كيف أتراجع عن الأفكار السيئة التي برأسي وأتوقف عن التفكير في هذه العلاقة؟

Question

اتعرفت على واحد من فترة كانت حياتى كلها مشاكل حرفيا وعلاقات مع ناس بتأذينى كتيير وهو ساعدني جدا وخلانى بعدت عنهم، وبقيت بشوف مستقبلى ومذاكرتى وكل حاجه، المهم حبينا بعض وجدااا وعملنا علاقة سوا شات وكمان كان فيه صور لاول مرة فى حياتى ، وانا تعبت نفسيا وبعدها هو قالى أنه لازم نمنع ده عشانك وعشان خايف عليا حتى لو هو نفسه فى كدة إلا لو اتخطبنا مثلا او بقى فيه حاجة رسمية، بس انا مش قادرة ابطل افكر فيه واتخيله بجد بحبه اويي ف عايزة اعمل اي حاجة تخليه مبسوط لدرجة انى صورت جسمى وعايزة نعمل تانى، بس فى نفس الوقت هو قالى متعشمش فى حوار الجواز عشان الموضوع صعب جدا عشان اهلنا والمسافة بينا حوالى ١٢ ساعة وف اقرب فرصة يبقى يشوف الحوار ده، وقالى أنه لو هيأذينى يبدأ يبعد بالتدريج بس انا مش قادرة ابعد عنه ومش عارفه اشيل الأفكار من دماغى ازاى، المشكلة أنه حوار الصور ده انا عارفة أنه غلط بس انا مبقتش حاسة بالذنب أو مضايقة ف اعمل ايه غير انى ابعد عنه عشان مش هقدر انا مش بقدر اخد ساعتين تلاتة من غير ما اتكلم معاه وهو كمان كده وياريت لو حد هينصح يبقى من تجريح

Accepted Answer

السلام عليكم ورحمه الله وبركاته تعالي كده نشوف اسباب اللي بيحصل معاكي ده ونبدأ نحاول نحل من الاسباب دي اول سبب هنا انه انا حطيت الشخص ده في مكانه عاليه جدا جدا جدا جدا جدا وحطيته فوق كل حد للاسف الشديد مكانه الشخص ده اتحطت عندي أعلى كمان من مكانه ربنا عندي وهو ده اللي بيكون السبب في انك مش حاسه بالذنب مبقتش حاسه بخوف من ربنا قد ما انا حاسه بالخوف من ان الشخص ده يبعد عني فهنا بقى شخص هو رقم واحد وللاسف الشديد ربنا هو رقم اثنين. وعلشان نحل الازمه اللي عندنا لازم الترتيبة دي تختلف ازاي الترتيبه دي تختلف؟ انا محتاجه اعرف ربنا اكثر زي ما انا قعدت عملت مجهود كبير ووقت كثير جدا وبذلنا ساعات وايام انا والشخص ده بنتعرف على بعض احنا هنا منعرفش ربنا احنا ما نعرفش يعني ايه ربنا الرحيم في نفس الوقت ما نعرفش ربنا الجبار في نفس الوقت ما نعرفش ربنا اللي هيكون وهاب وما نعرفش ربنا اللي هيكون في ايده العذاب وما نعرفش ربنا اللي هيكون في ايده انه هو يحطنا في الجنه او يحطنا النار احنا ما نعرفش مين ربنا ده لانه احنا عرفنا الشخص ده اكتر حطينا الشخص ده في منزله المقدس اكثر وده طبعا ما ينفعش طب ليه الشخص اتحط في المنزله دي لانه جه وقدم لي حاجه غاليه جدا في وقت انا كنت فاقده كل شيء وكنت في حاله سيئة فلذلك انا حطيته في المكانة المقدسه دي طب ما تيجي نبص كده على ربنا ربنا اداني ايه ربنا مديني كل حاجه بقوم بيها الصبح اصلا عشان اكلم الشخص ربنا هو اللي اداني الصوابع اللي انا بكتب بيها على الكيبورد ربنا هو ادى الجسم الطريقه اللي يشغل بيها الصوابع ربنا هو اللي ادى للرئتين بتاعتي الطريقه بتاعت التنفس عشان اتنفس كمان وانا نايمه عشان ما اموتش ربنا هو اللي اداني عيني اللي بفتحها وبقرا بيها ربنا هو اداني عقلي اللي بيشتغل بسرعه جدا جدا فيخليني اعرف اصور صوره وابعتها بسرعه وافكر واتبسط وفي عندي اشارات عصبيه بتخليني اعرف يعني ايه سعاده في هرمونات بتتفرز عندي فتديني السعاده مين اللي عمل كله ده؟ ربنا اداكي اكتر بكتير من اللي الشخص ده اداهولك ده اللي محتاج ان انت تركزي عليه ومحتاجه تشوفي ربنا اكتر وتعرفي ربنا مش بس يعني يا رب ربنا انا اصلي انا بصلي لمين هل انا عارفه ربنا اللي انا بصلي له لا هو انا كده مش عارفه ايه ومش شايفاه بالدرجه الكافيه اللي تخليني فعلا لما آجي اتصرف تصرف اعمل له هو حساب قبل الشخص اللي انا عامله له التقديس دلوقتي ده وخايفه على اني ابعد عنه وما عنديش نفس الخوف من ربنا. فكري في الكلام ده كويس انصحك كتير جدا انك تقرأي في صفات الله كل الصفات مش بس الصفات بتاعه الرحمه والمغفره بكل الصفات وربنا عنده كل الصفات اقرأي في اسماء الله الحسنى اقراي صفات الله، طول الوقت تاملي كده حواليك هو لو ربنا ما ادانيش الحاجة دي حياتي كانت هتبقى عاملة ازاي؟ جربي كده تعملي تمرين مع نفسك، ثبتي صوابعك وخليها متتنيش ولو ربنا كان خلى صوابعنا ما تدينيش حاجه كده هتبقى عامله ازاي حياتك تبقى عامله ازاي هتبداي واحده واحده يتحرك عندك الادراك بتاع جود ربنا قد ايه هو اهم بكتير من وجود اي شخص تاني.

Answer

السلام عليكم، أنتِ طلبتِ إن النصح يكون من غير تجريح وإن شاء الله أكيد محدش هيجرحك، لكن ممكن حساسيتك تخليكِ تحسي إن كلامنا قاسي عليكِ لكن تأكدي إن حتى لو كان الكلام قاسي من وجهة نظرك فده عشان الكل عاوز مصلحتك وشايفين إنك في طريق خطر. وأنتِ فعلا في طريق خطر ولازم تنقذي نفسك منه. ** بالنسبة لمشكلتك فخليني أقول لك، من وصفك لمشكلتك واللي بتحسيه فأنتِ باختصار في حالة إدمان. والإدمان بياخد وقت عشان تعالجيه وأكيد هتحسي بأعراض انسحاب لما توقفي. *** إن شاء الله الخبراء يجاوبوكِ بخطوات عملية لعلاج الإدمان ده لكن على ما يجاوبوا، عاوزاكِ تقعدي مع نفسكِ وتفكري في كم سؤال: هل الشخص اللي بيحب فعلا بيرضى ده للبنت اللي بيحبها؟ هل شايفة تصرفاته معك كانت صح؟ فين حرمة جسدكِ؟ هل يحل له أصلا إنه يشوف جسمك، فضلا عن إنه يكلمك في كلام عادي مش حتى كلام يتخطى الحدود وحرام؟ فين أهلك من حساباتك؟ فكرتِ فيهم والثقة اللي أعطوها لكِ؟ فكرتِ في صدمتهم لو عرفوا؟ والأهم من نفسك وأهلك، فين ربنا من حساباتك؟ فكرتِ لو متِ فجأة وانتِ بتصوري نفسك أو أنتِ بتتواصلي معه وبتعملوا اللي كنتم بتعملوه، تحبي تموتي على كده؟ هتقولي إيه لربنا بقى ساعتها؟ هو قال لكِ متتعشميش بزواج، تمام... إيه نهاية العلاقة دي من وجهة نظرك؟ هتفضلوا في نفس الحكاية؟ ولما أهلك يكتشفوا اللي بتعمليه؟ متخيلة صدمتهم أو ممكن يعملوا إيه؟ قلتِ إنه الشخص ده مش بيأثر سلبًا عليكِ... هل شايفة كل اللي عملتِه واللي لسه بتفكري تعمليه... شايفة كل ده مش تأثير سلبي؟ هل لمجرد إنه بعدك عن ناس كانت مؤذية في حياتك يبقى شخص كويس؟ ليه مفكرتيش إنك أنتِ شايفاه أحسن حد لأنك شايفة صورة مثالية هو راسمها لك أو مرآة الحب عامياكِ أو لأنه كان معكِ في فترة صعبة في حياتكِ فمش قادرة تشوفي غير كده؟ حتى لو الشخص ده ملاك ومحترم ومثالي وهو بس ضعف قُدامك... هل ده كله يمنع إن اللي عملتوه غلط وتكراره هيبقى غلط أكبر وإن ممكن الأمور تتجه إلى كارثة في النهاية لو موقفتيش؟ أول خطوات الحل، تقعدي مع نفسك وتجاوبي على الأسئلة دي بصراحة وتواجهي نفسك بالحقيقة... إجابتك عن الأسئلة هتخليكِ تفكري في كل حاجة تمنعك من الاستجابة للأفكار اللي في دماغك وإنك تكرري اللي حصل. الجأي لربنا عشان يساعدكِ واستغفريه واعترفي له إنك غلطتِ ومحتاجة العون والقوة عشان ترجعي للطريق الصح. *** اللي أنا شايفاه إنك في حالة إدمان، وهو كان غير أمين عليكِ حتى لو انتِ شايفة العكس ولو حتى كان كويس بس ضعف وجرفك معاه للغلط فده لا ينفي إن فيه مشكلة كبيرة. محتاجة تفكري نفسك وتحبيها وتعرفي إن محدش مهما كانت مكانته بقلبك يستحق يشوف ظفر منك إلا بالحلال، غير كده يبقى أنتِ مش عارفة قيمة نفسكِ فعلا. ** ربنا يصلح حالك ويوفقك للي فيه الخير لكِ.

Answer

كلنا بشر وخطائين بس نصيحة لوجه الله هو لو بيحبك فعلا مكنش قبل عليكي الاذي ده وكان هيحافظ عليكي انتي غاليه اوي متزعليش مني بس مترخصيش نفسك علشان حد ما يستاهلش حاولي قربي من ربنا اكتر وادعي كتير ان ربنا يخرجك من الازمة دي علي خير وادعي ربنا انه يخرجه من حياتك واشغلي وقتك بحاجة مفيدة ولو مش عارفة تتخطي الازمة دي لوحدك روحي لدكتور نفسي علشان ميحكمش عليكي وفي نفس الوقت تتطلعي كل اللي جواكي لحد امين حاولي طلعي الناس المؤذية من حياتك حتي لو بتموتي فيهم اتمني الابتلاء ده يقربك اكتر من ربنا ويعينك علي طاعته اتمني انك تخرجي من المشكلة دي في اقرب وقت ممكن 🥰🥰😍😍

كيف أتراجع عن الأفكار السيئة التي برأسي وأتوقف عن التفكير في هذه العلاقة؟

نفسية

اجتماعية

علاقات

سؤال من احد أعضاء فدني

تم النشر الأحد، ٩ مارس ٢٠٢٥

6 إجابة

18 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك