ازاي اعرف اوصل للتفكير خارج الصندوق
وهل من وجهه نظر حد فكره خارج الصندوق دي ممتعه
مع العلم اني مش فاهمه ازاي افكر بره الصندوق دي بالنسبالي سؤال غريب !!
محتاجه اعرف اعمل ايه عشان اوصل لخارج البؤره الروتينيه ؟
سؤالك رجعني لعام 2019 لما كنت بدرس صحافة، وكان في سيشن في المنحة ديه عن السؤال الشخص العادي والغير عادي. في الحقيقة مكدبش عليكي كنت وقتها تبع الانسان الغير عادي، لأن كان في اعتقادي أنه إنسان مميز جدا، "غير عادي" في كل حاجة. لكن بعد كده التفكير اتغير كتير، وشاركت التجربة بعدها بعام على إحدى مواقع التواصل الاجتماعي. هشاركه معاكي. في يوم من الأيام كنت بدرس صحافة، وفي يوم من أيام الكورس الدكتور كان بيشرح حاجة لطيفة جدا، تكاد تكون من أكبر الإشكاليات الموجودة في المجتمع على الأقل بالنسبالي. كانت المحاضرة ساعتها عن الإنسان العادي، والإنسان الغير العادي. الإنسان العادي هو اللي بيعمل كل حاجة عادية يروج شغله العادي ويرجع بيته لمراته وعياله ويتكلم في نفس الكلام العادي، يعمل كل اللي بيعمله كل يوم عادي، حياته مفيش تجديد، كله عادي في عادي. أما بقا الإنسان الغير عادي، هو الإنسان اللي ديما فيه جديد في حياته، اللي ديما بيفكر تفكير غير عادي، اللي عايز ديما يعمل كل حاجة غير عاديه، اللي بيعمل شيفت كارير، اللي لما يحصل تريند مثلا في شغل معين، لازم يكون من أصحاب الشغل الجديد، حياته جديد في جديد، ومميزة بشكل غير عادي. ساعتها كانت نظرتي في الأمر تكاد تكون ضيقة الأفق شوية .. بمعنى! أني بطبعي حد مبيحبش التكرار، أو الملل، وعايز يعمل اللي هو عايزه، وكان بالنسبالي الإختيار الذي أميل ليه هو الإنسان الغير العادي، لأني بكره الحياة الروتينيه بشكل غير عادي.! بعد شوية وقت كبير جت نفس الحكاية ولكن شخصية شرحتلي فديو مقارنه ما بين الإنسان العادي، والغير عادي. حاجة جوايا ساعتها أتغيرت ولقيتني بعد مرور عام على المحاضره لقتني بفكر بعمق شوية وزادت عندي أسئلة تانيه، وتفكير تاني، غير اللي كنت فيه من سنة. للمرة الثالثة كنت بتناقش مع حد في موضوع ما وفتحنا النقاش في الموضوع ده .. لقتني بقول كل التفاصيل اللي جوايا اللي حددت كمان جهة تفكيري من جديد. هل الإنسان اللي عايز يكون غير عادي بيواجه ضغط..! طيب الضغط ده مين اللي وراه..! مين اللي بيحدد مصيرك..! مين اللي بيحدد تعمل ايه ومتعملش ايه.. لأ وكمان مين اللي بيحدد انك لو عملت الحاجة الفلانيه هتبقي شخص مبسوط وسعيد .. وساعتها بس هتكون ليك قيمة بجد..! مين اللي بيحدد شغلك .. الترند.! مين اللي بيحدد تعليمك .. المجتمع.! مين اللي بيحدد شغفك.! مين بيرمي ليك الصنارة اللي فيها الطعم.. وانت تفرح وتتشقلب بيه وكأن ايه... وتجري عليه وتلبس.! مين اللي بيحدد ليك كل رسمة في حياتك وأنت بس عليك تحط التاتش الأخير وتلون... اهو بيسبوك على الأقل تلون.. علشان بس تحس أنها بمزاجك برده.! وجهة نظري دلوقتي مبقاش فيها أي تمييز.. سواء ما بين الإنسان العادي أو الغير عادي.. لأن المصطلحين دول أعترض عليهم أنهم يكونوا موجودين من الأساس.. معترضة على أن أي حد يحدد أصلا أنت المفروض تحس ب ايه.. او متحسش ب ايه.. معترضة انهم يعملوا ليك معيار وتحديد لكل شئ في حياتك. لأن ساعتها هتكون مجرد طحونة دايرة مع اللي داير.. وخلاص.! مش مهم بقي تحس إنك مبسوط ولا لأ.. مش مهم بقي تحس هو ده اللي أنت عايزه ولا لأ.. مش مهم تحس أنك فعلا حابب اللي بتعمله في حياتك ولا لأ..! مش مهم أي حاجة غير للي عاوزينك تمشي زي ما هما ماشين وبس! الكل دلوقتي بيقول على البزنس، وال ستارت اب.. طيب فعلا انت عايز كدا ولا بمجرد ما الترند طلع انت معاهم.! لأننا ساعتها مش بنشوف نفسنا عايزة ايه.. احنا بنشوف ايه متطلبات المجتمع الكريم عايز ايه.. والناس الجميلة عايزة ايه.. ونفسنا احنا بنشوفها آخر الأخرين. اتمنى اكون قدرت افيدك بشئ ما.
تم النشر الخميس، ١٩ يناير ٢٠٢٣
عشان تخرجى بره الصندوق لازم تعرفى الصندوق نفسه كويس . يعنى اتقنى مهاراتك الشخصية واعرفى تعبرى عن نفسك وافكارك كويس واعرفى الاساس فى الحاجة كوييس ( دراسة بقي او شغل او نشاط ..) بعدها تقدرى لما تجيلك فكره تعرفى هل هى خارج الاساس والصندوق ده ولا هى من نفس النوع اللى جوه الصندوق.
تم النشر الأربعاء، ٢٥ يناير ٢٠٢٣
ودول عملوا ايه او لو ليهم كتب ممكن تقولي اسمها
تم النشر الخميس، ١٩ يناير ٢٠٢٣
بس من وجهه نظري او ال فهمته ان التفكير خارج الصندوق اني اشوف المجتمع عايز ايه واين متطلباته واعمل عكسها ال هو مش هبقي زي الناس ومش بفكر بنفس العقليه شويه
تم النشر الخميس، ١٩ يناير ٢٠٢٣
لعرض السؤال في فدني اضغط هنا