السلام عليڪم ورحمة الله وبركاته..
ذڪرت قبل ڪده اني ف ثانويه عامه، طيب دلوقتي أنا بقيلي 5 شهور علي امتحانات الفاينل، والوضع بيزداد سوء، بس أنا مازال عندي شعور اني في حاجه هتحصل السنادي.. عندي احساس قوي ملازمني من أول م دخلت الثانويه اني هعمل حاجه، اني هوصل، برغم مستوايا اللي بينحرف بزياده كل مدي ده، بس أنا واثقه ان ربنا مش هيسبني، وإنه هيڪرمني مش عشان انا أستحق الكرم ده، لأ عشان هو الكريم، الجبار، بس المشڪله مش هنا المشڪله اني مش عايزه اذاكر أصلا، وبعد م قعدت مع نفسي واتكلمت معاها، عرفت السبب، والل. بيتلخص ف اني مش عايزه اذاكر عشان هدفي مش واضح، اه انا عايزه كلية الطب لكن هل انا بموت نفسي عشان كلية الطب، هل أنا مبنمش الليل عشان كلية الطب، هل انا بتعب عشان بوصل لكلية الطب؟.. الاجابه للأسف: لأ و لأ ولأ.
طيب أنا ڪل م أريد معرفته ازاى أحس بخطورة وأهمية السنه الدراسيه دي بالنسبه ليا ولتأثيرها علي مستقبلي ولحياتي الماديه والاجتماعيه وغيره من الامور، عايزه اعرف بجد أهمية حصولي علي درجات عُليا ف السنه دي عايزه اشوف نفسي بعد ماجيب درجات عاليه، واحساسي هيبقي ايه، لأني مجربتش قبل ڪده، جد محتاجه اني اعوز بجد كلية الطب عشان اشتغل ليها بجد، علي سبيل المثال، انا عايزه اطلع عمره السنادي قبل الامتحانات واطلع ماما كمان قبل مني، ومستعده اعمل اى حاجه عشان اطلع واطلع امي، بدور علي المسابقات وبدور علي الشيوخ اللي بيطلعوا وبراجع قرءان عشان استعد، ليه عشان انا بجد عايزه العمره، واهمية وقع اثرها ف نفسي وعلي حياتي، وانها هتنضفني كده من ذنوبي، ف عشان كده انا بشتغل علي نفسي عشان اوصلها ان شاء الله.
ازاى بقا اخلي كلية الطب بالنسبالي كده، تكون حاجه انا عايزاها موت، ومبنمش عشانها؟؟ وأقاوم نفسي عشانها؟
عايزه أعرف لو سمحتوا.... وشڪرًا.
بصي يا حبيبتي عشان تعملي أي حاجة ف الدنيا وتكملي فيها انتي لازم تكوني فعلاً عايزاها من جواكي وفارقة معاكي زي العُمرة كده لو انتي عايزة الحاجة بس اللي هو عادي لو ماتحققتش ماعتقدش إنك هتحاولي فيها بكل طاقتك ومش هتديها وقتك واهتمامك ف أنا عايزاكي دلوقتي تسألي نفسك سؤالين.. الأول هل أنا محتاجة المجموع العالي عشان أدخل بيه كلية الطب تحديداً؟! وللا ممكن أغير رأيي أو حاسة إني مش متأكدة لسة التاني هل لو ماجبتش مجموع حلو ومالحقتش الطب أو كلية عالية من كليات القمة كما يسمونوها هل هزعل وهتأثر وللا عادي مش هيفرق معايا كتير وهدخل أي حاجة تجيلي؟ ولو ماجبتش المجموع ده هل هيكون السبب تقصير مني وللا هبقى مظلومة أو نصيبي واللي ربنا مقدره ليا كده رغم إني سعيت وعملت اللي عليا؟ حاجة كمان ممكن تساعدك ف إنك تحسي بخطورة الوضع او المرحلة دي أو تحسي بالجدية ناحيتها هي فكرة إنها فرصة بين ايدك حالاً واجتهادك فيها وحصولك على مجموع عالي هيتيح ليكي خيارات كتير اوي وانتي اللي هتبقي بتختاري من بينها اللي يناسبك أما لو قصرتي فيها ف انتي بتحدِّي من الاختيارات دي للأسف وبتضيقي ع نفسك واحتمال كبير تحسي وقتها بالضياع والحيرة ف إنك تختاري طريق هتضيعي فيه كام سنة ممكن ف الآخر يطلع مش ده اللي كنتي بتدوري عليه أو هتحتاجي تتعبي كتير اوي وتتحملي مصاريف وتكاليف إضافية عشان تتعلمي مجال معين من اختيارك مش محتاج شهادة جامعية على حسابك الشخصي وتاخدي فيه كورسات او شهادات عشان تلاقي شغل يريحك ودخله كويس... إلخ لو أدركتي أهمية المرحلة اللي انتي فيها وإنها سنة واحدة بس ممكن تختصر عليكي طريق طويل بعدين وتفتحلك فرص كتير أكيد هتبدأي تديها وقت وجهد بإخلاص ((لازم تقعدي مع نفسك بجد وترشحي أفكارك لأن انتي صاحبة النية والقرار والاقتناع لو ماكانش منك عمرك ما هتاخدي خطوة ولا هتعملي حاجة))... وآخر حاجة حابة أقولهالك ليه ماتعمليش اللي عليكي وتتقني عملك ومذاكرتك السنة دي لمجرد إن ربنا بيحب إذا عمل أحدكم عملاً أن يتقنه.. استحضارك للنية دي صدقيني هيفرق جدا جدا ف نفسيتك وهيخليكي تتعلمي الإتقان ف أي حاجة ف حياتك عموماً وخليكي عارفة إن استثمارك في حاجة زي دي دلوقتي أو استثمارك ف تعلم طرق المذاكرة والحفظ والفهم والتذكر وكل ده هيفيدك ف أي مجال وأي مكان هتكوني فيه ف أي وقت ودايماً هيوصلك للنجاح المضمون وده بجد مش كلام دي حقيقة واقعية لأن كلنا من صغيرنا لكبيرنا ماينفعش نوقف نتعلم ونذاكر طول ما احنا عايشين لأن الدنيا بتطور وكل يوم بيبقى في جديد لو مش بنتابع التطورات دي ونذاكر مش هنقدر نواكب التطور ونوصل لأماكن أعلى ونترقى ونتميز ونحقق نجاحات ولو بدأتي الطريق ده من دلوقتي صدقيني هيفرق معاكي ف مرحلة الكلية والشغل وكل مراحل حياتك جربي ومش هتخسري وعذراً على الإطالة ♥️
تم النشر الاثنين، ٢٣ ديسمبر ٢٠٢٤
تمام احنا ممكن نتكلم ف كام نقطة : انتى ليكى هدف ( كلية الطب ) دا واضح بالنسبالك وموقنة بية ١٠٠٪ وان انتى عاوزة دا لانك حابة دا ونفسك تحققية لنفسك انتي+ رغبة والديكِ … الهدف مطلوب ليه طريق للوصول .. الطريق دا الى هو المذاكرة والاجتهاد .. احنا هنا مشكلتنا تكمن فى " السعى " للهدف دا .. انتى مش حاسة انك بتعملى الى عليكى وزيادة عشان توصلى مع انك عارفة انك لازم تجتهدى اكتر من كدا .. تمام انا مش هفكرك بحاجات انتى اكيد عارفها من حبك للكلية ونظرتك ليها ومساعدتك للناس والنجاح المعنوى لما تحسى انك دكتورة اكيد كل دا عرفاة اكتر مننا .. وانا شايف انة مش حل - يعتبر حل مؤقت - لو قعدنا نحفز فيكى شدى حيلك وموتى نفسك مذاكرة وافتكرى البالطو الابيض واول كشف ليكى والكلام دا .. هو حلو بس لفترة قصيرة حلنا هنا اننا نشتغل ع الانظباط الذاتى .. افتكرى دايما ان اول عدو لنجاحك مزاجك .. زاى دلوقتى مالكيش نفس تذاكرى بس حاسة بالتقصير مهو كدا مش هنوصل لحاجة .. محتاجة انك تذاكرى سواء متقبلة او لا لان دا الصح اولا وان ليكى هدف ثانيا ..طبعا دا مابيجيش مرة واحدة لازم تعود .. ومحتاجين نعلى الارادة شويه .. هاتى ورقة واكتبى عليها بخط كبير - جايلك ياطب واحذرو مني يادكاترة العالم - وعلقيها ع المكتب عندك .. خلى هدفك قدامك دايما دا هيحفزك جدا وكل ماتركنى وتشوفيها هتفتكرى هدفك .. متبصيش للهدف ككل مرة واحدة عشان حقيقى يخض ! اى حد .. متقعديش تفكرى فيها كتيير دى كليه الطبببيب اعععهع ونا مش بعمل الى عليا فهيجيلك احباط حضرتك .. فهتحسى انو حمل تقيل فهنركن للاسف .. انتى قبل كلية الطب ليكى اهداف صغننة دى الى اشتغلى عليها الاول وحاجة ورا التانية لحد ماتوصلى .. يعنى عندى مادة هيا جزء من الطريق الى الهدف اذاكر واجتهد فيها وامتحن وانجح .. كدا هتوصلى .. متذاكريش عشرين ساعة ف اليوم ولا تسهرى طول الليل ولا تمشى ورا اسطوانة فيلم الثانوى التعبانة دى .. انتى نظمى وقتك ونظمى نومك وهتلاقى الدنيا ماشية من غير اى مشكله .. نقطة اخيرة ودا رأي الشخصى .. ماتربطيش نفسك وتتعلقى بحاجة - كلية الطب- وارد متوصلهاش احنا مش ضامنين حاجة .. فمتخليش عليكى عبأ وضغط وانتى بتذاكرى كفاية المواد .. انتى اعملى الى عليكى واجتهدى لنفسك وكله خير واهم حاجة الثقة فى الله وربنا يوفقك يادكتور
تم النشر الاثنين، ٢٣ ديسمبر ٢٠٢٤
وعليكم السلام ورحمة الله وبركاته، حَـفـصـه مُحمد. أفكّرك بأنك في مرحلة مهمة جداً من حياتك، وعلي الرغم من التحديات التي تواجهينها، فهذا أمر طبيعي جداً يمر به الكثير من الطلاب في الثانوية العامة. شعورك بأن لديك هدفًا ولكنك تجد صعوبة في تحقيقه يُعتبر تجربة شائعة للغاية. لكي تشعري بأهمية حصولك على معدل عالي في الثانوية العامة، من المهم أن تراجعي أهدافك وتحددي سبب رغبتك في الالتحاق بكلية الطب. إليك بعض الخطوات التي يمكن أن تساعدك في ذلك: وضحِي أهدافك : اجلسي مع نفسك وضعي قائمة بالأسباب التي تجعلك ترغبين في دراسة الطب. اسألي نفسك: ما الذي يجذبك إلى هذا المجال؟ هل هو حبك لمساعدة الآخرين؟ أم الفضول العلمي؟ تلك الأسباب يمكن أن تعطيك دافعًا قويًا. تصورِي المستقبل : تخيلي نفسك بعد أن تنجحي في تحقيق معدل عالي وقبولك في كلية الطب. كيف ستشعرين في تلك اللحظة؟ كيف ستؤثر تلك الخطوة عليك وعلى عائلتك؟ رسم الصورة الإيجابية لمستقبلك يمكن أن يكون دافعاً قوياً. تحدِي نفسك : حاولي وضع أهداف قصيرة المدى، مثل دراسة فصل دراسي كامل بتصميم معين أو إنهاء مادة معينة. كلما حققت أهدافًا صغيرة، زادت ثقتك بنفسك وزادت دافعيتك. استثمري في روحانية العمرة : كما ذكرت، الذهاب للعمرة سيكون له أثر عظيم على نفسك. اجعلي العمرة وسيلة لتنقية قلبك ورفع معنوياتك. يمكنك أن تقومي بعمل نية الدعاء خلال العمرة حتى تُزيدي من قوة إرادتك في الدراسة لتحقيق أهدافك. الجئي إلى والدتك : تحدثي مع والدتك عن مشاعرك وأحلامك. قد تجدين لديها الدعم والإلهام الذي يمكنك أن تستلهمي منه. ابحثِي عن مثلك الأعلى : استمعي لتجارب الأطباء أو الطلاب في كلية الطب وكوني على تواصل معهم. تعرفي على قصص النجاح التي قد تُلهمك. تذكّري دائمًا أن الحياة مليئة بالتحديات، ولكن بالإرادة والمثابرة يمكنك تجاوز أي عقبة. اجعلي من السنة الحالية فرصة لتثبتي لنفسك ولعائلتك أنك قادرة على تحقيق أحلامك. وفقك الله وسدد خطاك إلى ما فيه الخير.
تم النشر الاثنين، ٢٣ ديسمبر ٢٠٢٤
لعرض السؤال في فدني اضغط هنا