خريجة أداب إنجليزي وقررت اعطي دروس تأسيس وابتدائي .. إزاي أكون متميزه ف مجالي وأبقي مدرسه كويسه مش عاوزه أكون حد عادي وخلاص ؟ واعتمد علي مصادر اي مثلا
حاسه اني اترميت ف البحر واتقالي عومي وانا مش بعرف
بصي تحنا لما بنبص علي المدرسين بنبص اول حاجه علي الضمير يعني المدرس دا بيدي وقته كامل وبيراعي ربنا في شغله ولا لأ ومجرد انك تعملي دا ربنا هيفتحلك ابواب الرزق ان شاؤ الله تاني حاجه انك مثلا تسالي الطالب فهمت ولا لا ولو مفهمش تشرحيها بطريقه تانيه وبردو ممكن تكوني لطيفه مع الطلبه لان لو الطالب حبك ولي امره هيحبك وبس عليكي بالدعاء
تم النشر الاثنين، ١٧ يوليو ٢٠٢٣
تأسيس وابتدائي يبقى لازم يكون بالك طويييييييل جدا وصبرك كبير جدا وتكوني عندك حب للتعامل مع السن ده السن ده بتكون مشاعره بريئه لو حبك الطفل هيحب الماده تاني حاجه اهتمي بالمسابقات كل حصتين تلاته نعمل مسابقه عال اخدناه قبل كده ونسال وال يجاوب صح ياخد جايزة رمزيه والسن ده اي حاجه بترفع معنوياتهم قلم رصاص استيكه بسكوته شيكولاته علبة الوان اي حاجه خلي كل حصه يكون عندك بريك صغنن في النص بس مشوق يعني مرة بريك نعمل فيه فزورة مرة نحكي حكايه صغيرة مرة نلعب لعبه جماعيه سريعه افكار كتير تخليهم مركزين ومتسوقين لفقرة البريك القصص بتلزق المعلومات في دماغ الاطفال فلو اي جرامر جديد او معلومه جديدة عملناها على شكل قصه هتلاقيها تعجبهم حدا التكرار مفيد جدا جدا لازم تعملي مراجعات مستمرة خلي اسعارك في متناول الناس وراعي ان أولياء الأمور بتضطر تدي دروس في مواد تانيه وبتدفع في كل مادة فارفقي بحال الناس ربنا يوفقك
تم النشر الخميس، ٢٠ يوليو ٢٠٢٣
سهل مع الوقت هتتعلمي كل حاجة اهم حاجة تخلي بالك اوي علي سمعتك من ناحية ان اي ولية امر بتسال طالبة جبتي كام ف الانجليزي لقيتها ناقصة اوي بتسال علي المدرسة و تعمل عليكي خط احمر و تعرف انك م شاطرة اذا لازم تخلي كل الي معاكي بيقفلو او بينقصو درجة درجتين و يزعلو عليهم و لازم تشجعيهم اوييي من ناحية ومبوني و فلوس و امتحانات مفاجئة و ساعتها لما يبقو شاطرين اوي تقدري تعلي المبلغ و حاولي برضو لو حد مقدرش يدفع او يعلي او اضطر يطلب منك انك تقللي المبلغ ليه شوية متجيش علي حد عشان ربنا يكون في عونك و يباركلك و بس حاولي بقي دي اهم حاجة تستخدمي طرق جديدة بحيث لو دة طفل ف اولي ابتدائي تانية تالتة و عايزة تخليه شاطر ف النطق لازم تعملي جروب واتساب تبعتي فويسات تخليهم يسمعوها و هما بيعملو الhw عشان لما حد يسمعهم يلاقيهم شاطرين و مع الوقت هتكتسبي خبرة اكتر و اكبر و اهم حاجة اييي طفل واقع ف المادة بيوقع الي حواليه و بيشوشر عليهم فحاولي يا تعملي مجموعة جود و مجموعة عادية او تستغني عن العادي عشان برضو السمعة زي ما قولتلك بس الي تلاقيه عنده شغف يبقي شاطر متمشيهوش خليه فضل يلعب و متحركش مشيه اتحرك و حاول يلحق زمايله خلاص ساعديه و حاولي تركزي مع كل طالب و شطارته و تتواصلي مع الاهل ديما
تم النشر الثلاثاء، ١٨ يوليو ٢٠٢٣
أهلاً! هنا بعض النصائح لتكوني مدرّسة متميزة في مجال تدريس اللغة الإنجليزية للمراحل الأساسية: - اعتمدي على مناهج معتمدة وموثوقة في تدريس اللغة الإنجليزية مثل Cambridge و Oxford. - استخدمي طرق تدريس تفاعلية وممتعة مع الأطفال مثل الأناشيد والقصص والألعاب. - شجعي الأطفال على المحادثة بالإنجليزية قدر الإمكان حتى يطوروا مهاراتهم اللغوية. - كوني مبدعة في استخدام الوسائل التعليمية المختلفة كالصور والرسومات ومقاطع الفيديو. - حافظي على بيئة صفية إيجابية ومحفزة للتعلم. - شاركي أولياء الأمور في عملية التعلم وأبقيهم على اطلاع دائم. - طوري من نفسك باستمرار من خلال الدورات وورش العمل التعليمية. - كوني على تواصل دائم مع زملائك المدرسين لتبادل الخبرات. أتمنى لكِ التوفيق والنجاح في مجال التدريس! لا تترددي في طلب المزيد من النصائح إذا احتجتي.
تم النشر الاثنين، ١٧ يوليو ٢٠٢٣
أول حاجه حضرتك لازم تعرفي و تسمعي من مدرسين محايدين فى مدرسة إزاي هما بيشوفوا الطلبة علشان تعرفي نظرة غيرك ليهم إيه و تعرفي طريقته معاهم إزاي و ده هيفيدك في إنك تغدي فكره مسبقة عن الفئة اللي هتتعاملي معاها تاني حاجه لازم تحددي سواء هيبقى دروس خصوصية أو مُدرسة فى مْدرسة لو فى مدرسة فلازم تعملي حسابك إن هيبقى فى طلبه مش عارفين حاجة فتحاولي تشجعيهم بطريقتك إزاي يتفاعلوا معاكي علشان يحبوها كلغة اكتر ما هيا كمادة إنما لو درس خصوصي فينفعش حضرتك تركزي على واحد من المجموعة كلها علشان ده بيخلق مشاعر سلبية عند البعض و ده مش بيدفعهم حتى للتقدم لأنهم فى الأول و الآخر سنهم صغير فبيميلوا للحل السهل و ده قليل من هيخالف النهج ده مثال عليا لما كنت فى ابتدائي كان مدرسي المحترم مكنش بيعترف بيا مع إني كنت بجاوب بس كنت بتهته بسبب الخوف من إني أجاوب غلط و مع ذلك عمرو مسألني على أسمي حتى و أستبعد إنو يكون فكرني أصلا و ده أثر عليا و خلاني بقيت مش متقبلها كلغة و مبقتش أهتم بيها (لحد هنا نطاق المدرسة) لما دخلت تانية اعدادي روحت مع مدرس محترم درس خصوصي كان مهتم بيا مش إهتمام خاص لكن كان بيشجعني زي مكان بيشجع الكل و ده كان من الأسباب اللي خلتني اتشجعت و حبتها كلغة و الحمدلله أنا دلوقتي أقدر أفهم English very well. الملخص لو فى مدرسة بلاش تهتمي بمجموعة و مجموعة تانيه لا و حاولي تبعدي عن مبدأ العقاب بالضرب علشان ده هيخليهم يخافوا منك مش اكتر و فى الأول كده خلي معاكي شوية حاجات بسيطة و قولي اللي يجاوب هياخد مكافأة و خلي أول حصه تعارف لو درس خصوصي برضوا بلاش نهتم بطالب عن التاني و دائما اسألي فهمت ولا لا و من غير ضغط على الطالب و حاولي فى الدرس تكوني صحبتهم و تعرفي نقاط ضعفهم لوحدك و تحاولي تساعديهم فيها بشكل غير مباشر و برضك أول حصه يكون نصها تعارف و تخليهم يتكلموا مع بعض و يعرفوا بعض علشان محدش يتكسف لأن فى الغالب بيكون الطلاب عندهم أسأله كتير بس بسبب إن فى جنس آخر بيتكسفوا و بينكروا إنهم مكسوفين أساليني أنا مكنتش بسأل علشان مكسوف اتحرج 😅 وبس أتمني أكون أفدتك بس.
تم النشر الاثنين، ١٧ يوليو ٢٠٢٣
ياريت تقول هكون ممتنه لحضرتك جداً 🤍
تم النشر الاثنين، ١٧ يوليو ٢٠٢٣
نصيحتي ليكي كمدرسة إنجليزي تبدأي بتعلم طرق التدريس الحديثة اللي بتركز على الطالب، زي إنك تشركيهم في الدرس وتستخدمي ألعاب وأنشطة تعليمية. ابحثي عن دورات تدريب مدرسين واقرأي كتب عن طرق التدريس. ابتدي بمستويات بسيطة وركزي على الأساسيات زي القواعد والمفردات. والمهم تكوني صبورة ومتفهمة مع الطلاب. أتمنى لكِ التوفيق!
تم النشر الاثنين، ١٧ يوليو ٢٠٢٣
أنا أقدر أفيدك إزاي تتعاملي مع الطلبة لكن مقدرش أفيدك فى المصادر الصراحة...لو حضرتك حابه اقولك اللي عندي لايك و هرد بإجابة بنائا على المدرسين اللي اتعملت معاهم و سمعت عنهم.
تم النشر الاثنين، ١٧ يوليو ٢٠٢٣
لعرض السؤال في فدني اضغط هنا