أنا باخد ٧ أنواع أدوية نفسية هل دا هيأثر علي عقليا لاني لاحظت تأخر في المستوى الدراسي جدا والتركيز
تابعي مع الدكتور بتاعك .. وقولي له الاعراض اللي بتظهر عليكي .. وهو اكيد هيتصرف سواء هيقولك نقلل الجرعة او نغير الدواء. ولكن خلي بالك اوعي تغيري او تلعبي في جرعات الدواء من نفسك .. لازم الدكتور هو اللي يحدد ده. وان شاء الله ربنا يتمم شفاكي على كل خير
تم النشر الأربعاء، ١٨ يناير ٢٠٢٣
ناس كتير بتسألني السؤال ده، هو أنا لو خدت الدوا ده هيغير من الدماغ أو يخليها أسوأ؟ مع سرد الأعراض الجانبية اللي بتحصلهم بسبب الدواء وهنا فيه نقطتين أساسيتين لازم نفتكرهم أول نقطة هي أنه المرض النفسي نفسه بيغير في الدماغ من جوه، يعني اللي بيسيب الاكتئاب أو القلق بدون علاج، ده نفسه بيغير في شكل الدماغ من جوه بيأثر على حجات كتير جداً، زي النواقل العصبية المختلفة وزي المستقبلات العصبية وحتى كمان حجم الدماغ نفسه مع الوقت بيصغر في بعض الأمراض وبيحصل ما يُشبه الضمور, فابالتالي أصلاً الخوف من المرض على الدماغ أكبر من الخوف من الدوا نفسه. النقطة التانية أن معظم الأدوية النفسية إن لم يكن كلها مش بتحوّل الدماغ وإلا لو كانت بتعمل كده فعلاً وبهذه البساطة مكانش حد غِلب أساساً يعني! هي بتعمل حاجتين بشكل رئيسي ومبسّط الشيء الأول أنها بتحاول تُعيد الدماغ لطريقة العمل الطبيعية، يعني لو في نواقل عصبية مثلاً مٌستهلكة أو خلصانة، هي بتخلي الكمية اللي موجودة طبيعي في الجسم تشتغل أكتر عشان تعوّض الناقص، وهكذا. وده اللي بيخلي التحسن بتاعها بطيء، لأنها مش بتعمل سحر، هي بتحاول تساعد الدماغ أنه يشتغل بكفاءته الطبيعية اللي أصبحت مفقودة بسبب المرض. الحاجة التاني اللي بيعملها الدوا هي للأسف الأعراض الجانبية، ولكن دي حاجة مش مقتصرة على الأدوية النفسية فقط، إطلاقاً، بل أي حد بياخد أي دوا مهما كان طبيعي جداً أنه هيحصل منه بعض الأعراض الجانبية وهنا فيه ميزة كبيرة أنه معظم الأعراض الجانبية بتختفي تماماً خلال أسبوعين أو تلاتة من تعاطي الدواء. وده النسبة الأكبر من الأعراض. طب ولو فيه أعراض جانبية مكملة؟ هنا ممكن يحصل كذا حاجة أولها ممكم الطبيب يكون عنده بديل أصلا للدوا ده يقوم بنفس الدور بدون هذا العرض الجانبي وده موجود كتير في الطب النفسي أو ممكن يكون فيه دوا بيعالج أصلاً العرض الجانبي، زي لو دوا بيعمل رعشة في الايد، في دوا بيتاخد عشان يمنع ده. طب لو فرضنا مفيش بديل ومفيش علاج للعرض الجانبي خلاص؟ هنا الدكتور والعيان بيحاولوا يوصلوا مع بعض ل حاجة بنسميها Risk / benefit analysis يعني إيه هي الأضرار والمميزات بتاعة الاستمرار على الدوا ده؟ مقابل العودة للمرض؟ ومفيش أي إجبار في الموضوع، الفكرة هي في وجود طبيب متفهم ومريض مستعد للنقاش بردو. إنما المضر هو عدم التواصل مع الطبيب وفهم أسبابه لكتابة كل دواء إيه، وتتناقش معاه لحد ما توصلوا لحلول مُرضية ليك في حدود الاستطاعة طبعاً
تم النشر الخميس، ١٩ يناير ٢٠٢٣
طالما في طبيب هو الي مديهولك وهو عارف بيدي ايه متقلقيش ووارد جدا تركيزك القليل بسبب اعراض اضطرابك نفسه او انك بتمري بفتره من الضغط بالأضافه لمشكلتك الاصليه ويفضل طبعا تكلمي طبيبك تقوليله على مشكلة تركيزك دي عشان يساعدك فيها او تقوليله انك مدايقه من عدد الادويه دي
تم النشر الأربعاء، ١٨ يناير ٢٠٢٣
هو الادويه حاجه طبيعيه بس الكميه دي كلها كتيره شويه ممكن تقللي الادويه دي او تبطليها خالص لان الكميه فعلا مبالغ فيها
تم النشر الأحد، ٤ يونيو ٢٠٢٣
الحاله عموما بتأثر على التركيز والادوية الحمدلله انها بتحسن حالتك النفسية ...اديها فرصه تستقر وهتلاقى تركيزك بدأ يرجع تانى . عموما لازم تاخد دوا للمعدة مع الادوية الكتيرة دى
تم النشر الأربعاء، ٣١ مايو ٢٠٢٣
سرباس ستاتومين بوسبار توداسيدون سنتليفاي اجوفالد ميمونتكس
تم النشر الأربعاء، ١٨ يناير ٢٠٢٣
ما هي هذه الأدوية؟
تم النشر الأربعاء، ١٨ يناير ٢٠٢٣
لعرض السؤال في فدني اضغط هنا