ممكن تكون مشكلتي تافهه بالنسبه لمشاكل البعض بس انا اتعقدت منها جامد وقرب يجيلي اكتئاب
من وانا صغيره خالص او اول ما اتولدت كان شعري ناعم وكان كويس جدا وطويل وكل الناس مبهورين بشعري لحد ما بقيت 8 او 9 سنين وللأسف امي استشورت شعري عشان كنا رايحين فرح ومرات عمي هي الي استشورته ليا وللأسف من وقتها شعري اتدمر واتحرق واتجعد وبقا تالف جدا ودخلت المدرسه وانا شعري كدا اتعرضت لكلام سلبي ممكن نسميه تنمر بشع على شعري من مدرسيني واهلي واخواتي وبشوف كل البنات بشعرهم الصحي والناعم وبيتصورو بيه الا انا واتحجبت في سن صغير جدا بسبب دا
جربت منتجات كتيره جدا حاولت اعالجه بمنتجات كتير صرفت عليه كتير جدا يمكن بقالي 3 سنين بحاول اعالجه ومفيش اي نتيجه بسيطه حتى هايش وقصير ومجعد وتالف وجبت له كل حاجه ودفعت عليه مبالغ كبيره ومفيش فايده بقيت بعيط كل يوم قبل ما انام ونفسيتي اتدمرت وبقا كل شغلي الشاغل في الحياه هو شعري
الي بطلبه منكم لو سمحتو تساعدوني بوصفه او علاج او اي حاجه حتى لو دعاء اي حاجه تحل مشكله شعري عشان انا قربت اكتئب واتعقد منه ودايما بلبس بونيه في البيت معنتش قادره ابص في شكله في المرايه
وشكرا لحضراتكم اتمنى تفيدوني بأي حاجه اعتبروني اختكم الصغيره وساعدوني
اوقات تركيزنا الشديد مع الشيء هو سبب عدم تغييره او تقبله ، الشعر جزء من جسمنا ومن نفستنا ، لما بتكون نفسيتي مرتاحه شعرنا بيتحسن ، زي حاجات كتير في جسمنا ، زي اوقات الصداع الشديد اوقات توتر ، الالام الرقبه اوقات بيكون سببها ضغط نفسي شديد . واوقات شعرنا بيقع بيتغير بعد طبعا عمل التحاليل المناسبه ، نقص معادن او حاله نفسيه او تغيير هرمونات بسبب العمر الحالي سواء كنتي صغيره او كبيره. اول حاجه حبيبتي حاولي تتقبلي تغيير شكله ، ممكن نجرب تسريحات جديده مع قصه جديده ، نجرب نتعامل معاه علي الوضع الجديد ونبحث عن المناسب له الان وليس نفكر ان نرجعه فقط الي ماسبق !
تم النشر الجمعة، ٢٦ أبريل ٢٠٢٤
شعرك إتعرض لحرارة قويه سببت في تلفه ولإن شعرك كان ناعم واستريت في البداية فظهرت عليه الأعراض زي الهيشان والجفاف و التقصيف من نهاياته و انه كل ما يطول يتقصف من النهايات فتحسي انه مش بيطول الحل مش إنك تفضلي مغطياه انتِ كدا بتكتميه عرفيني الأول إيه روتين شعرك الحالي أو المنتجات اللي بتستخدميها وهل بتطبقي عليه أي نوع من أنواع حمام الزيت؟ و كل فتره قد ايه؟ أو ايه الزيوت اللي بتستخدميها ؟ وهل بتستخدمي Leave-in ولا لا ؟ لان في حالتك محتاجه روتين مناسب عشان يرجع لطبيعته ومتقلقيش دا وضع مؤقت وهيرجع لطبيعته تاني مع الروتين المناسب وأهم حاجه توقفي حراره وبلاش شعرك يتعرض لحراره نهائي
تم النشر الخميس، ٢٥ أبريل ٢٠٢٤
خلينى اقولك ان اى وصفات او منتجات غير طبيعية من اى حد حتى لو جابت نتيجة معاه ده هيكون مضر ليكى فى الاغلب كل اللى ذكرتيه منتجات هى للتصفيف مش للعلاج والعلاج محتاج استمرارية عموما زيارة لطبيب جلدية ضرورى عشان يقولك مدى الضرر اللى حصل وهل الضرر فى البصيلات ولا فى الفروه ولا فى الشعره نفسها ده بيحدد وبيوفر عليكى التجارب الكتير لو عاوزه بقى حاجة طبيعية ...اعملى حنه لشعرك كل 15 يوم وزودى عليها سدر مطحون ...ان شاء الله ده عمره ما بيكون حاجة مضره لانه كله طبيعى ومغذى للشعر
تم النشر الجمعة، ٢٦ أبريل ٢٠٢٤
جربت تعمل بروتين او اى فرد الشعر بيجيب نتيجه كويسه لمده سنه كامله
تم النشر الخميس، ٢٥ أبريل ٢٠٢٤
عليكى بالرقيه ماء مرقة بالقرأن الكريم من ع اليوتيوب بس داومى عليها اهم حاجه
تم النشر الخميس، ٢٥ أبريل ٢٠٢٤
اذا لم يكن هنالك اي مشكلة عضوية في الجسم بعد التاكد من الدكاترة , نرى مدى تأثير أفكارك السلبية على حياتك ومقدار انفعالاتك اليومية , فلها تأثير كبير في تساقط الشعر مثلا
تم النشر الجمعة، ٢٦ أبريل ٢٠٢٤
شكرا لحضرتك يا اميره ههتم بكدا بردو، انا فعلا بفكر كتير ان ممكن يكون دا حسد لشعري او حد حسدني عشان مستحيل التغير المفاجئ الي حصل له دا بسرعه اوي كدا
تم النشر الجمعة، ٢٦ أبريل ٢٠٢٤
نفسيه
تم النشر الخميس، ٢٥ أبريل ٢٠٢٤
لعرض السؤال في فدني اضغط هنا