انا مخطوبه لابن خالتي ..
علاقتي انا وهو عبارة عن أننا بنصحي نتكلم ونهزر و مجرد اهتمام بيه و بتفاصيل يومه و شغله و تعبه و عمره ما اهتم بيا
بل بيقلل من مشاكلي لو حصلت مشكله معايا في البيت وانا مخنوقة و محكيش يفضل يزن عليا لحد ما أحكي وبعدين يستهزأ بمشاكلي و كتير عملها عمره ما حسسني أنه سند وامان ليا دائما حاطط كل الأنظار عليه هو وانا مجرد ظل عمره ما حسسني أنه بيخاف عليا و بيحبني
علطول قاسي و بياع انا ال دايما بصالحه انا ال دايما براضيه حتي لو غلطان فحقي لسانه طويل و علطول بيشتم و بيسب الدين و تتخيلوا كل مشاكله معايا ايه؟
اني قفلت منغير ما أعرفه اني هعمل حاجه
اني نزلت و نسيت أقوله أو كنت مستعجله
اني نزلت صوره أيدي
اني عامله فولو لبلوجر رجاله كبار صحاب محتوى مش ناس هايفه أو ممثلين رجال أو حتي لبيدجات كبيره
انه عاوزني أقوله حاضر و نعم بس مش عاوز يسمع غيرهم و انا ماليش حقوق مليش حق ازعل و اتقمص وهو ميراضينيش وبخاف ابين اني زعلت ليسيبني..
انا بحبه و مراهنه عيلتنا كلها احنا كبار مش صغيرين هو ٢٥وانا ٢١ هو مش عاوزني حتي اكمل تعليمي عشان هو معاه دبلوم بس وعاوزني ابقي زيه بشهاده الدبلوم بس مع اني مجموعي جايب كليه ز انا اتنازلت و قعدت و اختارته هو..
عمره ما فكر يسمعني ومبيثقش فيا برغم أنه عارف اني كويسه و عمري ما كلمت شباب ولا حتي حبيت
و لما بيسيبني و يبعد مش بكلم ولا بفكر ادخل حد حياتي حتي لو رسمي
عكسه تماماً مجرد ما يسيبني بيكمل حياته و يرتبط و يصاحب ..
انا عندي مشكلتين اني مبعرفش اطلع ال ف قلبي و اعبر عنه بسببه بسبب أنه عمره ما حسسني أنه حمبي وبيسمعني و تاني مشكله أنه خلاني حاسه اني قليله برغم اني جميله و حقيقي شباب كتير تتمني حتي أوافق علي رؤيه شرعيه منهم وأني ادي فرصه بس محدش لمس قلبي غيره برغم قسوته و بروده و بيعانه
دا انا كنت يتحايل عليه بقوله بالله عليك انا هعمل كل ال يريحك بس خليك حنين عليا
انا زي ما قولتلكم كل مشكلته معايا اني بقفل و مش بقوله أنا بعمل اي بس دا مش بيتكرر كتير يعني فجاه ماما تعبت أو بابا ناداني أو انشغلت في حاجه هو عاوزني ٢٤ ساعه أكلمه و أفضل موجوده و انفذ كل طلباته بدون نقاش ولا حتي اني أسأل
انا مش عاوزة اخسر نفسي ومش عاوزه اخسر كل حاجه اعمل ايه ..
السلام عليكم ورحمة الله وبركاته. لو هوا فعلا زي ما بتقولي كدا فده أصلا لا يصلح لأي حاجه لازم تعرفي إنك دلوقتي بتختاري شريك يكمل معاكي طول حياتك يشاركك حزنك قبل فرحك يقف جمبك ويبقا سند ليكي بعد أهلك شخص يكون أب صالح لأولادك وزوج صالح ليكي لازم تعرفي إن ده من أهم القرارات في حياتك فماتخليش مشاعرك تعميكي عن الحقيقه لو إنتي مكمله معاه بحجة إنك بتحبيه فالحب ده هيختفي من أول سنه وهيتولد بداله كره وهتندمي إنك ما فكرتيش بطريقه سليمه إنتي بتقولي إنه بيسب الدين معني كده إنه غالبا ما بيصليش يعني أصلا علاقته باللي خلقه سيئه وبيقلل من مشاكلك وعاوزك طول الوقت متفرغاله وخلاكي تفقدي ثقتك بنفسك يأختي دي علاقه سامه هتطلعي منها خسرانه كل حاجه حتي نفسك إنتي متوقعه إزاي إن شخص زي ده هيسعدك نصيحتي ليكي فكري كويس وإعرفي إنك بتختاري شريك ليكي وأب لأولادك فرجعي نفسك وإستخيري ودوري علي الرجل صاحب الدين والحب ده بييجي مع العشره. ربنا يرزقك بزوج صالح يصب عليكي الحب صبا صبا وعابدا لله.
تم النشر الخميس، ١٣ مارس ٢٠٢٥
كل الحاجات دي وانت مكملة وعايزة حل "عايزة تراضيه" محتاجة تقفي مع نفسك شوية وتفكري بعقل وتشوفي ايه اللي مش هتقبليه فيه مهما طال بينكم الوقت وايه ممكن تعديه وبعدها تقرري
تم النشر الأربعاء، ١٢ مارس ٢٠٢٥
السلام عليكم، خليني أسألك بجد، بعد كل اللي حكيتيه ده... إيه اللي مخليكِ مكملة مع الشخص ده؟ متقوليش بحبه. أنتِ لسه صغيرة، 21 أيوه صغيرة وحرام تضيعي عمرك كله على إحساس غلط لأن الحب عمره ما كان يتوافق مع خسارة الكرامة. اللي انتِ فاكراه حب ده لو كلمتِ وتزوجتِ وفضلتِ في نفس الحياة دي هيقلب كره ومش هتكوني طايقة نفسك ولا طايقة الشخص اللي افتكرتِ إنك بتحبيه. ** ملحوظة أهم من اللي فات، أنتِ بتقولي بيسب الدين، عارفة؟ الجملة دي لوحدها كفيلة تكون سبب تقطعي علاقتك بالشخص ده مهما كان حبك له. سب الدين كفر لو متعرفيش. https://www.islamweb.net/ar/fatwa/123958/حكم-من-صار-سب-الدين-عادة-له يعني انتِ دلوقتي بتخاطري تتزوجي شخص أصلا هو خرج من الملة... غير أصلا ترضي إزاي ده يكون أب لأولادك بعد كده؟ ** أنتِ شايفة نفسك قليلة عشان ترضي بكل ده؟ على فكرة أنتِ عارفة من جواكِ إيه الإجابة وإيه النهاية اللي لازم تختاريه للعلاقة دي. من كل الكلام اللي قلتِه أنا مش شايفة غير علاقة توكسيك. وعلامات الإنذار والريد فلاجز بتقول لك فوقي لنفسك محدش هينفعك لما تدمري نفسك. ** محتاجة تقعدي مع نفسك بجد وتفكري وتحطي السلبيات والإيجابيات (اللي أنا الحقيقة مشفتهاش في كلامك) وقارني وشوفي انتِ هل ده يستحق يكون شريك حياة وهتآمني على نفسك معاه ولا لأ. ربنا معك.
تم النشر الأربعاء، ١٢ مارس ٢٠٢٥
كفاية دمار .. مش هيتغير .. اقطعي العلاقة
تم النشر الخميس، ١٣ مارس ٢٠٢٥
ده مستقبلك وانتي اللي هتحددي اذا كان كويس او لا
تم النشر الخميس، ١٣ مارس ٢٠٢٥
وهو دا شخص يتحب اصلا دا عايز يتعالج وانتي هيطلع عينك معاه لما تتجوزي وابقي قولي حب وبتاع الرسول قلنا نختار صاحب الدين مش واحد كافر بيسب الدين اسلوبي وحش عشان انتي بايعه نفسك وهتلبسي ف حيطه فنصيحه فكك منه ودوري ع اللي يقدرك ويصونك
تم النشر الخميس، ١٣ مارس ٢٠٢٥
واحد بيصاحب ويرتبط وهو خاطب وبتقولي عليه "كبير" ؟؟
تم النشر الخميس، ١٣ مارس ٢٠٢٥
يعني مجرد ما انا ببعد يبدأ هو يدور علي بديل واول ما انا ارجع بيبعد عن الطرف التاني و كل مره لازم أحذره و أقوله أنه كده بياذي أشخاص ملهاش ذنب وأنه محتاج يتعالج لأن مفيش شخص طبيعي بيعمل كده
تم النشر الخميس، ١٣ مارس ٢٠٢٥
يعني إيه (مجرد ما يسيبني بيكمل حياته و يرتبط و يصاحب )؟؟
تم النشر الخميس، ١٣ مارس ٢٠٢٥
لول فعلاً عندك حق ،بس دا مش موضوعنا (متعلمش الغرقان ازاي يعوم) ازاي أحل مشكلتي دي
تم النشر الأربعاء، ١٢ مارس ٢٠٢٥
مفيش حد عارف ضوابط الخطبة بيقعد يكلم خطيبته ٢٤ ساعة في اليوم زي ما أنت كاتبة إلا لو كنتم بتحاولوا تحلوا مشاكل العالم بداية من الصراع الروسي الأوكراني ومشكلة تغير المناخ
تم النشر الأربعاء، ١٢ مارس ٢٠٢٥
معامله متزوجين ازاي ؟ انا مش بخرج قدامه منغير حجاب ومفيش تلامس ولا كلام خارج أو حتي هزار خارج مجرد علاقه عاديه في حدود الدين و مش بخرج معاه ولا حتي بقعد جنبه احنا عرب وعندنا تقاليد و عادات و مينفعش حتي اني أكلمه بعد المغرب ..
تم النشر الأربعاء، ١٢ مارس ٢٠٢٥
انتم الاثنين محتاجين تتعلموا ضوابط الخطبة الشرعية لأنه بيعاملك معاملة المتزوجين!
تم النشر الأربعاء، ١٢ مارس ٢٠٢٥
لعرض السؤال في فدني اضغط هنا