لو سمحتم أنا حاليا فى تالته ثانوى وقررت إنى أقسم السنه وخلاص قسمتها لأنى حصلت عندى أزمه نفسيه كبيره قبل دخول تالته ثانوى بحوالى نص سنه وهى فقدان والدى رحمه الله فتوقفت الحياه فعينى ودائما كنت يتظاهر إنى بخير للناس علشان محدش يشيل همى وعشت فى أكتئاب حاد لمده سنه ونص ودخلت تالته ثانوى وأنا مش مستعده خالص وتعبانه نفسيا وفاقده الشغف والثقه بالنفس وخدعت نفسى وضغطت عليها تذاكر وتجتهد بس للأسف كل ده كان بيجيب معايا نتيجه عكسيه وضغط الناس عليا فى الوقت الغلط وضغط. كمان على نفسى خلى الأمور أسوء بكتير وحاليا فاضل على أمتحناتى شهر وأنا المفروض معايا مادتين السنه دى بعد ما أخدت قرار قسم السنه حسيت بتفاؤل كبير وأقبلت على الحياه بشكل كبير بس لسه فى خوف جوايا من ناحيه الدراسه تانى بتهرب منها طول الوقت لأنها بتفكرنى بوجع كبير لسه متعافتش منه كليا وبفكر دلوقتى أخلى المادتين دول للسنه الجايه كمان علشان أرحم نفسى من التعب والخوف الحالى وأعرف أختم بيها لأنى بسبب أكتئابى فتره طويله صحتى تعبت جدا مع العلم إنى كنت من المتفوقين قبل حدوث صدمه وفاه والدى معايا وكمان مع العلم إنى كنت متعلقه بيه جدا فممكن حد يفيدني فى أخلى المادتين السنه الجايه أو لأ لأنى بصراحه خايفه يكون قرار غلط أو إنى بستسهل إنما يعلم الله إنى فعلا غير قادره على الدراسه حاليا أينعم حالتى النفسيه تحسنت كتير عن الأول بس لسه بتهرب من الحاجه اللى مربوطه عندى بماضى مؤلم بلأخص بعد ما ذقت طعم الراحه النفسيه بعد مده ومش عايزه أخسره تانى أرجوكم شورو عليا
انا شايفه إنك تدخلي المادتين دول عشان السنه الجاية تتفرغي لبقيت المواد ومتضيعيش تعبك فيهم السنادي والحمدلله إن نفسيتك بقت أفضل السنادي .. عندك من هنا لحد الإمتحانات ركزي في المذاكره والمراجعة وحل الأسئلة والإمتحانات لحد ليله الإمتحان ووقتها هتقدري تقرري هل إنتِ مستعده ولا لا
تم النشر الأربعاء، ٨ مايو ٢٠٢٤
من رأي انك تتدخليهم وتتغلبي علي الخوف ومضيعيش وقت تاني عارفه ان النفسيه بتأثر علي كل حاجه بس الواحد لو مشي ورا نفسيتو هيضيع ف حاولي انك تقوي وتتغلبي كل ده واكيد باذن الله لما تاخدي خطوه وتيجي بنجاح معاكي هتفرحي وهتفرحي اقرب الناس ليكي ف فكري حلو وخير باذن الله اتمنالك التفوق ياارب ♥️♥️
تم النشر الأربعاء، ٨ مايو ٢٠٢٤
لعرض السؤال في فدني اضغط هنا