دايما بحس اني بحب العزله بزعل بسرعه من اتفهه الاسباب اوقات كتير بفسر نيه اللي قودامي غلط بمجرد ما بحس بخزلان من اي حد بعزل نفسي واقفل الموبايل ومبقاش طايقه ارد علي اي حد بحس مقفوله اوي من جوايا من ناحيه اي شخص ومعنديش شغف اتكلم خالص وببقي شايفه ان ده ممكن يزعل ناس كتير مني بس بحس ان في حاجه بتشدني اني مردش او اني اتقفل من اللي قودامي حتي لو معملش حاجه بحس اني ممكن اخسر ناس كتير بسبب كده بس غصب عني مش بكون قادره اسيطر علي نفسي اعمل اي 💔
حببتي اشتغلي علي شحن روحك بعلاقتك بربنا.. لما تزودي يقينك بربنا وثقتك به إن حقك محفوظ من أي حد خذلك هتعرفي وقتها إن مش كل ناس زي بعض وإنه بالعكس ربنا بيعلمك ويقويكي ويعلقك بيه فقط.. هتتعلمي تتعشمي بالله فقط مش بالناس ومش هيفرق معاكي آوي أفعالهم ويبقي بيمر علي قلبك الموقف بلا تأثير ويمر مرور الكرام.. وسعتها بس مش هتخافي ولا تتوقعي السئ وتبقي مطمنه حتي لدرجه إنه السئ ربنا حافظك منه. واعرفي إن فايدك تتحكمي فتصرف ناس معاكي لو عرفتي يعني إيه لين وحكمه ووازنتي بينهم يعني إيه طيبه و ناصحه ومتي ده ومتي ده اقرأي عن السكينه والتغافل
تم النشر الثلاثاء، ٢٨ فبراير ٢٠٢٣
مش بتحبي العزلة ولا حاجة ...انتى بتهربي من انك تتوجعى من تصرف يزعلك. انتى حاسه انك يا اما تتعاملى حلو طول الوقت يا اما بلاش خالص. انا قريت تعليقاتك مع استاذة جهاد فى موضوع الشخص اللى كنتى مرتبطه بيه ....هو طبعا ده السبب الاكبر. بس فى مبدا غلط محفور فى نفسيتك ....انك لازم تلاقى الحلو من اللى قدامك ويعاملك كويس ومينفعش يظهر منه حاجة وحشة....طبعا دى حاجة مش منطقيه ...لان انتى شخصيا عندك تصرفات وحشة وبتتمنى اللى يحبك ويبقي جنبك يتحملك فى وقت التصرفات الوحشة بردوا . احنا بشر وبنتحمل بعض بكل ما فينا وبنغلط قصاد بعض والغلط بيورينا حاجات جميلة بردوا ...يعنى اللى خذلك او زعلك ورجع بعدها يحايل فيكى ويصالحك ...ليه مسكتى فى غلطة وسيبتى الحلو اللى طلع منه بعد كده. عاوزة تفضلى تأكدى لنفسك ان الشخص ده مش وحش لوحده اهو كل الناس التانيه وحشين اهوه وبيخذلونى .....خرجى نفسك من دايرة الضحيه دى ..وعيشى الواقع الطبيعى ...البشر بيغلطوا واه بيغلطوا فى بعض ...وبيسانحوا ويتصالحوا ويتفقوا ويختلفوا . سواء انعزلتى او اختلطتى هيفضل البشر زى ما خلقهم ربنا وانتى كمان زيهم ...ولما مبترديش على حد عاوز يصالحك مثلا او يفهمك اللى حصل انتى كمان بتخذليه وبتقللى منه وبتزعليه...شوفتى بقى الدايرة دى وحشه ازاى. من النهاردة تقدرى توقفى كل ده بانك تسيبى مساحه مفتوحة للحاجات الحلوة تحصل حتى لما يحصل حاجة وحشة ...متمسكيش فى الغلط عشان متبقيش زى اللى ايده اتوسخت بالتراب ورافض يغسلها رغم ان الميه جنبه.
تم النشر السبت، ٤ مارس ٢٠٢٣
انتي كدا كدا محتاجه مساحتك و حريتك عشان تعرفي ترجعي تتعاملي و كل واحد بياخد وقت مختلف عن التاني بس افضلهم وقتهم يكون قصير من الاخر اعصريهم ف وقت قصير عشان دا من عمرك و الوقت مبيرجعش ، فضيعي ف حاجه تفيدك احسن
تم النشر الأربعاء، ١ مارس ٢٠٢٣
في ناس بتحب تقعد لوحدها وبترتاح ف كده لان مثلا طبيعتهم انطوائيين وعلاقاتهم محدوده ده مش عيب ده عادي احنا مش نسخه من بعض ف تفضيلاتنا الي تخص علاقاتنا الاجتماعيه بس معاكي ممكن ميكونش كده بالضبط وممكن ليه اساس من تجربه فاتت او مشاعر مريتي بيها بتخليكي سهل تستغني وتفقدي لانك مريتي بالألام دي كتير وممكن كمان عندك مخاوف من ان الي قدامك هو الي ياخد الخطوه دي ف بتاخديها بأندفاعيه وممكن يبقا عندك خوف من انك تندمجي مع ناس كتير ف تتعلقي ف تمري بخذلان او فقدان ف قررتي مش هعرف حد مش هقرب من حد انة كده ف امان ومرتاحه عشان ممرش بألام تاني لو حاجه من الي قلتها دي مريتي بيها او هي فعلا سبب حاولي تفكري ف كذا حاجه ان علاقاتنا دي اختياراتنا احنا الي بنختار ندخل مين حياتنا ف لو اختارنا ناس بتاعه مظاهر ومبتهتمش غير بالشو ف طبعا ف المواقف المهمه الي محتاجه فيها سند وظهر مش هتلاقيهم ولو اختارتي ناس جد جدا ف وقت متحبي ترفهي عن نفسك مش هيندمجوا معاكي لانهم مش كده ...القصد انك بتختاري الي ينفع يكون معاكي ف كل الاوقات ومرن وشبهك او ع الاقل بيكمل الي بينقصك من اختلافه عنك ولما متحطيش توقعات عاليه ع الناس هتحسي براحه لانك مش هتتخذلي لما ميعملش الي حاجه معينه لانك مش متوقعه منه ده كمان العلاقات الاجتماعيه مهمه جدا لان ربنا خلقنا اجتماعين وبنتفاعل سوا عشان نقضي احتياجات بعض النفسيه والماديه والعاطفيه ف لو انتي قطعتي كل علاقه بتمري بيها بسهوله هتحسي بخلل لانك محتاجه التقبل الاجتماعي وانك محبوبه ف مجموعه محسساكي بأستقرار وامان
تم النشر الأربعاء، ١ مارس ٢٠٢٣
احساسك بالخذلان مربوط بالتفسيرات الغلط او التفسيرات الغير واقعية عن الناس اللي قدامك. يعني المفروض منعملش توقعات للناس اللي قدامنا وهي اساسا التوقعات ديه بس اللي في دماغنا .. هي مش في دماغ حد تاني غير نفسك. ف لازم قبل ما تفسري اي حاجة قدامك .. اتكلمي الاول مع الشخص ده .. اتكلمي بصراحة علشان تفهمي اكتر منه .. قبل ما تفسري كل حاجة من نفسك .. علشان كل حاجة تبقى واضحة قدام نفسك وقدام الاشخاص اللي بتتعاملي معاهم.
تم النشر الثلاثاء، ٢٨ فبراير ٢٠٢٣
غير قدم حسن الظن الاول
تم النشر الثلاثاء، ٢٨ فبراير ٢٠٢٣
غصب عني 💔
تم النشر الثلاثاء، ٢٨ فبراير ٢٠٢٣
سوء ظن
تم النشر الثلاثاء، ٢٨ فبراير ٢٠٢٣
لعرض السؤال في فدني اضغط هنا