيه الجزء الباقي وتراجع وخليك عارف المنهج هيتلم بالاجبار تجبر نفسك على ده وتحارب رغبتك انك مش عايز تذاكر بس تقعد على الكتاب وتتمشى شوية وتقعد شوية وتغير مكانك شوية المهم تتصرف بحيث انك تذاااكر وده أجره عظيييم ده اسمه جهاد ومن أعظم انواع الجهاد هو جهاد النفس واعرف ان المذاكرة وطلب العلم طريق من طرق الجنة** "من سلك طريقاً يطلب فيه علماً سلك الله به طريقاً من طرق الجنة، وإن الملائكة لتضع أجنحتها لطالب العلم رضاً بما يصنع، وإن العالم ليستغفر له من في السموات ومن في الأرض، والحيتان في جوف الماء، وإن فضل العالم على العابد كفضل القمر ليلة البدر على سائر الكواكب، وإن العلماء ورثة الأنبياء، وإن الأنبياء لم يورثوا ديناراً ولا درهماً إنما ورثوا العلم، فمن أخذه أخذ بحظ وافر"** فدى عبادة عظيمة وخصوصا لما تجاهد نفسك ورغبتك وتعبك وتكمل مذاكرة رغم كل ده وتنفع بعلمك ده نفسك والناس .. استعن بالله وربنا يوفقك وينفع بيك يارب
تم النشر الأربعاء، ٢٨ فبراير ٢٠٢٤
الدنيا هى لا تنفصل عن الدين الاسلام جميل وايسر الاشياء تجعلك على الطريق باذن الله من غير تعقيد كتير ... التزم بفروضك الاساسية ( صلاة - صيام - دراستك الاساسية - واجباتك الاجتماعية ) واعمل حاجة واحده حتى لو مروحتش اكاديميات ......الامر الاول فى القرأن ( اقرأ ) اقرأ كتيييير ..اقرأ فى كل حاجة ..بتسلسل او من غير ..بمنهج او من غير ..المهم لا توقف قراءة نصيحة بقى ..اللى تتعلمه نفذة وطبقة فورا مثال كده : ان فى حديث عن الرسول ( صل الله عليه وسلم ) اوصى رجل انه لا يغضب ...ابدأ ركز انك تنفذ ده بالفعل ومتبقاش مجرد معلومه لو ركزت بالشكل ده هتلاقى نفسك على الطريق ان شاء الله وحياتك مع الله ولله وتبقى فى تطور يجعلك من اللى يحبهم الله ورسوله
تم النشر الثلاثاء، ٢٧ فبراير ٢٠٢٤
اولا ربنا يثبتك ويجعلك من عباده الصالحين.. ثانيا انا بردوه بعاني من الوساوس ولما اتكلمت مع الشيخ نصحني اني اكثر من الاستعاذة واحافظ علي اذكار الصباح والمساء والاذكار الموظفه كاذكار الطعام والدخول والخروج من الخلاء والمنزل وغيره (هتجدها فحصن مسلم) وفحصن مسلم دعاء من اصابه وسوسة في الايمان: ١- يستعيذ بالله. ٢-ينتهي عما وسوس فيه. ٣-يقرأ قوله تعالى: "هُوَ الأَوَّلُ وَالآخِرُ وَالظَّاهِرُ وَالْبَاطِنُ وَهُوَ بِكُلِّ شَيْءٍ عَلِيمٌ" ، لو الوسواس الي عندك وسواس في الإيمان فعن أبي هريرة رضى الله عنه قال: قال رسول الله ﷺ: يأتي الشيطان أحدكم فيقول: من خلق كذا، من خلق كذا، حتى يقول: من خلق ربك؟ فإذا بلغه فليستعذ بالله ولينته. وأخرجه مسلم أيضًا بلفظ آخر عن أبي هريرة قال: قال رسول الله ﷺ: لا يزال الناس يتساءلون حتى يقال: هذا الله خلق الخلق، فمن خلق الله؟ فمن وجد شيئًا فليقل: آمنت بالله ورسله. وعن أنس رضى الله عنه قال: قال رسول الله ﷺ: لن يبرح الناس يتساءلون حتى يقولوا: هذا الله خلق كل شيء فمن خلق الله؟. وهحط لك فيديوهين عن الوسواس اتمنا يفيدوك ثالثا لو حابب تتجهز لرمضان في بودكاست وفيديوهات علي اليوتيوب عن كيفيه التجهز لرمضان دور عليها وان شاء الله تنفع وتستفيد بيها اخر حاجة واهم حاجة انك تدعي فالدعاء سلاح المؤمن وانصحك بقراءة كتاب مفسدات القلوب وكتاب الوسيط اسماء الله الحسنى وصفاته العلى ولو حابب تتعلم علوم شرعية ممكن تقدم في اكاديمية زاد للعلوم الشرعية او تجيب كتب العلوم تقرأها انت (لو حابب ابعتهم لك اشطا)..
تم النشر الثلاثاء، ٢٧ فبراير ٢٠٢٤
لعرض السؤال في فدني اضغط هنا