السلام عليكم، أنا شايفة إنكم استنزفتم مشاعركم ونفسكم في السنة اللي قبل الخطوبة، تعارفكم وطريقة التعامل خلال الفترة دي كان غير صحي وده أدى للوصول للنقطة اللي انتِ فيها حاليًا، أنتِ استهلكتِ نفسك في الاستماع له والضغط على نفسك فطبيعي دلوقتِ تشعري بالاحتراق النفسي. ثاني نقطة، انتِ قلتِ هو كان عنده مشاكل نفسية وانتِ كمان كنتِ خارجة قبل كده من علاقة استنزفتك. الزواج مش مصحة علاجية. مينفعش تبدأي علاقة وأنتِ مش متعافية من آثار اللي قبلها وتفكري إنك هتنسي معه أو هو ينسى معك. ومينفعش تفكري إنه I can fix him... محدش بيتغير عشان حد إلا إذا كان عاوز يتغير لنفسه. خليني أسألك، كنتِ بتحبيه قبل قراءة الفاتحة؟ ولا قصدك إيه بالسنة اللي قبل الخطبة؟ كنتم مرتبطين؟ ولا لما تقدم لك كان أول لقاء ووافقتِ عليه؟ لو كده هل كان فيه قبول وموضوع المشاكل النفسية ده عرفتِه بعدين؟ *** انتِ محتاجة تقفي مع نفسك شوية وتفكري أنتِ محتاجة إيه من العلاقة دي. ليه مستميتة في الحصول على اهتمامه؟ هل لانك مفتقدة اهتمامه الأول ولا خايفة يكون تغير وبيحاول يتركك فبتحاولي تتمسكي بأي دليل يقول إنه لسه شاريكِ ولا خوف من وصولك لنفس مصير العلاقة السابقة؟ ممكن عدم قدرتك على البعد رغم الأذى النفسي اللي انتِ حاساه إنك حاليًا في تعلق مرضي وده هيحتاج منك لخطوات عشان تتعافي منه. محتاجة تفكري مع نفسك، إيه اللي انتِ مستفيداه من الوضع ده؟ هل هتحتملي الحياة معه بعد الزواج في حين إنك في فترة الخطوبة مش مستحملة الوضع؟ *** أعتقد إن أي علاقة احنا غير مرتاحين فيها وبتتعبنا نفسيًا فالأفضل قطعها مهما كان التعب اللي هنمر به بعدها لحتى نتعافى منها نهائيًا. صلي استخارة واركني مشاعرك سلبية أو إيجابية على جنب واطلبي من ربنا هو اللي يختار لك اللي فيه الخير لك.
لعرض الإجابة في فدني اضغط هنا