السلام عليكم ورحمة الله وبركاته
بيجيلي تفكير مفرط بشكل مزعج في اي وقت لدرجة بيجيلي صداع و أرق و مبعرفش انام و بيخلي مزاجي وحش، التفكير مبيخلصش، و دايما قلقانة و مبعرفش أهدى و بتوتر كتير و بخاف من المجهول و بقعد اتخيل سيناريوهات وحشة للي هيحصل و مبعرفش أوقف القلق ده ولا التفكير، بخاف من الناس اللي حواليا و مبثقش في حد ولا بقعد اكلم حد على اللي بيحصلي لاني عارفة انه مش هيفهمني أو مبحبش ان حد يعرف عني حاجة معينة، و دايما و انا ماشية في الشارع بحس ان انا متراقبة و إن كل الناس بتبصلي و مبحسش بالأمان مع ان ممكن ميكونش في حد بيبصلي اصلا و لو انا طالعة على السلم و في حد طالع ورايا بتوتر و بحس ان هو هيضربني أو هيئذيني، لو فيه رقم غريب اتصل بيا مبردش لأني بخاف يكون هيهكر موبايلي أو حد بيعاكس، لما حد غريب يخبط على الباب مبفتحش حتى لو بتاع غاز أو نور لأني ببقى حاسة إنه هيئذيني، و لو انا راكبة لوحدي في ميكروباص ببقى قاعدة قلقانة و خايفة لأن ممكن السواق يئذيني و انا بخاف من الرجالة بشكل عام و دايما بتجنبهم و مبحبش اتعامل معاهم. و انا بتكلم، بلألأ في الكلام و بتوتر و مبعرفش اقول ايه، و لما بزعل أو بعيط مبحبش حد يشوفني بعيط لأني كده هظهر ضعيفة غير الأسئلة اللي هتقعد تتسئل: مالك؟ و زعلانة ليه؟ و ايه اللي حصل؟ و انا مش عايزة حد يسألني الأسئلة دي لأن أحيانا بكون زعلانة و بعيط من غير سبب فبعيط لوحدي من غير ما حد يشوفني و ساعات بعيط و انا بصلي و ده بيحسسني براحة، بس انا مشاعري متناقضة ببقى عايزة حد يحضني جامد و يضمني جامد عشان احس بالأمان و محسش بالوحدة و احس ان فيه حد معايا و فاهمني و في نفس الوقت مش عايزة حد يحضني ولا يعرف اصلا اني كنت بعيط لاني عارفة مهما حضنت الناس كلها مش هحس بالدفء و الأمان اللي انا عايزاه و في نفس الوقت مش هيفهموني و هيكون حضن عادي مش هحس بيه. و عندي فرط في حلم اليقظة و مبعرفش اوقفه، في اي وقت، في اي مكان، اقعد اتخيل و اعمل سيناريوهات خيالية و ابني عالم خيالي و شخصيات خيالية و اتخيل الأحداث و انا اللي اعلملها و بقضي وقت طويل في الموضوع ده لدرجة اني بتعب و الموضوع ده طول الوقت، و انا ماشية بتخيل حتى ممكن اعمل تعبيرات بوشي أو اتكلم بصوت واطي، و انا باكل بتخيل، و انا نايمة، و انا في المدرسة، و انا في الحمام، في كل مكان و زمان بقعد اتخيل سيناريوهات و ممكن لو حدث حصل في الواقع اجي اغير أحداثه في خيالي و اكون انا الشخصية الرئيسية و الأحداث اليومية اللي بتحصل في حياتي أو في فيلم أو في مسلسل اجي في خيالي و ازود عليها أو اعدلها و دماغي شغال على كده طول الوقت يا اما اقعد افكر تفكير مفرط من حاجة انا قلقانة منها أو حاجة هتحصل، و التفكير ده سواء كان تخيل أو حلم يقظة بيجيلي أرق و مبعرفش انام و بتبقى دماغي هتنفجر من كتر التفكير و ساعات بيوصل اني مش مستحملة و بقعد اعيط لاني مش عارفة انام و كمان من كتر ما انا مبثقش في الناس مبصدقهمش و ساعات بحس انهم بيكدبوا عليا و لو شخص غريب قالي حاجة مبصدقهاش، بس مش على طول في حاجات بصدقها و في حاجات لا. و دايما معنديش ثقة في نفسي و دايما مترددة اعمل حاجة او اتخذ قرار و اي حد يطلب مني حاجة مبقدرش اقول لا حتى لو الحاجة دي هتضرني أو انا مش موافقة عليها، معنديش ثقة اتكلم و اعبر عن نفسي و بلاقي صعوبة في التعبير عن مشاعري أو بالأصح مبعرفش اعبر اصلا و دايما مترددة اقول لحد يساعدني بس فعلا الموضوع وصل لمرحلة صعبة وبقى لا يطاق، و كمان بحس اني مليش لازمة أو انا مش مهمة في حياة البعض يعني لو في حد اعرفه من زمان شوفته في الشارع مش هروح اسلم عليه و بقول اكيد مش هيفتكرني و دايما حاسة ان انا وحيدة و مش معايا حد و دايما بكون عايزة حد يحبني و يحضني و يحسسني بالأمان و بعمل كل ده في خيالي بس ببقى عايزاه في الحقيقة.
فياريت اللي يعرف يرشدني لدكتور نفسي شاطر و فاتح عيادة يقولي.
https://www.youtube.com/watch?v=7N4op7qprNE شرح مهم على اليوتيوب يشرح لك كيف تتعامل مع الوسواس القهرى https://www.youtube.com/watch?v=hN4tPZlY77k
تم النشر الخميس، ٢٥ أبريل ٢٠٢٤
https://www.youtube.com/watch?v=r_Mu3x2LGw4 شرح كل ما يتعلق بالوساوس كلها من طبيب متخصص
تم النشر الخميس، ٢٥ أبريل ٢٠٢٤
آيات الوسواس تردديها عندما تكونين بمفردك و قبل الخروج من المنزل و ستشعرك بالطمأنينة و الهدوء لان الله هو الذى سيحفظك من كل شىء يزعجك سورة الناس “قُلْ أَعُوذُ بِرَبّ النّاسِ مَلِكِ النّاسِ إِلَهِ النّاسِ مِن شَرّ الْوَسْوَاسِ الْخَنّاسِ الّذِى يُوَسْوِسُ فِي صُدُورِ النّاسِ* مِنَ الْجِنّةِ وَالنّاسِ”. “وَنُنَزِّلُ مِنَ الْقُرْآنِ مَا هُوَ شِفَاءٌ وَرَحْمَةٌ لِّلْمُؤْمِنِينَ ۙ وَلَا يَزِيدُ الظَّالِمِينَ إِلَّا خَسَارًا” سورة الإسراء 82. “يَا أَيُّهَا النَّاسُ قَدْ جَاءَتْكُم مَّوْعِظَةٌ مِّن رَّبِّكُمْ وَشِفَاءٌ لِّمَا فِي الصُّدُورِ وَهُدًى وَرَحْمَةٌ لِّلْمُؤْمِنِينَ” سورة يونس 57. ” أَلَمْ نَشْرَحْ لَكَ صَدْرَكَ وَوَضَعْنَا عَنكَ وِزْرَك َ الَّذِي أَنقَضَ ظَهْرَكَ وَرَفَعْنَا لَكَ ذِكْرَك فَإِنَّ مَعَ العُسْرِ يُسْراً إِنَّ مَعَ العُسْرِ يُسْراً”. “أَفَمَن شَرَحَ اللَّهُ صَدْرَهُ لِلإِسْلامِ فَهُوَ عَلَىنُورٍ مِّن رَّبِّهِ”. “فَأَنزَلَ اللَّهُ سَكِينَتَهُ عَلَى رَسُولِهِ وَعَلَى الْمُؤْمِنِينَ”. “قَالَ رَبِّ اشْرَحْ لِي صَدْرِي وَيَسِّرْ لِي أَمْرِي”. “هُوَ الَّذِي أَنزَلَ السَّكِينَةَ فِي قُلُوبِ الْمُؤْمِنِينَ لِيَزْدَادُوا إِيمَانًا مَّعَ إِيمَانِهِمْ, وَلِلَّهِ جُنُودُ السَّمَاوَاتِ وَالْأَرْضِ, وَكَانَ اللَّهُ عَلِيمًا حَكِيمًا”.
تم النشر الخميس، ٢٥ أبريل ٢٠٢٤
روشتة علاج شرعية لعلاج الوسواس القهري قال الشيخ أحمد ممدوح، مدير إدارة الأبحاث الشرعية وأمين الفتوى بدار الإفتاء المصرية، إن الوسواس عندما يتحول إلى قهري يجب تجاهله تماما، لافتا إلى أن الوسواس من الشيطان. وأضاف الشيخ أحمد ممدوح، أن الأمر الثاني لعلاج الوسواس القهري هو كثرة الذكر، مشيرا إلى أن افضل الذكر لطرد الوسواس هو الصلاة على النبي صلى الله عليه وسلم مائة مرة في اليوم والاستغفار مائة مرة يوميا، ( اللهم صل و سلم وبارك على سيدنا محمد وآل سيدنا محمد استغفر الله العظيم ) بالإضافة إلى قول "يا مُقْسِط" فور الاستيقاظ من النوم مائة مرة، وبالمواظبة على هذا الورد اليومي لن يكون هناك وسواس على الإطلاق بإذن الله.
تم النشر الخميس، ٢٥ أبريل ٢٠٢٤
بصي انا بجد زيك بالظبط ويمكن اكتر ودا سببب اني اكيد طول الوقت ببقا لوحدي وبقعد اتخيل حاجات سلبيه كتير وببعد نهائي عن التجمعات عشان مش بحبها ورغم اني مخطوبه وقولت حد دخل حياتي وهتحسن لكن لما حبيته اكتر التفكير ذاد عليا وهو قالي انتي بقتي واحده مجنونه ومعندكيش ثقه ف نفسك وكلام كتير بياثر عليا مع اني مفروض يهون ويستحملني هكون افضل واحسن بس انا مشوفتش دا وحالتي بتذيد
تم النشر الخميس، ٢٥ أبريل ٢٠٢٤
+1
تم النشر الجمعة، ٢٦ أبريل ٢٠٢٤
لعرض السؤال في فدني اضغط هنا