انا عندي 16 سنه وكنت ف ريليشن من سنه الريليشن دي اذتني نفسيا واثرت بشكل كبير اوي علي صحتي ومذاكرتي وكل حاجه بس عشان كان اول حب ف حياتي كنت مكمله بس ف مره بدءت اكره تصرفات الشخص دا كنت دايما بحس ب نقص وقله ثقه ف نفسي وان شكلي وحش واني مش كفايا مع اني جميله جدا وجميله كفايا لدرجه ان اي حد يتمناني وهو كان من الناس دي بس عشان انا خليت يكون عنده ثقه ف نفسه وكنت بقلل من نفسي قدامه عشان احسسه انه حلو وكل دا وف الاخر شاف نفسه عليا ودايما كان بيعمل كل حاجه بتدايقني وكان عايز يكلم كل صحابي و كنت مش بصدق الكلام اللي بيتقال وبقول ممكن يكونو عايزين يوقعو بينا وكان بيستغلني ماديا كنت لما بجيبله هديه او حاجه حلوه ب فلوس كانت طريقته تتغير معايا للاحسن يومين ويرجع تاني لحد لما زهقت وحصلت مشكله وشوفت شات ليه وهو بيتكلم وبيقول انه عايز يكلم صحبتي وبينكر وجودي وانه مرتبط اصلا او ان ف حياته واحده ف بعدت عنه من غير ما اعاتبه و خليت يظهر عنده اني عملتله بلوك عشان اشوف هيبعتلي حاجه ولا لا بي مبعتش ومحاولش ومن يوميها واحنا مش بنتكلم ولما عرف اني ف ريليشن مع شخص بيحبني وبيخاف عليا وبيغير عليا وبيعمل ليا كل حاجه بيتمنالي الرضا ارضا حرفيا كان عايز يرجعلي وبيقول انه مش عارف ينساني المهم الشخص اللي انا عرفته دا بيحبني زي ما انا كنت بتمني انا مكنتش بحبه ف الاول بس هو خلاني حبيته حب لدرجه اني ممكن ابيع نفسي عشان اشوفه مبسوط واتعلقت بيه انا مصابه ب التعلق المرضي المهم اني كنت متكلمه عنه وقايله اني مش بحبه ومش عايزه اكمل معاه مع صحبتي ودا كان ف بدايه علاقتنا ك اصحاب انا وهو وهو شاف الكلام دا من قريب وبعد عني وقال ليا انه مش متخيل اني اخليه كدا وكل دا كان غصب عني وكل لما بنتخانق بيفتح الموضوع تاني وبيقول ليا احمدي ربنا اني موجود ف حياتك لحد دلوقتي وانه مش عارف هو ازاي كمل بعد كل دا انا بفضل اتأسف كتير واعمل اي حاجه عشان اخليه ينسي الموضوع لاكن هو مش قادر ينسي وكل لما يحصل مشكله بينا بيتكلم ف الموضوع دا انا بحس ب ضيقه ومعتش قادره استحمل كلامه ليا اكتر من كدا بس مش قادره ابعد عنه ابدا عشان بحبه اوي اوي ومش عارفه اعمل اي من كترر التفكير لما بنتخانق وبصالحه انا عشان انا اللي بكون غلطانه بفكر ف كلامه اللي هيقوله ليا بتردد عشان مش هقدر اسمع الكلام دا بس بقول لازم اعمل كدا واسمع الكلام دا غصب عني انا بس عايزاه يرجع معايا زي الاول ويخاف علي زعلي ويحبني وكل اللي كان بيعمله معايا الاول المهم اني اتجهت للادويه المنومه والمهدئه وانا لسه 16 سنه عشان مفكرش ف اي حاجه وانام بس انا مش عارفه المشكله عندي ولا عنده بس انا بحبه ومش عايزاه يبعد عني ابدا وعايزاه ميضمنش وجودي وف نفس الوقت بكون عايزه اطمنه اني معاه واني مش هسيبه عايزه اوزن العلاقه بتاعتنا بس مش لاقيه حل
أهلًا بك، شكرًا لمشاركتك مشكلتلك مع فدني وإن شاء الله تستفيدي من ردود خبراء وأعضاء فدني. معلش لو حسيتِ إن كلامي قاسي شوية بالنسبة لكِ لكن اعتبريها نصيحة من أخت أكبر منك. انت لسه صغيرة، ليه بتهدري مشاعرك وطاقتك بالطريقة دي؟ لسه 16 سنة وفيه حاجات كتيرة أهم تعيشيها في السن ده بدل ما تتعبي قلبك وتضيعي مشاعرك على أشخاص ميستحقوش. حتى لو انت شايفة إنك بتحبيهم ومتعلقة بهم فبالنسبة للأولاد في السن ده ولحد ما بيقرروا خلاص إن الوقت حان عشان يستقروا ويفتحوا بيت وأسرة فهم كل اللي بيعملوه إنهم بيتسلوا. يرتبطوا ببنت ويلعبوا بمشاعرها أو يعيشوا يومين يحبوا ويعشقوا ومفيش مشكلة بالنسبة لهم لو حصل تجاوزات مع البنات اللي بيعلقوهم بهم. مش هكلمك في حلال وحرام لأن المفروض تكوني عارفة إن العلاقات دي في ديننا حرام أصلا ومينفعش يكون فيه علاقة بين ولد وبنت لا قدر الله ممكن يحصل تجاوزات أو مشاكل كتير منها. وحتى لو محصلش تجاوز فهتلاقي فيه وجع قلب وخناقات زي ما في حالتك وصلتك تفكري تاخدي مهدئات وأدوية. هل انت راضية عن حالتك كده؟ هل راضية تبقى مشاعرك وطاقتك مهدورة عشان أي شخص والأهم إن الشخص ده أصلا ملوش حق عليك؟ راضية إنك تنسي كل حاجة مهمة في حياتك وتفضلي تفكري وتزعلي وتبكي وتحرقي في أعصابك؟ عززي نفسك يا حبيبتي... انت أكبر من كده. أكبر وأحسن من أن ولد يستغل حاجتك للعاطفة والحب في السن ده ويعلقك به وبعد كده يزهق ويبدأ يدور على بنت تانية. انت تستحقي تعيشي حياتك عشان نفسك وتتعلمي حاجات تنفعك لمستقبلك وتكوني انت اللي في موضع تتشرطي فيه ويجيلك اللي يطلب رضاك ويحبك ويعرف الطريق لباب بيتك غير كده صدقيني وقت ضايع ومشاعر بتهدريها على اللي يسوى واللي ميسواش. ربنا يكتب لك الخير دايمًا ويبعد عنك كل شر. تحياتي لك.
تم النشر الخميس، ١٨ يوليو ٢٠٢٤
هنصحك كأخت لان ١٨ سنه يعني قريبه منك في السن اللي احنا فيه دا بنمر بحاجات كتيره اووي زي دي وعاوزا اقولك اني مريت بحاجه زي كدا بس للاسف احنا بنكون فاكرين ان دا حب بس هو مش حب احنا لسه في سن المراهقه يعني بنكون مش فاهمين يعني اي حب او مشاعر بس مجرد ان حد يظهر اهتمامه بينا او يتكلم معانا لفتره طويله او حتا يتكلم معانا كتير ويحسسك باهتمامه بتعلق بيه وبتفكر ان دا حب وأننا كدا بنحب بعض خاصه انتي كبنت اكتر منه بتتاثري بكدا لان مشاعرك رقيقه اكتر وبنتعلق بسرعه هيكون من الأحسن انك تبعدي ولو هو فعلا بيحبك فهينسى وغير كدا هيبعد عنك ويحافظ عليكي وهيعمل اي حاجه عشان يتقدملك حاولي تفكري تاني اقعدي مع نفسك ولو لقيتي الأمور هتتعقد معاكي حاولي تتكلمي مع حد قريب منك ميكونش صحابك لو اختك هيكون احسن وبجد نصيحتي انك تبعدي انتي كدا بتدمري حياتك انتي ابعدي وهو لو بيحبك فعلا هحاول يرجع او عالاقل هيقولك بكدا لو ركزتي علي دراستك وبدأتي حياتك وطبعا مش هتكون سهله ولا من اول مره هتعرفي بس لازم تفضلي تحاولي وافتكري انك لازم تهتمي بدراستك هي سلاحك الوحيد في الدنيا دي بتمنالك الطريق الصح وانك تعرفي تختاري اللي فيه الخير ليكي بجد ودي نصيحه مني كأخت لان مريت بحاجه زي كدا بس قررت ابعد واهتم بدراستي وبس عشان مضيعه تعب اهلي معايا وكمان اعرفي ان اللي فيه الخير ليكي هو اللي ربنا كاتبه يعني مش في ايد حد فينا واكيد لو في نصيب بينكو ربنا هيجعلو من نصيبك ربنا يوفقك يارب
تم النشر الجمعة، ١٩ يوليو ٢٠٢٤
اولا انتي لسة صغيرة جدا علي انك تدخلي في ريليشن الاهم في السن ده هو انك تهتمي بنفسك دينيا ودراسيا دول اهم حاجة وانك تحافظي علي قلبك وعلي مشاعرك وتكون غالية عليكي مش تهديريها في علاقات ملهاش لازمة واول درس تتعلميه ان مفيش حاجة اسمها صحوبية بين الولد والبنت و حرام شرعا ودي اهم حاجة وثانيا عمرك ماتقللي من نفسك عشان اللي قدامك شايف نفسه قليل دي مشكلة عنده هو مش مشكلتك انتي مش جاية دنيا تعالجي ناس ودي في اي علاقة سوا صداقات او زواج او اهل ،ولازم يكون في حب واحترام متبادل وده في كل علاقات ومتخليش حد يمارس عليكي اي الاعيب نفسية يبقي هو اللي غلطان في حقك ويخليكي انتي اللي تعتذري ده مش اسلوب ناس سوية والحل انك تعملي بلوك لهذا شخص من كل وسايل تواصل اجتماعي واي حاجه ليها علاقة بيه وثانيا تقرب لله عز وجل ودعاء بنسيان هذا الشخص واشغال الوقت بي كل ما هو مفيد وعدم سماع اي اغاني حزينة او فراق او حب واجترار الموقف اشغلي يومك علي قد ما تقدري اهتمي بدراستك وبنفسك ونصيحة عدم دخول في اي ريلشين تانية الا لما تكبري وتكون زواج وخطوبة
تم النشر الخميس، ١٨ يوليو ٢٠٢٤
لعرض السؤال في فدني اضغط هنا