كان ليا شخص هو كل حاجه بنسبالى فى الدنيا دخل حياتى غيرها وبقى كل حاجه ليا فى الدنيا بقى ليا النفس الضحك وكل حاجه وفجأه مشى وقلى مش عايزك وانا مش عارفه اعمل ايه وبحبه اوى ومش عارفه اعيش من غيره
ازيك، أتمنى أنك تكوني بخير. مشكلة ملهاش حل! مفيش مشكلة ملهاش حل، انا متفهمة صدمتك حاليا، لكن مفيش مشكلة ملهاش حل، وأنتِ بتسردي مشكلتك أستشفيت كذا نقطة من كلامك واولهم عنوان المشكلة. أنتِ ليه شايفة أنها ملهاش حل؟ ليه شايفة أنه هو الدنيا واللي فيها؟ ليه شايفة أنك مش هتقدري تعيشي من غيره؟ طيب مش يمكن أنتِ اللي عملتي في نفسك كل ده من الأول؟ غض النظر أن العلاقة كدا كدا هي منتهية وده هقولك عليه في الاخر. أنتِ وحيدة مش كدا؟ حاسه بالوحدة طول الوقت غض النظر أن يكون في أشخاص معاكي عموما. للاسف الشخص ده لعب على نقطة مهمة جدا عندك، وهي أنه هو حاول يخترق كيان الوحدة بتاعك، وبدأ أنه يستحوذ على كل حاجه في حياتك، بل بالعكس بدأ يبقى هو حياتك. هل ينفع أن شخص يبقى هو كل حياتك؟ انتِ عارفه عملتي ايه؟ انت زي اللي عيشتي بس على الأكل فقط! مفيش شرب نهائي. هل ده ينفع؟ أكيد لأ. أهو أنتِ عملتي كدا بالظبط. دخلتي في حياتك شخص وبقى هو كل حاجه في حياتك، لدرجة أنه لما مشي، انتي قولتي مش هتقدري تعيشي من غيره. أنا مُقدرة وجعك، لكن أنتِ لازم تقدري نفسك، وكرامتك، أولا ده شخص لا يؤتمن عليكي، هتقدري تدفعي كل وجع هتعيشيه معاه؟ هتقدري تدفعي تمن عياطك كل يوم مع شخص مشي ومش عايزك؟ عززي نفسك وكرامتك خليهم فوق أي مخلوق، علشان يجي اللي يقدرهم. أما عن ازاي تعملي move on؟ متحاربيش حزنك، أصغي لمشاعر حزنك، الحزن مقدس، زيه زي الفرح، زيه زي أي شعور، بل أن الحزن هو البوابة اللي بتخرجي منها للنور بعد الظلام، الحزن هو الطريق. يستحسن تعملي بلوك من كل حتة، علان متدخليش تتابعيه أو تراقبيه. أعملي حياة لنفسك. متدخليش علاقة تانية الا بعد ٦ أشهر أو سنة. أكتبي مشاعرك كل يوم. انزلي كل يوم اتمشي أو اجري ساعة. شوفي حاجه بتحبيها واتعلمي عنها أو اقريها. انجحي واشتغلي واتعلمي. أملي حياتك، بس أمليها بجد، أمليها بنجاح وبتعليم، ويشغل وبنشاطات، أعملي انتي لنفسك حياة تانية، أتعرفي على صحاب جداد. غالبا بعد مدة هيرجع هو بنفسه وهيطلب أنه يدخل حياتك تاني، القرار قرارك، بس اللي يخرج من حياتك بالطريقة ديه، مظنش يستاهل إنه يرجع تاني، بعد ما هتكوني فوقتي لنفسك وحياتك. أتمني لك السلامة
تم النشر الاثنين، ١٩ سبتمبر ٢٠٢٢
فى مشاعر كده بتبقى شبه بعضها ( السعادة والحماس مثلا ) هنا بقى انتى فى وسط شعورين شبه بعض ( الحب والتعلق ) لما شخص يمشى او يغيب فتلاقى نفسك ضيعتى وانهارتى ( ده تعلق ) فعشان المشكلة يكون ليها حل ...يبقى نتعامل معاها باسمها ( مشكلة تعلق بشخص) التعلق يبدأ يتعالج بانك تعرفى قيمة نفسك وتقدريها وتقدرى كل حاجى جمية فيكى اقعدى مع نفسك وفكرى فى مميزاتك انتى لوحدك بدون الشخص ده وبعدها تتوالى العقدة فى الانفراج باذن الله
تم النشر الثلاثاء، ١٥ نوفمبر ٢٠٢٢
أنا أعلم أن هذا موقف صعب للغاية، ولكن الأمر الأهم هو أن تعلمي أن الحياة مستمرة ويجب عليك أن تتحركي قدما. قل لنفسك "أنا أستطيع التعامل مع هذا"، وحاولي أن تفكري بطرق كيفية تحسين حياتك وجعلها أفضل. تذكري أن الحب يأتي ويذهب، وتحتاجين للتركيز على صحتك النفسية وأهدافك في الحياة. قد يحتاج الأمر إلى بعض الوقت ولكن سوف تشعرين بالتحسن مع مرور الوقت.
تم النشر الأحد، ١٩ مارس ٢٠٢٣
فى اجابات تانية على الجروب ليكى https://www.facebook.com/groups/fedni.group/permalink/836507937624078/?mibextid=Nif5oz
تم النشر الأربعاء، ٧ ديسمبر ٢٠٢٢
الي يبيعك بيعيه يابنتي الي بيحب مبيقدرش يستغني ولو حتى كان عاوز بيدي لنفسه والطرق التاني فرصة للاختيار لكن طالما قالهالك وصمم يبقي ميستهلكيش ونصيحه بلاش تعلقي نفسك بأشخاص اتعشمي في الله وعلقي نفسك بالله وربنا يكتب لك الصالح يارب
تم النشر الأربعاء، ٧ ديسمبر ٢٠٢٢
لعرض السؤال في فدني اضغط هنا