انا عندي 25سنه بعاني من مشاكل نفسيه كتير خليني اوضح كل حاجة من صغري اهلي قاسين علي وبيعملوني وحش امي ولامرة حضنتني ابويا اسلوبه مؤذي نفسين ماعنديش صحاب اكتر من نص اهلنا مش بنكلمهم بسبب مشاكل ابويا اخواتي مافيش اي مشاعر تجاه بعض يعني مش موجودين دخلت اكتر من علاقة فاشلة خسرت فيها نفسي كنت بدور ع مشاعر وحب زي المجنونه الناس الي هنا مش شبهي ابدا حاسه مش مكاني لدرجة كنت هسيب البيت بس ستحرمت اجبلهم العار وقلت اجي ع نفسي بقيت بعمل عادة سيئه الي هو بعاقب اهلي بس انا بهلك نفسي انا متساويه بلارض لما بقرب من ربنا مش بكمل اليوم مافيش حد يسمعني ولا حد جمبي ومش متاح اروح لدكتور نفسي انا مش قادرة اعيش وخايفه اموت ع الحال دا والي ذايد الموضوع سوء انه لحد دلوقتي ماتخطبتش ولا مرة معا اني حلوة وذكية ومحترمة دا ف الي شيفاه الناس بس ربنا سترني مش اكتر وعارفه ومتاكدة انه ذنوب الي بعملها ماجله موضوع الزواج بس انا تعبت من اول اليوم بدور ع حد يسمعني ومش عارفه اروح لمين ايوه ونعمة بالله ربنا احسن سند بس الواحد عايز حد انسان يتكلم معاه ويرد حتي لو متاكد انه لاهينفعه ولا هيضره انا مش بصلي ودا علشان اهلي ماكنوش بيصلو ف مش قادرة انتظم انا تربيت ف بيت مفكك وسيئ مش عارفه اعمل اي وبقا عندي قناعه انه مافيش حل غير اهلي يموتو يا انا اموت برغم كل دا مش عايزهم يتئذو ولا يتحاسبو ع كدا ف الاخرة انا تعبانه جدا ومحتاجة حد يكون جمبي سند انا ستاهل والله حاجات حلوة تحصلي ومفتقدة جدا العيلة وحنانها وامانها مش قادرة اتقبل اني محرمة من النعمة دي
الله ينور عليكي .. انتي تستاهلي حاجات حلوة تحصلك. ايوه انتي تستاهلي حياة حلوة، تستاهلي تعيشي زي ما انتي حابه. اسفه لكل اللي تعرضتي إليه من صغرك. لكن ليه شايفة إن الحل هو لاما تموتي أو هما. طيب ما انتم ممكن تعيشوا انتو الاتنين . طبعا مع كل اللي قولتيه محتاجة طبعا لمختص. ولكن خلينا ندردش شوية معاكي ... ياترى ايه الحل؟ يعني شايفة الحل ازاي بعيد عن الموت، هما دلوقت بيأذوكي، فكرتي طيب ف أنك متهتميش بأي حاجه فيهم. عمرو دياب لما بيقولك انا عايش ومش عايش .. جربتي تعيشي معاهم بالاسلوب ده. ف أنك اوكيه انتي عائشة معاهم لكن انتي مركزة على نفسك .... نفسك انتي وبس. اصل كل اللي نقدر نعمله .. مع بعض هو انك انتي اللي تتغيري .. لأنك انتي المهم، ولأنك انتي اللي متضررة، ولانك انتي اللي المفروض تتغيري. طيب هو انا هتغير ليه، طالما أنا اللي متضررة؟ لأنك محتاجة أنك تتغيري .. محتاجة لحياة جديدة زي ما ذكرتي في الاخر. تفتكري محتاجة ل ايه؟ محتاجة تفهمي نفسك، تعرفي نقاط قوتك وضعفك. محتاجة للسكون، عارفه احساس السكون الداخلي، عارفه أن حاليا جواكي كمية كبيرة من الدوشة، ف علشان كده بقولك محتاجة للسكون، اقبلي أنهم أهلك الاول، الأمراض النفسية مش بتيجي هباءا لأ، هما ضحايا برده. ولكن لا تسمحي لنفسك أن تكوني جزءا من الضحايا. اقبلي كونهم بالشكل ده. لأن صعب تغيرهم دلوقت خاصة لو ده طبع فيهم، وهما بيتعاملوا حتى مع أقاربكم بالشكل ده. متحاوليش أنك تهدري طاقتك معاهم، ولكن عليكي بالتقبل والسكون، والقبول. اعملي لنفسك حياة، اعملي لنفسك عادات جديدة، مش عارفه ايه هي طريقة حياتك أو يومك ماشي ازاي؟ ولكن لو مفيش حاجه بتتعمل في يومك مثلا اعملي حاجات جديدة .. دخلي على ايامك حاجات حلوة وعيشي .. اتعلمي واشتغلي والعبيد رياضة، واتعلمي مهارة جديدة، عيشي الحياة اللي عايزاها. لأنك تستاهلي. وتاني، افهمي نفسك، افهمي شخصيتك، اعرفي انتي عايزة ايه، ومش عايزة ايه، وأقبلي الواقع بتاعهم، ولكن لا تكوني ضحية لهم. اتمنى ليكي التوفيق
تم النشر الأحد، ١٨ ديسمبر ٢٠٢٢
علشان تقربي من ربنا اقرأي الأذكار دايما طول ماانتي قاعدة او حتي بشتغلي بتعملي اي حاجه استغفري دايما وصلي علي النبي وسبحي هتلاقي قلبك لوحده بدأ يحن للصلاة وهتلاقي نفسك اول ما تسمعي الآذان عايزه تصلي ومره مع مره هتلاقي نفسك بتخشعي في الصلاة وممكن تبدأي في حفظ القرآن لو حتي هتحفظي آيه واحده كل يوم هتفرق معاگي اوي واطمني دايما علشان ربنا معاكي وربنا رحيم بعباده وهيغفرلك إن شاء الله ولازم تخليكي فاكره إن ربنا عالم بحالك واللي بيحصل معاكي فاطمئني وكمان انا هنا اهوو ممكن تعتبريني زي اختك وتقدري تحكيلي اي حاجه نفسك تحكيها وكل اللي هنا زي اخواتك برضوا ربنا يوفقك ويسعدك ♥🌻 وإن شاء هفضل ادعيلك دايما
تم النشر الخميس، ٢٩ ديسمبر ٢٠٢٢
ربنا يفرج همك وغمك ولكن انصحك تعملي حجامه وترقي نفسك يوميا وتعرفي ان اول خوة في علاج حالتك انك تصلحي علاقتك بالله وتخلي رضا ربنا اول واهم حاجه في حياتك عشان حياتك تتعدل وادعي كتير يا حي يا قيوم برحمتك استغيث اصلح لي شأني كله ولا تكلني الى نفسي طرفه عين واسمعي دروس دينيه كتير حتى لو مش مركزة او مش فاهمه اسمعي كتير واسمعي قران كتير حتى لو مش مركزة
تم النشر السبت، ٢٤ ديسمبر ٢٠٢٢
إن الله إذا احب عبدا ابتلاه +اصبري وكل هذا في ميزان حسناتك
تم النشر السبت، ٢٤ ديسمبر ٢٠٢٢
هبدأ معاكى من اخر جملة ( مش قادرة اتقبل اني محرمة من النعمة دي) محدش بيعيش مرتاح ولا اى حاجة بتبدأ تتحسن الا لما يتقبل قضاء الله ومقاديرة .. جربى كده تقولى لا انا مش متقبلة ان فى جاذبية ...ايه اللى هيحصل بقي ...هتفضلى تعلقى نفسك فى الهوا لوحدك ( هتتعبى اكيد ) لانك هتبقى بتقاومى قوة اكبر .... مقاومتك مش هتلغى الجاذبية ...وانك تتعلقى وترفضيها مش هيغير شىء بردوا بس انتى اللى هتتعبى . ده سر الازمة هنا نستاهل حاجات حلوة وربنا بيدينا الحلو والوحش واحنا فى كل الحالات نحمد ربنا طبعا الظروف اللى كل واحد اتربى فيها بتأثر عليه بس بعد ما يكبر ويبلغ بقى قادر انه يفكر ويتحمل نتيجة تفكيرة يا اما يستمر في اللى اتربى عليه يا اما يقرر يغيرة انتى ما شاء الله كبرتى وقررتى ان حاجات كتير غلط وفى افضل منها ....ابدأى بقى غيرى عشان تبقى فخورة بنفسك وممكن تبقى انتى سبب ان اهلك نفسهم يتغيروا عندك احتياج ولازم تخلى بالك من المصدر االلى هتاخدى منه ممكن تشوف حد يكون قريب منك حتى لو ام صاحبتك وتعتبريها مصدر الاحتياج تصاحبيها وتستشريها وتاخدى منها حنيه او واحده صاحبتك تكون حنينه وبتخاف عليكى . خليكى دايما واعية زى ما انتى كده بتسألى عشان واعيه عشان متقعيش فى حاجة تأذيكى . لو محتاجة دعم نفسى انا موجوده تقدرى تبعتيلى على الصفحة ع الفيس بوك...من غير تكلفة خالص ومتشيليش هم
تم النشر الأربعاء، ٢١ ديسمبر ٢٠٢٢
ممكن تتابعي التعليقات هنا https://www.facebook.com/groups/fedni.group/posts/846122256662646/
تم النشر الأحد، ١٨ ديسمبر ٢٠٢٢
لعرض السؤال في فدني اضغط هنا