أنا و شخص بنحب بعض و بعد ما خلصت دراسه قعدت أقوله ييجي يخطبني علشان في عرسان بتيجي و أنا مش حابه أقعد مع حد غيره و هو وقتها كان عامل حادثه و صارف كتير على تصليح العربيه و كان لسه ناقل شغل جديد قالي أصبر شهرين و هييجي كنت برضو بزن و جه فعلاً بس بابايا مكنش ألطف حاجه معاه و زود حاجات كتير و طلبات كتير و زهقه ، هو دلوقتي مبقاش طايق البيت بتاعنا بسبب اللي بابا عمله معاه و بيقولي أنا معنديش مشكله معاكي أنا عندي مشكله مع باباكي و مش قادر ولا عايز أكمل و قالي أنا لسه بحبك بس مش قادر أكمل بالشكل دا فضلت أقوله يديني فرصه أخيره أرجع شغفه تاني و بعد إلحاح كتير وافق بس قالي أنا حقيقي مش قادر أكمل ، فأنا محتاجه أستغل الفرصه دي و أرجع شغفه بيا و بالعلاقه تاني و يكون حابب يكمل ممكن تنصحوني أعمل إيه علشان يرجع تاني لشغفه
معلش لو حسيتِ إن كلامي الجاي قاسي شوية أو ممكن مش على هواكِ. بس بجد... أنتِ ليه تعملي كده في نفسك؟ شخص مش عاوز يكمل ورافض بيتك أصلًا ومعندوش استعداد يتحمل والدك عشان يفوز بكِ ومش قادر يتحدى ظرف بسيط زي ده. يعني مش مثلا هنقول فيه عوائق رهيبة ما بينكم... ده مجرد رفض أو تعامل سيء من والدك لأي سبب بقى... ممكن يكون حس إنه هياخده منك فعامله كده... ممكن والدك أحس إنه شخص مش كويس لكِ. الشخص ده مش مستعد يحارب عشانك وانتِ اللي بتتوسليه عشان يبقى؟ أنتِ المفروض اللي تكوني مطلوبة ومرغوبة في العلاقة دي. الرجال بطبيعتهم مش بيحبوا الحاجة السهلة ولا البنت المرمية عليهم ولا اللي بتجري وراهم. هو دلوقتي شايفك ملهوفة عليه ومتمسكة به فطبيعي (يتفرعن) وكمان بيتشرط هيعطيكِ فرصة أخيرة؟ والفرصة الأخيرة دي وهو أصلا مش عاوز يكمل... أيوه يعني هو رافض باباكِ ومش عاوز يكمل... الفرصة الأخيرة دي لإيه بقى؟ علاقة وارتباط غير رسمي لحد بقى ما يزهق هو ويقول لك مع السلامة؟ عززي نفسك يا بنت الناس ومتهدريش كرامتك أكتر من كده. عارفة من النهاردة لو قلتِ له مع السلامة، انا كمان مش عاوزاك ولا هموت من غيرك مش بعيد يرجع هو يجري وراك ويطلب رضاك. اقعدي مع والدك وافهمي رفضه ليه، ممكن يكون شايفة حاجة أنتِ معمية عنها بسبب عواطفك. ونصيحية من أخت أكبر منك، أنتِ أغلى من إنك تتحايلي على شخص عشان يقبلك. أنتِ تكوني في بيتك معززة مكرمة واللي عاوزك وشايفك غالية وتستحقي يجي يطلب رضاك مش العكس. ربنا معك.
تم النشر الأربعاء، ٦ نوفمبر ٢٠٢٤
السلام عليكم ورحمه الله وبركاته. والله يا بنتي يعني اللي في نفس مشكلتك دي امم كان في سؤال كان برده انا كان ده. تعليقي عليه سؤال ثاني انتم بتعملوا في نفسكم كده ليه يعني انت اللي عاوزه ترجعي شغفه لك يعني واحد يعني زي ما بيقولوها كده بالبلدي مش شريكي لانه اللي بيشتري ده معناها ان هو بيعمل ايه اللي شاري حاجه وشايف ان الحاجه دي تستاهل ومش يعني مش هيرتاح الا لما يشتريها بيعمل كل جهده وبيدفع كل اللي معاه علشان يعني ياخذ الحاجه القيمه دي فحضرتك ليه مش شايفه نفسك قيمه انت اللي عايزه ترجعي شغفوه تجاهك يعني انت مش شايفه ان لك قيمه الا لما الشخص ده يبقى عاوزك وبعدين ثانيه واحده هو من البدايه خالص بما انه انت اللي بتقولي له يجي يخطبك وعشان في عرسان وهو واحد القصه كلها ان هو بيصرف على عربيته ااا مهتم بانه نقل من الشغل ده للشغل ده فحضرتك هنا مش مهمه خالص. فا قد ايه انت مش مهمه خالص عنده للدرجه دي هو مجرد ان باباكي. محسسهوش يعني بحاجه لطيفه وتقل عليه فهو الولد قال لا معلش انا مش قادره اكمل فانت. هو يعني اشفق عليك وقال لك اوكي تمام وهاجي وبعدين اتلكك على اي حاجه وخلاص تمام لا انا مش هقدر اكمل. شغف ايه اللي انت عاوزه ترجعيه اجابتي لك ان انا مش متفقه معاكي تماما في اللي انت عايزه تعمليه اصلا فا النصيحه اللي هتكون لك ارجوكي اعملي قيمه لنفسك ولو مش حساها شوفي اهلك اد ايه؟ شايلينك ومهتمين بيكي ويفرق معاهم جدا انه اي حد يجي يبقى برده حاسس بقيمتك قصه القيمه هنا مش ان هم عشان كده لازم يزودوا عليه طلبات بالعكس ده الموضوع ده بيقيس اصلا معادن الاشخاص الشخص اللي شاري هيقول طيب طبعا انا اديها عينيا طبعا انا جبت لها الدنيا كلها مش هيكفيها بس يعني انا دلوقتي المسموح معايا كذا شوفوا اقدر اعمل ايه تقبلوا مني ده دلوقتي وبعدين اقدر اعمل اكثر ده الشخص اللي شاري لكن اللي مش شاري اللي مش فارق معاه هيقول لك لا لا لا كتير عليا وانا مستحملش وانا متقدرتش واخذ بعضه يمشي وانت بتدوري على انك ترجعي شغف انا اسفه جدا حرام عليك نفسك
تم النشر الخميس، ٧ نوفمبر ٢٠٢٤
كلام الدكتورة مي صح ١٠٠% هو لو فعلا بيحبك مش هيفرق معاه ابوكي و لا اخوكي و لا كل عيلتك. هو راجل صح لأنه تقدملك فعلا و نيته سليمة بس المفروض يكون أقوى من هيك و يحارب عشانك مش اي كلام و خلاص. صلي استخارة و سيبي الأمور تسير براحتها بدون ما تزيدي شغفه و لا تترجيه ييجي يتقدملك.
تم النشر الخميس، ٧ نوفمبر ٢٠٢٤
بالنسبه لكل الناس اللي عماله تكرر انه مش شاريكي ومش راجل وا وا ...ياجماعه من كلامها انه وفي وعده وجه يتقدملها ومن كلامها ان ابوها عامله وحش وزود عليه طلبات كتير .. طيب انا احب اوضح جزئيه صغيره الرجاله مش بتحب الوش ووجع الدماغ الكتير ومش ناجحين في مواجهة ده ولا بنعرف نتعامل مع النوع ده من المناورات ..تحديات وصعاب ايه اللي المفروض يواجهها عشان بيحبها ..هو انا داخل حرب مع اهلها انتو ليه مصعبين كل حاجه برغم ان الراجل في ضائقه وطالع من حدثه وخلافه وطلع قد كلامه ورحلهم ابوها طلع عليه عقده النفسيه ...خلاص هيه مش خطفه ولا هياخدها غصب عن ابوها ولا انتو لازم الراجل يتزل قدام اهل البنت عشان يبقي راجل واتحدي الدنيا عشانها والجو ده ..مينفعش يخطبها بادب وبهدوء لازم حروب وتحديات مع ناس مريضه ...طبيعه الرجاله بتتخنق بسرعه من الوحاشه الغير مبرره وتخلي الراجل يتخلي عن اي حاجه عشان يتجنب الناس المريضه ووجع الدماغ ...وطبعا ده مش مبرر ان البنت تجري عليه وتراضيه والكلام ده لا هيا تتعامل عادي وتبقي عارفه انه هو راجل جدع وجالها وابوها هو اللي مش جدع وعامله وحش لاسباب ترجعله قد يكون الشخص نفسه وحش فعلا وابوها عنده وجهة نظر فيه وصده بالطريقه لكن مفيش اي دليل علي سوء نيه الشاب وعد ووفي والاسباب اسالي عنها ابوكي وانتي ولا ترجعيله شغفه ولا ترجعيله نيله خفو عنه وسيبوه في حاله
تم النشر الخميس، ٧ نوفمبر ٢٠٢٤
ممكن الكلام يضايقك ويبقا رخم حبتين بس صدقني مفيش حد في الدنيا يستاهل انك بتبقي بتحرقي في مجهود اكتر من الازم علشانه الست بطبعها كائن مستقبل اكتر من انها تكون بتدي يعني احنا بندي ع قد لي بناخدو وهو دا بظبط الفطره بتاعتنا انك وتاخدي الخضار يطلع اكل كامل والنطفه تطلع طفل هي دي لدنيا عمتا ولي بيحب حد شغفه من ناحيته مش هيروح من اول موقف باباكي ممكن يكون من وجهه نظرو انو بيخليكي غاليه في عينو هتعيشي حياتك كلهم بتحاولي ترضيه عنك وهضيع عمرك وانتي ترضي واحد وبعيدا عن اي حاجه دا مجرد راي ع موقف انتي بتحكيه انما لي بينكم محدش ادري بيه غيرك انتي لي شوفتي منو الحلو والوحش فانتي احسن حد يعرف الشخص دا يستاهل منكي اي وفي كل الحالات ربنا يكرمك بالاحسن ليكي
تم النشر الخميس، ٧ نوفمبر ٢٠٢٤
https://www.fedni.net/q/61104300
تم النشر الأربعاء، ٦ نوفمبر ٢٠٢٤
لعرض السؤال في فدني اضغط هنا