بقا عندى عقد من المناسبات لانه كل الناس شيفنى منبوذه علشان لسه متخطبتش على الرغم انى لسه 22سنه
السلام عليكم ورحمه الله وبركاته خليني اقول لك بقى انه نظره الناس جايه من نظرتك انت لنفسك. لو انت مش متبنيه الفكره دي او انت ذات نفسك من جواكي مش شايفه ان في مشكله انك ما اتخطبتيش زي مثلا القريبين منك في نفس العمر مش هتشوفي خالص في نظرات الناس ان انت منبوذة مش هتحسي في التصرفات ان انت منبوذة لانه لو فكرت انا وانت غالبا هتلاقي انه مواقف قليله قوي قوي تكون اتعملت بشكل صريح. ان حد يكون قال لك ايه ده بقى بصي معلش احنا مش هنقدر نقعد معك عشان خاطر احنا مخطوبين وانت لا يعني مفيش حاجه كده لكن انت احساسك ده داخليا هو اللي بيخليك مثلا لما واحده بتسلم عليك وبتاخذ بعضها وتمشي تروح تقف مع واحده ثانيه تقولي اه هي سابتني انا وراحت تمشي تقف معاها هي عشان هما الاثنين مخطوبين يعني مش هستقف معانا عشان كده ما قالتش كده مش شرط خالص يكون ده حصل علشان خاطرها يعني عشان خاطر مساله المخطوبه ولا مش مخطوبه انت تصالحي مع الفكره. واعرفي انه دي كلها اقدار ونصيب اعرفي كل اللي مخطوبين مش شرط يكملوا يعني الله اعلم الحياه هتمشي بيهم لفين وروحي اي مناسبه وانت راحه علشان خاطر تتبسطي عشان تشوفي الناس اللي انت مش بتشوفيهم غير المناسبات علشان تتصوري صور حلوه وبس يعني الهدف اللي انت هتبقي رايحه لانه بالشكل ده هيخليكي تتجاهلي الحاجات التانيه وما تركزيش عليها.
تم النشر الخميس، ٢٧ فبراير ٢٠٢٥
بالإضافة للإجابات الجميلة الموجودة عندي ترشيح ليكِ عشان لمَّا تيجي تتجوزي حاجة كده عشان تجهزي نفسك للجواز وده من ضمن الأخد بالأسباب فاهمة... في دورات علىٰ يوتيوب لتأهِيل المُقبلين على الزواج ودي تشمل الديانات كُلها في حالة كونِك مش مسلمة... وممكن أرشحلك دورة هيا شغالة حاليا للدكتور عبد الرحمن ذاكِر الهاشمِي الدورة إسمها أ ب زواج هتفيدك بإذن الله... كمان من ضمن الأخد بالأسباي إنك تعدِّي نفسك تكونِي أم صالحة " كويسة " فاهمة وبردك هتلاقي دورات كتير على يوتيوب وهتلاقي الدكتور اللي رشحتهولك عامل دورة كمان... ربنا ينفعك وينفع بيكِ ويقر عينِك 🤲🏻💕"
تم النشر السبت، ١ مارس ٢٠٢٥
السلام عليكم، أنتِ لسه صغيرة قوي إنك تحسي إن دي مشكلة وتتحسسي من الناس ونظراتهم. أنا مش عارفة المحيط الاجتماعي بتاعك والزواج عندكم بيبدأ من كم عشان يفكروا كده. لكن عامة ممكن يكون ده إحساسك أنتِ، ممكن هم مش شايفينك كده لكن أنتِ الموضوع بالنسبة لك مشكلة فبقيتِ تتحسسي من أي نظرة أو كلمة. وممكن يكون البنات في محيطك بيتزوجوا بدري وتكون فعلا دي نظرة الناس لكن أنتِ بإيدك تعالجي المشكلة دي. الناس لو أحسوا إنك بتنجرحي من حاجة بيزيدوا فيها، لو أحسوا إن الموضوع ولا فارق وإنك واثقة من نفسك وعرفتِ توقفيهم عند حدهم بالأدب محدش منهم هيتجرأ عليكِ. وحتى لو هم بيقللوا منك المفروض أنتِ تكوني أكبر من كده وتثقي في نفسك ونظرتك لها. اخرجي وتفاعلي واحضري مناسبات عادي واظهري ثقتك قُدام الناس لانهم بيشوفوكِ زي ما أنتِ شايفة نفسك وانتِ مراية للي جواكِ. ركزي في تعليمك وتطوير نفسك ووقت ما الزواج ييجي هتعرفي تختاري صح الإنسان اللي يستحق تعيشي معه وتأسسي أسرة صح. بالتوفيق.
تم النشر الخميس، ٢٧ فبراير ٢٠٢٥
عزيزتي، أقدر مشاعرك تمامًا وأفهم الضغوط التي تشعرين بها بسبب آراء الآخرين. من المهم أن تعرفي أن كل إنسان له توقيته الخاص في الحياة، وما يتناسب مع أحد قد لا يتناسب مع آخر. في حالتك، يبدو أن هناك ضغطًا اجتماعيًا كبيرًا حول فكرة الخطوبة والزواج، لكن يجب أن تتذكري أن القرارات المتعلقة بحياتك يجب أن تأخذيها بناءً على ما يناسبك ويكون صحيحًا بالنسبة لك، وليس وفقًا لتوقعات الآخرين. إذا كنت تشعرين بالقلق أو الاضطراب بسبب هذه الضغوط، يمكن أن يكون من المفيد مناقشة مشاعرك مع شخص موثوق به، سواء كانت صديقة مقربة أو أحد أفراد الأسرة. ويمكنك أيضًا استثمار وقتك في تطوير نفسك في مجالات مختلفة، مثل التعليم أو الهوايات، مما قد يساعدك على تعزيز ثقتك بنفسك ويجعل هذه الضغوط تبدو أقل أهمية. تذكري، الأهم هو أن تكوني راضية عن اختياراتك وأن تعيشي حياتك وفقًا لقيمك وأهدافك.
تم النشر الخميس، ٢٧ فبراير ٢٠٢٥
مين الناس دي اللي شيفاك منبوذة؟ وبتقول عنك ايه؟ أو بتعمل ايه؟
تم النشر السبت، ١ مارس ٢٠٢٥
ممكن حد قال لك كلمة وحشة ففكرتي ان الكل تفكيرهم كدا .. اصلا قليل شافك من وسط العشرات .
تم النشر الجمعة، ٢٨ فبراير ٢٠٢٥
انتي مهما عملتي عمرك ما هتعجبي الناس ف دايما خليكي واثقه من نفسك واهتمي بنفسك وبحياتك وبشخصيتك وان شاء الله ربنا هيكرمك بحد يقدرك ويستاهلك وكلام الناس ارميه ورا ضهرك وده طبيعي انك متتخطبيش دلوقتي طوّري من نفسك وكملي دراستك لو بتتعلمي واشتغلي وامسكي فلوس في ايدك ده هيقويكي ويضمنلك مستقبل احسن وبعد كدا ابقي فكري انك تتخطبي او تتجوزي واشبعي من اهلك علشان متندميش ومتستعجليش علي الجواز اتمني اكون افدتك.
تم النشر الجمعة، ٢٨ فبراير ٢٠٢٥
اولا عادي يبقي في نظره بالاسلوب ده لكن لازم تعرفي إن ده ميزعلكيش انزلي المناسبات و اتعاملي ولو حد سالك عن موضوع الخطوبه قولي إن لسه مجاش النصيب او ربنا مأذنش
تم النشر الخميس، ٢٧ فبراير ٢٠٢٥
انتِ صغيره وكتكوته والعمر قدامك ي قمر والناس مبتبطلش كلام خليكِ واثقه من نفسك يمكن بيئتهم اللي وعيوا عليها هي اللي بتوحي ليهم ان ده مش طبيعي وده اللي اتربوا عليه فمتتأثريش بيهم وبآرائهم الرجعيه اتبسطي بحياتك وبسنك
تم النشر الخميس، ٢٧ فبراير ٢٠٢٥
خالتي اتخطبت عند سن 26 من شهر تقريبا مرات خالي عند سن 28 السنة اللي فاتت، صبروا وربنا عوض صبرهم خير ،، 🙂. الصبر وكبري دماغك من كلام الناس.
تم النشر الخميس، ٢٧ فبراير ٢٠٢٥
الاول حددي مين كل الناس اللي تقصديهم هل عيلتك مثلا جزء من صحابك الخ الخ
تم النشر الجمعة، ٢٨ فبراير ٢٠٢٥
انتي لسه صغيره سيبك من كلامهم
تم النشر الجمعة، ٢٨ فبراير ٢٠٢٥
لعرض السؤال في فدني اضغط هنا