عندي سؤال
حد هنا مريض كهربا عالمخ (صرع)
او يعرف حد كده (كبير بالغ مش طفل)
و اتعالج و وقف ادويه
و لو بنت كده .. قدرتي تتجوزي و تخلفي عادي؟
انا المرض جالي فجأه و بقالي سنين بتعالج و باخد ادويه يومياً
و الموضوع مأثر فيا نفسياً جداً و حاسه انه عقبه كبيره اوي ف حياتي
خايفه لو اتجوزت مقدرش اكون ام و لو ربنا كرمني خايفه اولادي يشوفوا امهم و هي تعبانه
ده غير اني بخاف انام و الافكار السلبيه مش بتسيبني
طول الوقت حتى لو تعبانه بظهر قدام اهلي اني كويسه و ده تاعبني نفسياً
و انا ف الحقيقه من جوايا ضعيفه جداً و خايفه من كل حاجه
المرض ده الناس بتستخدمه ف الهزار و هو ف الحقيقه هم كبير اوي ف حياة اي شخص مريض بيه و نقطه سودا
بعد اذنكم تدعولي كتير اوي ربنا يشفيني و يريح بالي
لاني خسرت و بخسر كتير اوي بسبب الموضوع ده
السلام عليكم ورحمه الله وبركاته أولا الف سلامه عليك وباذن الله ربنا عليك يمن عليك بالعافيه وبالشفاء التام بقدرته. وشفائه من عنده باذن الله خليني اقول لك انه سواء المرض اللي عندك مرض الصرع او اي مرض ثاني سواء مرض عضوي او مرض ذهني او مرض نفسي لو اي حد فينا متقبلهوش ده بيخلي المرض يكون وضعه اسوا مش افضل يعني لو احنا فضلنا متضايقين انه المرض موجود ده مش هيخليه يمشي ده مش هيخلي الاعراض بتاعته تبقى اخف ده مش هيخلي قدرتنا على التعامل معاك تبقى اكبر بالعكس الامور كلها هتكون رايحه للاسوء اول حاجه لازم نعملها هي ان احنا نتقبل وجود المرض خلاص هو موجود احنا ما نقدرش نمنع وجوده حاليا او ما نقدرش ان احنا نوقف الاعراض او الحاجات اللي بيسببها المرض ده فدي اول نقطه التقبل ده يبان ازاي التقبل ده يبان انك تتكلمي بانك عندك المرض ده لما تكوني في مكاني يا جماعه انا لازم تبقوا عارفين انا ممكن نيجيلي نوبه صرع وهيحصل فيها كذا وفي الوقت ده لو ده حصل لي يا ريت تتصرفوا بالطريقه الفلانيه ده كده اسمه ايه ده كده اسمه تقبل ليه؟ لان انا اتكلمت على الحاجه اللي هي فعلا موجوده واقعيا ما انكرتهاش وما حاولتش اخبي وجودها. ثاني حاجه ان انا ابدا اخلي حياتي بيتها. معمول حساب المرض ده فانا دلوقتي لو هكون موجوده في مكان فيه ناس كثير لكن في مكان ممكن يكون يعني بعيد عن الناس شويه فانا اختياري هيكون دايما المكان اللي بعيد عن الناس ليه عشان انا مكسوفه؟ مش عشان مكسوفه ولكن عشان ظروف المرض اللي عندي لو لا قدر الله حصلت لي نوبه الصرع او حاجه يبقى انا هكون في مكان يعني اكثر خصوصيه فما يحصلش مشكله كبيره ليا لو انا هتكشف او هدومي هيحصل فيها حاجه او أتخبط او اي حاجه من دي دي الامور اللي هيبان فيها التقبل بتاعك، الادويه بتاعتي هاخد بالي منها لما اكون تعبانة هقول انا تعبانه في الوقت ده انا مش محتاجه امثل اني ما عنديش حاجه ليه لاني متقبله وجود المرض ده. عارفه انك ممكن تحسي انه ياه هو ممكن يعني يكون ده كل الموضوع وقد ايه ده ممكن يكون كلام نظري لكن ده كلام حقيقي انا بقوله لك من واقع ناس انا اتعاملت معاهم كان عندهم مختلف الانواع من الامراض وكان اول نقطه في الحل هي انهم يتقبلوا وجود المرض وده اللي خلاهم يحسوا ان هم احسن اتمنى تقبلي النقطه دي وتشتغلي عليها قبل اي حاجه ثانيه خالص. ** النقطه الثانيه وهي نقطه ان انا افكر في المستقبل ممكن يحصل فيه ايه الحقيقه انه انت بتقولي انه المرض ده جالك من فتره قريبه يعني ده مش مرض انت اتولدت بيه فالفتره القريبه دي كان فيه قبلها ماضي وانت ما كنتيش تعرفي ان في المستقبل هيحصل كده حصل ايه ساعتها هل كنت عايشه حياتك وانت مستنيه يجيلك المرض ده لا ما كنتيش مستنيه ولا حاجه كذلك ده اللي احنا محتاجين نعمله مع المستقبل احنا ما نعرفش المستقبل هيجي في ايه ما نعرفش المستقبل اللي هيكون عامل ازاي اللي احنا نعرفه كويس قوي ان احنا محتاجين النهارده اللي احنا عايشينه نتعامل فيه بقدر اللي موجود وبقدر المتاح ونشوف انه ده افضل حاجه حاليا احنا فليه احنا ننغص الحالي ونضايق نفسنا في الوضع الحالي عشان خاطر احنا بصينا على المستقبل اللي احنا منعرفش عنه حاجه اذا كان هيكون اسوا او هيكون افضل محدش عارف بالنسبه لتصوراتك انه هل اقدر اكون ام زوج انت تقدري تكوني كل حاجه ليه لانه قد ما الصرع ده يعني من الامراض العنيفه قد ما في ناس كثير جدا بامراض عنيفه بتخليهم يبقوا في المستشفى لأيام كل فترة فخلاص بقى الطبيعي بتاع حياتهم إنهم بيروحوا المسشفى ومع ذلك بيعيشوا وبيكملوا حياتهم وبيبقى عندهم أولاد وبيبقى عندهم بيت وبيبقى عندهم شغل وكل حاجة ولكن هم بيرتبوا حياتهم على أساس اللي ممكن يحصل لهم بناء على الوضع بتاعهم زي ما أنا قلت لك في الريكورد اللي فات. أتمنى إن أنا أكون ساعدتك لو فيه أي حاجة محتاجة تسألي فيها اتفضلي.
تم النشر الأربعاء، ٢٣ أبريل ٢٠٢٥
الف سلامه عليكي يا روحي الست اللي ردت ردت بجواب يمكن كافي اللهم بارك بس هقلك على حاجه كمان لو انت مسلمه فانت لازم تبقي عارفه انه ربنا مبيجبش حاجه وحشه لحد ربنا رحيم بينا وده ممكن يكون سبب في دخولك الجنه ممكن يكون ابتلاء محتاج صبر علشان ربنا يجازيكي بالصبر ده ويدخلك الجنه فلازم يكون عندك رضا رضا بقضاء الله تكوني دايما عارفه انه ربنا مش هيعطيكي حاجه وحشه لازم تثقي بالله ادعي ربنا دايما بنعمة الصبر والرضا لانه بجد النعمتين دول بيخلوكي عايشه مرتاحه نفسيا وسعيده ومريحه بالك تقربي من ربنا صلي اقرئي قرءان ادعي وخليكي عارفه انه كمان في امراض صعبه جدا مثلا واحد عنده شلل كامل اللهم احفظنا تبصيله وتقولي الحمد لله انا ربنا عطيني الصحه قادره اتحرك واعمل كل حاجه وربنا مبيجبش حاجه وحشه لحد 🤍🤍 ربنا يشفيكي 🤲🤍🤍
تم النشر الأربعاء، ٢٣ أبريل ٢٠٢٥
عزيزتي، أشعر بمدى ما تمرين به من صعوبات وقلق، ويجب أن نفهم أن مرض الصرع هو حالة طبية تحتاج إلى دعم وفهم، وليس فقط من جانب المريض، بل أيضًا من العائلة والمجتمع. من المهم أن تعلمي أن العديد من الأشخاص الذين يعانون من الصرع تمكنوا من عيش حياة طبيعية وتحقيق أهدافهم، بما في ذلك الزواج وتكوين أسرة. هناك تجارب إيجابية عديدة لأشخاص عانوا من هذا المرض ولم يمنعهم من التقدم في حياتهم. أنت تعانين من أفكار سلبية وهذا أمر طبيعي في مواجهة مثل هذه التحديات، لكن عليك محاولة تطوير استراتيجيات لتنمية الثقة بنفسك. تذكري أن الشعور بالضعف لا يعني أنك غير قادرة على تحقيق أحلامك. التواصل مع أخصائي نفسي أو مستشار يمكن أن يساعدك في التعامل مع هذه الأفكار السلبية ويعطيك أدوات للتكيف. كوني صادقة مع نفسك ومع من حولك، قد يكون الحديث عن مشاعرك ضعيفًا في البداية، لكن الفهم والدعم يمكن أن يخففا العبء كثيرًا. حاولي أن تحيطي نفسك بأشخاص داعمين ومؤمنين بك. ندعو الله أن يشفيك ويرزقك السلام الداخلي والقوة لمواجهة تحدياتك. تذكري أن هذه المرحلة في حياتك ليست النهاية، بل بداية جديدة قد تحمل لك العديد من الفرص. (يرجى ملاحظة أن هذه إجابة آلية بواسطة الذكاء الصناعي ولا تغني عن زيارة الطبيب في الأمور الصحية)
تم النشر الأربعاء، ٢٣ أبريل ٢٠٢٥
انا كان عند حد قريب ليا تمام وخد ادويته اتنظم عليها ٣سنين ووقف الحمدلله العلاج وبقى طبيعي
تم النشر الأربعاء، ٢٣ أبريل ٢٠٢٥
لعرض السؤال في فدني اضغط هنا