في حل للتوتر ال عندي انا حياتي بتبوظ بسبب كدا انا طالبة في ٣ث وكان عندي مشاكل في طفولتي وانا بنت وحيده على أربع ولاد لكن والدتي وأهلها كانو بيعاملوني زي الخدامه لاخواتي ولبست الحجاب من ٣ ابتدائي غصب وكنت كارهته اوي ومكنتش بلعب زي الأطفال ولا اتكلم حتى لاني بنت ف بالتالي مكنتش بخرج برا البيت واتعلمت اول جزء عم من التلفزيون والحروف والأرقام وقرأت باحترافية من المصحف في سن قبل الحضانه ولما دخلتها المس قالت لوالدتي اني مش محتاجه حضانه لاني بعرف اقرأ واكتب واني ادخل مدرسه على طول وفعلا دخلت وكنت متفوقه جدا من يدوب شرح في المدرسه وحل الواجب من غير دروس ولا اي حد كان بتذاكري ولا يسأل عليا وطبعا والدي حياته كلها سفر ف مكنتش اعرفه في البدايه ولما وصلت ل ٣ ابتدائي بدأت معاناتي لما جبت امتياز وكنت التالته على المدرسه وقتها خالي ضربني وكان بيهيني وكنت بقوله ي بابا لان مفيش غيره كنت اعرفه وبسمع كلامه وكان شعري طويل جدا جدا وجميل اوي وقالي انتي تلبسي طرحه وقتها عيطت وجريت منه في الشوارع لانه كان هيضربني واخد شعري ربطه في المكنه وقالي هجرك بي لو ملبستيش طرحه خوفت وقلتله ماشي وانا بعيط جامد وبعدها كنت بلبس طرحه ولاني كنت صغيره ف كان الحجاب بالنسبه لحجمي وشعري الطويل كان قصير ف قال لوالدتي قصي ولما حصل كدا حزنت جامد لدرجة جبت لزقه وكنت بحاول ارجعه تاني وانا بعيط ونمت كدا ومن يومها وابتدت تخيلات في دماغي ومشاكل وخناقات مع والدتي ةاني دايما بكرها ودا كلو في خيالي وكنت بنام عايطه لما كنت بتخيل كدا وقل مستوايا في المدرسه بعد م كنت شاطره بقيت مش بعرف اكتب ولا امسك القلم اقسم بالله والنهارده خطي زفت وامسك القلم برعشه وبتوتر وفي زعل دايما كنت بتعرض للضرب دايما والمقارنه بإني بنت واخواتي ليهم الصيت عليا وكانو بيجرجروني حرفيا ولما وصلت لاعدادي كانت وقت الكورونا والموضوع تبع التخيلات زاد معايا اوي وبتخيل أحداث مش حقيقيه وبصدقها ولو حد اتخيله زعلني بزعل في الحقيقه وكمان حاجه غريبه بتحصل اني بعد اي حاجه حوليا من أرقام وألوان ولازم العد دا يكون مثالي واي حاجه لازم تكون مثاليه ولو فيها غلط بعيد من تاني لدرجة ان ممكن اقعد اسبوع نفس الحاجه ال بعملها عشان تطلع زي ا في خيالي ولما بفكر بتكلم بصوت عالي ودايما في توهان وسرحان ولكن مش بكون بفكر في حاجه ممكن اقعد بالساعات تايهه وسرحانه كدا واوقات لما حد بيكلمني بفصل ومش بركز معاه وبكون سرحانه في ال لا شيء ولما حد بيناديني بكون سامعه ولكن مش بعرف ارد بحس اني محبوسه جوا خيالي الفاضي ومش عارفه اخرج دا كدا زاد من ساعة اعدادي كنت شاطره اوي في الدراسة من طفولتي بس من بعد ٣ ابتدائي لغاية ٢ اعدادي كنت بليده بمعنى الكلمه ولما وصلت ل ٣ اعدادي مكنتش عارفه ان في حاجه اسمها ثانوي او استيم والحجات دي لاني مكنتش بخرج خالص وبعدها عرفت ان في حاجه اسمها طب وهندسة من البنات .... الخ
ف عرفت كدا قبل الامتحانات بشهر وكان والدي موجود في اجازه وانا بحبه جدا وكنت بحاول في الفتره دي اعرفه كدا بس مكنتش عارفه لانه طول الوقت مسافر ف قلتله عرفني اكتر قالي ذاكري وانا عايزك دكتوره قلتله ازاي قالي ذاكري قلتله يعني اي اذاكر اه قلتله كدا ساعتها فهمني وقالي كل حاجه وفعلا ذاكرت وجبت ٩٨ % وكان ليا ترتيب على المحافظه ففرحت وقلت انا هدخل طيران او ستيم عشان عايزه اعرف الدنيا اكتر وبابا قالي اي رأيك اخدك معايا تسافري وتكملين ثانوي عندي قلتله موافقه وانا مبسوطه مش عشان اتعلم عشان هسيب الناس ا عقدتني في حياتي ٣ سنين وجهزت كل حاجه والورق والجواز السفر وحجزت وجا خالي منه لله دمرني ومعرفش ازاي غير فكرة بابا قلت ماشي دا خالي ولي احترام قلت هدخل استيم قال لا قلت هدخل ثانوي قال لا بابا وقتها انفجر في وفيا وزعقلي وقالي هتدخلي ثانوي وتذاكري وتدخلي طب انتي اخر امل ليا انا تعبت من السفر والشغل وعايز افرح بحد من ولادي وللعلم انا اصغرهم
قلتله ماشي هدخل عشان خاطرك ودخلت ثانوي عام وفي بداية السنه اخواتي اتجوزو قرايب لينا وكنت فرحانه اوي وكان ليا ابن خالتي مكنش ليا علاقات كتيره بيهم ومعرفتش انه قريبي غير وانا في ٢ اعدادي المهم يوم الحنه اتقدملي وانا عرفت كدا بعد الفرح بأسبوعين وهو كان في مشاكل بينه وبين خالي ال هو خاله بردو بسبب انه منعه يدخل هندسه خاصه ف اضطر يدخل حاسبات ف خالي لما عرف انه متقدم قعد ينفر في ويشتم وانه بخيل والى آخره
فوالدي رفضه وبعدها جا والده واتكلم وقال إن يسألني الاول قبل م يرفض يعرف رأي ولما والدي سألني قلتله اني حابه اتعلم واسافر ويبق ليا شغل ودخل خاص بيا الاول ولكن مقلتش رأيي وقريبي دا كان هتجنن لو معرفش رأي ولاني جبت مجموع في اعدادي بابا جبلي تلفون أحدث اصدار وعملي فيس وواتس وقالي انتي محرمتنيش ف مش هحرمك ولما خالي عرف خلى امي ضربتني ووقتها مقدرتش اصبر وقلت لبابا كل حاجه من وانا صغيره كان بيعملها وقتها بابا قاله دول كانو امانه وزعق معاه ومن وقتها مش طايقني ولا امي بردو وبدأت تعاملني وحش وتدعي عليا وتقولي ربنا لا يوفقك لا دنيا ولا آخره وانا كل دا ومش بتكلم بحد جوايا وبسكت وكنت خلاص هدخل في نوبة اكتئاب وكنت برجع على طول وبنام كتير ومكنش فارق معايا نفسي وكنت بكره ابص في المرايه لاني كنت ببق عايزه اكسر المرايه ووقتها بنت خالتي كلمتني واتس وحبتها جدا وكنت بشكلها من معاملة امي ليا وكانت بتصبرني وبعدها بحوالي شهر بدأ ابن خالتي يعرف اخباري منها وهي سألتني انا موافقه اولا ومجوبتش ساعتها بعتلي ع صراحه وحكى ال خالي عمله وكان شبه ال عمله معايا وصعب عليا اني ظلمته وسمعت كلام خالي عنه وانه وحش وكل دا ورديت عليه في استوري محدش شافها غيره وقلتله رأيي تقدر تعرفه بعد ٣ث من والدي وبس على كدا وبعدها بشهر رد في استوري زيي وقالي انه بيحبني من زمان وكان ساكت بسبب ان كان بيقولو ان ابن عمي ال هيخطبني ... وبعدهاكان بيبعتلي لمدة أسبوع وعايز يارف رأيي وكنت بفهمه ان الكلام مش ليا وانه لبابا والى آخره.... وقفلت معاه وكان كلامي لي ان بابا بيثق فيا مينفعش اكلمه اكتر من كدة ووالله م كان في اكتر من كدا وهو احترم كدا وبطل يبعتلي حاجه بعد م خلصت الترم الاول من ١ ث ونجحت في بتفوق دخلت الترم التاني ووقتها مرآة اخويا عرفت اني كلمته وفهمو غلط واتهموني اني بكلمه من سنه وانا والله مكنت اعرف انه قريبي ولا كنت اعرفه غير بعد م خلصت ٢ اعدادي وظلموني واخويا جلدني وامي ضربتني وخالي شتمني وقالهم طلعوها من ثانوي وانا مكنتش قادره اتحرك من الضرب ولما قريبي عرف جا عندنا ووراهم كلامي وساعتها صدقو بس وانا وقتها كنت ايام امتحان الترم التاني وشلت تاريخ ولكن مدخلتش الامتحان وكنت في حاله نفسيه صعبه وكرهت والدتي اكتر واكتر لأنها مش بتسمعي وفعلا هي اكتر انسان بكره لما جيت ادخل ٢ ث اتحديت الكل وجبت في الترم الاول ٨٩ % والترم التاني ٩١% وللعلم مكنش معايا كتب ولا كنت بروح دروس كنت معتمده على الله ثم على اليوتيوب ولما طلبت اخد دروس في تالته ثانوي لاني مش هعرف اخدها لوحدي يومية بتدعي عليا وحصل بيني وبينها خناقه وكل التراكمات خرجت وقلتلها انا في حياتي م حبيتك ولا عمري هحبك ومن وقتها وهي بعيده عني مش عشان قلتلها عشان شكيت لربنا ودعيت يبعد الناس دي عني والله انهم بعدو ولكن مازال الاحباط من كل جانب وانا مكمله بس كل ال مريت بي من تدمير احلام ليا مأثر لدلوقتي جامد وبعيط من اتفه كلمه وبقعد اسبوع واتنين بفكر في كل كلمه وكمان القديم كلو بيرجع ودايما في وجع بطن لما بزعل ومش باكل كويس لو قعدت يومين مبفتكرش اصلا ولكن بقالي شهرين ونص بحاول ابعد عشان اذاكر واحقق حلم بابا ال مستني مني افرحه بس مش عارفه اذاكر لان الكوابيس دي في دماغي دايما وخصوصا اني بتخيل حجات مش موجوده وعلى فكره انا قريبه من ربنا كتير وبصلي وبدعي يبعد اي حد وحش عني ويشفيني من ال في قلبي من زعل واحباط انا دلوقتي برتعش جامد وبفضل اكتم علي بقي عشان صوت العياط محدش يسمعه وبمنع نفسي لأنهم بيتريقو عليا ويقولولي كلام جارح وانا من طبعي هاديه ومش بحب ازعل حد ولكن باخد كل الزعل على خاطري وبقيت بعتبر الكلام الايجابي زيه زي السلبي اتمنى الاقي حل نفسي والله افرح بابا زي م كان بيفرحني
عزيزتي كل الي بيحصلك من أعراض جسديه ونفسيه ممكن يكون متوافق مع طبيعه الشخصيه الحساسه ودي شخصيه بتمثل من 15الي 20% من البشر ربنا خلقهم بطبيعه مختلفه عن غيرهم وهي حساسيه جهازهم العصبي بتكون خمس اضعاف غيرهم من الشخصيات الي غير حساسه وبيزيد الموضوع مع ذكاءك ونقاءك وحبك الخير والجمال للغير واستنكارك وعدم قدرتك علي فهم ليه ممكن بني آدم يأذي بني آدم زيه ويعنفه ويقسو عليه دي نقطه مهمه جدا لأن أي أذي بيحصل لك بيكون مضروب في خمسه فيعلم فيكي جامد ويخليكي غرقانه باستمرار في مشاعرك ومش قادره تتجاوزيها وبيكون جزء كبير من الحل في إحتواء الام بالذات والاب أو المسؤلين عنك والموقف زي ما فهمته من روايتك أن والدك مسافر وساب الحِمل والمسؤليه علي والدتك وفي رقبتها أربع صبيان تربيتهم بتكون في منتهي الصعوبه لأن طبيعه الولد بتكون أكثر عنفا ورغبه في السيطره وإثبات الذات عن طبيعه البنات الي غالبا بتتمتع بالهدوء والمسؤليه فوالدتك ماكانش عندها القدره علي المعامله اللطيفه والإحتواء الازم لشخصيتك الجميله في ظل انها لازم تكون حازمه وجامده طول الوقت وهي أكيد خايفه ومحتاجه والدك يدعمها في مسيره التربيه فكان الخال محل الوالد وكان ممكن يكون خال حنين وداعم ولكن للأسف خد صلاحيات من والدك ووالدتك خلته يسيطر علي حياتكم ويتعامل من مكان الخاءف علي مصلحتكم وجودك كبنت وحيده وسط المجتمع الذكوري المتسلط ده -وفي غياب إحتواء والدتك الي كان ممكن تتخذك صديقه وحبيبه لها وتتمتع بحنيتك ودعمك العاطفي ليها -فانتي مصدر تهديد كأنثى لازم يدفنوا معالم أنوثتها بأي طريقه ويجعلوها خاضعه وتحت التهديد دائما وكل ده منافي للعقل والدين ومتوافق مع العقليه الجامده المغلقه الي عايزه تكسر البنت عشان يسهل التحكم فيها دلوقتي حاله الفراغ العاطفي والتدمير المعنوي أدي بيكي لنتف رموشك وهدم نفسك بنفسك وكان سفرك مع والدك حل مثالي ليكي للخروج من البيئه الي مش بيتدعمك دلوقتي ارجو ١-إنك تفرغي مشاعرك في ورق ابيض وتقطعيه اكتبي جوابات لكل شخص أذاكي واكتبي الي انتي عاوزاه وقطعي الجواب أو إحرقيه ٢-تواصلي دائما مع والدك مش لازم تشتكي له ولكن احكي له احداث يومك اشركيه في احوالك النفسيه خدي رأيه في أي حاجه ولو تافهه دخلي والدك في حياتك بكل تفاصيلها وعلي قد ما تقدري ٣-النجاح والمذاكره هديتك انتي لنفسك مش لأي حد تاني إنتي تستحقي النجاح ومجتمعك بحاجه إليكي ولطبيعتك الإنسانيه النادره ٤-كل ما تيجي تنتفي رموشك اعملي حاجه تانيه بتحبيها قومي اتمشي في الاوضه ارسمي لوني اكتبي ٥-استخدمي خيالك الواسع في رسم اجمل صوره لكي ولمستقبلك اتخيلي انك بتحققي نفسك وبتستقلي وبتقدري تقفي علي رجليكي وانك مش محتاجه لحد تاني غير نفسك اتخيلي النجاح وخطواتك وشكلك ووضعك لما تشتغلي وتقبضي اول مرتب مش هااقدر ااقولك سامحي واغفري الي أذوكي ولكن حاولي تحطي نفسك مكان والدتك ربما ده يريحك شويه من ناحيتها ربنا يوفقك ويسعدك
تم النشر الجمعة، ٢٧ أكتوبر ٢٠٢٣
انتي قوية جدا جدا .. وده مش كلام برغم كل اللي انتي مريتي بيه، ولكن انتي جواكي قوة ما شاء الله عليها قادرة انها تعدي وتتجاوز لانك ما شاء الله واعية وفاهمه وذكية .. خليكي زي ما انتي متمسكة بقربك من ربنا .. ولكن انتي حكيتي تفاصيل كتير جدا .. لازم مختص يسمعك فيها ويطلعك منها واحدة واحده .. بالنسبة للخوف اللي عندك ولكلامهم السلبي .. ياريت متحاوليش خالص انك تتكلمي معاهم، الكلام معاهم مظنش هيجيب نتيجه. خصوصا مامتك وخالك. وللاسف مش لازم الوضع يفضل كما هو عليه انك تكتمي كل ده، حاولي تفرغيه على هيئة انك تكتبي مشاعرك أول بأول .. وداومي على تمارين التنفس هتساعدك كتير برضه.. ولكن لازم في اقرب فرصة تزوري متخصص .. لانه ضروري.
تم النشر الخميس، ٢٦ أكتوبر ٢٠٢٣
السلام عليكم ورحمة الله وبركاته شكرا لحضرتك ع المشاركة 🌷 ظروف صعبة وواقع أليم لابد من المتابعة مع حد يدعمك نفسيا ونشوف الافكار اللي بتجيلك دي وابعادها عليكي الحلو انك بتدوري جواكي وان شاء الله هتلاقي حل فيه نجاتك ممكن التواصل مع مؤسسة تداوي مؤسسة تداوي للدعم النفسي. مؤسسةغير ربحية 🗣️ للاتصال: WhatsApp: 01555121622 ونفكر فهنا ودلوقتي انتي تقدري تعملي ايه دلوقتي بظروفك فمكانك يساعدك تاخدي خطوة اولي صغيره ؟
تم النشر الخميس، ٢٦ أكتوبر ٢٠٢٣
طب احنا اللى محتاجين نتعلم منك ازاى تقابلنا حاجاات صعبه ويفضل حاطط حلمه قصاد عينه ومصمم عليه حلمك هو اللى مقويكى وحاميكى ...خليه قدام عينك وقولى لنفسك انا الدكتوره لازم اتعود اتعامل بهدوء متنفجريش ..كل اللى جواكى قوليه وفى وقته وبهدوء ودايما قولى الله معى لن يضيعنى انتى ماشاء الله ذكية وقوية ونعم ربنا عليكى كتير ...فطبيعى تلاقى ابتلاء صعب ربنا يشوف جمالك اكتر فيه بالنسبة للتوتر فاستخدمى اى حاجة تفرغى فيها ى توترك الا جسمك مثلاا عاوزه تشدى شعر ...هاتى اى حاجة فيها فرو وشديه بدل شعرك ..بس فى نفس الوقت سبحى اى ذكر تحبيه ( انصحك بقول لا حول ولا قوة الا بالله او الصلاه على الرسول ) ممكن كمان تعملى اى حاجة يدويه زى التطريز ...هتحبيها اوى وتشغل الخيال عندك بس فى شىء مفيد وهتبعدك شويه عن التخيلات اللى ملهاش لازمه . والقران اكثر مهدىء لاى روح قلقه وكلما تعمقتى فيه وفى التفاسير كمان ..تلاقى نفسك لا تلقى للدنيا وافعال البشر بالا.
تم النشر الجمعة، ٢٧ أكتوبر ٢٠٢٣
لعرض السؤال في فدني اضغط هنا