ازاى انسى علاقة حب وصلت لزواج شرعى و النهاية كانت وحشه اوى و سايبه أثر كبير فى حياتى و مشاعرى و احاسيسى اتجاه الستات عموما
فيه بعد النفق المظلم اللي انت فيه نور. سؤالك هو ازاي انسى .. مقدرة جدا انك عايز تنسى الألم .. ولكن هل المفروض فعلا اننا نسى الالم اللي حصلنا ؟ أول حاجة علشان تبدأ انك تتخطى المرحلة ديه .. هي انك تفرغ مشاعرك .. متحاولش تقول لنفسك انا كويس .. وانت مش كويس .. فرويد كان بيقول المشاعر المكبوتة لا تموت .. انت لو دفنت مشاعرك هتيجي في يوم وهتتحول لبركان وينفجر في وشك .. خد فترة الحزن بتاعتك واحزن براحتك .. مشاعر الحزن مقدسة من حقها تاخد وقت زيها زي الفرح بالظبط. حاول انك تروح تلعب رياضة قتالية وتفرغ اللي جواك كله في اللعبة اللي انت هتلعبها .. لو بتحب تكتب مذكراتك او يومياتك يستحسن كمان تكتب كل يومك مشاعرك ايه .. تكتب كل اللي جواك او اللي بيدور في عقلك ... الكتابة هي ايضا فكرة علاجية ف هتساعدك في المرحلة ديه. متفهمة غضبك نحو كل شئ .. والستات كلهم خاصةً .. لكن ديه فترة وهتعدي .. انت لو مكنتش مريت بالتجربة ديه .. مكنتش هتقول ان مثلا انا كرهت كل البنات او فيه مشاعر سيئة جوايا دلوقت ليهم .. ولكن هرجع واقولك انها فترة وهتعدي .. لان غضبك اتجاه علاقتك السابقة هي اللي مسيطرة عليك وعلى غضبك . علشان كده اسمع لنفسك ديما .. اسمع لصوت تفكيرك .. بتقول لنفسك ايه طول الوقت ..؟ ده مهم جدا لان كلامنا لنفسنا طول الوقت هو اللي بيحدد طريقة تفكيرنا وسلوكنا فيما ببعد. وممكن تكون انت مش واخد بالك اساسا لتفكيرك .. وتستعجب من نفسك وتقول انا وصلت للنقطة ديه ازاي .. ومنين ؟؟ تفكيرك هو اللي وصلك .. راقب نفسك وتفيكرك .. اكتب اي فكرة غريبة بتطرأ عليك .. واقرأ اللي انت كتبته اخر اليوم وحلل الكلام ده في الاخر. اهتم بنفسك .. شوف انت كنت بتتنازل عن ايه وانت مع العلاقة ديه .. وابتدي اعمله، خروجة مع صحاب .. سفرية معينة .. اهتم بشكلك وبأكلك .. وبصحتك .. اعمل كل اللي انت كنت عايز تعمله. واتكلم مع حد بتثق فيه لو انت بتحب تتكلم مع حد من صحابك ... اهم حاجة ميكونش بيحكم عليك اطلاقا. بلاش علاقة بديلة .. اه انت متعقد من الستات دلوقت .. بس كان لازم اقولك برده .. بلاش علاقة بديلة .. بلاش تداوي جروحك بحد تظلمه وتظلم نفسك. اقطع علاقتك بكل اللي يخصها .. سوشيال ميديا ... وسائل اتصالات .. كل حاجة .. اقطع علاقتك بكل حاجة. بلاش تتابع .. بلاش تدخل تشوفها هي اونلاين ولا هي راحت فين ولا جت منين ولا بتعمل ايه ..؟ متنساش ان هي شخص اذاك. لو فيه حاجات او هدايا معاك مع الشخصيه ديه امحيها خالص .. حطها في مكان ومتفتحوش .. لحد ما تعدي الفترة ديه. اتمنى تعدي الفترة ديه بسلام .. وهي هتعدي ان شاء الله.
تم النشر الأحد، ٢٥ ديسمبر ٢٠٢٢
وليس للانسان الا ما سعى النوع ده من الصدمات بيبقى غصب عنك لانك متخيل نتيجة محددة ولما محصلتش وحصلت نتيجة وحشة فده خلاك استغربت اوى لدرجة الصدمة دى انت سعيت ولما حبيت اخدت الطريق السليم واتجوزت......االنتيجة اللى اراد ليها ربنا انها تحصل( لحكمة منه هتظهرلك بس فى الوقت المناسب. فى ابسط الاشياء هتلاقى نفس المبدأ ( الست بتجمع المكونات وتعمل اكله مظبوطة المقادير ) وبعدين تتحرق فى الاخر او تلاقيها مش مظبوطه. اذا ده اثر عليك نفسيا درجة شديدة الجأ لربنا اولا وتوكل عليه حتى يزول اثر الابتلاء ده وانشغل فى الحياة اكثر
تم النشر الثلاثاء، ٢٧ ديسمبر ٢٠٢٢
طبيعي بعد اي علاقه بتكون سايبه مشاعر عالقه اسأله علامات استفهام كتير حاول تلاقيلها اجابات تريحك واعتياد الشخص على حاله من الحب والاهتمام والمشاعر اعتاد على وجودها فلما بتنتهي بتسببلك اثر سلبي ومشاعر حزن واكتئاب بس لازم تفهم كويس ان مينفعش تعمم تجربتك مع واحده ع باقي الستات فمثلا مش كل الستات شعرها اشقر ومش كلهم رفيعين ومش كلهم سمر ومش كلهم طوال ومش عصبيبن كلهم ولا كلهم صوتهم عالي او بيعرفوا يطبخوا وكمان تربيتهم وبيئتهم مش واحده ف طبيعي مينفعش تعمم تجربتك مع واحده وتقول ان كلهم زيها لان فعليا كلهم مش زيها لا ف الشكل ولا المستوى الاجتماعي ولا الطباع وشوف ممكن تجربه واحده مريت بيها سيئه تفتحلك باب وطاقه خير مع واحده تانيه وتكون نعمه وهديه من ربنا وكان لازم تسيب الي معاك عشان تشوف النعمه والهديه الي ربنا شيلهالك
تم النشر الخميس، ١٢ يناير ٢٠٢٣
نصيحه من تحت تجربة قرب لعبادة ربنا صلي وادعي ربنا ياللي انت عاوزه واقرأ قرءان وقرب من والديك واقعد واتكلم معاهم وساعدهم وأخرج اتمشي وشوف صحابك وتعاون معاهم وساعد إذا حد محتاج مساعده وارجع اعمل حاجات انت بعدت عنها من زمان الحاجات الحلوه ممكن تسمع فيديوهات تحفيزيه ودائما خلي نظرتك للحياه فيها تفائل وخلي عندك امل في بكرا وان ربنا مش هيخذلك وربنا يهديك ويصلح حالك يارب
تم النشر الأحد، ٢٥ ديسمبر ٢٠٢٢
في اي زواج انتهي بالانفصال الطرفين بيكون ليهم و عليهم يعني بالبلدي بيكونوا الاتنين غلطانين بس مفيش ملاك ولا شيطان، اتنين بشر إتقابلوا و حاولوا يأتلفوا بس اختياراتهم انهم يبذلوا مجهود اكبرر علشان استمرارية العلاقة و مدي صبرهم مكانش كافي، و انفصلوا لسبب او لآخر، الحياة كفيلة تنسي اي حد اي حاجه، و الأهم متكونش انت اللي غلطان، و متكونش ظلمتها، الستات احيانا بتبان قوية بس هما مش كده، هما أضعف من كده و لو اظهروا العكس،و لو بقت قوية بيبقي لفترة ما او لسبب، لازم تتفهم انك زي م انت تأثرت هيه كمان.. اعتقد لازم تستفيد من تجربتك و تحاول يا تخرج منها يا تصحح اللي فات. يا اما تنسي بطريقة تناسبك
تم النشر الخميس، ١٢ يناير ٢٠٢٣
لعرض السؤال في فدني اضغط هنا