انا دلوقتي في تانيه ثانوي علمي ... ومش عارفه ادخل علمي علوم ولا علمي رياضة .. + معنديش هدف معين يعني ......... يعني حاجه يبقي ليها مستقبل يعني كشغل وكدا اكيد هشتغل علي نفسي بس يكون فيه شغل متوافر ليها واكيد تكون بتجيب فلوس ... + مش حابه طب خالص يعني ...!؟
والموضوع فعلا مأثر معايا اوييي يعني اللي هو مش عارفه احدد هدف وبتخنق دائما منه وممكن اعيط كتير اني مش عارفه ده مستقبلي ومش عارفه
مبدأيا كده هدي اعصابك شويه ومتتوتريش والامر مش مستاهل كل هذا الارتباك المستقبل بيد الله سبحانه وتعالى ورينا بيقدر لكل واحد الكليه المناسبه له في واحد ياخد درجات عاليه ويدخل الكليه ال شايفها مناسبه بمزاجه وميعرفش يكمل او يبدع فيها وفي واحد يتظلم في التصحيح ويجيله تنسيق مخالف لرغبته ويدخل كليه مش حاببها بس يتفوق فيها ويثبت نفسه ويوصل لدرجه الدكتوراه ... دي كلها اقدار مش بايدنا فلازم تكوني عارفه ان اي مجال الانسان هيبدع فيه ويشتغل فيه بحب هيعرف يتميز ويتقدم ويكسب فلوس ان شاء الله الرزق والكسب والفلوس ده بتوفيق وارادة الله مش بدخول مجال معين .. كمان في ناس كتير بتدخل كليه معينه باختيارها وارادتها ورغبتها وبعد ما تتخرج تغير المجال خالص وتتعلم حاجه جديدة خالص وتشتغل بيها وتبقى الكليه مجرد شهادة على ورق مش اكتر فحاولي تغيري نظرتك لفكرة ارتباط الكليه بالمستقبل وسوق العمل وكده لان احنا كل يوم نظرتنا للحياة وللمجالات ال حوالينا بتختلف ورغباتنا بتتغير بالذات في. السن بتاعك ده انصحك توازني بين المواد بتاعتك كويس وتشوفي انت بتحبي مواد العلوم اكتر ولا مواد الرياضه اكتر وعلى اساسها تقرري تدخلي ايه وفي نفس الوقت قبل اي خطوة سواء كلية او ثانويه لازم تستخيري وتثقي ان ال ربنا هييسره بعد الاستخارة هو الاصلح لك
تم النشر الأحد، ٨ يناير ٢٠٢٣
استفتى قلبك واستخيرى ربنا فى يوم قلبك يكون هادى مبدأيا كدة انتى من الاشخاص ال بتفهم ولا بتحفظ لان الأحياء و امتحاناتها دش السنين اذا مش بتحفظى هيبقى بتظلمى نفسك ورياضة ٢ اكيد عارفة انها ٦ اقسام يبقى بعد الفهم تنظيم وقتك وإدارة يومك ديه خطوتك حاليا ... بعدها كل مجال وفيه شغله ونجاحه وفلوسه وابداعه اطلعى السلم درجة درجة
تم النشر الاثنين، ١٠ يوليو ٢٠٢٣
اختارى المادة اللى مذاكرتها اخف على قلبك
تم النشر الاثنين، ٩ يناير ٢٠٢٣
شوفي المواد اللي تقدري تتفوقي فيها أكثر هل هي مواد علوم كالأحياء أم مواد رياضة كالرياضيات والفيزياء .. لأن هناك احتمال أنك ماتدخليش كلية علمية ولكن كلية من الكليات اللي تاخد مجموع كبير مثل سياسة واقتصاد مثلا .. ودة كمان هيبين إذا كانت ميولك أكثر ناحية الفهم الرياضي أم الحفظ كما في الأحياء .. لو تفوقت في حاجة هتلاقي إن شاء الله مجال كويس تشتغلي بها وتعملي فلوس
تم النشر الأحد، ٢٥ ديسمبر ٢٠٢٢
استهدي بالله كده .. وادخلي اعملي سيرش عن اكتر المجالات اللي هتبقى موجودة في خلال ١٠ سنيين أو ال ٢٠ سنة قدام. هتقابلك مجالات كتير .. ادخلي اقري شوية في كل مجال .. اتفرجي على فيديوهات عنه سريعة شوفي طبيعة المجال .. هل فيه حاجه شدتك منهم ولا لا . بعد كده ادخلي ع اللينك ده https://www.for9a.com/learn/اختبار-تحليل-الشخصية-والتخصص-الجامعي-من-موقع-فرصة ده موقع اسمه فرصة عليه كورسات في جميع المجالات وعليه تخصصات ومنح كتير جدا . موسوعة بمعنى أصح .. واللينك ده خاص ب اختبار تحليل الشخصية والتخصص الجامعي. الاختبار ده هيدي ليكي توقعات عن الحاجات اللي هتكون مناسبة ليكي. وكمان نوع شخصيتك ايه! اعملي الاختبار ده في جو هادئ جدا، وتكوني انتي برده مش مشتتة .. وتحاولي ع الاسئلة صح فعلا يعني تكوني فعلا بتعملي ده أو هي ديه شخصيتك. لو معاكي أي حاجه مش واضحة ابعتيلي ... بالتوفيق والنجاح إن شاء الله
تم النشر السبت، ٢٤ ديسمبر ٢٠٢٢
لعرض السؤال في فدني اضغط هنا