معظمنا مرينابنفس تجربتك بس الحياة فيها اشياء كتير حلوة بس.انتي لسة ماكتشفتيش كل اللي فيها عشان تحكمي دلوقتي انك تعبتي منها خلي عندك ثقة في ربنا وفي نفسك و دوري على حاجات تكون بتبسطك واعمليها "حبي نفسك اكتر"
تم النشر الأربعاء، ٤ يناير ٢٠٢٣
ليه شايفة ان طالما حلم ضاع، يبقى خلاص نهاية الدنيا؟ ليه متحلميش حلم تاني؟ ليه حياتك متمركزة على حاجة واحدة ومش شايفة غيرها؟ طيب ما تفتحي عينك ... جربي مش هتخسري حاجه لو حاولتي؟ مش يمكن اختيارات ربنا ليكي تكون احسن من اختيارك! يمكن ..! يمكن تكون حكمة ربنا في كليتك الحالية احسن من حلمك القديم! مش كل حاجة نفسنا فيها هتحصل زي ما احنا عايزين .. هي ديه القاعدة .. هي ديه الحياة. اوقات بنكون محتاجين نستسلم لحكمة الله ... مذاكرة الكلية غير ثانوي او اي مرحلة قبل كده .. معرفش انتي في كلية ايه الحقيقة .. ولكن ادخلي على اليوتيوب هتلاقي فيديوهات كتير عن طرق عديدة للمذاكرة .. وهتلاقي كمان ناس كتير بتتكلم عن كليات معينة وازاي تذاكري المواد وهكذا. شوفت في كومنتاتك .. ان كليتك مجالها كويس جدا .. ف ليه متحاوليش؟ خلي اهدافك في احتياجاتك .. وخليكي ذكية، يعني ايه؟ يعني دلوقت العالم بيتغير .. المنطق بيقول ان الاولوية ان الواحد يدور على احتياجاته في الشغل .. مش يقول انا بحبه ولا مش بحبه! لأ .. فرضنا دلوقت ان في خلال ال 10 سنيين الجاين الشغل اللي بتحبيه اصبح مثلا مش موجود .. وارد فعلا ... وفيه شغل كتير هيختفي. هتقولي ايه ساعتها ... وقتها هتبقى مضطرة انك تشتغلي الشغل للي موجود او هتتعلمي الحاجة المتاحة واللي هتكفي احتياجاتك. اما بالنسبة لجزء الصحاب .. والدكاترة انتي ليكي عندك الدكتور ايه والدكتور ليكي عنده ايه غير الالتزام والامتحانات والمحاضرات ... بس كده ليه حيرانه؟ اما الصحاب .. فيه ناس بتتخرج من الكلية وهي معهاش اي صحاب .. فيه ناس ممكن تعمل صحاب او سنة او اتنين وفجأة تحصل مشاكل ويسيبوا بعض. فيه ناس ممكن متعملش صحاب في الكلية وتعمل في الشغل. موضوع الصحاب ده نسبي جدا .. ومعادلة صعبة انك تحددي وقتها هيبقى امتى وازاي وفين؟ لان وارد جدا متلاقيش حد مش شبهك دلوقت .. ما عليكي غير الصبر .. مدوريش عليهم هما هيجيوا لوحدهم. ركزي في اللي معاكي حاليا واللي متاح قدامك علشان تكسبي. أما بالنسبة لعلاقتك بربنا ابدأي واحدة واحدة .. ايه رأيك تكلميه ؟ كلميه .. لما بقى محتاجة تكلميه .. اهملي مثلا مذاكرات (حديث مع الله) مثلا .. أظن انه الوحيد اللي نقدر نقوله على كل حاجة واي حاجة. ابدأي تتصدقي مثلا بجزء من مصروفك حتى لو بسيط .. ابدأي في الصلاة حتى لو قصرتي في يوم .. متزعليش وعدي وابدأي من جديد .. متجلديش نفسك وابدأي تاني .. متسبيش دماغك للشيطان.
تم النشر الثلاثاء، ٣ يناير ٢٠٢٣
انتى وصفتيها بنفسك الروح تعبانه لان علاقتك بخالق الروح ضعيفة الحل قدامك اهو ....اشتغلى على علاقتك بربنا كويس اوى عشان تقدرى تكملى الباقى. اللى حصل حصل ...اهم حاجة متكرريش الموضوع وتخسرى تانى فى مرحلة تعليمية جديدة بتوهان جديد. كل اللى انتى فيه نكران للى حصل ونفسك تصحى من النوم فى يوم وتلاقى مفيش مشاكل من دى حصلت....بس محتاجين نتعامل مع الواقع ونكون محددين ممكن نتصرف فيه ازاى.. الكلية مش عاجبانى ...ايه الحلول المتاحة؟ اغيرها وانقل كلية تانيه. اشوف الكلية دى فيها ايه ممكن يناسنى واكمل. اكمل فيها وادرس حاجة تانيه اتجاه تانى عن طريق الكورسات. محتاجين ترتيب وكله هيبقى تمام ان شاء الله
تم النشر الثلاثاء، ٣ يناير ٢٠٢٣
حاولي تعملي حاجه بتحبيها زي هواية مثلا و هي هترجعلك شغفك تاني و تتكلمي مع ناس مروا بتجربتك هتستفادي كتير منهم
تم النشر الجمعة، ٦ يناير ٢٠٢٣
معنديش هوايات للاسف دى مشكله كبيره اوى بالنسبالى ومديقانى كنت بلعب طايره بس بطلت من اربع سنين تقريبا ومش عارفه ارجع وصعب وكنت بعزف بيانو وكرهته فجاه بدون سبب ...كل لما اتكلم مع حد يقولى ارضى وكملى وانا خلاص اتحطيت ف الأمر الواقع بس عملت خطه دلوقتى ويا رب اعرف أمشى عليها واحقق الهدف اللى انا حطاه وف دماغى ...دلوقتى مفيش شغف خالص بس بعافر وبحاول بردو بس مفيش شغف
تم النشر الجمعة، ٦ يناير ٢٠٢٣
لعرض السؤال في فدني اضغط هنا