ازاي الواحد يقدر يتخلص من الكسل وادمان الموبايل؟
حلو اننا لاحظنا ارتباط بين الكسل وادمان الموبايل لأن الرابط بينهم قوي. هحاول اوضح ازاي ممكن نقلل استخدامنا للموبايل لو لقيت ده مش مناسب ممكن توضح/ي ليه مش مناسب ونشوف حلول بديله... بسم الله كده قبل ما نقول ازاي نبعد عن الموبايل لازم يكون عندنا حاجه تبعدنا عنه.. شغل/ دراسة / رياضة/ اعمال منزلية .. او اي حاجه تانيه. 1- كل يوم بليل هنكتب ف نوته ( النوته دي هتبقى صديقة الرحلة واقصد النوته الورقية مش اللي ع الموبايل عشان احنا عايزين نبعد عن الموبايل) .. هنكتب كل حاجه ورانا تاني يوم بالترتيب بحيث تاني يوم مننساش حاجه وعشان تاني يوم كل حاجه هنعملها هنعلم عليها علامة صح وكل فترة نقارن ونشوف احنا بنتقدم وبننجز اكتر ولا لأ. 2- طب انا مش ورايا حاجه اصلا؟ .. يبقى هنفكر ف حاجات نلزم نفسنا بيها زي شغل البيت (سواء كنت شاب أو بنت الطبيعي يكون في دور ليك ف البيت بجانب ترويق اوضتك مثلا ده اساسي)... كمان مهم يكون عندك ورد قران كل يوم ولو صفحة (هتاخد منك 3 دقايق بالكتير) .. الرياضة مهم لو مفيش رياضة بتلعبها او جيم يبقى ممكن ننزل نتمشى نص ساعة نغير جو وننشط الاوعية الدموية بتاعتنا عشان منكسلش نعمل اللي ورانا.. ممكن كمان نتعلم حاجه جديده سواء اشغال يدوية / مهارة ننميها/ نزود معلوماتنا ف مجال دراستنا / نعرف اكتر عن ديننا / عن نفسنا وهكذا .. الكتب كتير والمكاتب منتشرة لو مفيش امكانية نشتري الكتب ممكن ننزل نقرأ ف المكتبة يوم ف الاسبوع وناخد معانا البيت كتاب او اتنين نقرأهم.. كل ده طبعا في حالة ان مفيش شغل أو مفيش امكانية اننا نشتغل حاليا... ولو طالب/ة يبقى عندنا كتب الجامعة محتاجه زيارة يوميه في حدود الساعتين على الاقل. 3- كنت بقول فوق اننا نكتب ف نوته اللي ورانا بكره وحددناه صح كده؟ نقفل النوته ونقول الاذكار وننام على طول مش هنمسك الموبايل .. لأن الموبايل اصلا هيكون بعيد عن السرير والبطانية بمسافه تمنعنا من اننا نضحي بدفا البطانية ونقوم نجيبه ف معلش هنكسل ف النقطة دي وننام ونبقى نمسك الموبايل الصبح عادي. 4- اول ما نصحى هنلاقي الموبايل مش جنبنا صح؟ هنستغل الفرصة ف اننا نقوم ونتوضى ونصلي ركعتين ونروق السرير ونفتح مصحفنا نقرأ الوِِرد وجنب المصحف هنلاقي كتيب أو ورقه فيهم اذكار الصباح نقرأها (لو مش معاك كتيب هنجيب ورقة وقلم وننقلهم من جوجل ونحتفظ بالورقة جنب المصحف والنوته ف اقرب مكان للسرير).. بعد كده هنفتح النوته نشوف ورانا ايه النهاردة ونعمله. ونحاول قدر المستطاع نأجل اننا نمسك الموبايل حتى لو بس عايزين ناخد بصه سريعه لأننا عارفين انها مبتبقاش سريعه. 5- نيجي للموبايل بقى .. وقت ما نمسكوا هنلاقي برنامج اسمه digital wellbeing لو عملت سيرش ف موبايلك وملقتهوش نزله من جوجل بلاي .. هتقدر تتحكم ف وقت محدد لكل ابليكيشن وبعدها الابليكيشن هيقفل ومش هينفع نفتحه الا تاني يوم. 6- هننزل برامج مفيدة نقدر نتعلم منها اي معلومه وممكن تاخد فكره هنا https://m.facebook.com/story.php?story_fbid=pfbid0DG8TedCqX3beUEDtjcoUSygJmfnTHyDtUmsjhUEaDy2jnCUZiwvxDrep6a61WtpVl&id=381717105540302&mibextid=Nif5oz https://m.facebook.com/story.php?story_fbid=pfbid02ZYyZr7gxMpUFUBFX4VjhroEXpu3EAAws6wDRRQPz2neEHMS4hnqh8Abkzv5xA4Lul&id=14578103211843 https://m.facebook.com/story.php?story_fbid=pfbid028zSTykZpYe5GdEwmuSc5WKjZmTpd8eyRG7zwApHyycB7EDt5sXEpPc4QCvM7vzZQl&id=100067300945155&mibextid=Nif5oz بتمنى أكون قدرت أفيدك وبتمنالك التوفيق.
تم النشر الأربعاء، ٧ ديسمبر ٢٠٢٢
يفكر نفسة ان بعد نهاية العمر هنتسأل سؤال صعب اووووى ( عن عمرك فيما افنيت ) معتقدش ربنا هينفع نجاوب عليه ونقول كنت ماسك الموبايل الحياة اختيارات شوف هتختار ايه
تم النشر الأحد، ٤ ديسمبر ٢٠٢٢
انت عندك وقت فراغ كبير الحل بقي انك تشغل وقتك بحاجة مفيده الصلوات والنوافل اول حاجة ممارسة الرياضة مهم جدا القراءة حتي لو هتسمع كتب صوتية اخرج لشغل او مع الأصدقاء الفراغ هو سبب كل الأمراض فالكسل وإدمان الموبايل معناه أن وقتك مش مليان
تم النشر الأحد، ٤ ديسمبر ٢٠٢٢
حاول تعمل جدول للحاجات اليومية اللي بتعملها اللي من ضمنها هيكون الجزء الجد والجزء الترفيهي وتحاول تقسم اليوم لكل جزء مخصص عشان مفيش جزء ييجي على جزء والافضل تبدأ بالجزء المهم ( تتجنب فيه تماما انك تمسك الموبايل ) عشان الجزء الترفيهي يكون زي مكافاة ليك
تم النشر الأربعاء، ٧ ديسمبر ٢٠٢٢
كلنا بنتعلم لما نتوجع ومش بنستمع لنصائح الآخرين علي الرغم من كونها صحيحه، فيوم من الأيام هتكتشف انك بتعاني ساعتها هتفوق، دا لو مكانش عندك تحكم في الذات. للإستشارة كلمني
تم النشر الاثنين، ٥ ديسمبر ٢٠٢٢
الحركه بركه الحركه بركه الحركه بركه، ابدا بتمارين كارديو هتحس بتغيير بعدها بأسبوع وهتحس بنشاط وهيتعدم الكسل.
تم النشر الاثنين، ١٢ ديسمبر ٢٠٢٢
حاول تملى يومك وفراغك بحاجات تانية ،، علشان متندمش بعدين عالوقت اللي ضاع من غير ولاحاجة
تم النشر الأحد، ١١ ديسمبر ٢٠٢٢
اسمع حلقة ايه المشكلة عن السوشال ميديا
تم النشر الجمعة، ٩ ديسمبر ٢٠٢٢
لعرض السؤال في فدني اضغط هنا