السلام عليكم ورحمة الله
عندي مشكلة اني مش قادرة احس بالراحة في بيتي ولا اعرف اعمل شيء في البيت ولا اقدر افكر بهدوء و بحس البيت زحمة، احنا خمس أفراد و انا و اختي في اوضة مشتركة و بحس بخنقه و ببقى محتاجة أوضة لوحدي اعرف انام فيها براحتي و اعمل اللي انا عايزاه براحتي من غير ازعاج ولا صوت ولا خناق لكن طول ما انا قاعدة في اوضتي اخويا الصغير (عنده ٦ سنين) يدخل يا اما يلعب يا اما يتخانق مع اختي و صوتهم عالي و انا مبعرفش لا اذاكر ولا انام بالذات لو ماما كمان داخلة و قاعدة بتتكلم معاهم و فاتحين النور و انا مبعرفش انام و النور مفتوح و في صوت جنبي، و ساعات مايبقاش في مكان تاني في البيت فاضي اروح اذاكر فيه، ماما بتكون قاعدة في اوضة النوم و بابا قاعد في الصالة و مشغل التلفزيون و انا و اختي قاعدين في الاوضة بتاعتنا بس مش حاسة بالراحة، و حاسة ان البيت زحمة، و انا معظم الوقت قاعدة في البيت مبنزلش غير دروس أو امتحانات و ارجع تاني اكمل قاعدة في البيت،و حاليا انا تايهة و مش عارفة افكر بهدوء ولا عارفة ارتب أفكاري
وعليكم السلام ورحمة الله وبركاته فى الاغلب ده توتر جديد عليكى ..لما بيكون الشخص عنده افكار وزحمة ودوشة بيكون مش قادر يستحمل اى اصوات من بره حاولى تلاقى اوقات زى الصبح بدرى بعد الفجر ويكون اغلبهم او كلهم نايمين ... تنفردى بنفسك وافكارك وترتبيها وتشوفى ايه اللى مزعلك او عاملك قلق وفرغى كل ده على ورق. زائد ابدأى اعملى مواعيد واضحه الكل يككون عارفها ..مواعيد للمذاكره واكديها عليهم كل شوية ...اللى داخل تقوليله معلش ممكن تسيب االاوضه عشان ده وقت مذاكرتى وهكذا مع التكرار هيلاحظوا ويراعوا ان شاء الله واهم حاجه احمدى ربنا على نعمة العيلة والونس حتى لو ده بيمثل دوشه حاليا فدى حاجة تقدرى تاخدى منها هدنه وترتاحى ..لكن لو عايشه فى وحده هيكون صعب تلاقى ونس وقت ما تحبى .
تم النشر الخميس، ٢ مايو ٢٠٢٤
وعليكم السلام ورحمة الله وبركاته.. هل ف امكانية انك تذاكري في اي workspace ؟ لو هينفع يبقى انتي كده حليتي جزئية المذاكرة. اما الراحة عموما في البيت، حاولي تنظمي الدنيا مع اخواتك، ولو هما مش بيعملوا حاجه معينه في الغرفة بتاعتك، قولي لهم يطلعوا يتفرجوا على التليفزيون. وانتي اقعدي براحتك بعد كده.
تم النشر الثلاثاء، ٣٠ أبريل ٢٠٢٤
في فرق بين دا وبين انه بيكون حواليكي دوشة حتي ف الأوقات ال مش بتكوني فيها بتفكري زي وقت النوم او المذاكرة ف اطلب منهم بهدوء يبطلوا دوشة يطفوا النور لو مش هيستجيبوا شوفي حلول تانية، اشتري ال eye mask بتاع النوم ال هو بيغطي العين ، حطي سدادت اذن بس دا لو مسمعوش الكلام...انا بردو كنت زيك ومعنديش اوضة🥲 لحد ما اختي الكبيرة اتجوزت ، ف حاسة بيكي جدًا 💙
تم النشر الأربعاء، ١ مايو ٢٠٢٤
بصي هو في فرق بين انك تكون عاوز تفضي عقلك وتفكر شوية مع نفسك وتفصل اما تكوني حابة تعملي كدا يا اما اخرجي اتمشي شوية كدا وفكري لو دا مش متاح استني اما كله ينام واقعدي فكري مع نفسك...
تم النشر الأربعاء، ١ مايو ٢٠٢٤
Flower E اجابتك مميزة وركزتى على نقطة مهمه جدا
تم النشر الخميس، ٢ مايو ٢٠٢٤
شكرا ليكم على نصايحكم ان شاء الله هعمل اللي قولتوا عليه
تم النشر الخميس، ٢ مايو ٢٠٢٤
اجلسي مع والدك ووالدتك وكلميهم بالكلام ده ووضحي ليهم ازاي بتتأُثري بالمشاكل دي وازاي عاوزة تنحل , وتضعوا حدود للأخوة مع بعض في البيت واحترام الخصوصية
تم النشر الخميس، ٢ مايو ٢٠٢٤
قوليلهم واتفاهمي معاهم ممكن يكونوا مش واخدين بالهم
تم النشر الأربعاء، ١ مايو ٢٠٢٤
بصى ياست الكل بالنسبة للاصوات هاتى قطنة وحطى عليها شوية فزلين و افركيها بيهم كويس و حطيها فى ودانك الاتنين هتمنع عنك الصوت خالص اما لما تيجى تنامى فيه غمامة سودا بتتحط على العنين وقت النوم تمنع الضوء عنك يبقى لو حد جه او ولع نور او اتكلم و انتى نايمة مش هتحسى بيه و ساعة المذاكرة سيبى القطنة فى ودانك عشان متسمعيش و لو اختك هتهزر زوقيها برة فى الصالة ترغى براحتها مع اخوكى و ابوكى
تم النشر الأربعاء، ١ مايو ٢٠٢٤
اخرجي ذاكري برة في اي مكان
تم النشر الثلاثاء، ٣٠ أبريل ٢٠٢٤
مشيت خالص من البيت و روحت اشتغلت في مكان بعيد تقريبا عايش لوحدي لكن الحمد لله مبسوط وحاسس أن عملت حاجه كويسه وبنزل زيارات البيت الموطن الأصلي لكن بالنسبالك انتي عندك مذاكرة ودراسة ف صعب تمشي من عندك الا لو هتتجوزي ان شاء الله ويكون عندك بيتك الخاص اللي ترتاحي بجد فيه.
تم النشر الثلاثاء، ٣٠ أبريل ٢٠٢٤
وعليكم السلام كانت نفس مشكلتي تقريباً لأني بحب الهدوء وروقان البال ف البيت عندي كان زحمة و دوشة طول اليوم من التليفزيون وصوت الاطفال العالي ف كنت بسهر بليل لما كل اللي في البيت ينام عشان اخد راحتي مع نفسي لكن في نفس الوقت كنت عارف أن ممكن اوصل أن أكون شخص انطوائي خدي بالك من النقطة دي وفرقي بينها وبين انك بتحبي الهدوء والمكان اللي ترتاحي فيه.
تم النشر الثلاثاء، ٣٠ أبريل ٢٠٢٤
لعرض السؤال في فدني اضغط هنا