واحتمال كبير لدا تكونى حاسة انك تايهه وحياتك دى ع الفاضى ومالهاش طعم .. بس ثوانى محتاجين نفسر السؤال شوية ونبسط الدنيا .. مافيش حد مننا ماعندوش هدف .. احنا بشر والى بيحركنا المشاعر .. والناس بتحب تدور ع الى يسعدها فدا هدف والنجاح فدا هدف واى حاجة تخليك مبسوط ومرتاح نفسيا وماديا فدا هدف ..احنا بس محتاجين ندعبس فى نفسنا شوية ونشوف نفسنا نعمل اي .. محتاجين نتعامل نفسيا الاول مع نفسنا ونشوف حياتنا ماشية ازاى ونظرتنا ليها ازاى ..انشغالك بمشاكل الحياه والبيت مسبب احباط وركود وانعدام شغف باى حاجة .. الى هو يعنى - يارب نعدى يومنا على خير - مع الوقت اصبحنا زاى الآلات … متسبيش نفسك للشعور دا واستغلية انك تحددى هدف توصليلة عشان تكونى فخورة بنفسك .. محتاااجين شوية طاقة ايجابية لحياتنا .. دا البنزين الى بيحركنا .. مش هنعرف نكون متشأمين وكارهين حياتنا وعاوزين ننجح فيها .. اول واكبر هدف فى حياتنا هو دخول الجنة عشان كدا احنا مأمورين بالعبادة واتباع الدين للوصول للهدف دا فاصبح دا زاى البوصلة الى بتوجه صاحبها.. فاصبح الصلاه ٥ مرات والصيام والزكاه وسائل بستخدمها فى سبيل هدفى .. قيسي على كدا كل حاجة فى حياتنا .. حتى ع الحاجات البسيطة هدفى انى اشبع فمحتاج اكل مثلا .. وهكذا كدا المعادلة واضحة " هدف + سعى + فعل ومداومة " يدينا النتيجة والنجاح الى محتاجينه لازم تستشعرى النجاح الى ف حياتك سواء الى بتعملية يوميا او دراسيا او عمليا عشان نحس اننا بنعمل حاجة مفيدة وحياتنا مش فاضية .. بنك الاهداف من واحد للتانى بيختلف بس الرابط بين الجميع ان الكل بيسعى لحاجة يوصلها .. ولازم يكون ليكى طموح واهداف تخليكى تشتغلى عشانها فتحسى بالنجاح وانك بتعملى حاجة كويسة ليكى تخليكي مبسوطة من نفسك .. دا الأثر النفسي الى محتاجينة..وكل فترة دماغنا بتكبر فاهدافنا بتتغير .. وفى اهداف قصيرة واهداف طويلة المدى .. ممكن تبدأي باول حاجة انك تعرفى انتى بتحبى اى عندك شغف باية عندك هوايات اى نفسك تتعلميها .. دى بداية كويسة انك تسعى ورا حاجة .. انتى محتاجة تقعدى مع نفسك وتبدأى تحددى مثلا وليكن : انا عاوزة اخلص كليتى ، دا هدف ، عاوز ابدأ فى كورس انجلش مثلا ، دا هدف ، عاوز اتعلم سواقه ، دا هدف ، عاوزة اعمل اسرة وبيت واربى عيال وهكذا .. وافضل حاجة انك تقعدى وتحددى اكتر .. مثلا انا محتاجة دينا اصلى الفجر فى وقتها ، محتاجة ابدأ احفظ قراءن فحعمل خطة مثلا انى احفظ كل يوم ايتين ايتين واصلى بيهم مثلا وهكذا .. قيسى على كدا مثلا الدراسة والتطوير الذاتى واللغة والبرمجة والطبخ والشغل .. وهكذاا عشان نتجنب الاحباط لازم نقسم اهدافنا الكبيرة لخطوات صغيرة ونمشى واحدة واحدة عشان نوصل التخطيط مهم جدااا عشان تكملى ومايجيش احباط المزاج عدوك الاول وهنا مزاجنا حالتنا النفسية .. السعى اهم حاجة والتوفيق من ربنا دا قانون ربانى حاربى نفسك عشان يكون ليكى هدف بسيط واوصلليه .. خلى هدفك دايما انك ترضى عن نفسك وتتقبليها وطوريها .. احنا المسئولين عن حياتنا .. وافتكرى دايما لو مساعدتيش نفسك محدش هيقدر يساعدك .. الكلام ف الموضوع دا بشكل عام كبير وكتير .. انا حاولت اوفى شوية بالى ف دماغى .. واسف جدا ع الاطاله
حاربى خوفك .. اصل اى فايدة تجاربنا غير الخبرة وانها تعلمنا وخلتنا ناخد بالنا بعد كدا واحنا بنختار .. وتأكدى ان الناس مش كلها واحد .. جربى دا ليكى انتى محتاجة دا
تم النشر الأحد، ٢٢ ديسمبر ٢٠٢٤
انا بس بقيت بخاف اقرب من حد اذا كان بنت او ولد وبخاف حد يقرب مني او يكلمني بقيت بقلق ومكنتش بعرف اثق ف حد ومش عارفه اعمل اي
تم النشر الأحد، ٢٢ ديسمبر ٢٠٢٤
مختلفناش فى المشكله بس ماتبقاش محور حياتك وليل نهار عايشه فيها ! ماهى ياتسحبك وتغرقى فيها ياتشدي نفسك ع الاقل منها شويه .. انا كلامى مادام الوضع زاى ماهو انسيها شويه .. الهى نفسك فى اى حاجة تانيه .. التفكير مهلك نفسيا وخصوصا لو قعدنا نفكر كتير ومفيش حل ولا حاجة بتتغير .. جربى مش هتخسرى حاجة .. وبالنسبه للشغل كفيل يظهرلك الناس وتعاملتهم واذا كانو بيتعاملو عشان المصلحة او لا اكيد هتلاقى حد مش عاوز منك حاجة ..شوفى واحدة ثقى فيها وقربى منها هزرى واضحكى واحكيلها وخدى رائيها .. متعامليش الناس كلهم انهم واحد ... وباذن الله هتلاقى الى يفهمك ويعوضك ويكون سند ليكى وادعى ربنا دايما بخير الصحبة وخير الاهل
تم النشر الأحد، ٢٢ ديسمبر ٢٠٢٤
مشكله والدي واخده فكري ليل ونهار عشان دي حاجه انا عايشه فيها يوميا بالنسبه لنومي ف دا مش بأيدي غصب عني الشغل نفسو كلة مقرف انا معنديش صحاب هناك وبخاف اقرب من بنت واصاحبها عشان اتخذلت كتير منهم انا عندي صحاب كتير جدا ومش من الغردقه بس لا من المنصوره كمان انا عايشه ف الغردقه طول عمري ف صحابي هنا اكتر من المنصوره هي بلدي الاساسيه بس مش بروح هناك غير لأمي بس مره او اتنين ف السنه ف انا عندي صحاب كتييير اوي بس كلهم بالاسم اصلا مش بنتكلم ولو بعت لوحده منهم واتس بتعلق رسايلي ومش بترد مع اني مش وحشه والله انا بحب الضحك والهزار جدا وعمري مت كرهت حد ولا خليت حد يكرهني انا بس مش لاقيه اللي يفهمني اذا كان بقا اللي معايا ف البيت أو الشغل أو شخص حقيقي يفهمني ويحبني يحبني عشان انا شهد مش عشان حاجه تانيه فاهمني؟
تم النشر الأحد، ٢٢ ديسمبر ٢٠٢٤
طيب احنا محتاجين نلاقى حل فى وسط المدعكة دى .. ماتحوليش تشوفى الموضوع بالشكل دا قسميه لنقط صغيرة قابله للتغيير .. اولا لازمى تتعلمى انك ترمى ورا ضهرك شويه .. على سبيل المثال مشكله والدك واخدة فكرك ليل نهار ومافيش فيها تغيير جربى تركنيها ع جنب شويه وتفكرى تعملى حاجة تانية .. شغل البيت مثلا قسميه مع اخواتك ساعدو بعض .. شغلك مثلا استغليه ان حالتك تتحسن شوية افصلى خالص من جو البيت واضحكى فيه وانسي شويه .. نومك اهتمى بيه .. ٩٠٪ من مودنا الوحش بسبب عدم انتظام النوم ... لاحظى طريقة كلامك مع نفسك كلها سلبيه طب هنتغير للاحسن ازاى لما كل حاجة بحطلها سبب واتنين وتلاته انى مطلعش خطوة لقدام .. انا مش بقلك انها سهلة بس لازم تاخدى خطوة تهيكلى بيها حياتك .. نفسك ليها عليكى حق متنسهاش
تم النشر الأحد، ٢٢ ديسمبر ٢٠٢٤
لا داعي للأسف بس صدقني انا مش لاقيه وقت اقعد مع نفسي وافكر النفسيه زفت واظن حضرتك عارف من السؤال بتاعي اللي قبل دا واتكلمنا فيه ودا اكبر الأسباب اللي مخلياني معنديش شغف لحاجه حتي هوايتي اللي هي القراءه معتش عندي طاقه ليها ولا طاقه لحاجه بقيت عصبيه جدا لاقصي درجه انا مخلصه دراسه بقالي كام سنه وواخده دبلوم تجاره مفيش حد من اللي حواليا حتي مساعدني ان نفسيتي تكون كويسه ويكون عندي شغف لحاجه انا بنام بالعافيه مش بلاقي وقت انام فيه غير الساعه 7 الصبح واصحا الساعه 10 عشان اشوف شغل البيت و اصلي فروضي وبعدها اروح شغلي وارجع الساعه 11 بليل واشوف شغل البيت وانام الساعه 7 الصبح حتي صحيا مدمره وانا لسا عندي 22 سنه طب اعمل اي مفيش وقت للتفكير م بصدق انام الكام ساعه اللي بنامهم حتي التفكير بقا مهلك جدا والصداع مش بيفارقني عموما ف زهقت من حياتي
تم النشر الأحد، ٢٢ ديسمبر ٢٠٢٤
لعرض الإجابة في فدني اضغط هنا