حاولي في كل مرة تقولي ان : انا بجد زعلانة على زعلكم مع بعض ، بس مش هقدر اقف في صف حد فيكو على حساب الطرف التاني انتو الاتنين غاليين عندي ، وزعلكم كبير اوي وبيزعلني انا صغيرة عنكم كتير ، ومعنديش خبرة كفاية اني اقدر احكم بينكم انتو محتاجين تتفاهمو سوا وتتكلمو سوا وتوصلو لحلول سوا ، بدون ما انا اكون وسيط بينكم ، لان التفاصيل اللى بينكم انا مش مفروض اعرفها علاقتي بيكم اني بنتكم ، احبكم واراعيكم لو محتاجين رعاية، وابركم ، لكن مش دوري اصالح او اوفق بينكم كزوجين انتو محتاجين شخص حيادي مش عايش وسطكم يحكم بينكم ، لان عاطفتي هتغلبني ومش هقدر اكون حيادية ولا احكم صح ولا اوصل الكلام بشكل صحيح جربو تروحو لاستشاري زواجي يسمعكم وهيسعدكم ، بقالكم سنين بتستخدمو نفس الاسلوب والمشاكل مبتخلصش ومبتتحلش ، جربو طريقة جديدة نفسي البيت يكون هادي وقادرين تتفاهمو سوا ، لان دا بجد هيبسطني وهتطمن بيه واكيد انتو كمان نفسكو تلاقوني مبسوطة وسطكم انا بحبكم جدا ، ومقدرش اتحط في موقف احكم مين فيكو الغلطان ، انتو كدا بتحملوني مسؤولية وطلب فوق طاقتي ومش هقدر اعمله كل الجمل دي ، تتقال لما حد فيهم يجي يطلب تدخلك في المشكلة ، تتقال وتعتذري عن انك هتحكمي او حتى تسمعي المشكلة .. انتي فعلا اصغر بكتير من انك تحكمي بينهم ، وهما علاقتهم كزوج وزوجة اعقد بكتير من انك تفهمي تفاصيلها او تصلحيها .. مش دورك ومش مسؤوليتك ، فمتحمليش نفسك فوق طاقتك .. دورك تحبيهم وتحترميهم وتحافظي على علاقة طيبة معاهم هما الاتنين ، وتوجهيههم صح في التعامل بشكل صحيح مع مشاكلهم ... اللى مش من ضمنها انك انتي اللى تدخلي بينهم ولا انك تسمعي شكوتهم ، هما لازم يتكلمو سوا ، ويتفاهمو سوا .. يمكن اصل المشكلة هو سوء التواصل بينهم لو في حد صاحب بابا او قريبكم من طرف بابا او ماما ، راجل يكون عاقل ومحترم وامين وعنده دين واخلاق ، تقدري تقترحي على بابا انه يطلب رايه او يحاول يصلح بينهم او يروحو لاستشاري زواج يساعدهم ، لان الاستشاري شخص حيادي ، وموضوعي ، وهيحكم بعقله وخبرته وادواته بينهم ، وهيقدر يوصلهم لنقطة تفاهم كاتنين كبار راشدين مسؤولين عن نفسهم ومسؤولين عن حل مشاكلهم سوا بدون ما يدخلو ولادهم في المشاكل دي.
اقتراحات جميلة ومثمرة من استاذة منى ..اتمنى تطبقيها
تم النشر الجمعة، ٤ أبريل ٢٠٢٥
لعرض الإجابة في فدني اضغط هنا