عايزة اعرف هو كده حرام عليا ولا إيه
بصوا انا مستوايا ف الدراسة مش شاطرة ولا وحشة
بس ببذل مجهود علي قد ما اقدر
المهم ان فيه مادة انا كويسة فيها الي حد ما وانا مش بذاكر الا لما اعمل ملخص للمادة دي
المهم كان ورايا امتحان وكده وصحبتي دخلت قالتلي لو معاكي مخلص ابعتي
ف انا مردتش ابعت الملخص اللي عملاه وبعت ملخص مستر كنت لاقياه كويس بردو وكان معايا
ووالله بعتلها بعض ملخصات دروس قبل كده
هي مش بتبقي ملخصات بالمعني الحرفي هي عبارة عن حاجات مش مذكورة ف الكتاب وبيتسأل فيها و انا بفضل ادخل منصات واسمع وادور ف كل حتة والمها وبتفرق معايا جدا ف الحل
والمرة دي والله والله فضلت يوم كامل بجمع وتعبت جدا جدا ورجلي وضهري وجعوني
ف مردتش ابعت المعلومات دي ليها عشان لما امتحن اجيب درجة كويسة واحس اني شاطرة ف حاجة
وقولت هبقي ابعت الملخص ليها بعد كده
عشان عايزة الاول احصل نتيجة اللي عملته
مع العلم انهم عندهم نت والحمدلله ميسورة وعلي طول اون لاين
ف ادايقت وقولت هي تاخد ليه معلومات علي الجاهز
بس بحس بالذنب وبفضل اقول عادي وربنا هيكرمني عشان بساعد غيري وكده وبحس كده اني مش كويسة
وبغير منهم ساعات لما بيجيبوا درجة اعلي مثلا بس والله مش بتمني الشر ليهم ولما بفكر في مثلا انب اتخابث عليهم واقول اني مذاكرتش مثلا بحس بالذنب وبحاول اتجنب اني اكلمهم عشان محدش يسألني
لان والله العظيم هي المادة دي اللي كويسة فيها ..وكنت منزلة هنا مرة اني ضايعة ف الكيمياء والفيزياء واللغات مش بفتحها
بس يعني اهي ماشية بلم اي حاجة
ف بيفضلوا يقولوا دحيحة وانا اقسم بالله من كتر ما انا مش بذاكر قعدت من درس الكيمياء لاني حسيت ان بصرف فلوس ع الفاضي . والفصل التالت فيزياء مروحتش غير حصتين بس ووالله انا ضايعة
وتيجوا للجد محدش بيحب الخير لحد وهم بردو مش بيفرحولي لما بجيب درجة اعلي
انا شخصيتين في بعض معرفش اي القرف اللي انا فيه ده !
ان رغبتي في اتقان ما اقوم به من عمل لم تعن قط رغبتي في التفوق على اي انسان اخر وكنت ولا ازال أرى أن هذا العالم يتسع لكل الناجحين بالغا ما بلغ عددهم كنت ولا ازال أرى أن اي نجاح لا يتحقق الا بفشل الآخرين هو في حقيقته هزيمة ترتدي ثياب النصر. منقول من غازي القصيبي ولكن والذي أراه والله اعلم انه لكل مجتهد نصيب فما ينقصها أن تكون مثلك وتقوم بالتلخيص مثل ما قمتي او تشتركون مع بعض وتقومون بالتلخيص فلكل مجتهد نصيب .
تم النشر الثلاثاء، ١٤ فبراير ٢٠٢٣
بصى هقولك حاجة عن تجربة والله لو انتى مشيتى الامور بطيبة خاطر ونفس طيبة مع الناس وممنعتيش عنهم حاجه ربنا هيراضيكى وهيكافئك مكافأة انتى مش هتتخيليها خالص ولو عملتى العكس هيعاقبك بحاجات انتى متقناها ومتأكده منها وعليكى تكونى مذاكرة السؤال الف مره وفى الامتحان متعرفيش تكتبى فيه حرف واحد علشان السبب اللى فوق وهكذا وعن تجربة لو قدرتى تساعدى حد ساعديه لوجه الله علشان ربنا يكرمك من عنده وموضوع الدرجات والحاجات دى ارزاق وكل واحد بياخد رزقه ولو سهلتى الدنيا ربنا هيكرمك ان شاء الله
تم النشر الاثنين، ١٣ فبراير ٢٠٢٣
اهدي كده متدايقيش من نفسك انك مدتيهاش هوضحلك حاجه مهمه الاول ف العموم لو حد اتعود ياخد حاجه هيعتبرها حق مكتسب ومن حقه انه ياخد الحاجه دي ف عشان كده بتحسسك بالذنب وخلتك تحسي بتأنيب الضمير لكن من حقك توافقي وقت متحبي وترفضي ووقت متحبي لان دي حريتك وده حقك لوحدك ومجهودك فعلا بعد متخلصي مذاكرتك خالص اديها وبعدين هي لو بتديكي ملخصات لماده تانيه اديها وخليها تفهم انك هتديني هديكي بس لانه موضوع تبادلي رايح جاي بينكم مش رايح بس
تم النشر الثلاثاء، ١٤ فبراير ٢٠٢٣
حقك جدا ان حاجة خاصة بيكي وتعبتي فيها متحبيش تديها لحد بس حابة احكيلك على حاجة كان عندنا في الكلية جروب عامله زمايلنا اسمه " الدحيحة " .. كانوا بيذاكروا ويلخصوا اللي ذاكروه ويعملوا بنك اسئلة كمان لان مكانش عندنا بنك اسئلة ولا امتحانات سابقة لان نمط الامتحان اتغير وكانوا بيعملوا بنك الاسئلة دة عشان نتدرب على الامتحان هل احنا طلبنا دة منهم ؟ لا هل هما لخصوا المواد واحنا اللي طلبنا منهم زيادة يعملوا بنك الاسئلة ؟ لا هل اللي عملوه خلى كل الدفعة من الاوائل والدحيحة دول بقوا في ذيل قايمة الاوائل ؟ لا الاول على الكلية في الدفعة اللي قبلي كان بيعمل قبل كل امتحان ملخص للمواد ومسميه " الزتونة " لاي حد ملحقش يذاكر كويس او اتكاسل ومبدأش مذاكرة اصلا واتزنق سؤالك جميل وبيدل على انك شخص لوام لنفسه وبتخافي تكوني كتمتي علم ودة يدل على انك انسانة جميلة اي ملخص خاص بيكي مش عيب انك متديهوش لحد بس انتي كشخص هتزيدي لو شاركتي مجهودك مع غيرك مع العلم ان ملخصك مش هو اللي هيخليهم هما متقدمين عنك ( مع ان دة مش عيب ) بس انتي ممكن تدي واحد ملخصات الدنيا وبردو ميعرفش يحل ومتزعليش لو حد اخد منك جنب لان دي هيكون فعلا اللي بيتقال عنك للاسف
تم النشر الاثنين، ١٣ فبراير ٢٠٢٣
هونى على نفسك شوية ...انتى قلبك ابيض وجميلة. عشان كده مش حابه تبقي وحشة قدام نفسك رغم كل حاجة. مجهودك وتعبك ده حقك. لو انتى رفضتى تشاركيه ده حقك ومفيش لوم عليكى. لو قررتى تشاركيه مع غيرك ...فده احسان منك وكرم وثوابه كبير. ولا انتى كده بشخصيتين ولا اى حاجة من دى...انتى العادى بتاع اى شخص بيفكر وبيقدر مجهودة وتعبه. توكلى ع الله وافعلى ما يرتاح له قلبك.
تم النشر الاثنين، ١٣ فبراير ٢٠٢٣
يا الله! شخصيتين فبعض! كبيره آوي الجمله دي حببتي آنتي طبيعيه جدا جدا هونيها وبلاش نوعيه الكلام ده مع نفسك.. أصلا ما شاء الله آنتي كل كلامك حل فنفسه حرفيا.. دلوقتي آنتي متوسطه في درجاتك وبتحاولي تعلي اهو أول حاجه همشتيها مع إنها كبيره جدا جدا ربنا يوفقك وينجحك يارب علي سعيك وتعبك يبقي اهم حاجه تركزي فيها مستواكي وتنظيم مجهودك وتعلي هدفك وتحصني نفسك عشان الهمه بتتنظر وتحافظي علي فكره إني أحسن درجاتي. نيجي لنقطه المنافسه الجميله المطلوبه إنك تتفوقي علي نفسك أولا وعلي زمايلك بالحسني إيه الحسني؟ الانتي عملتيه إنك تساعديهم 💜 ساعديهم بس مش بمجهودك وسهرك وتعبك في فرق بين أبخل بمعلومة وبين أتنازل عن تعبي.. إحنا اتوصينا علي أننا نتنافس ونتميز بس من غير كبر وغرور وإنتي معملتيش كده. فرقي بين التنافس والتميز الشريف مع نفسك أولا ثم من حولك وبين البخل والكذب.. بلاش تقولي مش مذاكره وتنكري قولي عادي بثقه الحمدلله قدرت أنجز شويه وسبقي دايما بالتحصين وخليكي خيره معاهم و احتسبي نيه تيسير الحال عليهم من نفسك ابعتلهم ملخصات الاساتذه.. وما جزاء الاحسان إلا الاحسان. نقطه كمان قولتيها وتيجوا للجد محدش بيحب الخير لحد.. لا في كتير آوي بيحبوا الخير للحواليهم ولو افترضنا مش في ليه آنتي متبقيش زي مالرسول قال سيظل الخير في أمتي.. ليه تبقي شبه حد أصلا! متعامليش الناس علي أخلاقها هي عامليهم باخلاقك آنتي بس بعقولهم هما.. يعني صحبتك معاها نت ومكسله تجيب مراجعه ملكيش دعوه آنتي كده كده بتبعتليها ونيتك خالصه لله تساعديها ولو هي سايقه فيها بردو ربنا شاهد وإنتي سايسيها لإنه مش فارقلك غير الخير لوجه الله ونفسك إلي حصنتيها وطورتيها وحافظتي علي نقائها.. أسفه إني طولت عليكي 🌻💜
تم النشر الاثنين، ١٣ فبراير ٢٠٢٣
حبيبتي هوني ع نفسك انتي تعبتي وجبتي معلومات كتير ودورتي وكتبتي عشان دي اكتر ماده بتحبيها انا ف تانيه ثانوي وبرضه عندي مواد معينه بحبها جدا لما بعمل ملخص او حاجه بمجهودي الشخصي انا مش ملزمه ابعتها لحد ع الجاهز ممكن ابعتلهم ملخص من ع النت او بتاع المدرس انما مجهودي الشخصي يبقي ليا بس انتي كده مش بتعملي حاجه غلط لأن الواحد لما بيحب ماده بيبقي عايز يقفلها وبيبذل فيها جهد كبير فعلا ف ربنا يوفقك ومتحسيش بالذنب بس اهتمي ب موادك التانيه كمان عشان تجيبي مجموع كويس ♥️
تم النشر الاثنين، ١٣ فبراير ٢٠٢٣
استهدي بالله فهماكي كويس جدا ... مش انتي بعتي ليها ملخص مختلف عن الملخص اللي معاكي؟ يعني كان معاكي حاجتين انتي لو كنتي انسانة وحشة مكنتيش بعتي حاجة اصلا، وكنتي كبرتي دماغك لكن انتي بتحاولي المساعدة على قدر المستطاع. هوني على نفسك ولو حد شيفاه فعلا انه يحتاج للمساعدة وفعلا الدنيا ضيقة عليه وشايفة انه فعلا مثلا مش معاه نت، ولا معاه مثلا مذاكرات ولا بياخد دروس وحابه انك تساعديه ده هيبقى كويس جدا. لو حد مقضيها ومش هامه اي حاجة وجي ياخد تعبك على الجاهز يبقى فكري الاول قبل ما تعملي اي حاجة.
تم النشر الاثنين، ١٣ فبراير ٢٠٢٣
لعرض السؤال في فدني اضغط هنا