عاوز حل للثقه بالنفس وتقدير الذات لانني معنديش ثقه في نفسي ودا بحد ذاته خلاني ماقدرش اقدر نفسي و التفكير المفرط دمر حياتي للاسف بفكر في كل حاجه سلبيه
الموضوع ده بيحتاج خطوات صغيرة وثابته ومستمرة ...بدون ملل ولا زهق. ١. هنجمع قائمة بالمميزات اللى فى شخصيتك ( سواء الناس بيوصفوك بيها او انت عارفها عن نفسك ) ٢. هنجمع قائمة تانيه بالحاجات اللى كانت وحشة وانت اشتغلت على نفسك فيها وصلحتها او حد نصحك فيها واخدت برأيه وغيرتها او حتى بسبب موقف قررت توقفها . ٣. كل يوم هتاخد صفة واحدة منهم وتكلم نفسك بيها وتعمل مواقف كتير تأكد الصفة دى . ٤. المرحلة اللى بعدها انك هتبدا تشوف صفات تانيه انت حابب انها تكون فيك عشان تكون واثق فى نفسك وتبدأ تتعلمها وتعمل بردوا حاجات تأكدها فى شخصيتك. دايما الحاجات السلبية حاربها بانك تحط قصادها حاجات ايجابية. مثال ( انا جبان عشان مدافعتش عن نفسي....بس انا ذكى عشان حافظت على حياتى واخترت الاهم ) وهكذا
تم النشر الأحد، ٢٦ فبراير ٢٠٢٣
عايزاك تسجل كل الحجات الي انت انجزتها التجارب الصعبه الي مريت بيها وعدتها واللحظات الصعبه واوقات الناس كانت بتشكر غيك وبتعلق عليك تعليقات كويسه وبتشكر ف انجازك ومجهودك سجلها واكتبها عشان تفضل قدامك كل مالافكار دي تجيلك تساعدك انك تعديها وتقاومها كمان بما يخص الافكار الزايده الافكار السلبيه عموما بتبقا عامله زي دخان الحريقه او شويه تراب ف الجو لو حاولت تطفي النار وتهوي المكان الحريقه هتنتهي والدخان هيروح واحده واحده ف افكارك السلبيه جايه من مواقف مريت بيها قبل كده وبدأت تعمم ان كل حاجه مش هتمشي مضبوطه وان كل حاجه بتبوظ مثلا والحل معاها اول مفكره سلبيه تيجي تحاول تناقشها اكتبها ف ورقه سؤال كده مثلا انا شايف اني فاشل ف كل حاجه بتسأل نفسك طيب هو انا منجحتش ف حاجه ف حياتي خالص؟ تجاوب وتقول لا نجحت ف المدرسه ومره رجعت بهديه ومره اهلي قالولي شاطر ومره حققت حاجه نفسي فيها وهكذا يعني انا مش فاشل دي اول طريقه بتناقش الفكره وتثبتلها انها مش صح بعد كده لما بتجيلك بتشتتها بفكره ايجابيه عكسها على طول عشان تثبت لنفسك انك مش فاشل او ان الفكره السلبيه دي مش صح دايما
تم النشر الأحد، ٢٦ فبراير ٢٠٢٣
الاهم.. انك تعرفنا ايه سبب مشاعرك ديه؟ وامتى حسيت انك فقدت ثقتك في نفسك؟
تم النشر الأحد، ٢٦ فبراير ٢٠٢٣
لعرض السؤال في فدني اضغط هنا