السلام عليكم، رمضان كريم ان شاء الله
انا عايز احكي حاجه عشان بسببها تعبت جدا نفسيا
اولا انا هقول عندي ايه، انا مولود بعيب خلقي والحمدلله شكلي كويس لكن الكلام بيبقي فيه خنفان شويه وده لعيب خلقي
الاب والام مش قرايب
أخواتي الحمدلله مفيش مشكله فيهم
ومفيش تاريخ مرضي للعيله
اتعرفت ع إنسانه وحبتها وكانت مشكلتها انها خايفه انها تخلف اطفال عندهم عيب خلقي زي، ف طلبت اننا نتاكد لكن كنا بنتعامل ونتعرف وكل يوم كنا بنقول هنعمل ف الشقه كذا ونتفرج ع العفش ونجيب ايه والوان ايه والنقاشه الالوان ايه وابتديت أتعلق بيها لغايه ما نشوف الموضوع هيوصل لايه وقولتلها انا خايف بعد ده كله تقوليلي لا قالتلي مش عارفه ورغم اني كذا مره قولتلها بصيلي كشخص بدون عيوب الخلقيه دي هل مناسب ليكي ولا لا لان وارد الانسان لو سليم وربنا كاتبله حاجه هيشوفهاc والعكس ف نخلي املنا بربنا اكتر ونعمل اللي علينا. الاجابه انها شايفاني مناسب جدا وفيا صفات هي عايزاها وكان كلامها بيديني امل ويعلقني آكتر وقررت اني اروح لدكتور وراثه
روحت لاحد المراكز لها علاقه بالأمراض الوراثيه وعملت تحليل جيني
الدكتور قال انه جين منحرف وليس جين اساسي
المهم متتجوزش قرايب و هتخلف اطفال كويسه ان شاء الله
بلغتها بالكلام ده وسالت هي برضو دكاتره تاني وأكدوا ع كلام الدكتور اللي روحتله.
قولتلها صلي استخارة زي ما قولتي لما النتيجه تطلع
صلت وانا مستني ردها بعدها بكام يوم بسألها ايه الاخبار لاني ابتديت احس اني متعلق ف الهوا
لقتها بترد رد مستفز اللي هو لو ادامك عروسه غيري اتوكل ع الله لاني مش عارفه اقرر وخايفه
ف بصراحه قولتلها هسيبك يومين وتردي عشان أعرف
مفيش ثواني لقتها بتقولي لا خلاص انا قررت مفيش نصيب! طب والكلام اللي ما بينا والحاجات إللي اتفقنا عليها كل ده كان وهم!
سؤالي هنا
الاول هل انا ظلمتها لان كلامها محسسني اني ظالم
الثاني كلامها سببلي عقدة نفسيه وخلاني افقد الثقه ف نفسي اني اتجوز او حد احبه ويقبل بيا زي ما انا
ياريت اسمع راي حضراتكم
تعرفت علي واحدة وحبيتها ؟ قصدك علاقة محرمة ابعد عنها وانساها وغضج بصرك يصاحبي وانسي الكلام مع البنات ده خالص
تم النشر الثلاثاء، ٢٦ مارس ٢٠٢٤
وعليكم السلام ورحمة الله وبركاته .. سؤالك عن هل انت ظلمتها ام لا؟ لا انت ظلمتها ليه ..! انت يمكن ظلمت نفسك لما تعلقت بشخصية هي اساسا مش عارفه تاخد اي قرار في حياتها، وكمان اخطات لما انجرفت بمشاعرك وبقيت تتخيل حياتكم مع بعض هتبقى ازاي وامور الشقة والعفش وغيره، وهي اساسا مترددة في زواجها منك. انت هنا اللي ظلمت نفسك في الحقيقة. وكلامي هنا هربطه بسؤالك التاني ان حصلك عقدة بسببها .. انت برضه اللي وضعت نفسك في الموقف ده للاسف، لان تعلقت بشخصية غلط من الاول، ومشتة ومش عارفه تاخد اي قرار. يعني ليه تظلم الحب بسبب شخصية غلط عرفتها؟ وليه تظلم منظومة الزواج بسببها !! لا انت اخدت تجربة اه كانت قاسية .. ولكن علمتك اشياء كويسة .. بانك لما تعرف شخصية مرة تانية تبقى انت واضح من نفسك وواضح معاها ولو حسيت بانها بتلف وتدور من الاول كده ومش عارفه تاخد قرار تبعد فورا .. وربنا يوفقك .. ومتجلدش نفسك اللي حصل حصل .. فكر في اللي جاي.
تم النشر الخميس، ٢١ مارس ٢٠٢٤
اولا الخلفه دي بتاعت ربنا يعالم ويامه ناس اتقدملتلنا وبتترفض لاسباب عبيطه وبعدين بيتجوزا ونكتشف عنهم حاجات بنقعد نحمد ربنا ان نحصلش نصيب ف ملخص اكيد ربنا شايلك العوض يعالم اي اللي ف دماغها
تم النشر الخميس، ٢١ مارس ٢٠٢٤
أولًا هي مش غلطانة حقها ترفض وهي وأنت شايفة إنكم غلط في حتة التسرع واختيار أشياء لبيتكم..إلخ، لأن مادام كان فيه شك من الأول واحتمال بالرفض للسبب دا وكان فيه اتفاق إنكم هتشوفوا كلام الدكاترة الأول وبعدين هتقرروا على هذا الأساس كان لازم تستنوا وما تتعمقوش في حاجات تانية، محافظة على مشاعرك ومشاعرها، ثانيا زي ما قلت حقها ترفض والأمور والقبول بالشخصيات دا نصيب، ولكن أنت ما ظلمتهاش ولكن زي ما قلت ما كنش ينفع تدخلوا في تفاصيل قبل التأكد من المقبول والموافقة، ولكن دا في الأخر شيء لا يعيبك إطلاقا لأن شخصيتك هي أقرت فيها بصفات حسنة وقابلاها، وأكيد فيه غيرها هتشوف نفس الصفات الحسنة دي وتقبلك، ولكن التخوف دا شيء طبيعي عند البشر ممكن حد يتخوف من غير منطق بالرغم من كلام الدكاترة وحد تاني ياخد بالأسباب وخلاص هو سأل دكاترة وهياخد برأيهم، فالناس بتختلف ودا نصيب في الأول والآخر ولعله خير أو هي مش مناسبة. ربنا يرزقك بالشخصية إلي تناسبك ويرزقك حبها.
تم النشر الخميس، ٢١ مارس ٢٠٢٤
هقولك علي 3 نصايح اظن انك محتاجهم في حياتك 1- الدنيا مش بتقف علي حد علشان كده حاول تنسي كل اللي فات 2- كفايه سهر وتفكير في ناس انت مش في دماغهم ربنا يعوضك باللي احسن منهم بإذن اللّٰه 3- حب نفسك وما تستناش حاجه من حد
تم النشر الخميس، ٢١ مارس ٢٠٢٤
أولاً انت مظلمتهاش ثانياً دي حاجه مش بأيدك ده خلقه ربنا ملكش ذنب فيها والمفروض هي تفهم ده مش يمكن ربنا بعدها عنك لأنها مش كويسه ماهي اللي تتكلم عن حاجه ربنا خلقها دي مش كويسه ربنا قال لقد خلقنا الإنسان في احسن تقويم حاول تنساها وان شاء الله ربنا يرزقك ببنت الحلال
تم النشر الخميس، ٢١ مارس ٢٠٢٤
كيد ربنا هيهعوضك بحد احسن منها كيد هتلاقي بنت الحلال الهتريحك وبعدين يعني لا نسان ممكن يخطب مرة وتنين وتلاتة وميحلصش نصيب وبعدين انتي ظلمتها فين دي هي الظلمتك وحسستك بالحب وضحكت علكي
تم النشر الخميس، ٢١ مارس ٢٠٢٤
الحياه مش بتقف علي حد دا خير ليك متعرفش ربنا شيلك اي التعلق دا وفراقه صعب بس اكيد ف الاحسن منها والي بتقبلك زي ما انت ثق ف نفسك والي بيحبك بجدد ومحتاجك هياخدك زي ما انت كدا
تم النشر الخميس، ٢١ مارس ٢٠٢٤
مفيش حرج عليك هي شكلها مش مسؤولة ولا ناضجة
تم النشر الخميس، ٢١ مارس ٢٠٢٤
زودتها على نفسك مفيش حد كامل مكمل قول الحمد لله أن دا عيبك العيوب الحقيقة في الأخلاق والشخصية هي بتتلكك بعدين هتندم وانت شكلك طيب والطيب له الطيب اللي زيه وربنا يكرمك ويكرمها
تم النشر الخميس، ٢١ مارس ٢٠٢٤
لعرض السؤال في فدني اضغط هنا