لا أقبل النقد، عصبية للغاية، أجيد فن سوء الظن في الآخرين، ولا أثق تماما في نفسي!

Question

السلام عليكم ازيكم يا جماعة هقول مشكلتي باختصار اولا : مش بقبل النقد البناء يعني لو غلطت مش بحب حد يقولي أنا غلط أو حد يشبهني بشخص مش كويس بس ده غرور وعايزة أتخلص منه ثانيا : بعد ما كنت شخصية هادية بقيت عصبية جدا وده بعد ما قابلت بنت بتتعصب دايما وبشتكتي من حياتها وأهلها وأنا كنت بسبب دراستي واللي ورايا واواسيها بكل الطرق حتي لو الطريقة دي هبلة لغاية ما اتخانقنا في الآخر وأنا كنت اللي غلطانة وكل خلاف بعمله مع زمايلي بيبقي ببقي أنا اللي غلطانة فيه عمري ما عرفت اتصرف صح مع حد وادي كل واحد حجمه و عملت كذا خناقة مع كام واحدة ولسه عاملة خناقة من قريب مع واحدة زميلتي ثالثا : شاطرة أنا في سوء الظن و أني أعمل نفسي فاهمة واللي قدامي فيه المشكلة مش أنا مع أن العكس صحيح ممكن واحدة زميلتي معملتش فيا حاجة هي بس علمت عليا عشان هبدت في معلومة أو واجهتني بغلطي أقعد أتخيل أنها وحشة وأنا كويسة وتمام والمشكلة فيها مع أن بردوا العكس صحيح وافضل مش طايقاها لغاية ما اتخانق معاها رابعا : بلاقي بعض من زمايلي علاقاتهم الفاشلة بتتكرر ده ليه بجد ؟ خامسا: بتعلم من الناس اللي قابلتهم في حياتي الصفات السلبية والوحشة زي الشكوى و العصبية وسوء الظن وأسلوب الكلام اللي مش كويس سادسا : أنا مش واثقة من نفسي أبدا ثقتي بنفسي معدومة جدا وحاسة أني منبوذة وأني نكرة ومريضة نفسيا وفيه اتنين من زمايلي قالولي أني مريضة نفسيا عشان اتعصبت وغلطت فيهم ويا ريت محدش يقولي اروح اعتذر لحد سابعا : لما بتفرج علي أنمي أو مسلسل أو فيلم بتصور نفسي البطل أو البطلة بقي و اتخيل الأحداث في دماغي وبتاع وألف قصة جديدة والهبل ده وحاجة كمان لو لقيت واحدة زميلتي أنا معنديش الجرأة أني أكلمها وأن هي أحسن مني بقعد أتخيل نفسي أني صاحبتها مع انها ولا صاحبتي ولا أي حاجة وبردوا لو فيه واحد زميلي مثلا شوفته بالصدفة اعمل نفس القصة بردوا بس أنا عمتا مش بكلم ولاد ومليش دعوة بيهم ثامنا : مشكلتي هي الكلام أنا مش بعرف اتكلم ولا أجامل ولا آخد وادي مع حد وبيبقي شكلي بايخ وأنا بتكلم وبحرج نفسي وبخلي الناس تعلم عليا وتشمعني حرفيا وفي نفس وقت لو بتكلم علي حد بيضايقني أسلوب كلامي بيبقي حاد جدا وكام مرة بابا و زمايلي قالولي متكلمش عن حد بالطريقة دي وبحس أني بحرج نفسي اوي تاسعا : بحاول أرضي الناس كلها بضايق جدا لما حد يفكرني وحشة وبخاف أي حد يفكرني وحشة بتعب أعصابي وبضيع راحة بالي عشان الناس عاشرا : لما حد يقول لي أنتي مضيقة ليه أو حد بيسأل في تفاصيل حياتي المفروض أرد إزاي ؟ ودائما بحس إحساس مش كويس أنا شعري مش حلو و شكلي طفولي أوي ومش ذكية بحسني أقل من زمايلي في كل حاجة ومش عارفة أطلع لمستوي حد أنا مش مرتبة في لبسي رغم أني بجيب لبس غالي بس بحسني مش منسقة خالص شكلي مفعكش أوي ودائما بجيب طرح بتخلي شكل وشي مبهوق أوي وده عشان مش بعرف اختار حاجتي بعناية وأنا مهملة جدا في نفسي بحس أن زمايلي أنظف مني

Accepted Answer

وعليكم السلام ورحمة الله وبركاته ... أحب أحيكي لفهمك لنفسك بالصورة الكبيرة ديه في الاول .. 👌👏🏻 اولا طبيعي شوية ان الواحد ميكونش حابب حد يشبه بحد تاني خاصةً كمان لو الحد ده مش كويس، ما هو اكيد هتضايقي، لانك برضه مش هتحبي انك تكوني الشخص ده، ف ده مش غرور. اما انك ترفضي الاتقاد عموما سواء طبعا بناء او هدام، محتاجه أسالك سؤال في الجزء ده! هل بترفضي النقد من كل الناس وبكل الطرق؟ يعني فيه حد ممكن يجبها بطريقة مباشرة ليكي؟ وحد تاني لا ميحسسكيش انه بيدي ليكي اوردر ... انتي ممكن تتقبلي النقد بطريقة مختلفة، ممكن تحبيها؟ ولا عموما مش بتحبيها؟ وهل اهلك وانتي صغيرة دايما بيعطوا ليكي اوامر وبطريقة مش احسن حاجه برضه ولا لا؟ ثانيا بالنسبة للتحول اللي حصلك .. من شخصية هادية الى عصبية .. طبعا مفهوم اللي حصل .. والمشاكل قادرة انها تحول الشخص لكده، خاصة اذ لم يكن غير مستعد لها. ولكن مش شايفة انك مش باصة خالص لجانب كويس في الموضوع ده .. ع الاقل جزء منه يعني انتي بتقولي انك كنتي بتواسيها بأي شكل، حتى لو كانت طريقة هبلة زي ما بتقولي، ده ميعنيش ليكي شئ طيب؟ انك مثلا شخص معطاء! العطاء شئ كويس، بس ايه اللي اخدتيه من المواقف مثلا اللي كنتي فيها مع اصحابك؟ تحليل كل شئ حصل، ده مهم علشان تعرفي انتي هتستفادي من الموضوع ده ازاي؟ وده محتاجه تعمليه، علشان تشوفي الصورة اوضح من كده. ثالثا هل المشاكل اللي حصلت مرتبطة بسوء الظن السئ اللي عندك لصحابك؟ يعني رابطة المضووع ب ايه بالظبط؟ رابعا بلاقي بعض من زمايلي علاقاتهم الفاشلة بتتكرر ده ليه بجد؟ سؤال كويس .. وده بيرجع لكذا حاجه .. تقريبا ممكن تكوني في سن المراهقة .. وده واضح شوية، ف اغلب المشاكل في السن ده شبه بعضها ده اول حاجه، تاني حاجه وده شائع محدش بيتعلم .. الغلط بيتعمل - طيب اتعلمتي من الغلط؟ لا محصلش. ف تلاقي الغلط هيتكرر تاني طبيعي جدا، لحد ما تتعلمي. خامسا بتعلم من الناس اللي قابلتهم في حياتي الصفات السلبية والوحشة زي الشكوى و العصبية وسوء الظن وأسلوب الكلام اللي مش كويس!! طبيعي برضه، لما هتحاوطي نفسك بناس كويسة، وشاطرة، واخلاقياتهم كويسة، طبيعي انتي هتتعلمي منهم، وهتعلي معاهم. طيب لو حياتك مليانه بقى ناس بتشتكي باستمرار، ناس مش كويس، وبتشتم .. انتي هتكوني بعد كده لا اراديا كده برضه، هتحاوط الطاقة السلبية بتاعتهم، عارفه فيه قول كده شائع، لما حد مثلا يجي وانتي مش طايقاه، تقولي ياه ده جه وشفط الاكسجين كله اللي في المكان، ديه قعدته كله بؤس، ده حد بيجي عايز يشتكي وبس! اكيد قابلتي الناس ديه .. طبيعي بعد كده هتكوني مش ف احسن حالة بعد كل ده. سادسا هل انتي شايفة انك مريضة نفسيا علشان حد من صحابك قالك كده؟ ولا انتي شايفة ده من قبلهم؟ ثم هو اي حد ماشي كده يحكم على الناس ويقول مين هيروح الجنه ومين هيروح النار؟ اه ما هو كده بقى! ليه شايفة نفسك نكره، ومش واثقة في نفسك؟ سابعا لما الواحد تبقى الحياة الواقعية اللي هو فيها مش حاببها، طبيعي هيبدأ يعيش فيعالم افتراضي .. وده اللي بيحصل لمعظم الناس .. على السوشيال ميديا عموما، هروب .. بنهرب من كل حاجه حوالينا، وبنروح للسوشيال ميديا، وكأن مفيش حاجه تتعمل في الحياة غير القعدة على الفون! طبيعي لما تحسي انك مش عارفه تعملي ولا حاجه في الحقيقة، هتبقى عايزة تعملي ده في خيالك! ابدأي اتصالحي مع نفسك، ومع واقعك، وابدئي عدلي فيهم .. علشان ميكونش ولا فيه خيالات ولا افلام! ثامنا اهلك كانوا بيتعاملوا معاكي كده ؟ بطريق حادة برضه .. وكنتي منعزلة شوية حتى من وانتي صغيرة؟ تاسعا من وجهة نظرك هل هتفضلي طول عمرك هتحاولي ترضي كل الناس؟ وهل هتنجحي في كده؟ انتي اصلا دلوقتي ناجحة في كده؟ عاشرا ما حد يقول لي أنتي مضايقة ليه أو حد بيسأل في تفاصيل حياتي المفروض أرد إزاي ؟ سؤال: انتي عايزة تردي؟ سؤال تاني: انتي حابه تسردي تفاصيل؟ واخيرا دائما بحس إحساس مش كويس أنا شعري مش حلو و شكلي طفولي أوي ومش ذكية بحسني أقل من زمايلي في كل حاجة ومش عارفة أطلع لمستوي حد أنا مش مرتبة في لبسي رغم أني بجيب لبس غالي بس بحسني مش منسقة خالص شكلي مفعكش أوي ودائما بجيب طرح بتخلي شكل وشي مبهوق أوي وده عشان مش بعرف اختار حاجتي بعناية وأنا مهملة جدا في نفسي بحس أن زمايلي أنظف مني عملتي ايه بقى علشان تكوني راضية عن نفسك؟ يعني سردتي بشكل كويس مشاكلك، عملتي ايه بقى علشان تتعاملي مع كل ده؟ انا مش هقولك قومي الصبح وبصي في المراية قولي انا حلوة!! لا .. عادي جدا انك تشوفي نفسك كده، المفروض الواحد بقى يعمل ايه علشان يكون راضي عن نفسه، ولكن عمليا.. فيه حاجات الواحد مينفعش ييغيرها، زي شكله، لونه .. خلقة ربنا بمعنى اصح .. لكن انتي ممكن جدا تتعلمي كل اللي قولتيه، ممكن تتعلمي تلبسي ازاي، تنسقي ازاي؟ تهتمي بنفسك وبشعرك ازاي؟ مش لازم تبقى احسن حد في الدنيا .. بس على الاقل، تبقى راضية عن نفسك بأقل الامكانيات، حتى لو كانت حاجات رخيصة على فكرة، مش لازم براندات، اكيد فهماني. وبعدين الشكل الطفولي لو قصدك (البيبي فيس) ف ده مش وحش ف انتي ليه مش حباه؟ وليه بتقارني نفسك ب حد تاني .. اتعاملي مع نفسك على انك شخص منفصل، مدخليش حد تاني في الموضوع .. انتي ونفسك وبس ده لو ناوية تتخلصي من المشاكل ديه كلها.

Answer

كل انسان مهما كان شكله او صفاته بيبقى فى حاجات كويسة بتميزه عن الاخرين لازم تكتشفى ده وتنميه فمثلا ممكن يكون شخص شكله مش حلو بس هو زكى وزكاؤه بخلى الناس تنظر اليه نظرة محترمة ثانيا لازم تثقى فى نفسك جدا وانك مميزة لان الثقة فى النفس بتولد القوة والارادة ثالثا خلى ظنك بالناس خير وخدى حذرك برده يعنى متأمنيش لاى حد بسرعة غير لما تثقى فى بعد معاملات كتيرة

Answer

ماشاء الله وصف شامل ومفصل جدا، انت ذكية لعلمك وقوية من الداخل ..ولست بتلك الصورة المصورة، أن التجأتي للتعبير بالكتابة، ينقصك فقط اظهار هذي القوة والثقة من خلال عدم الاكتراث لنظرات المحيطين، اصنعي ما هو جيد بالمعروف ولتقولي خيرا او لتصمتي، انتقي الصحبة الجيدة عن طريق اجتناب الصحبة السيئة ذات الاخلاق المعدومة والمظهر المنحرف والقلوب السوداء، يسهل التعرف عليهم .. لسنا سواسية.. ليس هناك نمط للبشر ولا يجب ان يكون، الاختلاف في نوعية وطباع الانسان سنة ف الارض، فلا تتشبهين ولا تقتدين الا بالنبي العدنان عليه الصلاة والسلام، .. أنسب مكان للبحث عن ردود الافعال، هو كتب السيرة النبوية، كتاب "رياض الصالحين" اذا تحبين القراءة (اخالها يسيرة) .. الزمي قراءة القرآن، الورد حافظي عليه، .. المظهر الخارجي للمسلم يحسن ان يكون بقدر المستطاع ذو طابع غير ملفت أو منفر، حاولي بمختلف الأطقم والملابس بالتجريب والتبديل ستصلين للاطلالة المتوافقة مع الشخصية القوية مثلك، .. دعاء التوكل على الله قبل الخروج يحفظ الانسان من المكاره، داومي على الاذكار والاستغفار واذكري الله اول ما تشعري بالغضب، .. عليكي بس ان ترضي بحكم الله وما يمكنك تغييره للافضل في شخصيتك فلتسعي اليه من الان .. لا تنتظري الظروف .. اسعي مع الدعاء ربنا يوفق العبد لما هو صالح .. ادعي الله بالصلاح والفلاح .. ربنا مجيب الدعاء... أحد ماهنالك مثالي ، ﴿ كل ابن آدم خطاء، وخير الخطائين التوابون﴾ حديث نبوي شريف .. والله المستعان

لا أقبل النقد، عصبية للغاية، أجيد فن سوء الظن في الآخرين، ولا أثق تماما في نفسي!

اجتماعية

نفسية

علاقات

ثقة بالنفس

خوف

سؤال من احد أعضاء فدني

تم النشر الخميس، ٢١ ديسمبر ٢٠٢٣

3 إجابة

16 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك