عايزة حل لاني تعبت جدا
دلوقتي انا اتعرفت على واحد هو بيني وبينه 11 سنه، كان خاطب قبل كدا المهم لينا 3 اسابيع نعرف بعض وبنتكلم وكدا هو كان بيشوفني وبيبص لي كتير وكدا المهم كان عايز يكلم بابا بس قلت له بابا رافض دلوقتي، طول المدة دي انا اللي بتصل واطمن وهو نادر لما يرن ولما اسأله يقولي غصب عني ومشغول،
هو طبيعته مبيتكلمش مع حد كتير، وعاتبته كتير وتجاهلته كتير ولكن بلا جدوى ممكن اعرف اتصرف معاه ازاي، يقولي هرن عليكِ ولا بيرن ولا بيعبرني، ويقولي معيش رصيد وهو فعلاً مبيبقاش معاه رصيد بس بيقعد باليوم مبيكلمنيش ولا يطمن عليا
السلام عليكم، طيب هو والدك رافض إنه يتقدم لك الشخص ده بالذات أو تقريبا إنك تتخطبي حاليًا. ممكن أسألك... ما دام والدك رافض، ليه بتكلمي الشخص ده دلوقتي؟ ممكن أقول لك كذا احتمال لتصرفه زي مثلا إنه بيحاول يقلل التواصل لحد ما والدك يوافق يتقدم لك وممكن شايف إن غلط التعارف غير الرسمي بينكم. ممكن كلمك في البداية عشان يتقدم بس هو عارف إن حرام العلاقات بين الشباب والبنات خارج الإطار الشرعي. ممكن مبقاش مهتم... ممكن أي سبب. لو عاوزة رأيي ونصيحتي كأخت أكبر منكِ... تصرفكِ غلط. ومش انتِ اللي المفروض تدوري على اهتمام من حد وخاصة لو مفيش علاقة رسمية بينكم. أنتِ البنت... المفروض في العلاقة تكوني أنتِ المعززة واللي بينطلب رضاها. فنصيحتي لكِ، لحد ما والدكِ يسمح إنه يتقدم لك بلاش كلام وتواصل من ورا الأهل حتى لو بنية التعارف عشان الزواج بعد كده. عززي نفسك وغليها ولو هو بعد كده كان لسه متمسك بك هيتقدم لك ويحاول يقنع والدكِ بأي طريقة. بالتوفيق.
تم النشر الأربعاء، ٢٥ ديسمبر ٢٠٢٤
التواصل مع الشخص طبقا للدين الإسلامي بيكون بعد الدخول من باب البيت ودليل على كلامي قال تعالى " وأتوا البيوت من أبوابها " ده بالنسبة للمبدأ الأساسي ليك ثانيا أنتِ كبنت المفترض بيحصل أن والدك بيعرف الشخص الأول وبيسأل عنه بعدها يسمح ليه لو وافق مجرد أنه يشوفك ويعرفك وده إن دل على شيء فهو مدى الاعتبارات اللي اتوضعت عشان بس تتشافي مما يؤكد كونك جوهره مش اي حد يوصلها ولا باي سهوله لأن اللي بيحصل معك حاليا ما تعرفيش أصلا هو بيتسلى بيك أو أنتِ كغيرك مجرد بيجربكم في السريع ولقى غيرك مهوا كدا كدا مش متكلف حاجه فزي ما قالتلك دكتور مي ياريت حضرتك تقطعي كلامك معاه أولا عشان ربنا ودينك ثانيا أهلك ونفسك الغاليين
تم النشر الأربعاء، ٢٥ ديسمبر ٢٠٢٤
سورى ف الى هقولة ..بس هو كدا " بيصطاد " حضرتك بيوقعك ف شباكه .. من الاخر الشخص دا بيلعب عليكى وبيستخدم " علم النفس العكسي " اللي هو كل مايعمل مش مهتم انتى تهتمي اكتر كفعل مضاد لفعله ... بيلعب على حتة انك مهتمة تعرفيه اكتر منه ... وفى اعتقادى هو موصلك ان كلامه قليل عشان تشفقى عليه ويكون الاكشن من ناحيتك بدافع العاطفة انك انتى الى هتخليه يتكلم واللي هتغيرى حياته ... دى وجهه نظرى خصوصا ان فرق السن مديله افضلية الخبرة ف التعامل ..
تم النشر الأربعاء، ٢٥ ديسمبر ٢٠٢٤
ايه الحدفة دي، مش كده، مفترض تكوني اتقل من كده، الاهتمام بيجي منه لو مفيش اهتمام ماتسأليش بجد عن حاجة،.. ماتطلبيش منه حاجة.. ماتبدئيش معاه حوارات، ماتفتحيش الباب قوي كده، واصلا الموضوع محتاج جدية، هو لو مخلص وصادق كان وضحلك موقفه بسرعة، انما التلكيكه يعني عايز يبعد بشياكة بس مش عارف
تم النشر السبت، ٢٨ ديسمبر ٢٠٢٤
فقط اتقي الله ولاتتبعي الهوي واتبعي ذكر الله وحافظي علي صلواتك حتي ياتيكي ابن الحلال غير كذا انتي في الهاويه
تم النشر الخميس، ٢٦ ديسمبر ٢٠٢٤
لعرض السؤال في فدني اضغط هنا