المفروض دخلا تالته ثانوي السنادي بس مفيش اي استعداد للسنه نفسي او اي حاجه انا اصلا مليش نفس لحاجه ولا عايزه اعمل حاجه بجد انا ف مود وحش اوي بقالي كتير ومعرفش السنه دي هتعدي ازاي وانا مش عايزه ابدأها اصلا ، خصوصا اني السنه الي فاتت منزلتش دروس ولا اهتميت ف مش متعوده ونجحت بالصدفه كدا
المشكله ان مامتي اعصابها بتتعب بسرعه وممكن تتعب بسببي وبتفضل زعلانه عشان هيا شايفه انها كانت مقصره معايا يعني بس حاليا انا مش زعلانه منها بس مبقتش عايزه اعمل حاجه بجد
بتتحايل عليا انزل احجز دروسي زي اصحابي وكدا بس انا بجد مش قادره ابتدي حاجه ، وكمان انا كنت عايزه علمي رياضه بس بقالي سنتين يعتبر مأخدتش درس رياضه وحالتي الدراسيه مدهوره ف اخش علوم وادرس حاجه غير الي عايزاها ولا علمي رياضه واضيع وسط المنهج وهتبقا الدنيا صعبه عليا
بجد انا وصلا لدرجه احباط كبيره بس الي مخليني اتكلم هنا حتى امي بس ممكن يجرلها حاجه بسبب قهرتها عليا
حياتي... إنتي قاعدة مكانك وبتقولي مش قادرة أبدأ؟ حبيبي لو كلنا فضلنا في مكان الراحة بتاعنا ماحدش فينا هينجح... ماحدش فينا عايز يسهر يذاكر، ماحدش فينا عايز يصحى بدري للشغل أو الجامعة او الدرس، كلنا عايزين نقعد على السرير قدام التليفزيون مع كوباية القهوة وكتاب نقراه... بس ايه؟ ماحدش ناجح بيعمل كدا غير في الإجازة بتاعته ومش كلها كمان! لازم نيجي على نفسنا ونضغط على راحتنا شوية ومع الوقت هتحسي ان دا العادي وهتتعودي، لكن مش نقعد ونقول مش قادرة أبدأ! ماهو أكيد مش قادرة عشان مجاتيش على نفسك. دي حاجة... الحاجة التانية، لو قدامك دقيقة واحدة على ميعاد الامتحان، دقيقة واحدة، اعملي اللي عليكي فيها... وماتقارنيش نفسك بحد؛ كل واحد فينا ليه ظروفه مختلفة عن التاني ربنا سبحانه وتعالى لما ييجي يحاسب مش بيحاسب على عدد ساعات المذاكرة بس.. لأ، بيحاسب على الليلة كلها، على تعبك وقلقك ومذاكرتك ومحاولاتك وجهادك مع نفسك وعياطك وكل دا، فاعملي اللي عليكي شوفي انتي عايزة ايه وابدئي فيه حالا مالكيش دعوة بمين بدأ ومين مابدأش كل واحد ليه ظروفه زي ماقلتلك. ربنا سبحانه وتعالى بيقول في سورة النجم الآية ٣٩: ( وأن ليس للإنسان إلا ما سعى)، اللي عليكي هو انك تسعي وترمي دعواتك وكل همك على الله. هقولك حاجة بقا انا باعملها تشجعك على المذاكرة، انا عندي مذكرة كدا صغيرة شكلها حلو عشان احب اكتب فيها فلما الاقي نفسي مقصرة في المذاكرة افتحها واعمل حوار مع عقلي يعني حوار بيني اللي مش عايزة تذاكر وبين عقلي اللي فاهم فعقلي مثلا يقولي مش عايزة تذاكري ليه اقوله عشان مش حابة المذاكرة فيرد يقولي ومين بيحب المذاكرة بس لازم عشان ماتبقيش فاشلة وكل اللي عملتيه يضيع اقوله طب انا عاوزة انام يقولي اشربي قهوة وهكذا واسجل اليوم والتاريخ، فلما آجي اكره المذاكرة تامي افتح المذكرة وأقرأ الحوار وأتشجع وأذاكر
تم النشر الاثنين، ١٠ يونيو ٢٠٢٤
السلام عليكم ورحمه الله اهلا بيكي لا شك أن أغلب الطلاب في تالته ثانوي بيكونوا متوترين و مضغوطين ، عاوزين يحققوا حلمهم و حلم أسرتهم ف بيكون عبئ عليهم. و لكن التوتر لو سيطر عليكي كامل مش هتقدري تكملي و هنا لازم تعملي توازن ممكن تلعبي رياضه حتي لو في البيت و ممارسه تمارين التنفس هتساعدك ممكن تشوفي فيديوهات ليها عبر اليوتيوب. تدخلي علمي علوم ولا رياضه هنا متوقف عليكي و علي مهاراتك. الرياضه بتكون حلقات متصله ببعض يعني لو تعرفي تشوفي الأجزاء اللي فاتتك السنين اللي فاتت و تذاكريها هتعرفي تلمي الماده أن شاء الله ، كل دا متوقف عليكي في ماده الرياضيات بتقعميها بسهوله بتعرفي تحلي و تفكري كويس. لو نص النص و مش متأكده من اختيارك ممكن تشوفي كتب چولوچيا و كتب احياء بتاعه تالته ثانوي و ساعتها تقرري هتعملي ايه. و علي كلا استعيني بالله و اسعي و اعملي اللي عليكي و اللي ربنا كاتبه هيكون ولكن بلاش اي تقصير حاولي هي سنه هتفرق كتيييييير معاكي بعد كدا. ربنا يوفقك و تجيبي اعلي مجموع. تحياتي 🌹
تم النشر الاثنين، ١٠ يونيو ٢٠٢٤
هقولك شيء "الثالث الثانوي" هو حلم لاي طالب انتي بدراستك ثانويه عامه دي في حد ذاتها اعلى مستوى تعليمي ثانوي هل هي صعبه؟؟ الاجابه نعم... «في حاله التقصير» بيستلمك الشيطان هل هي سهله؟؟ الاجابه نعم...«في حاله الانتظام بالمذاكره» السنه غير اي سنه عديت بيها قبل كدا ممكن تقصر وتلم منهجك ليالي الامتحانات او قبلها بفتره لكن في الثانوي ما دمت ماشي بالطريق توصل لاي حلم باذن الله انتي ممكن تعالجي ضعفك بالرياضيات ودي اول خطوه للطريق عن طريق كورسات كتيير على اليوتيوب بس استشيري معلم ايه الله ممكن تحتاجي قبل تالته ثانوي وفي اساسيات زي حل معادلات وانك تعرفي الاشتقاق وصديقني الرياضيات ما هي الا انك تحل وتغلط وتتعلم فتتدخل اخر السنه باعلى تدريب وتجيب اعلى معدل ان شاء الله طالما بتحبيها... ولو عندك توتر وقلق طبيعي كلنا كنا كدا حاليا بالثالث الثانوي واقصى فتره توتر بس بعرف انه ملوش لازمه كدا كدا ربنا كاتب لينا مستقبلنا في اللوح المحفوظ ولازم نيتك تعرفي ان ربنا لدم وضع جواك حلم استحاله يخذلك طالما بذلت الاسباب لاخر يوم وبنوه على شيء الثانوي العام ممكن تدرسيها بمرتين يعني عامين اي تقسيم المواد ودا في حاله الصعوبه الماديه واسباب تانيه بس ليها مميزات وعيوب نصيحتي إلك " فاستقم كما امرت "
تم النشر الثلاثاء، ١١ يونيو ٢٠٢٤
حبيبتي، أنا فاهمة إنك بتمري بوقت صعب ومليان توتر وقلق خصوصًا مع اقتراب ثالثة ثانوي. أول حاجة محتاجة تعمليها دلوقتي إنك تهدي نفسك وتفكري بهدوء. أي حد ممكن يحس بالإحباط وضياع الاتجاه، وده طبيعي جدًا. خلينا نحاول مع بعض نفكر بخطوات بسيطة تساعدك تتجاوزي المرحلة دي: حددي أهداف بسيطة : مش لازم تقفزي مباشرة للتحضير للسنة كلها. ابدأي بخطوات صغيرة زي قراءة شابتر واحد في اليوم أو حضور درس واحد في الأسبوع. الهدف يكون تنشيط عقلك من غير ضغط كبير. تواصلي مع أصدقائك : هما كمان ممكن يكونوا بيمروا بنفس الحالة أو يفهموكي كويس. حاولي تخرجي معاهم أو تتواصلي معاهم عشان تحسي إنك مش لوحدك. استمعي لأمك : عارفة إنك بتحبيها ومش عايزة تزعليها. حاولي تكوني صريحة معاها وتقوليها إنك محتاجة دعم نفسي قبل ما تبدي في دروسك. أكيد هتفهم وتحاول تساعدك. روحي لمرشد نفسي : لو حسيت إن مشاعرك بتزداد سوء، ممكن تحتاجي لمساعدة متخصصة. مرشد نفسي ممكن يساعدك تحطي خطة للمستقبل ويكون معاك في أيامك الصعبة. خذىي شوية وقت لنفسك : خذي فترة راحة واستخدميها للهوايات اللي تحبيها أو حتى بس تكوني فيها لنفسك. الراحة النفسية واحدة من أهم الأساسيات قبل أي تحضير دراسي. اختياري بين علمي رياضة وعلوم : فكري في مستقبل كل مجال وتكلمي مع ناس درسوا في التخصصين. اختاري المجال اللي تحسي إنك ممكن تستمتعي بيه أكتر وتكوني فيه مبدعة. أنا دايمًا هنا لو احتجتي تتكلمي أوي أيوا نصيحة تانية. مبروك إنك قويتي وتكلمتي، دي خطوة مهمة جدًا. ان شاء الله كل حاجة هتتحسن بأمر الله، والتوفيق ليكي 🌼.
تم النشر الاثنين، ١٠ يونيو ٢٠٢٤
تم النشر الاثنين، ١٠ يونيو ٢٠٢٤
متقوليش كدا ، أنتِ شطوره ، استعيني بالله وانزلي احجزي دروسك وادخلي الحاجه الأنتِ بتحبيها عايزه اقولك السنه طويله اوي اوي اوي هتعملي كل الأنتِ عايزاه ومش مهم لو مخدتيش رياضه بقالك فتره طلاما بتحبيها هتعرفي تتعاملي و3 غير متوهميش نفسك انك مش شاطره لا أنتِ شاطره وهتقدري ، قربي من ربنا اهم حاجه اهم حاجه ف السنه دي وعموما انك تكوني قريبه من ربنا هو اولا واخرا توفيق من ربنا مع شويه سعى منك لو استعنتي بالله كدا ومن جواكِ عندك يقين أن ربنا معاكي والله والله هيكون معاكِ صدقيني عن. تجربه
تم النشر الاثنين، ١٧ يونيو ٢٠٢٤
لعرض السؤال في فدني اضغط هنا