السلام عليكم ورحمه الله وبركاته
أنا طالبه ٣ث يعلم ربنا كمية التوتر والقلق والرعب اللي بعيشها كل يوم
أنا حرفيا ببكي كل يوم بالاربع والخمس والست ساعات، أنا جيت في يوم بكيت سبع بوصل لحالات التشنج العصبي من التوتر
الثانويه العامه مسببالي رعب من وانا في ٦ ابتدائي وانا كنت طول حياتي بحب المذاكره وبذاكر للأسف السنه دي بدأت معايا بدايه مش حلوه
أنا نفسيتي مدمره جدا من اللي بيحصل حواليا، أنا من محافظه في مدارس تتدفعلها فلوس وتغش وحرفيا الاغلبيه العظمي من صحابي فيها وكلهم هيجبوا مجاميع وصعبان عليا نفسي
على فكره اهلي قالوا لي تروحي المدارس دي بس انا موافقتش للأسف وندمانة جدا
اللي حصل معايا من اول السنه تشتت رهيب في المدرسين والكتب وغيرت في كل ماده ييجي حوالي ٥ او ٦ علشان اما مكنتش بفهم او مش بعرف احل
وللأسف لتراكم عليا المنهج من أوله ولا يعتبر حليت ولاحفظت ولو ذاكرت مش بعرف أحل الاسئله مش عارفه انظم وقتي كل ما أعمل جدول يدمر ومعرفش أعمله وانا مرعوبه جدا من امتحان اخر السنه
تنصحوني بإيه أجل السنه ولا أذاكر وامتحن والماده اللي تقف معايا اأجلها مع العلم اني مش مذاكره ولا حاجه وهل لو بدأت هلحق واجيب مجموع ولا بلاش اعشم نفسي وأجل ؟
في البدايه انتي دخلتي السنه مش مركزه مع نفسك وهدفك اصلا تركيزك كان لو مجبتش لو معملتش هما هيجيبوا مجاميع وانا لا وكل دا ضيع السنه منك بس خلينا نرجع لسؤالنا : اعملي الي عليكي في الي فاضل وقسمي المواد كلها واضغطي علي نفسك وطبعا تقدري تلمي كل الي عليكي وتجيبي نتيجه ممتازه بس اول شرط تصلي وتلتزمي بصلاتك وتدعي ربنا غير كدا متستنيش.. وبعدين ذاكري وقسمي موادك وركزي فدراستك وبس واي شيئ تاني متعلق بالنتيجه دا لربنا مش مطلوب منك غير انك تعملي الي عليكي وتركزي فيه وبس واذا في حاجه حابه تتوضح تاني او اساعدك في تخطيط شي اكتبي فتعليق لعلي الله يجعلني سببا في هدايتك وصلاحك.. الخوف يدمر الانسان ويجعله يأزم الامور الخوف هو السبب يلي مخليكي شايفه انك في ازمه وقربك من الله يطمنك ...اسأل الله لكي التوفيق .. لله الامر
تم النشر الثلاثاء، ١٠ ديسمبر ٢٠٢٤
السلام عليكم، بالمناسبة الوقت كاف جدًا للمذاكرة والاستعداد الجيد للامتحانات لكن أهم شيء أن تتوقفي عن الخوف والقلق والتفكير في النتيجة وهل ستلحقين أم لا. كل هذه المشاعر ستجعلك مشتتة وعاجزة عن فعل أي شيء. ابدأي من الآن واستعيني بالله وأنتِ موقنة أنه إن شاء الله لن يضيع عملك ومجهودكِ. الثانوية العامة سنة مثل غيرها وليست هي ما ستحدد مصيرك في الحياة. قومي بما عليكِ وفقط. جددي نيتك من المذاكرة والنجاح وقومي بعمل خطة منظمة ومراعية لطاقتك ويُفضل أن تجعليها مقسمة حسب مواعيد الصلاة، هذا سيجعل هناك بركة في وقتك وفي مذاكرتك. المراجعة المستمرة والمنتظمة مهمة جدًا جدًا وجدًا. المراجعة هي ما تثبت معلوماتك وتجعل استدعائها سهلًا في الامتحانات. لا تؤجلي أي مواد وتوكلي على الله وإن شاء الله ستنجحين بتفوق، لا تقلقي.
تم النشر الثلاثاء، ١٠ ديسمبر ٢٠٢٤
السلام عليكم ورحمة الله وبركاته بصي يا جميل هقولك ب النسبه لخوفك ف دا طبيعي جدا ليه بقا علشان دي السنه اللي انتي هتتحدي فيها مصيرك علشان كدا انتي خايفه هقولك على شويه حاجات كدا وخديهم نصيحه مني وخليكي دايما تسمعي ب ال نصايح إلايجابيه وابعدي عن أي حاجه سلبيه سواء صحاب او اي حاجه اولا تالته ثانوي مش نهايه العالم ومش نهايه المطاف اول حاجه كدا كدا انتي مطلوب منك السعي والنتيجه دي مش بتاعت حد النتيجه دي بتاعت ربنا و دي حاجه مكتوبالك من زمان اوي احنا لسه في ١٢ وانتي امتحاناتك في ٦ حاولي وابدئي مناهجك من الاول وصدقيني هتلحقي بس بلاش تضييع في الوقت مثلا ابعدي عن الفون ابعدي عن أي حاجه تشتتك او تسبب ليكي آذي نفسي وابدئي وحاولي من جديد لما ترجعي للصفر اوعي تقفي مكانك حاولي تاني وتالت وبعدين لازم تحسي ب التعب دا ولازم تخافي ولازم كل دا يحصل اما انتي عايزه توصلي لحلمك ب بالساهل ولا اي بصي مفيش حاجه في الدنيا دي بتيجي بالساهل حرفيا كل حاجه موجوده في الدنيا دي محتاجه جهد كبير اوي ومحتاجه سعي مننا علشان نوصل للحاجه اللي بنحبها ابدئي حل كتير كتير كتير خالص حرفيا لان الثانوي عموما أساسه حل قربي من ربنا كتير اوي على قد ما تقدري صلى و اقرئي وقيام ليل وأذكار وادعي وربنا موجود واتعبي في الست شهور دول و هتلحقي ماتخليش حاجه توقفك ابدا بصي من وجهه نظري انا شخصيا لو مكانك مش هأجل اي ماده ولا هأجل السنه ليه لان كل سنه حرفيا بيطلع ليها قرارات أصعب من السنه اللي قبلها وكدا كدا اللي مكتوب ف الاخر هتاخديه ليه بدل ما اكون خايفه في سنه افضل خايفه سنتين ليه طيب ما انا اخلص مره واحده واسيبها على ربنا واعتبره زيه زي اي امتحان مفيش حاجه بتقف والحلم مش بيقف واللي عنده هدف هيوصل حتى لو اي حتى لو لقدر الله ما جبتيش الكليه اللي انتي كنتي بتحلمي بيها اوعي تقفي مكانك لا تحلمي واعملي هدف جديد منها وابقي حاجه ما تخليش حاجه تقصر عليكي ابدا وخلي بالك انك لو رايحه صامه المناهج كدا لو دحيتي المناهج حرفيا بس انتي من جواكي فين سنه خوف صغيره صدقيني عمرك ما هتعرفي تحلي وهتوتري نفسك وهتنسي شيلي الخوف من قلبك وكل لما تبقي خايفه اذكري ربنا وصدقيني عمره ما هيضيع حد واللي من نصيبك هيصيبك ربنا يحققلك كل اللي بتتمنيه يارب ويجعل حياتك كلها سعاده و2025 تبقا بدايه سنه سعيده عليكي وتحققي فيها كل اللي نفسك فيه وربنا يجبر قلبك
تم النشر الثلاثاء، ١٠ ديسمبر ٢٠٢٤
لية ؟ على اية ؟ اهدى شوية على نفسك وادى مساحة لنفسك .. الواضح من كلامك ان فى حمل كبير شيلاه ، طموح كبير بيحركك ، امال كبيرة من اهلك عليكى .. وانتى خايفة متوصليش لكل دا .. بس ع العكس تماما احنا عاوزين نستغل الخوف دا لصالحنا اكتر ناس بتنجح اكتر ناس بتخاف لانهم بيعملو كل حاجة ممكن تتعمل عشان ينجحو بس ساعات الخوف دا بيقلب ضد .. عادى انك تغلطى عادى انك تنسى عادى انك تحسى بتوهان بس على حسب هتعرفى تستغلى دا ويكون دافع انك تزيدى ف اجتهادك ولا تقعدى وتعيطي كأن ما باليد حيلة ملكيش دعوة بغيرك .. يغش مايغشش انتى مالك ، ليكى نصيب ورزق ربنا كاتبهولك المهم انك تهتمى انك تجتهدى وتعملى الى عليكى وفكك من اى حد اكيد جزاء الى اجتهد وتعب مش زاى الى غش .. انتى مش قادرة تذاكرى لان جواكى مرعوب من انك تفشلى ورافض الحفظ والفهم طب ماتجربى كدا واحدة واحدة واحنا هادين .. غيرى ستاذ واتنين و٣ لحد ماتلاقى الى تفهمى منه عادى الثانوية مش نهاية الدنيااا ومش صعبة والله احنا الى عملنها بعبع .. انتى محتاجة بس شوية ثقة ف نفسك وف امكانياتك وتقدرى تديرى رعبك وخوفك .. متنسيش قدرة ربنا على تغيير الامور ، استعينى بالله وتوكلى علية ، احنا لا نملك فى امرنا شئ.. وتأكدى ان كل الامر بيد الله .. انتى عليكى السعى والاجتهاد وهو عليه التوفيق ..
تم النشر الثلاثاء، ١٠ ديسمبر ٢٠٢٤
وعليكم السلام ورحمة الله وبركاته، عزيزتي، أشعر بقلقك وضغوطاتك الناتجة عن مرحلة الثانوية العامة، وهي مرحلة مهمة ودقيقة جداً في حياة أي طالب. من الطبيعي أن تشعرين بالضغط والتوتر، ولكن يجب أن تتذكري أن لديك القدرة على التغلب على هذه الصعوبات. أولاً، عليك أن تحاولي تنظيم وقتك، لكن لا تشغلي نفسك كثيراً إذا لم تنجح الجداول بشكل مثالي. يمكن أن تكون لديك طريقة أكثر مرونة للدراسة. جربي تقسيم المواد إلى أقسام صغيرة وامنحي نفسك فترات استراحة قصيرة، هذا سيساعدك على البقاء مركزة. ثانياً، عليك التفكير في أخذ كل مادة على حدة. إذا كانت لديك مادة معينة تشعرين بأنها تمثل تحديًا كبيرًا، يمكنك التركيز عليها أولاً، وإذا كنت بحاجة لتأجيلها، يمكنك القيام بذلك بأفضل طريقة؛ يُفضل أن تتحدثي مع معلميك أو مستشار المدرسة حول خياراتك. من المهم أيضاً أن تفتحى قناة للحوار مع أهلك، فهم قد يساعدوك في تنظيم خطتك الدراسية. اتفقي معهم على توقيتات لمتابعة تقدمك ومحاولة الوصول إلى حلول معاً. وأخيرًا، لا تنسي أهمية الدعم النفسي. يمكنك التحدث إلى صديقة مقربة أو أحد أفراد العائلة عن مشاعرك، فهذا سيساعدك في تخفيف العبء النفسي. لا تفقدي الأمل، واجعلي تحصيلك الدراسي هدفك، ولكن تذكري أن صحة عقلك وراحتك النفسية تأتيان في المقام الأول. أنت قادرة على تجاوز هذه المرحلة، والله معك.
تم النشر الثلاثاء، ١٠ ديسمبر ٢٠٢٤
أنا بشكرك جدا والله والكلام دا فوقني بجد وجه في الوقت المناسب شكرا جدا ادعيلي اخلص علي خير
تم النشر الأربعاء، ١٨ ديسمبر ٢٠٢٤
منستهمش
تم النشر الاثنين، ١٦ ديسمبر ٢٠٢٤
مش مشكله أنا فاكراهم
تم النشر الاثنين، ١٦ ديسمبر ٢٠٢٤
هو حضرتك كنت نظام جديد
تم النشر السبت، ١٤ ديسمبر ٢٠٢٤
اقسم بالله أنا مش عارفه اشكرك ازاى يا جدع بجد شكرا ليك جدا جدا جدا جدا جدا جدا أنا والله العظيم في حاله اكتئاب وخوف وتوتر وعياط مش هنسي النصائح دي ابدا واثرت فيا جدا
تم النشر السبت، ١٤ ديسمبر ٢٠٢٤
هعرف أحل اخر السنه يعني الامتحان مهما كان صعب يتحل ولا بيجي صعب جدا
تم النشر السبت، ١٤ ديسمبر ٢٠٢٤
شد حيلك وخلي ثقتك بنفسك كبيرة وبسطي نفسك، وعمرها مكانت بالنوم على الكتب والله، الثانوية العامة عامله زي الضيف التقيل اللي مفيش منه منفعة غير يحرق الدم، فخليكي تقيله زيه ومتوتريش نفسك، واللي انتي فيه دا عادي جدا وطبيعي انا كنت كدا والله وكنت شاطر وفي الاخر مخدتش غير نصيبي في شهر ونص جبت ٩٢ ايام مكانت الامتحانات مقالي مش صح وغلط واختياري، حاولي ديما تركزي وانتي في الدرس بحيث تفهمي الدرس كويس ومياخدش منك غير نص ساعة في البيت مذاكرة، وديما اتكلمي مع بابا وماما واخواتك ومتقفليش علي نفسك علشان متتوتريش زيادة عن اللزم، وزي مقولتلك قبل كدا بأقل مجهود هتنجحي وهتجيبي مجموع حلو والله، بس متفكريش إنك تأجلي والله يابنتي هتندمي ندم عمرك، لما تشوفي زمايلك سابوكي ودخلوا جامعة وانتي لسه بتعيدي الكرة تاني، هما يلبسوا ويخرجوا وياكلوا ويتفسحوا في الجامعة في اي كلية دخلوها وانتي مازلتي مش عارفه تحددي هدفك ولا عارفه هتوصلي ليه، وفلوس خسرتيها كتير وتعب نفسي وجسدي والهم اللي بيكون في البيت ونظرة عيلتك وبلدك ليكي حاجات كتير هتموتك نفسيا والله، استعيني بالله وذاكري ع قد متقدري مش بقولك متموتيش نفسك لا خدي الثانوية دي تسلية اها والله واللي يقولك غير كدا دا حمار، علشان متطلعيش معقدة ونفستيك مدمرة، جبتي طب او اسنان او صيدالة او هندسة كان بيها، مجبتيش افضل كلية من وجهة نظري للبنات تمريض او معهد فني صحي لو لسه التعين بتاعها شغال، بعد كدا كليات التربية تعليم اساسي زي الرياضيات او العلوم او الانجليزي، بعد كدا اسوء الاختيارات كلية أداب قسم إنجليزي تحفة، ونصيحة من اخ اكبر منك ب 10 سنين متدخليش اي كلية خاصة ملهاش اي تلاتين لازمة والله غير فلوس بالكوم وخلاص، وانا مخلص تجارة انجليزي وبقولك مفيش فرق بينها وبين تجارة عربي والله، كله محصل بعضه، شد حيلك وربنا يوفقك ويفرحك بنجاحك، وبإذن الله السنة الجاية تكوني في الجامعة🤲
تم النشر الثلاثاء، ١٧ ديسمبر ٢٠٢٤
أسف ع حذف التعليقات، بس كنت حذفت حسابي، فالتعليقات إتحذفت تلقائيا، لا كنت اخر دفعة في النظام القديم اللي الإمتحانات كانت فيه مقالي مش صح وغلط واختياري، انتوا المفروض بتتدلعوا بموضوع البابل شيت دا والله، اعتقد لو الواحد ذاكر بأقل مجهود ولعب حادي بادي هينجح في المادة فمش مستاهلة خالص إنك تخافي ولا توتري نفسك
تم النشر الأحد، ١٥ ديسمبر ٢٠٢٤
لعرض السؤال في فدني اضغط هنا