ازاي ممكن الانسان يتغير 180درجة ،كان ليا واحدة صحبتي مكنتش صحبتي بس كنا اخوات بجد غير اننا بنروح وبنيجي من الدروس والمدرسه مع بعض كنا اخوات حتي ف الحياة الشخصية وبنحكي كل حاجه لبعض وبنكلم بعض كل يوم وكنا بجد بنقول لبعض دايما ملناش غير بعض وعمرنا ما هنتفرق لدرجة كل اللي كان بيشوفني يسالني عليها ع طول هي فين وكنا لو اتخانقنا يومين بنتاثر اوي وبالذات هي بتقعد تعيط وتقول ازاي نتخاصم واحنا صحاب المهم انا غصب عني اتعلقت بيها اوي مع الوقت حتي قللت معارفي كلها وقولت كفايه صاحبه واحده تبقي كويسه وبتحبني ...بس بعدين جينا دخلنا الجامعه كل واحده ف حته مع ان بيتنا جمب بعض اوي اتغيرت 180 درجة انا عارفه ان الجامعه بتاخد الصحاب من بعض شويه بس هي اتغيرت بطريقة فظيعه وبقت شايفه نفسها وبتقولي خلاص كل صحاب وليهم مراحلهم مع اننا صحاب من ابتدائي واعدادي وثانوي ..وف مره شدينا مع بعض عادي زي ما بيحصل كل مره لقيتها بعتالي رساله انا قرفت منك ومن حكوايكي بقالي كل ده مستحمله وانا مبقتش بحبك وانتي دمرتيني نفسيا وقالتلي كلام صعب اوي وف اخر الرساله قالتلي تعالي نتقابل عشان ننهيها بشياكه كانت بتتكلم بقسوة اوي اوي مع انها كانت طول عمرها حنينه وهي فعلا بكلامها ده وطريقتها اذتني جامد اوي انا قعدت تلت ايام منمتش ومش مصدقه ان دي صاحبه عمري وانها قالتلي كده تلت ايام ولا ينام ولا باكل ولا بذاكر مع اني كنت ف امتحانات فاينل وهي عايشه حياتها عادي جدا بكل بجاحه وعدي سنه ونص اهو عمرها ما جت اعتذرت وكنت كذا مره بعد الموضوع ده اخش اكلمها وكنت بقول لنفسي يمكن هي فيها حاجه وانا مش عرفاها معلش صحبتي لازم استحملها وبجد طول السنة ونص دول انا اتعذبت عذاب لاني كل ماكلمها تقولي نفس الكلام وانتي خنقه وانتي تقيله ع قلبي لدرجة بقت تيجي ف الاحلام وهي بتقولي كلام وحش وانا بقوم مفزوعه وبحس قلبي هيقف وبروح وبقولها الكلام ده بس لا حياة لمن تنادي هي عايشة حياتها عادي جدا وانها خلاص بقا عندها صحاب تانين وانا بجد من جبروتها بقيت بحس انا اللي وحشه مش هي بقيت اشك ف نفسي وان ازاي اقرب واحده ليا تعمل كده لا وكمان ايه عيرتني بالحاجات اللي كنت بحكيها ليها بتوجعني وانها مؤذية نفسيا بالنسبالي ...انا بس عايزة اعرف هو انا ليا حق ولا ماليش وهل ده حرام ولا حلال انا بجد حياتي باظت وبقيت اخاف اقرب من اي حد تاني ليطلع كده بعد سنين طويله وهي بتقولي انه مش حرام وعادي ايه يعني مبقيناش صحاب انا بجد روحي مقهورة اوي طول مانا شيفاها عايشه عادي كده مش ندمانه علي اللي عملته فيا دايما بقعد اصلي وادعي واقول يارب هاتلي حقي منها لانها دمرتني بجد ودمرت نفسيتي انا مبقتش عارفه اثق بحد وف نفس الوقت زهقت اني عايشه لوحدي بقيت ف النص مش عارفه اعمل ايه بجد 🥺🥺
العلاقة طلاما بقت مؤذية ف مش هتفيدني كل ذكراياتها الجميلة وعمري إللي كان فيها طلاما الشخص مبقاش نفس الشخص وإنت حاولتي تكلميها وتعاتبي ومجابش نتيجة يبقى أسحب نفسي كده والكلام على قد السلام زيها زي أي حد...
تم النشر الثلاثاء، ٣٠ أبريل ٢٠٢٤
لو البيت إللي عايشة فيه عمري كله بيولع وأنا جواه مش هقول لاء دا فيه ذكريات عمري كلها وأفضل وأتحرق معاه، بس هطلع براه علشان أعيش وأكمل حياتي واشوف بيت جديد. وانا مش بتكلم عن البيت..
تم النشر الثلاثاء، ٣٠ أبريل ٢٠٢٤
ولو على ان البني ادم بيتغير فالبني ادم بيتغير بيتغير 180 درجه ويتغير 190 درجه وكل حاجه يعني عادي جدا انه يحصل تغيرات في البني ادم. دي اول حاجه ضروري تتعلميها من الموقف ده ما فيش ثبات ما فيش حد هيثبت على نفس الحاجه. في تغيرات دايما بتحصل على النفس البشريه بسبب ايه بسبب حاجات كتيره جدا فتاخدي بالك انه اي حد بتتعاملي معه تبقي حاطه احتمال حتى لو الاحتمال ده واحد في الميه ففي احتمال واحد في الميه ان البني ادم اللي قدامي ده يتغير حاله ويروح لشكل تاني من الاحوال او يكون في صفه ما كانتش فيه وفجاه تبقى فيه فانا بناء عليه هبدا احدد علاقتي به من اول وجديد ده وارد ده وارد ويحصل الاسباب الاسباب.
تم النشر الثلاثاء، ٣٠ أبريل ٢٠٢٤
اكيد تجربه صعبه ومؤلمه ، ولكن كل التجارب تاتي لتعلّمنا دروس ، انت اكتفيتي بصديقه واحده فقط ، وبعدتي عن كل علاقاتك ،وهذا حبيبتي تعلق اكتر منه مشاعر حب لصديقتك . والتعلق مؤلم لك وحِمل علي صديقتك ، التوازن مطلوب ، طبعا طبيعي يكون لنا شخص نرتاح معه ونحكي له ، ولكن لا نعتبره هو المصدر الوحيد لسعادتنا و احتياجاتنا . الدرس كبير ولكن هدفه انك تفتحي دائره علاقاتك ، تتعاملي مع اشخاص مختلفه ، بافكار واراء جديده ، حتي ان اختفي او تغيير شخص او الظروف لم تعد تجمعكم سويا ، الم الفراق سيكون اخف واهون .
تم النشر الثلاثاء، ٣٠ أبريل ٢٠٢٤
طيب احنا هناخد جزء جزء ونتناقش فيه على حسب كلامك:- ازاي الواحد يتغير كده فجأة؟ هو الواحد مش بيتغير فجأة الواحد بيمر بظروف طيلة حياته وهي اللي بتكون شخصيته، وهي بتيجي فجأة ولكن هي بيكون وراها حاجات كتير فاتت. انتي قللتي دايرة معارفتك علشانها وقولتي كفاية واحدة بس تكون بتحبي؟ طيب هو مين قالك تعملي كده؟ هو اه لو فيه صاحبة كويسة ده شئ لطيف، لكن ليه تضطري تقللي الدايرة طالما مثلا كانوا كويسين؟ ليه تحصري نفسك مع واحدة بس، وتكون هي الحياة بالنسبة ليكي. ده تصرف مش كويس، انك تعلقي نفسك ع حاجه واحدة بس. بالنسبة لبعد الاصدقاء عن بعض وقت الجامعة؟ اه هو شائع ان الناس بتتغير خاصة بعد دخول الجامعة وكل واحد بيدخل كلية مختلفة، وحياة الواحد بتبقى واخداه بكل حياة .. يعني زي ما تقولي ملهيات الحياة. ف ممكن الواحد يبعد، خاصةً ان الشخص ممكن يكتشف نفسه من جديد، ويكون له فكر مختلف بعيدا عن فكره القديم. وده وارد جدا. كلامها ليكي كان قاسي! ده اللي عليه علامات استفهام شوية، يعني انا ممكن اكون معاها ان لو هي عايزة تبعد تمام تبعد بس ع الاقل تبعد بطريقة كويسة ليه تقول كلام زي ده؟ والسؤال هل الكلام ده صحيح؟ وكلامها ده ميني على ايه بالظبط؟ الحاحك عليها في كل فترة انكم ترجعوا ! ده كان خطأ جسيم، مينفعش شخص يكون قرر انه يبعد، وانتي تروحي كل فترة تلحي على الشخص ده انه يكون معاكي مهما كان مين .. خلاص هو اختار يبقى انتي اختاري انتي كمان وتبعدي، وتحترمي قرار الشخص، وف نفس الوقت مدمريش نفسك، لان جزء من نفسيتك اللي مش كويسة دلوقت يقع عليكي، لانك انتي اللي عملتي ف نفسك كده. اكيد لو ده مكانش حصل .. مكنتيش هتبقى متأثرة للدرجة دي حاليا. ولكن! ديه تجربة تعلمك .. راجعي نفسك، وفكري في كلامي .. متوقفيش حياتك على حد، في الحقيقة هي قالت جملة كويسة، ان كلنا مراحل في حياة بعض. هذه الجملة صحيحة تماما. حتى لو فضلوا مكملين ف اكيد فيه شخص هيمشي حتى لو كان غصب عنه. فالفقد نفسه احنا بنتعرض له، سواء الشخص بيمشي بمزاجه، او بنفقده بالموت وده اللي بيكون غصب عنه. اتمنى اكون افادتك ب شيء، وربنا يوفقك يا جميلة
تم النشر الثلاثاء، ٣٠ أبريل ٢٠٢٤
اعرفي أصحاب جديده وبلاش تفكري فيها وهتلاقي كتير أصحاب جدعان
تم النشر الاثنين، ٢٩ أبريل ٢٠٢٤
لعرض السؤال في فدني اضغط هنا