انا اسفه لو هطول ف المشكله دي بس انا بعاني من كتير ومش لاقيه حل
انا ٢٣ سنه وهتخرج السنادي من كلية طبيه
الحمد لله من صغري وانا بذاكر وملتزمه ودايما ف حالي ولا ليا ف اختلاط ولا شغل المراهقين دا كان طريقي ..دخلت الكلية واشتركت ف حاجه تطوعيه واتعرفت ع زميل ليا وقعد يلمحلي أنه معجب بيا وأنه مش هيقدر يتقدم وكدا وحقيقي انا كنت هبله اوي وساذجة ومكنتش بلاقي الحنية ف بيتنا فا كنت بصدق اي حد حرفيا المهم غلطت وحبيته وفضلنا سنتين سوا كان بيطلع قعد نقص كتير عليا وعرفت أنه شخصية نرجسية وانا الضحية تحملت كتير ونفسيتي ادمرت والحمد لله بعدت عنه ونسبته تماما لحد ما بشوفه ولا كأن شايفه حاجه بعد ما كنت اشوفه اتخنق واعيط..
بعده كان ف حد اكبر مني ب ١٢ سنه كلمني أنه عايز يتقدم وأنه شغال ف السعوديه وهيزل يكلم اهلي وكلم ماما وحقيقي انا برضو بساذجتي صدقته وقعدنا نتكلم ٦ شهور لحد ما بدأ يتهرب مني وحسين برضو أنه مريض نفسي وكان شكاك ودا عرفته لما كان بيحكيلي أنه اتصدم ف اول حب في حياته وكان معشمني بحاجات كتير وكلم بابا أنه هينزل يتقدم وكنت فرحانه اني هلاقي عوض عن اللي شوفته ف الاول لكن زي ما قولت طلع مريض واتهرب واتهمني بحاجات كتير وحشه وسبته خالص ..
انا عيلتي من امي بتكرهني اوي عندي تلات خالات منهم واحده بنتها قدي ف السن ودايما بينا مقارنة واحنا ف ثانوي عامه هي قسمت وانا لا المهم لما دخلت الكلية عملت فيس وهي دخلتلي وقعدت تتكلم وتحاول تمسك عليا حاجه تذلني بيها عشان اعملها اللي هي عايزاه ولما ملقيتش مني فايده طلبت من مباشر كدا اني ادخل اكلم ابن خالتي اللي هي بتحبه وكانوا مرتبطين عشان تعرف هيعمل معايا ايه !! كتجربة يعني وانا رفضت تماما وبعدت عنها وبقيت تزن عليا وكنت بهرب منها
المهم ماما وبابا عرفتهم لاني خوفت تعمل اكونت بأسمي وتدخله (دا كان طريقه تفكيري وقتها أولي جامعه) المهم بعد مرور السنين لقيت خالتي بطلب ايدي من ماما (انا كنت معجبه بأبن خالتي دا من واحنا عيال بطبع أننا متربين سوا ولكن عمري ما قولته ولا كنت بشوفه اصلا مفيش اي تجمعات من وقت ما كبرنا ) كنت فرحانه وف نفس الوقت موضوع بنت خالتي دا مخوفتي وماما رفضت خالص برضو المهم بابا قال أنا عارف تربيه الولد وان البنت دي هي اللي مش تمام( لأنها كانت بتحاول تكلم اخويا اللي اصغر منها ) مع العلم أن ابن خالتي دا هو ابن عمي برضو المهم انا قولت اشوفه واقعد افهم منه لقيته حد كويس وقال إن هي اللي بدأت معاه وأنها لفت ع صحابي وكلام مش حلو ف حقها وأنها غلطت ف والدته وكدا
وأنه عايزني انا ولو كان عايزها كان راحلها من الاول وانا صدقته وبعدين لقيت خلافات كتير مؤذيه ليا وشبكه قليله اوي ٢٠ الف واحنا علينا المطبخ واوضه اطفال وعقد نقص طلعت عليا عشان انا دكتوره وهو لا مع اني مش باصه النقطه دي خالص وكنت شايفه أنه مناسب عشان عارفه أنه قريبي وحماتي خالتي ومفيش بيت عيله يعني هرتاح لكن اتضح أنه ابن مامته هو ابنها الوحيد ع بنتين ومعندوش شخصية وأهله هيجوزوه وهيتكفلوا بكل حاجه وهو ملهوش عين يطلب ومرتبه قليل ٤٥٠ جنيه ايوا هو دا المبلغ وهما هيساعدوه المهم ماما رفضت الوضع وانا الحقيقة حسيت أن حياتي هتبقي جحيم وخالتي اللي هتتحكم ف كل حاجه كدا ونهينا الموضوع وبعدها بأربع شهور راح لبنت عمي تاني ورفضوه وبعدين راح خطب بنت خالتي اللي كان معاها الاول
قد ايه بني آدم معندوش شخصية وماشي ورا كلام أمه ...خالتي الكبيرة طبعا فرحانه وكانت تتمناه وخدته
الصغيره بقا لسه متجوزتش وهي أكبر مني ب ٢٠ سنه وطبعا انا عيله بالنسبالها وأزاي اتخطب وهي لسه وطريقه كلامها عني فيها مقارنه بالكلية والشكل واللبس
دول خالاتي 💔
انا قلبي اتكسر من كل العك دا ومن كلامهم عليا اني طالعه ف العالي واني باصه لبيت عمامي التانين اني اتجوز حد من عيالهم وانا مش كدا ولا عمري بصيت لحد والله انا طول عمري بذاكر عشان اكون دكتوره زي ما انا عايزه ومعنديش الكبر دا خالص والله هما شايفين دا عشان انا الوحيده اللي ف عيلتي دكتوره..
كل دا كتير عليا حاسه اني اتأذيت كتير وان كل الناس بتكرهني وكمان (كان عندي صحابي من الكلية خذلوني ف عز ما انا كنت محتاجهم ملقتهمش )واني مستحقش الحب ولا أن حد يحبني بجد ويقدرني كل ما حد يعجب بيا بتهرب منه ومش عايزه ادي فرصه لاي حد يقرب مني انا معنديش ثقه في بني آدم تاني
انا مش وحشه والله دايما مسالمه ومش بأذي حد وكل اللي حواليا بيقولي انتي نعمه ف حياه اي حد يعرفك
رأيكم اعمل ايه
بالنسبة ل أول مشكلة وهي الاشخاص اللي هما دخلوا حياتك أول حاجه انتي غلطتي انك عطيتي الامان واتكلمتي معاهم، يعني مثلا اول واحد ده .. المفروص انك عطيتي الامان وصدقتي بناءا على ايه؟؟ انا مقدرة جدا انها اول تجربة وطبعا معندكيش خبرة في العلاقات وازاي تتصرفي ...! ولكن التصرف العقلاني .. او المنطقي او الصح ... ان حد معجب بيكي .. والله يتفضل البيت مفتوح، هيقولك اصل ومش اصل .. ولسه قدامي لما الرد هيكون لما تبقى جاهز ابقى تعالى والبيت مفتوح .. غير كده متوعديش حد بحاجه، ولا تدخلي في علاقات مع حد. لانك اولا انتي مش ضامنه ده كويس ولا لا؟ هل بيتسلى ولا ايه حكايته؟ قبل ده كله حرام العلاقات اللي بتبقى غير شرعية وبتبقى في الضلمه. اما عن تاني علاقة ... في شباب اساسا كتير بيقولوا هكلم ماما وبابا ومعرفش ايه وتفضلي معاه وتتكلموا وفي لاخر اساسا يكون بيتسلى وميجيش، لا لما يبقى عايز يجي البيت مفتوح، غير كده مفيش كلام بنيه التعارف، امال الخطوبة معمولة ليه؟ اما عن عيلتك ... معظم العائلات بتبقى فيها جو الغيرة ده ما بينهم، اللي تعمليه انك تطلعي كل ده من دماغك ومتركزيييييش مع حد، ولا فلانه قالت عليكي كذا او كذا .. ولا فلانه عملت او معملتش ... خليكي في نفسك وبس، ومذاكرتك واهتمي بنفسك انتي في مركز كويس وهيبقى عندك شغلك بعد كده فركزي ع نفسك .. وكل الافلام اللي بتحصل في العيلة ملكيش دعوة بيها ولا تهتمي بيها .... واتعلمي تعرفي الاشخاص الكويسة اللي تدخليهم دايرتك من الصحاب والناس اللي مينفعش يدخلوا الدايرة ديه ... واتعلمي من اخطائك القديمة يعني اعرفي الاخطاء اللي حصلت قبل كده وحللي الموضوع واعرفي انتي غلطتي في ايه ومتكرريش ده تاني.
تم النشر الأحد، ٢٣ أبريل ٢٠٢٣
بخصوص الشخصين اللي اتهربوا منك في الاول فأنت احمدي ربنا اوعي تزعلي أو تحسي انك وحشة ماكانش فيهم الخير ولا يستاهلوا بنت جميله زيك بس نصيحة مني الشباب لما بتلاقي البنت سهل أنها تتكلم معاهم وتصدقهم بيحسوا أنها سهلة فابيبعدوا ومش بياخدوا خطوة رسمي عشان كده حافظي علي قلبك لحد ما يجي الشخص المناسب اللي يدخل البيت من بابه بالنسبة لبنات خالتك في كل عيلة بيكون في جو الغيرة والحقد ده وده بس بذيادة عشان انت في كلية كويسة واحسن منهم فتجاهليهم تماما وكبري دماغك وحتي كلامهم أنك عايزة حد من عيال عمك ده متحطهوش في دماغك انت اي حد يتمني يرتبط بيك واوعي تفكر انك قليلة ابدا خليك واثقه في نفسك وربنا يبعت لك الشخص اللي يعرف قيمتك ويوفقك يارب ❤️
تم النشر الأحد، ٢٣ أبريل ٢٠٢٣
لعرض السؤال في فدني اضغط هنا