سلام عليكم بصى انتى عندك حاجات حلوه جدا انتى الحمد لله ربنا خلاكى تسمعى الفيديوهات علشان تشيلى فكره الانتحار من دماغك وكمان انتى بتفكرى فى الاخره يعنى ضميرك لسه صاحى انتى ربنا اتكلم عن كل واحد فينا فى القرآن انتى حسب كلامك بتقولى عماله اقوم واقع ومش عارفه تقربى من ربنا معنى كده انك نفسك لوامه وربنا اقسم بيها فى اول سوره القيامه فى تانى ايه على طول نفسك اللوامه دى لو فضلتى تحاولى وتجاهدى نفسك على الخير هتوصلى فى يوم لنفس مطمئنه وده ليه لان ربنا قال والذين جاهدوا فينا لنهدينهم سبلنايعنى انتى دلوقتى مش قادره تصلى ومش حاسه بحاجه وانتى بتصلى لاكن لما تحاولى كتير وتقرأى عن الخشوع وتبدأى تقرأى سورمن القرآن وتبدأى تحفظى وتبدأى تسمعى عن الصلاه واهميتها هتبدأى وقتها تحسى بحلاوه الصلاه وكذلك فى كل عباده تمشى بالنظريه دى وكمان محتاجه تتوبى وانا محتاج اتوب وكلنا محتاجين التوبه اذا كان رسول الله صلى الله عليه وسلم كان يتوب فى اليوم أكثر من ١٠٠ مره فتخيلى احنا محتاجين نتوب قد ايه وكمان التوبه تمحو الكبائر تفتكرى مش هتمحى الصغائر وكمان لما بتوبى وتعملى الطاعات قلبك بيبدأ ينضف من الخنقه والضيق والجبل اللى عليه لان ربنا قال كلا بل ران على قلوبهم ما كانوا يكسبون والران هينضف بالتوبه وكمان ربنا بيحب التوابين ويحب المتطهرين انتى عارفه يعنى ايه ربنا يحبك وكمان التوبه من صفات الأنبياء كلها من اول سيدنا ادم عليه السلام حتى سيدنا محمد صلى الله عليه وسلم طيب ممكن تقعى اه ممكن جدا طيب تعملى ايه توبى تانى ومليون ده مش استهتار لاكن دى مجاهدة النفس اصلك ملكيش غير ربنا اسألى نفسك هتروحى لمين غير لله رب العالمين وخليكى دايما مع صحبه صالحه وده بردك مش كلامى ده كلام الله قال عز وجل فى سوره الكهف واصبر نفسك مع الذين يدعون ربهم بالغداوة والعشى ولا تعد عيناك عنهم تريد زينه الحياه الدنيا ولا تطع من اغفلنا قلبه عن ذكرنا واتبع هواه وكان امره فرطا الصحبه الصالحه حتى لو انتى مش صالحه هتبقى زيهم بعد كده لانهم كلهم بيشدوكى الصح واقفلى اى باب ممكن يرجعك لأى ذنب بحيث الشيطان ميدخلش ليكى منه كل ده اول نصيحه لسه بقى ناقص التانيه
تم النشر السبت، ٢١ يناير ٢٠٢٣
انتى اول حاجه تحطيها فى بالك انتى مش فاشله انتى مشتته لسه ملقتيش المجال اللى تنجحى فيه وشاطره فيه يعنى مثلا الدكتور شاطر والسباك شاطر والمكانيكى شاطر لاكن كل واحد فيهم ناجح وشاطرفى مهنته مفيش واحد يقدر يفهم فى شغلانة التانى وتانى حاجه ايه يعنى مجبتيش درجه كويسه فى الثانويه مش مهم الثانويه مش نهايه الحياه اى حد نجح فى اى شئ فى الدنيا فشل كتير جدا جدا ولاكن الشخص الناجح مش بيحبط ولا ييأس وبيحاول تانى ومليون ويراجع خطته ويشوف ليه فشلت ويقوم من تانى لانه عارف كويس انه خسر جوله ولاكن مخسرش الماتش كان فيه واحد ناجح بيسألوه ازاى وصلت للنجاح ده كله قالهم قرارات قالولوا القرارات دى كانت على اساس ايه قالهم خبرات قالولوا الخبرات دى جبتها منين قالهم من الفشل وخليكى فاكره حاجه مهمه جدا (محدش بيحاول وبيجيب صفر ) حاجه كمان متسمعيش كلام حد سلبى او اى حد يقول كلام يضرك طول ما انتى عارفه انك بتحاولى وبتعملى اللى عليكى وبتجاهدى نفسك وبتجتهدى يبقى طنشى اى كلام ملوش لازمه غير انه يوقعك لاكن اى حد هيقول كلمه تفيدك او تاخدى منها طاقه ايجابيه اسمعيها كويس جدا واخر حاجه وتفهميها كويس الماضى لو فضلتى حزينه عليه لحد اخر عمرك مش هيرجع والمستقبل لو فضلتى تحلمى بيه بدون ما تصحى من النوم وتبدأى تحققى الحلم مش هيحصل و هيبقى مجرد حلم مش بأيدك غير الحاضر تعملى فيه اللى عليكى والنتايج على الله وادعى الله اللهم وفقنى لما تحب وترضى وافتكرى إن الله لا يغير ما بقوم حتى يغيروا ما بأنفسهم يعنى انتى اللى لازم التغير يبدأ من عندك ومن جواكى انتى وواحده هتبدأى فعلا تبقى الشخصيه الناجحة فى الدين والدنيا اللى الكل فخور بيها نصيحه اخيره فيه جروب على الفيس اسمه No Zero Days ادخليه هينفعك فى حاجات كتير جدا مش هقدر اوفى حقه لو اتكلمت عنه من هنا لبكره أتمنى اكون افدتك وانك فعلا تفكرى فى كلامى كويس وتبدأى تغيرى نفسك من دلوقتى
تم النشر السبت، ٢١ يناير ٢٠٢٣
هل لو اخدتي فرصة انك تبدأي من جديد هتعملي كده؟ ولكن هنبدأ بجزء جزء ..... مفيش حاجة بتعمليها صح حاليا .. طيب ايه اللي يمنع انك تحاولي تعملي الصح؟ حاسه انها كده كده خربانه؟ طيب ليه مش عايزة تندمي، الندم بيمثل ليكي ايه؟ طيب اقولك مثلا الندم بعتبره ايه من وجهة نظري، كلنا بنعمل اخطاء مش كده؟ فيها ايه يعني؟ يعني مثلا هل انا عمري ما عملت غلط؟ هل مثلا عمر اي حد ما عمل غلط، او حتى ذنب؟ فيها ايه لما تغلطي؟ وفيها ايه لما تقولي لنفسك انا مش ندمانه على الغلط؟ طيب ازاي .... قولتيلي ازاي؟ الندم لا يمثل غير تجربة ( تجربة عدت بكل الحلو والمر) تجربة خوضتيها .. غلطي فيها .. هتتعلمي منها، هي ديه الحياة .. تجارب وبنمر بيها وبنتعلم منها. بل إن التجارب ديه كنز .. الحزن نفسه المفروض منكرهوش، انتي ليه تكرهي مشاعر طبيعية المفرض اننا كلنا بنحس بيها، الحزن المفروض انه اهم من الفرح، لان تجربته هي اللي بتقوي وبتثقل الواحد، الحزن هي الاشارة اللي بتقولك فيه حاجة غلط .. لازم تاخدي بالك. نعمة من نعم ربنا. تاني جزء ..... أسالي نفسك سؤال ليه انتي بتكلمي ولاد، بتاخدي ايه من كلامهم معاكي .. ايه هو الشعور اللي بتحسيه وقتها لما تتكلمي معاهم؟ بتعوضي شعور الاهتمام مثلا، الوحدة، العاطفة ... حتى لما دخلتي في تجربة سابقة مع ولد .. انتي كنتي ساعتها عايزة مشاعر معينة .. وعايزة تحسيها، بس هو مكانش حب، انتي كنتي عايزة المشاعر ديه ولكن بتحبيه ف لأ. اقبلي .... فقط اقبلي ( هتقبلي ايه؟) هتقبلي نفسك .. بكل ما فيها حاليا .بكل اللغبطة بكل المشاعر اللي بتحسيها .. بكل الحب والحزن اللي جواكي ... اقبلي .... اقبلي الواقع ولكن هنا قصدي اقبلييه مش هتستسلمي ليه. علشان فيه فرق كبير جدا .. انتي هتقبلي نفسك كما هي .. وهتسعي انك تغيريها .. لانك خايفة تحسي بالحزن، خايفة تندمي، خايفة تخلي في مرحلة التعافي .. وتعرفي قد ايه اللي كنتي فيه ده غلط .. خايفة تقبلي الغلط، لكن يا عزيزتي .. كما قلت لكي الخطأ امر مفروغ منه. انتي مش هتعرفي الصح ده صح ليه وازاي من غير ما تغلطي. من غير ما تدخلي التجربة نفسها، من غير ما تعيشي حياتك كما هي. متتكسفيش من نفسك وواجهي. واجهي نفسك .. ومتهربيش منها .. واعرفي انك ليكي قيمة .. لانك لو مكانش هيكون ليكي قيمة مكنتيش اساسا اتخلقتي! طالما موجودة انتي ليكي سبب في وجودك هنا .. فكري في الحياة الحقيقية .. فكري في الجنة. فكري ازاي يبقى ليكي قيمة بجد، لنفسك ولمجتمعك ولصحابك ولعائلتك. فكري فيكي
تم النشر السبت، ٢١ يناير ٢٠٢٣
انتي حد كويس جدا وفيكي صفات حلوه كتير واهمها خوفك من ربنا وان ضميرك لسه مماتش وانك مدايقه من نفسك ومن وضعك ده علامه حلوه قوي انك هتقدري تساعدي نفسك انك تتغيري للأحسن وانتي مش فاشله مش ضروري انك مدخلتيش كليه معينه كنتوا حاطين امل عليها انها اخر الدنيا انتي ممكن تنجحي ف مجالك وتثبتي لنفسك قبل اي حد انك تقدري كمان في نقطه مهمه محتاجه انك تجاوبي عليها انتي دخولك ف العلاقات الكتير كنت محتاجه المشاعر والاحتياج العاطفي وللتقبل ولا كان من باب انة عايزه اعمل حاجه ممنوعه عني عشان حاسه بالغضب من نفسي او من الي حوليا محتاجه تقعدي مع نفسك وتفكري كويس بسبب ايه وخوفك من الموت وسكراته دي نعمه وميزه ربنا رزقك بيها عشان ميقسيش قلبك قلبك يفضل عايز يرجع لربنا لان ربنا بيحبك جدا وخافي من موت الفجأه ربنا بيبعتلك ف كل حاجه في حياتك اشارات وتفاصيل عشان ينبهك من الخطأ تبعدي عنه ويقرب من الصح واشارات كمان عشان تقربي منه وانك تصلي ف ممكن تعملي جدول للصلاه لمده اسبوع وحاولي ان ميعديش يوم غير وانتي مصليه وكل صلاه بتصليها حطي صح لان ده الحافز بتاعك عشان تكلمي وعشان انتي عارفه ان العلاقات الكتير الي بتدخلي فيها غلط امنعي كل ده وقاومي نفسك قبل اي حاجه عشان توصلي لنفسك انك قوي وبتعملي الي بتقرريه وتثبتي للي حوليكي انك بتقدري تنفذي كمان وانك مش فاشله خالص وان اكبر نجاح ليكي مقاومتك لنفسك وحاولي تحددي وقت تنزلي فيه من البيت كل يوم تعملي رياضه تتمشي وانك تقرأي كتب وروايات كمان هتفرق معاكي جدا
تم النشر الجمعة، ٢٠ يناير ٢٠٢٣
انتي زي بالظبط اكني انا اللي كنت بكتب
تم النشر الجمعة، ٢٠ يناير ٢٠٢٣
طب شوف تعليق طنط اسماء تحت ولو حد علق شوفه أن شاء الله تستفاد وتتغير وربنا معاك ويقويك
تم النشر الجمعة، ٢٠ يناير ٢٠٢٣
لعرض السؤال في فدني اضغط هنا