السلام عليكم ورحمة الله وبركاته انا مش عارف ابدأ منين لكن هبدأ وخلاص
أنا حبيت بنت من وانا في ٦ ابتدائي وهي كانت في رابعة دلوقتي أنا مفروض تانية طب وهي تالتة ثانوي لكن أنا تعبت سنة وأجلت فدلوقتي في أولي وأجلت امتحانات الترم الأول برضو بسبب الاكتئاب أنا حبيتها لمدة ٧ سنين من غير ما اعترفلها ممكن جمعنا الحظ اننا نتكلم مرة واحدة بس وكانت وانا في ٦ ابتدائي كنت كل ما اقابلها قلبي ينبض بشدة ومعرفش ابعد عيني عنها كنت بفكر فيها كل لحظة ولما جبت آخري السنة اللي فاتت بعتلها على المسنجر رسالة اعتراف بحبي مشافتهاش فمسحتها وبعد فترة عملتلي بلوك لما عرفت اني كنت بعتلها فدخلت من اكونت تاني كلمتها ولما اتأخرت في رؤية الرسالة قمت ماسحها تاني المهم بعد فترة فكت البلوك للاكونت بتاعي فدخلت بعتلها نفس الكلام واستنيت ردها وشافت رسايلي وخليت أختي تكلمها وطلبت منها تفكر في كلامي وانها تاخد قرار بالموافقة او الرفض وكان من شروطي قبل شروطها اننا مش هنتكلم تاني لحد ما آجي اتقدملها وبعدت فترة ومفيش بيننا كلام ولكن جيت لما تعبت وجالي وسواس قهري واكتئاب حاد بقيت حاسس اني محتاجلها جدا وكانت جزء من الحاجات اللي بتخليني اتمسك بالحياة جزء كبير ودخلت مرة كلمتها اطمن عليها وردت وسألتها عن الدراسة وكدا وخلاص ومرة تانية دخلتلها واعترفتلها انني مريض نفسي وعندى وسواس قهري واكتئاب حاد ولو مش حابة ان شريك حياتها يبقي كدا عادي تسيبني ومتعلقش نفسها بي فردت ان دا مش عيب ويمكن لما نتعرف اكتر انت اللي تلاقيني مش عاجباك ومن ساعتها وحبي زاااد جدا ليها وبقيت بقدرها خصوصا بعد ما قالتلي معدناش نتكلم واهو عدى شهر من غير كلام المشكلة بقا اني هموت واكلمها وعارف انه حرام ومش عايز اخسرها ونفسي انها تدعمني وانا اساعدها في دراستها بس ببعد عنها علشان مخسرهاش المهم بقا انا دلوقتي في أولى طب ولي أخ في رابعة كلية وأخت مخلصة كلية لسة ومفيش حد منهم خاطب وانا كل ما افتح السيرة قدام ابويا وامي واخواتي يقولولي انت عيل لسة ومين اللي هيرضي يخطب بنته ليك وعلى كدا على طول انا بجد نفسي يبقاي فيه بينا حاجة رسمية واخطبها في اسرع وقت السؤال بقا هل ينفع اخطبها ٤ سنين واتجوزها بعد ٥ ان شاء الله هل دا معقول ولو لا هل ينفع بعد ما اخلص تانية اخطبها ؟؟
ممكن يكون اعجابك بيها ميتغيرش وتفضل شايفها مناسبه ليك من ٦ ابتدائى بس بردوا مينفعش فى ظروف دراستك ولا ثقافة بلدنا انكم تتجوزوا صغيرين اوى كده ولا حتى خطوبة لمدة طويلة زى دى لو عاوز تجرب تجربة بس تتحمل عواقبها.....كلم حد من اهلها لو ينفع ده ولا لا ...يمكن يشوفوك شاريها ويوافقوا. بس لو هنتكلم ف الافضل ...فانت كمل دراستك وادعى ربنا يجعلها نصيبك وهو قادر يسبب الاسباب ليك وليها.
تم النشر الجمعة، ٢٠ يناير ٢٠٢٣
انا عايزة اتكلم معاك في كذا جزئية .. اول حاجة حب ايه اللي في 6 ابتدائي؟ كنت تعرف ايه وقتها علشان تقول حب؟ انت لحد دلوقت انت اساسا مش بتحبها .. انت فقط معجب ومنجذب اليها .. لأن اول ده مش حب ديه مشاعر مراهقة وطبيعية جدا انك تحس انك منجذب للجنس الاخر بس منقولش حب. انت قررت انك بتحبك علشان لما بتشوفها قلبك بينبض؟ هل يعقل ذلك يعني؟ انك لمجرد انك بتشوفها قلبك بينبض؟ فكر فيها انا مش بستهزأ بمشاعرك انت دلوقت ما شاء الله دلوقت في كلية وراجل .. نفكر هل اساسا الحب اللي من طرف واحد اسمه حب؟ انت ترجمت اللي بتحس بيه غلط .. لان عادةً الكل بيترجمه بنفس الطريقة .. واحد شاف واحدة هوووب بس بيحبها ؟ طيب ثواني بس نتفاهم بتحبها منين وازاي؟ ايه اللي حصل؟ اللي حصل ده هرمونات .. كيميا .. انجذاب للجنس الاخر .. لكن مفيش ابدا حب في الموضوع .. انت اساسا يا راجل متعرفهاش؟ انت بتحب ايه بالظبط؟ بتحب ايه؟ انت متعرفهاش اساسا؟ شخصيا متعرفش عنها اي حاجة. طالما انت بتابع مع مختص نفسي علشان الاكتئاب والوسواس .. ف ياريت تطرح عليه المشكلة ديه كمان. عايزة اقولك حاجة كمان .. الطبيعي اكتر ان الواحد لما يكون تعبان او مضايق .. يكون محتاجة حد جمبه ويدعمه ف طبيعي برده انها تكون هي الحد اللي فكرت فيه. على ما اعتقد هتميل اكتر للجنس الاخر على عكس مثلا ما تروح تحكي لواحد صاحبك. راجع مفاهميك .. من تاني واتمنى تسال الطبيب اللي بتابع معاه برده. لو انت بقى مثلا بتسال سؤال محدد ان فيه بنت عجباك وعايز تخطبها) طبعا ايه اللي يمنع .. كله شئ ممكن ممكن تتقدم مثلا في سنة 2 وعادي تقعدوا مخطوبين سنتين او 3 .. حتى علشان تتعرفوا على بعض .. اكتر وبعد كده تتجوزا .. ده الرد التاني على الجزء الاخير من سؤالك. اتمنى اكون افادتك بشئ
تم النشر الخميس، ١٩ يناير ٢٠٢٣
مشاعرك حلوه جدا وانت كنت شخص مسؤل جدا ومركز مع الحلال والحرام ربنا يكرمك بجد ويوفقك ممكن تكلم والدك تاني وتالت وتثبتله انك مسؤل مش صغير وتشتغل وقت اجازتك كمان عشان تثبتله انك تقدر تفتح بيت وتكون مسؤل عنه وكمان تتفوق في كليتك عشان تكون فخر لنفسك واهلك وليها ان شاءالله
تم النشر الخميس، ١٩ يناير ٢٠٢٣
عادي طبعاً بس اتكلم مع باباك وقوله انك بتحبها ونفسك تكون معاها وتروحوا لأهلها وتتكلموا معاهم علشان تبقوا مرتبطين بعلم أهلها وشوف أهلها هيوفقوا علي مدة الخطوبه دي ولا ايه؟ ربنا يجمعكوا علي خير يارب ويفرحكوا وانشاء الله خير
تم النشر الخميس، ١٩ يناير ٢٠٢٣
لعرض السؤال في فدني اضغط هنا