السلام عليكم
انا عندي ١٦ سنة
انا في بنت معايا في المدرسة وانا حاسس اني مشدود ليها او معجب بيها بس مش بحاجة معينة مع مكلمتهاش ولا هكلمها بس انا حاسس اني متضايق من ده عشان مينفعش يكون في حاجة زي دي دلوقتي وكمان عشان ببقا متضايق عشان دي اخر سنة ليا في المدرسة انا بقالي فترة كبيرة بحاول اقرب من ربنا اكتر وبدعي ربنا يهديني وكل ما بحس اني متضايق بصلي واقرأ قرآن وفعلا بهدأ بس المشكلة ان بعد ما بهدأ برجع تاني مبسوط لو فاكرها واني على طول متحمس لو عارف اني هشوفها حتى وانا عارف ان مالوش لازمة ولو فكرت وحاولت اشيلها من دماغي بتأثر بس بردو ببقا بذاكر وانا فرحان من ده وبحاول اشغل نفسي بحاجات كتير في اليوم بس كل شوية في حاجة ممكن تفكرني
انا ببقا مبسوط بس بجد بزعل لو فكرت في ان الموضوع اخره كدا ولازم يخلص
ولما قولت لاهلي قالولي ايه اللي يريحك وانا مش عارف ايه اصلا اللي المفروض اقوله
من فضلكم اللي عنده حل عشان بجد عشان بفضل افكر كتير وده بيوترني وانا داخل على الامتحانات كمان
بص يعني هو موضوع المشاعر في الفتره العمريه دي بتبقى حاجه طبيعيه يعني حاجه ان انا بجربها لاول مره بجرب ازاي لما بشوف حد قلبي بيدق جامد وجسمي كده بحس ان انا ايه يعني حسيت؟ بان وشي احمر حسيت ان في قلوب بتطلع من عيني يعني كلها اختبار لمشاعر جديده ما عدتش عليك في مراحل تانيه قبل كده. لما بنختبر حاجه جديده خلاص يعني بنحس بطعمها وبعد كده خلاص بنكمل في حياتنا عادي هو ده اللي بيحصل في النوع ده المشاعر يعني مش كل حاجه بيبقى لازم الشعور بتاعها يكمل يعني انت لو جربت تاكل الايس كريم مثلا. بطعم جديد ومختلف هتاكل واحده وهيعجبك وهتفضل فاكر طعمها كل ما هتفتكر طعم ايس كريم اه تبتسم وتقول اه كان طعمه حلو جدا كان مش معناه ان انت هتحتاج طول الوقت يبقى جنبك نفس نوع الايس كريم هي المشاعر برضو اللي بتبقى لسه نبت كده او تجربه لسه او مره تطلع من جواك بتبقى بنفس الشكل ده بالظبط بتبص عليها وبتبتسم المشاعر مش الهند هو تبتسم. وكمل حياتك عادي فلما يجي لك لحظه اللي انت بتفتكرها فيها ابتسم وقوم اغسل وشك بميه ساقعه العب شويه الضغط اعمل اي نشاط بدني لحد ما الطاقه بتاعه المشاعر دي تخلص وارجع كمل مذاكرتك وحالك وكمان الاساسي يستعيذ بالله من الشيطان لان هو بيصدق يلاقي حاجه يقعد بها بقى يعني ويشغلك عن الحاجه الاساسيه الكويسه اللي انت بتعملها مستعد من الشيطان ثلاث مرات ادخل كده وان شاء الله ربنا يعينك والموضوع.
تم النشر الجمعة، ١٩ أبريل ٢٠٢٤
استعين بالله وادعي ربنا ان يخرجها من دماغك ويحفظ قلبك زائد انك لازم تغض بصرك لان النظر هو السبب لانه هو ذريعه ارتكاب المعاصي ربنا سبحانه وتعالي أمر الرجال والستات بغض. البصر لان النظر هو الباب الأكبر للقلب لأنك لو مكنتش بصيت مكنتش دخلت قلبك واستعيذ بالله من الشيطان الرجيم والرسول صلى الله عليه وسلم قال لا تتبع النظرة النظرة فإن لك الأولي وليست لك الأخرة وكمان ادعي ربنا انه يختارلك الأفضل ممكن انت تكون شايف ان هي دي اللي انا عايزها من نصيبي لكن انت اش دراك ان هيا فعلا الأفضل ليك فدايما ادعي بالزوجه الصالحه وإن ربنا يختارلك وميخيركش لان الإنسان نظرته محدودة فمش عارف اي الأفضل ليه وحاول تبعد عن الاختلاط بيها لو أمكن والله أعلي وأعلم
تم النشر الجمعة، ١٩ أبريل ٢٠٢٤
وعليكم السلام ورحمة الله وبركاته .. في الوقت ده بالذات طبيعي يكون فيه مشاعر، خاصة انها مرحلة مش بتبقى مفهومة، بتبقى كل حاجه وعكسها. اهم حاجه في الوقت ده انك تثقف نفسك بالمرحلة اللي انت فيها، وتعمل ايه، وتعديها ازاي بأقل الخسائر. عجبني جدا في كلامك انك بتقول انك مش هتكلمها، ده كويس وياريت تثبت على قرارك. بالنسبة بقى لمشاعرك ناحيتها، وانك مضايق لمجرد انك بتحبها او بتفكر فيها، جرب تعمل العكس. في نظرية ممكن تنفع معاك، لو فضلت مركز على الحاجه ديه انك عايز تشيلها من دماغك، الموضوع بيزداد معاك اكتر واكتر. طيب يعني ايه؟ اركز معاها يعني؟ لا برضه .. طيب اعمل ايه؟ افهم المرحلة اللي انت فيها، اعرف انها طبيعية جدا، واعرف انك مش بتحبها، لان الحب محتاج علاقة ومواقف وعشرة .. حاجات كتير اوي علشان تقدر تقول انك بتحب. طيب امال اللي انا فيه ده يطلع ايه؟ مجرد مشاعر جديدة عليك، بتحس بمشاعر لاول مرة وشايف انها حلوة جدا، ومبسوط بيها .. اهم حاجه انك تفهم معنى مشاعرك وهو ده اللي هيخلصك من الحيرة اللي معاك. تفهم معني اللي انت فيه، وتثقف نفسك بالمرحلة ديه. علشان تعرف تعديها. وبالتوفيق
تم النشر السبت، ٢٠ أبريل ٢٠٢٤
قرب من ربنا وحاول تنسى الموضوع لان دا كله هتضحك عليه لما تكبر ركز بس ف دراستك دلوقتي دا المهم ومتخليش حاجة تعطلك ومتحطش دماغك ف الحاجات دي ولو انتو خير لبعض وليكو نصيب ف بعض اكيد ربنا هيجمعكو وتبقى من نصيبك
تم النشر الجمعة، ١٩ أبريل ٢٠٢٤
وعليكم السلام ورحمة الله هو فعلا مينفعش يكون في حاجة زي دي دلوقتي بس فى السن دا بالذات بتبدا مشاعرك تزداد غصب عنك بس الفكرة أن احنا مبنبقاش لسه مؤهلين لاى حاجة من دى فلازم نوجه المشاعر دى صح قرب من أهلك اكتر الموضوع هيفرق حقيقي وخليك عارف ومدرك أن فعلا الموضوع مينفعش يكبر عن كدا فى دماغك ونصيحة متعرفش صحابك أو متنشرش الخبر يعنى وخطوة عظيمة انك عرفت اهلك أحييك عليها هى يمكن فيها كل الصفات الحسنة بس هى لسه شخصيتها متكونتش مش هى الشخص اللى هتبقى عليه بعد ١٠ سنين مثلا المواقف والمشاكل حتى اللى بيتعرضلها الإنسان فى حياته بتغير كتير هى لسا مراحتش فى حته يمكن كمان شوية يظهر فيها سلوك مش حلو انت متتقبلوش ولا انت كمان لسه روحت ف حته ولا طلعت وشوفت الدنيا عاملة ازاى بكرة تروح الجامعة وتلاقي ناس صفاتهم احلى من كدا عادي مش اول شخص تلاقى فيه الصفات دى يبقى هو دا برضو الدكتور عبدالرحمن الهاشمي كان بيقول أن الشخص اللى حب قبل الجواز يراجع نفسه فلربما فيه شيء من الحب وليس الحب الناضج وما يحصل من شعور معين أو شوق إلى لحظات معينه هذا لا يبني بيتا" وفيه فكرة حلوة انك كل م تفكر فيها قول الصلاة الابراهيمية وبطل تفكير على طول الموضوع صعب بس مش مستحيل ومش اصعب من لما تعمل العلاقة وف الاخر مداركك توسع أو تفهم حجات مكنتش فاهمها وتقرر تسيب وتظلم الشخص التاني معاك
تم النشر الجمعة، ١٩ أبريل ٢٠٢٤
شكرا لكم وان شاء الله هعمل بنصايحكم وربنا يهدينا جميعاً
تم النشر الجمعة، ١٩ أبريل ٢٠٢٤
بص مشاعر محدش يقدر يلومك عليها طالما معملتش حاجه تغضب ربنا محدش له يتحكم في احساسه دي مشاعر بريئه جواك اعترف بيها لنفسك وتقبلها وحافظ علي حدود متلومش نفسك لانه ده طبيعي جدا
تم النشر الجمعة، ١٩ أبريل ٢٠٢٤
صلي كتير و ادعي ربنا يطلعها من دماغك و قوله اللهم اختارلي ولا تخبرني و لو هي خير اجعلها من نصيبي
تم النشر الجمعة، ١٩ أبريل ٢٠٢٤
استعين بالله وادعي ربنا ان يخرجها من دماغك ويحفظ قلبك زائد انك لازم تغض بصرك لان النظر هو السبب لانه هو ذريعه ارتكاب المعاصي ربنا سبحانه وتعالي أمر الرجال والستات بغض. البصر لان النظر هو الباب الأكبر للقلب لأنك لو مكنتش بصيت مكنتش دخلت قلبك واستعيذ بالله من الشيطان الرجيم والرسول صلى الله عليه وسلم قال لا تتبع النظرة النظرة فإن لك الأولي وليست لك الأخرة وكمان ادعي ربنا انه يختارلك الأفضل ممكن انت تكون شايف ان هي دي اللي انا عايزها من نصيبي لكن انت اش دراك ان هيا فعلا الأفضل ليك فدايما ادعي بالزوجه الصالحه وإن ربنا يختارلك وميخيركش لان الإنسان نظرته محدودة فمش عارف اي الأفضل ليه وحاول تبعد عن الاختلاط بيها لو أمكن والله أعلي وأعلم
تم النشر الجمعة، ١٩ أبريل ٢٠٢٤
لعرض السؤال في فدني اضغط هنا