هل متابعتي لمسلسل سبب كافي ليتركني الشخص الذي أرتبط به؟

Question

السلام عليكم حابة اسألكم سؤال مزعلني ومش قادرة افهمه هل فكرة اني متابعة مسلسل محترررم وبيناقش فكرة معينه بمنتهى الاحترام مع أهلي في رمضان تخلي الشخص اللي مرتبطة بيه يسيبني وميكلمنيش بقاله اكتر من أسبوعين دلوقتي وعلاقتنا تتقطع للسبب دا ؟ هل دا طبيعي ولا بيتلكك ليا عشان يسيبني !!! هو شبه متدين ولكن هو نفسه بيتفرج على مسلسلات أجنبيه بدون رقابه كمان ومتابع ناس بينزلوا صور ممكن متكونش كويسة ولكن دايما يقولي انا بجاهد نفسي اني متفرجش على اي مسلسل ولا اسمع اغاني بس هو مش مانع دا بالنسباله بالعكس بيعمل حاجات كتير جدا تخليني احس اني انا محافظة اكتر منه على اني مشوفش مسلسلات مثلا او اغاني او اشوف مشهد ممكن يكون في اي الفاظ انا مقهورة بجد ومش فاهمة ليه سابني هل السبب يستاهل فعلا وانا مش واخدة بالي ؟؟ اصله عمره م اتلككلي على حاجة بالعكس كان كويس معايا ولما بنبعد فترة بيرجعلي المرة دي كأنه ماصدق يخلص مني وعمال يضيف ف بنات عنده وانا مش فاهمة ايه ال اتغير قبل مايعرف اني متابعة مسلسل بدقيقتين بالظبط كان بيتكلم كويس جدا معايا ومفيش اي حاجة هو انا اللي غلط ولا هو ولا في ايه انا مش فاهمة حاجة ومش مستوعبه انه يسيبني بالطريقة دي ومش عارفة اطلع الموضوع من دماغي وابطل افكر فيه اني هنت عليه كدا

Accepted Answer

السلام عليكم ورحمه الله وبركاته. يعني مهما كنت انت والشخص ده انتوا بقى لكم قد ايه على العلاقه ببعض بس خليني اقول لك انه هو التزامه اللي انت بتتكلمي عليه ده التزام مزيف هو عاوز يكون مع بنت محترمه وكويسه وملتزمه وهو بالنسبه له لا هو مش لازم يكون على درجه الالزام المهم ان هي تفضل على درجه الالتزام والنوع ده من الشخصيات بيكون نوع سام جدا ومش مناسب جدا خالص ان احنا يعني نرتبط به بعلاقه رسميه او جاده احمدي ربنا انه الموضوع ده خلص بالشكل ده علشان يوريكي انه ده بني ادم عكس اللي هو بيظهره واريد يكون من جواه بيجاهد اه لكن خلينا نقول ان هو الاسهل بالنسبه له الاستسلام للحاجات الخطا واسهل حاجه يعملها ان هو يقول للي معاه لا لا لا خليكي انت احسن ويكون ده بالنسبه له الشكل اللي هو شايف نفسه بيه ملتزم انه هو انا بقول لها تفضل مكمله في الصح وهي ملهاش دعوه بيا وهي لو كويسه تخليها هي في الصح وما تعملش زيي بالعكس هي كده مش بتساعدني هتلاقي كلام كثير جدا من النوعيه دي. فيا بنت الحلال اه الشخص ده كان بيتلكك مش اكتر من كده عشان يروح بقى ايه يعمل يعمله ما تبقيش انت بالتزامك قصاده ومحسساه بانه هو مقصر كده تمام جدا والمساله مش في المسلسل او غيره ما ترتبطيش النوع ده من الارتباط تاني علشان ما تاذيش نفسك بشخصيات ملهاش اي لازمه خالص في الحياه.

Answer

ما يمكن مش دا السبب وفي حاجة تانية ضايقته منك مع ان بصراحة دا شغل عيال صغيرة ويوضحلك ان الشخص دا مش ناضج سواء كان زعله بسبب المسلسل ( سبب غير منطقي ابدا ) أو سواء كان سبب تاني في الحالتين هو قرر يبعد وميواجهش ويقول انا متضايق من كذا عشان واحد اتنين تلاتة وحتة انه بيضيف بنات دا يوضحلك قد ايه هو شخص غير مسئول وسلوكه غير سوي لانه مش محترم وجودك مع ان الراجل المحترم سواء مرتبط او لا المفروض يحترم نفسه اولا ويغض بصره ومعلش اللي بتحكي فيه دا ميدلش انه متدين وبيجاهد ابدا هو بيحاول يقنعك بده، من وجهة نظري سيبيه يبعد براحته أنتي مغلطتيش في حاجة ومتقعديش تجري وراه لان دا هيحسسه انه مرغوب فيه وبالتالي هيبعد اكتر سيبيه ولو اتكلم مترديش عليه وشيليه من دماغك ومتتعلقيش بيه خصوصا ان علاقتكم مش رسمية وهو لو عايزك بجد هيجي يقعد مع اهلك تاني ولو دا محصلش احمدي ربنا لأنه اكيد مش خير ليكي

Answer

للاسف ده شخص سطحي وعايش بازدواجية وانتي بنفسك بتقولي بيتفرج علي مسلسلات اجنبية واكيد فيها عري ومشاهد خارجة ويقولك بجاهد نفسي فين الجهاد في كدة الواضح أن هو بيدور علي واحدة ملتزمة تبقي معاه علشان الشكل الاجتماعي وفي المقابل هو يتصرف كأي شاب في سنه وبحرية هو مش راجل للأسف ولا كان بيحبك حب صادق لعب بمشاعرك وسابك وهيعمل كدة مع غيرك خلي عندك ثقة في نفسك وحاولي تشغلي نفسك علشان متفكريش فيه وحتما هتنسيه لانك مش غلطانة انتي بس وقعتي مع واحد تافهه و معندوش ضمير

هل متابعتي لمسلسل سبب كافي ليتركني الشخص الذي أرتبط به؟

اجتماعية

علاقات

سؤال من احد أعضاء فدني

تم النشر الأحد، ٦ أبريل ٢٠٢٥

4 إجابة

5 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك