من ساعة ما النتيجة بتاعت تالتة ثانوى ظهرت وانا نفسيتى بايظة خالص وخصوصا انى كنت شبه متاكده انى داخله طب خلاص بس اتصدمت بمجموع زى الزفت والمشكله انى كل اصحابى كده داخلين طب ما عدا انا والعشرة الاوائل هما هما بتوع كل سنه ماعدا انا ف انا لسه ف صدمه المشكله بقا انى مش قادرة اتقبل ولا بصلى ولا بكلم اهلى كويس ولا عايزة اشوف حد ووقتى كله ضايع بلا هدف فى الا شئ وعندى احساس بالسخط على القدر مش قدرة اسيطر عليه والحاله بتتطور وللاسف بقيت مش واثقه ف ترتيب ربنا لحياتى لان حسه ان كل حاجه ضاعت و مش بقيلى حاجه كده وفقدت الشغف لهواياتى كمان
انا عارفه الحالة دى ...حاسه بيكى وعدت عليا لما مجموعى مجابش غير كلية علوم وملحقتش صيدلة حتى على نص درجة بالظبط... انا هنصحك بقي النصيحة اللى ياريتنى كنت عملتها لنفسي. روحى زورى مستشفيات او روحى دار أيتام ..او اعملى اى عمل تطوعى فى الوقت ده احنا بنحتاج نشوف الدنيا بمنظور اوسع شوية...انزلى وشوفى الدنيا واسعه ازاى....الحياة ولا هى سكة واحده ولا هى اختيار واحد ...طول الوقت الاختيارات كتير وتقدرى تختارى اللى يناسبك . بس الحاجات اللى بره ايدينا بتقلل الاختيارات فى مجموعة مختلفة بس ....حسب الظروف بقي.. احنا عيبنا فى مصر بس اننا متعلمناش نكتشف قدراتنا ولا نقيم نفسنا ومهاراتنا ...وبنستنى بس الدرجات تقيمنا. بكره تشوفى دكاتره كتير غيروا مجالهم او بقوا ميالين لمجال تانى بعد ما اتخرجوا وكبروا ....بلاش تبقي زيهم ...اكتشفى نفسك من دلوقتى وهتلاقى نفسك عندك مهارات كتير تدخلك مجال تحبيه وبردوا ممكن يبقي مجال طبي وتبقي منيزة ومؤثرة كمان .
تم النشر الجمعة، ٤ أغسطس ٢٠٢٣
سخط على القدر و مش واثقه ف ترتيب ربنا ؟ القدر ده بتاع ربنا و دي إرادة ربنا و كل ده قسمه و نصيب و الدنيا كلها دار اختبار مؤقته وانتي بصالها انها الاخر و للأسف انتي من الصدمه بقيتي بتفكري و بتتصرفي غلط حتى الصدمه دي انتي و الاسره و الصحاب سبب فيها عشان كبرتوا الموضوع استعيني بالله و استغفريه و احمدي و ارجعي لربنا دي مش نهاية العالم و خلاص دي إرادة ربنا ربنا مش كاتبلك خير ف كلية الطب و اكيد تدبير ربنا خير و احسن ليكي من تدبيرك لنفسك انتي لسه صغيره و انا مش اكبر منك بفرق كبير بس عديت بتجربة مشابهة و اكتشفت ف الاخر اني كنت مكبر الموضوع و متزعليش من طريقتي و كلامي بس حقيقي لازم تفوقي عشان متغرقيش اكتر ف الدوامه دي
تم النشر الجمعة، ٤ أغسطس ٢٠٢٣
وليه مذنبة نفسك اوي كدا؟! دا ربنا اختارلك الافضل الك لو انتي شايفة دا العكس بس مينفعش لانو ربنا حطك وكتبلك قدرك واختار انك تجيبي العلامة دي ومتدخليش الطب لانو شايف قدراتك بتخصص تاني رح تكوني افضل فيه وتحطي مهارتك الي انتي مش شايفاها في تخصص تختاريه بعدين.. انصحك انو تحاولي تعدي الحالة دي وتعيشي حياتك وتتقربي من ربنا وتطلبي منه السماح عالفترة يلي قسيتي فيها على نفسك وبعدتي فيها عنو.. كبريها بتكبر وصغريها بتصغر.. صدقيني مشكلتك دي صغيرة وبتنحل باي تخصص تختاريه وتحطي مواهبك ومهارتك فيه وان شاء الله كم يوم وترجعي تبعتيلنا انك عديتي الفترة دي واي التخصص الي اخترتيه..
تم النشر الجمعة، ٤ أغسطس ٢٠٢٣
لازم تصبر و تووكل على الله و متسبش الصلاة خالص و التوم بيها و قوي علاقتك بربنا
تم النشر الأحد، ٦ أغسطس ٢٠٢٣
مقدرة الحالة اللي انتي فيها ... بس هل تعتقدي ان مجموع ممكن بعمل ف حد كده؟ ممكن يخليه يعتقد انه خلاص بالنسباله نهاية العالم؟ احنا اللي عملنا كده (المجتمع) احنا اللي خلينا الموضوع ياخد اكبر من حجمه .. للاسف غلطة وبيدفع تمنها اجيال .. وبنظام تعليم اساسا معقد .. ف ليه تزعلي عليه؟ انتي تعبتي واجتهدتي وعملتي اللي عليكي؟ ليه شايفة ان اختيار ربنا ليكي غلط؟ طيب تعالي نجرب تدي فرصة لنفسك وتكتشفي الحياة اللي جايه ؟ تجربي وتشوفي بنفسك هل ده كان غلط ولا صح؟ طيب انتي مش واثقة لترتيب ربنا؟ طيب كنتي واثقة في ايه بالظبط؟ احنا لما كل حاجه تضيع من ايدينا بنعمل ايه؟ احنا بنبقى محتاجين وقتها حاجه تطمنا .. ودعاء ندعيه لربنا .. علشان يطمنا اكتر .. ادي لنفسك فرصه انك تعرفي وتفهمي ان ترتيب ربنا احسن كتير من ترتيب اي بشر .. حتى انتي! لانها عمر ما هنقارن نفسنا ب ترتيب ربنا .. خدي وقتك ف الزعل زي ما انتي عايزة ولكن بعد كده لازم تحطي ف اعتبارك وتقولي لنفسك انك مينفعش تكملي كده، لازم تفوقي لحياتك ومستقبلك .. ايا كان بقى هو ايه ؟ ايا كان فهو صدقيني خير ليكي وبكره هتعرفي ده بنفسك.
تم النشر السبت، ٥ أغسطس ٢٠٢٣
انا حاسه بيكي والله انا كنت دفعه السنه اللي فاتت ومجبتش مجموع حلو انا مكنتش حابه طب بس كنت نفسي اجيب مجموع حلو عشان اهلي زعلت جداا ودخلت ف فتره اكتئاب وكرهت كل حاجه حتي نفسي وحاولت اموت نفسي بس افتكرت ان ربنا دايما بيخترلنا الخير واحنا المفروض نقول الحمدلله واكيد انتي سمعتي ان ناس كتير في طب سقطت عشان داخلين طب بالغش ادخلي الكليه اللي تجيلك وشدي حيلك فيها وابقي دكتوره جامعيه وممكن تدخلي كليه علوم وتبقي دكتوره تحاليل او دكتوره تغذيه واعرفي ان الثانوي مش نهايه العالم وقولي حسبي الله ف النظام الفاشل اللي ضيع تعبنا وتعب أهلنا وبلاش تخلي اهلك يزعلوا اكتر
تم النشر السبت، ٥ أغسطس ٢٠٢٣
انك مجبتيش مجموع كويس مش نهاية الدنيا وانك مدخلتيش طب مش نهاية العالم اقعدي مع نفسك واهدى وفكري انتي ممكن تعملي شفت دريم وتشوفي هتدخلي كلية ايه وتركزي فيها يمكن تبقى الاولى على دفعتك وتعملي دراسات عليا وتبقي دكتورة في الجامعة واللقب اللي بتحلمي بيه لسه في ايدك تحققيه اكيد ربنا ليه حكمة و متندميش مادام مقصرتيش وعملتي اللي عليكي اعقليها و توكلي
تم النشر الجمعة، ٤ أغسطس ٢٠٢٣
أولا مش هنعترض على قضاء ربنا وأكيد ادام كدا حصل يبقا ربنا كاتبلك الاحسن مليون مره من طب ويا عالم كان ممكن تحصل حاجه لو دخلتى طب أو كدا فى حديث قدسى بيقول "لو علمتم الغيب لأخترتم الواقع" يعنى ربنا سبحانه وتعالى دائما بيختار الافضل لينا انتى استعيذى بالله بس وهونى على نفسك وأهم حاجه علاقتك بربنا ترجع قويه وخليكى دائما واثقه أنه بيختارلنا الخير دائما ومتقارنيش نفسك بصحابك خالص لأن دا اكتر حاجه ممكن تأذيكى وخليكى واثقه فى ربنا يحبيبتى وهو عارف انك عملتى اللى عليك وهيعوضك فحاجات كتير اوى تانيه متعرفيش الخير فين "وعسى أن تكرهوا شيئا وهو خير لكم" هونى على نفسك وصلى أهم حاجه وإن شاء الله كل حاجه هتبقا كويسه ومتيأسيش أبدا مهما كانت الكليه اللى هتدخليها لازم تثبتى نفسك فيها وتحبيها اعتبريها رحله جديده ليكى وطبعا كل دا خير عشان ربنا اصلا مبيعملش غير الخير لينا ♥️♥️
تم النشر الجمعة، ٤ أغسطس ٢٠٢٣
إن شاءلله خير ❤💙شكرا ليكى جدا جزاك الله خيراً
تم النشر السبت، ٥ أغسطس ٢٠٢٣
لعرض السؤال في فدني اضغط هنا