انا ف اولي كليه علوم وللأسف كان عندي تقصير ف اول ترم وشيلت ماده ومش هينفع اقول ل اهلي ومش عارف ازاي هتصرف ف فلوس السمر كورس
اهلا بك فى كوكب كلية علوم .....عااادى جدا ..ده اقل واجب بيحصل فى الكلية خصوصا لما تكون الترم الاول كله نفسيتك مش تمام عشان حاسس انك محصلتش كلية كويسة ....قول لاهلك عادى ...لان التفوق فى الجامعه غير المدرسة وخصوصا كلية العلوم ....هتعدى المطب بتاع اول ترم ده وترجع تركز ومش هتنزل فى مواد تانى ان شاءالله.....لازم تقول لاهلك وهما هيتعايشوا معاك الواقع ...غصب عنك وعنهم ....مفيش داعى من انك تتعامل بانك تخبي......لو عاوز طريقة لطيفة ....ممكن تقولهم فى حاجة هدرسها تانى فى الصيف ضرورى فى الكلية ومحتاجة المبلغ الفلانى ...معلش انا مكنتش عامل حسابي عليها وهو نظام فى الكلية...ده لو حابب ترفع عن نفسك حرج انك ع طول تقول انك شيلت مادة ... سؤالك فكرنى والله بنفس اللى حصل معايا فى الكلية فى اول ترم....بعد شوية اخدنا على نظام الكلية وعرفنا انها مش بالدرجات ولا بالمذاكرة وان كل حاجة بتحصل وبقينا مبنتأثرش اوى بصراحة.😁
تم النشر الاثنين، ٢٠ فبراير ٢٠٢٣
لو مش هينفع تقولهم وازاي هتتصرف في الفلوس يبقى حاول تحوش من المصروف بتاعك. ولو فيه مهارة معينة انت شاطر فيها ممكن تشتغل بيها بدوام جزئي في يومك وتجيب فلوسها.
تم النشر الأحد، ١٩ فبراير ٢٠٢٣
هما حلين ملهمش تالت يا تواجه أهلك بهدوء وتراضيهم وتستحمل كام كلمه من تعبهم وقلقهم وزعلهم يا إما لو مش بيتفاهموا تحاول تشتغل وتدخل ال سمر من غير ما يعرفوا بس هتدخل فدوامه أكبر لو لقدر الله عرفوا إنك مش قايلهم إنك بتشتغل. أنا مش بعرف اسلك فالتحوير وبتوتر واحب كله يبقي علي نور حتي لو بمشاكل غيري بيقدر يريح دماغه ويسيطر فأنت شوف لو هتقدر فعلا مش تقول وتصرف خلاص لكن لو مش هتعرف والمشكله هتكبر آكتر لو عرفوا بعدين إنك خبيت يبقي قولهم براحه إنك معلش مش هتكررها عشان نفسك ومستقبلك أولا وعشان تعبهم ورضاهم
تم النشر الأحد، ١٩ فبراير ٢٠٢٣
اتوكل علي الله و قولهم الحقيقية زي اي شاب راجل في تربيته .. ايوه هيزعلوا و يمكن يحصل اكتر من كده ، و هيعقدوا يعدوا لك اخطائك و يمكن يحصل حاجات كتير بس في عز كل ده هتحس بشعور راحة من جواك ، اتعامل مع اهلك بالطريقة اللي تحب ولادك فيما بعد ان شاء الله يتعاملوا معاك بيها ، الكذبة بتجيب كذبة اكتر و بتبوظ الدنيا ، بس الصراحة بتعمل ارتياح للنفس .. و ربنا يوفقك يا اخي .
تم النشر الاثنين، ٢٠ فبراير ٢٠٢٣
لعرض السؤال في فدني اضغط هنا