السلام عليكم ورحمة الله وبركاته اخباركم ايه بجد أجمل تطبيق هو فدني هو فدني فعلا كل مااكون مضايقه بفتحه واقعد اقراء فيه بجد انتو ناس جميله جدا ولطيفه اوووي ربنا يجبر بخاطر كل بنوته وكل حد بيرد علي سوال التاني في وقت التاني ميكونش لقيه حد يرد عليا ربنا يكرمكم يارب ويجبركم زي مابتجبروا بخاطر الناس دي ربنا يجبر بخطركم يارب..هو ان عايزه اتكلم معاكم في حاجه بجد نفسي مااخدش كل حاجه علي اعصابي تعبت بجد اني حته الكلمه العاديه بتقهرني من جوايا حته لو اتقلتلي وان بعدها ضحكت عادي بس بعدها بتتخنق وبضايق ومزاجي بيتقلب في ثواني نفسي ابطل اشغل نفسي بالحاجات دي حاولت اعمل حاجات تانيه لكن في نفس الوقت بطايق وكمان ممكن يكبر معايا الموضوع ان عارفه اني في ناس هتشوف الموضوع تافه بس هو بجد تعبني جدا حته لو حاولت اخرج من مود الزعل دي واتصلت بحد وقعدة اتكلم معاها الكلام بيخدنا للغيبه فابضايق اكتر واكتر ومش عارفه اعمل وكمان يعني حته لمه بيحصل موقف ولا حاجه طبعا لمه بتكلم فون اللي بكلمها عايزني احكي الموقف وان مبكونش عايزه احكي علشان مدخلش في بند الغيبه وبضايق جدا ومبكونش عارفه ارد عليها اقولها ايه ان كنت بكلم مع اخواتي طبعا ليل نهار نتكلم حصل كده وكده وقال كده وكده كنت بتكلم عادي طبعا مش فتنه ولا حاجه بس من وقت ماعرفت اني اللي ان بعملها غيبه ومبقتش طريقه نفسي ولا طريقه اتكلم وكارها كل حاجه ومخنوقه جدا وكل ماابطل ارجع تاني لدرجة ان ان ممكن اكون بتكلم وبهار وكده واول مااقول اتخنق وابكي واضايق اووي مش عارفه اعمل ايه ولا ايه ولا عارفه انظم يومي ولا حته عارفه ارد بخاف جدا من زعل اللي قريبين مني بس في نفس الوقت بحس زعلت مش فارق معاهم دايما حاسه زعلي نش بتفرق مع حد حاسه شخصيتي ضعيفه جدا اللي هما يعني اغلي ناس عندي بس بجد ان ابسط موقف ممكن اللي قدامي يعملو وميخدش بالو اصلا ان بطايق جدا وبتخنق وبتعب جدا ومش بابين ولا عمري قولت لحد ده ضيقني وزعلني اسفه اووي اني طولت جدا في الكلام بس ان وقت مااتخنقت مالقتش قدامي غير المكان ده
احنا كلنا بنحب التطبيق فدنى زيك كده لانه بيوفررلنا مساحة نساعد فيها بعض انا عاوزاكى مم وسط كل ده تفتكرى كل يوم انك انسانه طبيعية ...تصيب وتخطأ وترجع وتبدأ الصح ...عاادى جدا سنك غالبا صغير ...وحتى اللى سنهم وصل لمرحلة كبيرة من النضج...احنا كل يوم بنتعلم حاجات فى الحياة وبنتعلم عن نفسنا وبنتطور وبنختبر مواقف . مش كل ما هنلاقى حاجة محتاجة تطوير او تغيير يبقي كده كارثه ...طبعا لا كل واحد بيتحط فى مواقف تختبر شخصيتة وهو يا اما يأكد انى صفه حلوة ويشتغل عليها اكتر ويثق فى حاجة فى شخصيتة ...او يلاقيها مش حلوو فيقرر يغيرها ويبدأ يركز على تغييرها. هو ده التطور وانا انصحك متركزيش بالشكل السلبي وتبقي بتلومى على نفسك وبس.. فكرى بالشكل الايجابي اللى يخليكى تتوجهى للاحسن.
تم النشر الأحد، ٢٦ مارس ٢٠٢٣
شكرا يا قمر على كلامك عن التطبيق خلينا طيب نتكلم شوية.. في عدة نقاط لما حد يقولك كلمة مثلا انتي عارفه انك هتضايقي منها، اللي بيحصل معاكي انك اكيد تقعد دماغك تودي وتجيب طيب هو ليه قالي كده؟ طيب هو انا فيا ايه؟ طيب هو انا عملت ايه علشان يقولي كده؟ الغلط اللي انتي بتعمليه انك بتستنتجي حاجات كتير من اللي حصلت في الموقف ده وبتقومي تعكسي ده كله عليكي وده ياخدنا لنقطة ( انك مش عارفه قيمة نفسك الحقيقية) مش اللي المفروض الناس هي اللي تعرفهالك! فالحل هنا انك تبطلي تشغلي نفسك بكلام الناس او بمعني اصح تبطلي انك توجدي قيمة في كلام الناس، لان مهما اي حد يقول اي حاجة، انتي لو واثقة في نفسك، وعارفه قيمتك، اللي يقول حاجة يقولها .... مش مهم كلامهم على اد ما انتي عارفه نفسك كويس، وعارفه قيمتك. لازم كمان تعملي حدود ما بينك وما بين اي حد (الناس) انتي لو مش عاجبك حاجة معينة بيعملها الشخص (س) مثلا والحاجة ديه بتضايقك ف هنا انتي لازم تتكلمي وتعبري عن اللي جواكي .. والله يا (س) انت الجملة او الكلمة اللي قولتلها ديه مش عجباني ومضيقاني ومن فضلك بلاش تستخدمها في تعاملك معايا وبس نقطة والكلام انتهي. انتي هنا لازم تعبري عن رأيك وتعملي حدود بينك وبين اي حد علشان ده اللي لازم يحصل، هتقولي مش بحب ازعل حد، بخاف الناس تفهمني غلط، اخاف الناس تبعد عني ويقولي عليا شخصية مقفلة؟ وليكن، اه ... يعني حضرتك تضايقي وتزعلي ولا هما اللي يزعلوا؟ انا منتظرة ردك الموضع مش هيمشي زي ما انتي متخيلة .. اي حد في اي علاقة لازم يكون واضع الحدود بتاعته، والحدود ديه اساسا بتختلف ما بين اي حد والتاني، يعني الحدود بتاعتي غير الحدود بتاعتك، غير حدود س غير ص وهكذا ... وبعدين انتي بتعملي حاجه صح .. يعني لما تقولي مثلا اني مش بصاحب رجالة مثال اهو .. فيه ناس ممكن تقول عليكي فعلا وده الصح وده الدين، وفيه ناس ممكن يقولوا عليكي مقفلة، وفيه ناس ممكن تتريق ..وهكذا شوفي كام حد ممكن يقول عليكي ايه من مجرد حد من الحدود اللي انتي وضعتيها؟ ف هل انتي هنا هتبقى مقتنعة بقيمك ودينك، ولا هتشوفي الناس هنا بتقول ايه ولا عايزة ايه وتعمليه؟ طبعا لازم تكوني مقتنعة بحدودك اللي انتي عملاها. محتاجة كمان انك تعملي خطوات معينة اول ما تطرأ عليكي فكرة تقلب مزاجك بسبب الحساسية أي فكرة ممكن تلعبي معاها بفكرة مضاد لها، يعني الشخص ده قال كلمة تزعلني، طيب المفروض اعمل ايه؟ ارجع بالفكرة ديه واشوف لها فكرة مضادة لها، لأ انا اللي المفروض اشوف قيمتي بنفسي مش شخص هو اللي هيحدد ده، انا لازم ارد عليه واعمل حدود، مقلبش الموضوع واهزر واضحك وكأن مفيش حاجة وانا ابقى بنهار عادي، لا .. احنا اتفقنا على الحدود. اتمنى اني اكون افادتك بشئ ما، واتمنى ليكي السلامة
تم النشر الأحد، ١٢ مارس ٢٠٢٣
والله آنتي جميله آوي 💜.. ممكن تتابعي أستاذ مايكلًراشد وأستاذه أمال عطية بيتكلموا عن الشخصيه الحساسه في كذه فيديو
تم النشر السبت، ٤ مارس ٢٠٢٣
ممكن تحاولي تخلي يومك مليان انشطه مفيده تقرأي كتب روايات قران وممكن تعملي رياضه واول متلاقي الكلام مع اخواتك او صحابك وصل لغيبه وقفيهم وقوليلهم مش عايزين ناخد ذنوب ع الفاضي واستغفري كمان انتي من الواضح انك حساسه جدا ودي حاجه حلوه جدا بس مش صح انها تزيد عن حدها ف ممكن لما يحصل موقف ويدايقك تسجليه وتبداي تحلليله وتشوفي لو مكان الشخص التاني كنتي هتقولي وتعملي ايه وتاخدي نفس رد الفعل بتاعه الي دايقك ولا لا كمان ممكن بعد الموقف تشوفي كان المفروض ارد بكذا عشان محسش بالضيق ده كله وفعلا تاني مره تحاولي تردي بنفس الطريقه وحقيقي انتي تستحقي انك تتحبي وان الي حوليكي يكونوا باقيين عليكي خليكي واثقه انك تستحقي الحب والاهتمام وان الي حوليكي بيعبروا عن ده بس كل واحد واسلوبه
تم النشر السبت، ٤ مارس ٢٠٢٣
لعرض السؤال في فدني اضغط هنا