انا شاب عندي 22 سنه
عندي مشكله نفسيه تقريبا مخليلني مابفكرش غير في الحاجه دي وهي اني طولي مش عاجبني وديما بقارن طول اي حد بيا وعلي اساسها بقيم اذا كان احسن مني ولا لا
والموضوع ابتدا بي ان ممكن حد يهزر معايا في طولي او يقولي انتا قصير واني كنت ديما نفسي اكون الشاب الي حلم ل اي واحده انها ترتبط بيه وكنت ديما بشوف البنات نفسها ديما في الولد الطويل وان دي حاجه مش ذنبي وانا حاليا مش عارف اتقبل الحته في نفسي وبقيت كاره نفسي بسب الموضوع ده وماثر اوي ف نفسيتي مع اني الحمد لله محبوب بين الناس
وكمان بالنسبه للبنات بتشدوا اوي عليا عشان شخصتي جذابه ليهم واني دماغي حلوه وبعرف اتحمل مسئوليه واكون سند بجد ل اي حد بس بخيت خايف لاني ممكن ادخل علاقات مع بنات عشان اثبت لنفسي بس ان ممكن اكون حلم لاي واحده زي ماكان نفسي انا مش وموذي بس ده الي بيخصل ساعات
نفسي حد يدلني ع الطريق الصح لاني فعلا نايم قايم مابفكرش غير في كدا
طولي 170 س تقريبا
بص ياحبيب خالتك طولك مناسب جدااااا وبعدين كل فوله وليها كيال ياواد يعني هو انت لازم تتقدم لنخله ما تتقدم القصيرين حته مبيتعبوش 😃 المهم نتكلم جد الي انت فيه دي يعتبر ضعف ثقه في النفس أما أن حد انتقد طولك وانت صغير او أن المحيط بتاعك دماغه فاضيه للانتقاد فاسمع من خالتك الكلمتين دول اولا ابعد عن أي علاقات سامه وسلبية همها المظاهر بس واختار ناس تشجيعك علي اظهار ذاتك الحقيقة ثانيا قيمتك بتتحدد من انجازاتك وأخلاقك وتعاملاتك الحلوة مع الناس ثالثا لازم تحطها قدامك ربما مبينظرش للصور والشكل لكن في القلب فدائما احرص علي نظافه وطهاره قلبك زي ما بتحرص ع شكلك رابعا بقي والأهم ربنا مبيخلقش حد ناقص فدائما قول لنفسك أنا راضي وسعيد بحالي ومحدش كامل علشان اكون كامل ويومك كله بركه ورضا
تم النشر الجمعة، ١٨ نوفمبر ٢٠٢٢
مساء الخير هو ده مش وسواس قهرى هو مجرد فكرة غلط مسيطرة عليك ...ياريت ترجع بذاكرتك وتشوف الموقف الاول اللى وصلك ان الطول الحالى ليك يتوصف بالقصير الاشارة لشىء بصفة معينه بيبقى بناءا على معيار محدد وواضح ان المعيار اللى حواليك اطوال عاليه اوى لدرجة انك افتكرت ان ده الطول الطبيعى وانك كده قليل اوى بالنسبة للمعيار ده فانصحك تشوف من خلال مقالات طبيه المعيار والمدى الطبيعى للطول فى سنك كشخص بالغ هتلاقى ان طولك طبيعى جدا وبالنسبه لسنك مش بيصنف قصير خالص انا متأكده انك وصلت للفكرة دى غصبن عنك بسبب افكار غلط اتزرعت من موقف او اكتر من موقف محتاج تغير الافكار الغلط عشان تبدأ تحس باحساس افضل والمشكلة تتلاشى ان شاء الله
تم النشر الجمعة، ١٨ نوفمبر ٢٠٢٢
أولا انت مش قصير، انت طولك مناسب جدا، وكويس. ثانيا هو لو حد قالك أرمي نفسك البحر؟ هتروح ترمي نفسك في البحر؟ يعني هو مين المفروض يقرر أنه شكلك حلو، شخصيتك حلوة، طولك مناسب؟ كل واحد وله مميزاته الخاصة بيه هو .... هو وبس. المهم انت تكون شايف نفسك ازاي؟ ف واقعيا انت مش قصير اصلا، وحتى لو كنت أقل من ١٧٠ في ايدك ايه ممكن تعمله غير انك تتقبل الواقع، وتحبه كما هو عليه. لازم تدي الحب ده لنفسك، ازاي بتطالب الناس تتقبلك وانت مش متقبل نفسك؟ وانت ذكرت حاجه مهمة جدا، أهم حاجه شخصيتك، اه أهم حاجه شخصيتك فعلا. ومن أهم الحاجات اللي المفروض تبقي في شخصيتك هي الثقة بالنفس، اللي محتاج تشتغل عليها. ثم انت بتقيم نفسك بغيرك على أساس احسن منك في ايه؟ في الطول، هل الطول مستوى تقيس بيه أن الناس التانيه احسن منك. هل انت شايف فعلا أن ديه فكرة عقلانية. أو ممكن تشغل بال أي حد غيرك. الفكرة ديه محدش مشغول بيها غيرك، ولو حد قالك كدا يبقي بيحاول يلعب على ثقتك في نفسك، لانه عارف انك مهزوز للاسف بالموضوع ده.
تم النشر السبت، ١٧ سبتمبر ٢٠٢٢
عايزة اوضح ف البداية .. ده مش وسواس قهري وملوش ادنى علاقة بالوسواس .. الكلمة دي في حد ذاتها مجرد ما تشيلها من دماغك ومتوصمش نفسك بيها في حِمل هيتشال عنك. حاجه كمان، ربنا عزوجل قال ف كتابه الكريم " خلق السماوات والأرض بالحق وصوركم فأحسن صوركم" و "هو الذي يصوركم في الأرحام كيف يشاء" وآيات تانية كتير لما نتدبرها نقول الحمد لله أننا صنيع الله عزوجل وده يكفينا شرفاً ويزيدنا ثقة في نفسنا أن ربنا عزوجل بنفسهل هو اللي صورنا ف الصورة دي .. ف ليه نشغل نفسنا بناس سخفت علينا واعتبرنا كلامهم انه حقيقه؟ وليه ربطت حبك لنفسك بإذا كانت البنات هتحبك أو لا؟ يكفيك إن في بنت كُتبت ليك من زمن الزمن وهتحبك وتتقبلك زي ما انت. آراء الناس فينا ليها حدود احنا اللي بنحطها وحتى لو تخطوها ف بندخلها من هنا ونخرجها من هنا ولا كأننا سمعنا حاجه لأن الشخص اللي بيقولك كده ده هو ذات نفسه عنده عيوب بيحاول يداريها وبيتمنظر بغيرها. بالمناسبة البنات بشكل عام مش بتهتم بالشكل قد ما بتهتم بالجوهر ف متشغلش بالك بالنقطة دي .. ولما ان شاء الله تيجي تتجوز ابقى ساعتها متروحش تختار من الكام بنت اللي اطول من 170 سم لأن البنات متوسط طولها أقل من كده.
تم النشر الخميس، ٨ ديسمبر ٢٠٢٢
هتكلم في حتة الطول اولا دي حاجه بإيد ربنا وما حدش ليه دخل وبعدين طولك ده مناسب جدا وكويس اوي نتكلم في مشكلة خوفك من نظرة البنات اولا كده البنت اللي هتحبك هتحبك عشان شخصيتك مش عشان انتي طويل ولا قصير ولا تخين ولا رفيع وبعدين ركز دلوقتي علي مذاكرتك وشغلك اكتر وسيبك من كل ده واستعز بالله من الشيطان الرجيم معلش حاجه كده هي غتاته شوية بس هتستفيد ايه بالبنات كده عيب 😁
تم النشر السبت، ١٧ ديسمبر ٢٠٢٢
طولك مناسب جدا انت مش بايدك حاجة تعملها متسمعش كلام حد ابعد عن الناس اللي بتهتم بالمظاهر القصر مش عيب وانت اللي خلاك واثق ان البنات بتحب الشخص الطويل مش كلهم والله متقارنش نفسك باللي اطول منك بص للي اقل واقصر منك هتشوف انك في نعمة كبيرة والله .انا مثلاً 155سم يعني علية كانز 😂 ماشية علي الارض وعادي ارضي انت بس وقول الحمدلله على كل شيء تفأل انت بس وشيل الفكره دي من دماغك قول بس الحمد الله وكل ما تفكر في كده قول الحمد لله مره في مره هتحس برضا كبير ومش هيشغلك الموضوع ده تاني مش لازم يعني تبقي شبه النخلة عشان تعجب البنات مش بالطول ولا بالشكل روحك وقلبك هما اللي بيحددوا إذا كنت حلو او وحش
تم النشر الاثنين، ١٢ ديسمبر ٢٠٢٢
عارف الأفكار بتبدأ ازاي ..؟ زي البذرة بالظبط بتزرعها في دماغك او حد بيزرعها لك لو اتمسكت بالفكرة حتي لو غلط و فضل تديها اهتمام و رعاية البذرة بتكبر و تتحول لشجرة عملاقة غول مخيف مزروع في مخك ،قارن نفسك بالاقصرو انت تعرف ان 170 مش قصير و قارن نفسك بكل واحد عنده عاهة جسدية و انت تعرف انك في نعمة
تم النشر الاثنين، ٢١ نوفمبر ٢٠٢٢
عن أبي هريرة قال: قال رسولُ اللَّه ﷺ: انْظُرُوا إِلَى مَنْ هو أَسفَل مِنْكُمْ وَلا تَنْظُرُوا إِلَى مَنْ هُوَ فَوقَكُم؛ فهُوَ أَجْدَرُ أَن لا تَزْدَرُوا نعمةَ اللَّه عَلَيْكُمْ متفقٌ عَلَيْهِ
تم النشر الخميس، ٨ ديسمبر ٢٠٢٢
170وزعلان😂😂 انا مش مصدقه والله احمد ربنا يعم دا نا طولي 160
تم النشر السبت، ٤ مارس ٢٠٢٣
من ضمن الحاجات الي وجعاني اني حاسس نفسي اني ممكن اترفض من واحده عشان مجرد ان طولي مش مناسب ليها واني مها اشتغلت وغيرت من نفسي مش هعرف اغير الحاجه دي خصوصا ان تفكير البنات في حته الطول دي تعباني
تم النشر الخميس، ٨ ديسمبر ٢٠٢٢
اولا 170 طول كويس جدا بالنسبة للشاب لان متوسط طولنا كبنات بيكون اقل من 170 ثانيا مادام حاجة مش في ايدك يبقى فعلا مفيش حاجة هتقدر تعملها ودة اللي محتاج تقوله لنفسك وتردده كتير ويكفيك انك شخصية جذابة .. ياما شباب طوال وشكلهم حلو ومتقدرش تقف تتكلم معاهم 5 دقايق .. مع الوقت هتتقبل نفسك
تم النشر الثلاثاء، ٦ ديسمبر ٢٠٢٢
صح وهي بدات بان كذا حد اتريق ع طولي وبقيت تعبان اوي بسبب الموضوع ده والله ومش عارف اتقبل نفسي
تم النشر الاثنين، ٥ ديسمبر ٢٠٢٢
لعرض السؤال في فدني اضغط هنا