عايزة نصيحة اعتبروني اختكم
انا مرتبطة بشخص كان اهتمام و كل حاجة حلوة اول اسبوعين من بداية الارتباط بعدها بقي إهمال و ابعت بالعشرين رسالة ميردش غير برسالة كل فين و فين حتي الاتصال بقيت ناقص اتحايل عليه عشان يتصل نتكلم خمس دقايق مع أن في الاول كان دايما عايز يتصل
و يتكلم و كنا نتكلم بال٦٠ دقيقة و الساعتين لدرجة انا مكنتش في الاول بهتم اوي بموضوع الكلام بس لما لقيته مهتم كده بقيت انا كمان اهتم وحرفيا حبيته جدا ، المهم اني جبت اخري من إهماله و لما شوفته حكيتله اللي حساه قولتله كل اللي مضايقني قالي هتغير و متزعليش وكويس إنك نبهتيني لكن لما روحت البيت واتكلمنا لقيت كلامه اتغير ١٨٠ درجة و يقولي انا مش هعرف وانا كده و في الاخر خلاني انا اللي اعتذرتله و قفلنا .. تاني يوم بقي يكلمني بالقطارة و لما جيت اكمله كلامي و احاول نوصل لحل وسط كلمني بأسلوب وحش و قالي ألفاظ مقدرش اقولها لأول مرة في حياتي اسمعها منه انا الشخص ده نعرف أن أخلاقه كويسه ملوش في كده خالص و صدمني لما لقيته بيديني اخوه أكلمه ويقولي صدعيه انا تعبان مش قادر .. عدي الموقف و محبتش أحرج اخوه لانه اصلا اتحرج من اللي حصل .. بعدها لقيته بقي كويس شوية لكن نفس الإهمال و نفس كل حاجة .. حصل و غصب عني من يومين موبايلي كان في مشكلة واتقفل ٢٤ ساعة كاملين لحد ما عرفت إحل المشكلة و لما فتحته اتفأجت أنه لا اتصل ولا اتكلم ولا بعت حتي يسأل عليا و لما انا اتصلت قالي انا مسافر و مش عايز افكر في حاجة تاني و راح عيد عليا و قفل المكالمة .. دلوقتي انا حيرانه اعمل ايه انا بحبه جدا و في بينا حاجات كتير تخليني أحبه و افضل معاه و في نفس الوقت اهلي بيقولولي مفيش واحد بيحب واحدة يعاملها كده و انا اصلا محكتش لحد فيهم علي اللي حصل منه من ألفاظ و لا حوار اخوه عشان ميحصلش مشكلة أو حتي يكرهوه ... ارجوكم حد يساعدني انا متعلقة بيه جدا و الله ما كان كده ومش قادرة افهم ايه حصله
لو عايزة نصيحة لوجه الله .. لو علاقتكم مش رسمية يعني متقدمش يخطبك فاتركيه لوجه الله واحترمي حدود ربنا اللي حطها علشان يحفظك ومترخصيش نفسك اكتر من كدة ولا تدخلي في علاقات تتعدى حدود ربنا قبل مايجيلك واحد تاني يخليكي تكلمي صحابه ويقولك صدعيهم!
تم النشر السبت، ١٥ يونيو ٢٠٢٤
تم النشر السبت، ١٥ يونيو ٢٠٢٤
لو انتي خطيبته فالمفترض تصبري عليه مش لازم الراجل مننا يكلم خطيبته كل يوم لا خالص مره في الاسبوع كويس جدا وبعلم اهلها وع فكره مينفعش كلام رومانسي وانتي مجرد خطيبته فالمفترض يحترمك لان دا حرام وبيعلق بشخص زياده عن الزوم ... طيب لو حسيتي انه بيستهزأ بيكي لا انتي اللي تبعدي وفكك هو كدا كدا هيكلمك لو ما كلمك وقالك السبب فانتي بشكل تلقائي فكي الخطوبه دي لانك قدام شخص مش مبشر اذا كان مش واخد باله لو مرضتي او حصلك حاجه دلوقتي هيعمل اي بقا لو شال مسئوليتك في الجواز.... إنما لو انتي مرتبطه بيه من غير خطوبه فأبشرك انك في بدايه طريق الدمار وحتما هو مستقل بيكي لانك بالنسبة للشاب اللي بيدور على بنت يفضي مشاعره معاها زي اللبس اللي بيتلبس في المناسبات وبيتغير من كل فتره على حسب الجديد والاحسن، ودا اقل تشبيه الصراحه من شاب اهوت بقولك مفيش راجل بجد هيرتبط بواحده من ورا اهلها ايا كان سبب ومسمى العلاقه وهيعتبرها غاليه عنده كله كلام من الشيطان اذا كان اللي بيعمل كدا لو اتسأل ترضاها لاختك هيقول لا معنى كدا انتي اقل من اخته اصلا والكلام كدا كدا هيخلص واللي بعديه اصعب بنقصان قيمه البنت.... اخرت مراحل الكلام بعد شات وكلام حلو ثم صوره ثم فيديو اخرت المراحل لو عدى كل ده هي الجواز وبعد كده هيكون اخد منه كل حاجه دا لانها كانت بالنسبه لي كدا من الاول اصلا مكان يخلص فيه مشاعره وبعدين بقا يظهر العقل ويفكر اذا كان البنت دي كلمتني ايش ضمني تكلم غيري اللي تخون مبادئ الدين مش هتخون انسان ومن ثم مشاكل واخيرا طلاق وخراب نفسي اخرت الحب الحرام هلاك على فكره المثال مش عليكي المثال دا اللي بيحصل فخدي بالك انا بحذرك،،، انت بنت والبنت لو ما كان طريقها من بيت اهلها مباشره ومفيش كلام قبل الخطوبه فطريقها مجاني لان الشاب عارف كدا كدا انها لعبه في ايده متحكم بمشاعرها هما حاجتين "لو ما غليت قيمه نفسك، هتكوني رخصتي قيمه نفسك"
تم النشر السبت، ١٥ يونيو ٢٠٢٤
عززي نفسكِ يا حبيبتي، لا أحد ولا رجل يستحق أن تتنازلي عن كرامتكِ لأجله بهذه الطريقة... ما الذي يجبركِ على تحمل مثل هذه المعاملة بل والتوسل له؟ لا أعرف إن كان خطيبكِ ولهذا عائلتكِ تعرف بأمره أم أنّها علاقة غير رسمية و(مجرد صحوبية غير شرعية) وتقصدين بالعائلة هنا أخواتكِ وصديقاتكِ، لكن حتى خطيبكِ لا يحق له أبدًا التعامل معكِ بهذه الطريقة ويتعمد الإهمال والإساءة والشتائم أيضًا. إن استمريتِ في علاقة مؤذية كهذه ربما يتطور الأمر إلى الضرب وأكثر من هذا. بعض الذكور يدعي الحب والاهتمام ويغرق بهما الفتاة في البداية حتى تقع في فخه وبعد أن يمل أو يجدها علاقة لا تستحق يبدأ في تعمد الإهمال والإساءة لعلها تبتعد من نفسها أو ربما بعض المرضى النفسيين يتلذذ بتوسلاتها وتمسكها المرضي به. قد أكون قاسية في كلامي لكن أنتِ كفتاة غالية ويجب أن تنظري لنفسكِ هكذا... أنتِ غالية ولا يستحق أحد أن تهدري مشاعركِ وكرامتكِ وتنزلي من قيمتكِ التي منحها الله لكِ كامرأة... من المفترض أنه هو من يأتي ليشتري خاطركِ ويبذل الغالي والنفيس لأجلكِ ويحفظ لكِ كرامتكِ ويضعكِ في عينيه وفوق رأسه. عززي نفسكِ واحفظي مشاعركِ للشخص الذي سيعرف قدرها ويكرمها. ابتعدي ووفري على نفسكِ وجع القلب والمعاناة وقبل أن يتطور هذا التعلق ويصبح مرضيًا ولن تستطيعي التخلص من آذاه بسهولة والأهم أن يكون الله راضيًا عنكِ.
تم النشر السبت، ١٥ يونيو ٢٠٢٤
اولاً، احب أقول لك إنتي شجاعة جداً لأنك حكيتي كل ده وحاولتي تلاقي حل. اللي حصله صعب ومش سهل عليكي، وده مفهوم تمامًا. بس بصراحة، من البداية، لازم تكوني واعية إن الشخص اللي بيحب بجد مش بيحسس الشخص التاني بالإهمال أو يجرحه بالكلام. صحيح العلاقة فيها أيام حلوة وأيام وحشة، لكن الإهمال وقلة الاحترام مش مقبولة بأي شكل من الأشكال. حاجة مهمة لازم تاخديها في اعتبارك هي احترامك لذاتك. إذا واحد بيتجاهلك بالشكل ده وبيتحجج بإنه تعبان أو مسافر، فده معناه إنه مش مُلتزم أو مش واخد العلاقة بجدية. لازم تكوني مع حد يقدرك ويكون موجود جنبك لما تحتاجيه. أهلك عندهم حق في اللي بيقولوه، الحب مش كافي لوحده، لازم كمان يكون في احترام وتقدير. حاولي تاخدي خطوة للوراء وتفكري في مستقبلك مع الشخص ده: هل ده الشخص اللي تقدري تعتمدي عليه في الأوقات الصعبة؟ كوني صريحة مع نفسك، الأمور دي هتكون أصعب مع الوقت، وأحيانا القرار الصعب بيكون هو القرار الصح. لسه عندك فرص كتير تقابلي ناس تانيين يقدروكي ويعاملوك بالطريقة اللي تستحقيها. وافتكري دايمًا إنك تستحقي كل الاحترام والحب والاهتمام، وما تقبليش بأقل من كده. ممكن تاخدي شوية وقت بعيد عن الشخص ده، وتستعيدي قوتك وثقتك في نفسك، وبعدين تقدري تقدري الوضع بشكل أوضح. ربنا يوفقك ويوهج طريجك يا رب وتلاقي السعادة اللي تستحقيها.
تم النشر السبت، ١٥ يونيو ٢٠٢٤
لعرض السؤال في فدني اضغط هنا