انا و صحبتي كنا صحاب بقالنا تلت سنين تقريبا دايما بحس انها داخله سباق معايا بجد و كل حاجه غل و حقد و كده بس مش بتبقي مبينه
لما بشتري حاجه جديدة بتقعد تقولي مبروك و كده بس بيبقي باين عليها انها مستكتراها عليا و كده و لما بسأل عن حاجه في اي محل بلاقيها تروح تجيب الحاجه اللي سألت عليها و من غير ما تقولي انا مش عارفة هي بتخبي ليه
هي لو بتيجي في وشي تقولي انها جابت كذا و طلعت حلوة او وحشه هقول كده اشطا عادي انما هي بتجيب و بكتشف بالصدفة و مره قبل كده عجبتني اسورة فسألت عليها و الراجل قالي سعرها و هي كانت معايا و انا مكنش معايا فلوس ساعتها قلت اني هروح اشتريها بكره لقيتها جابتها و هي كانت اخر واحدة و علطول لما كنت بحكيلها على حاجه كانت مبتمش و مبتحصلش و كأنها بتحسد الحاجه فبقيت بخبي عليها و مش بقولها إلا لما الحاجه تخلص و تتم بجد انا مش عارفه ده ايه بجد
حتى احنا كنا متفقين نجيب نوع فون زي بعض و كل اما احكيلها ان بابا خلاص هيجيبه يحصل حاجه سبحان الله و ميجبوش ما عدا اليوم اللي مقلتلهاش فيه اني هجيبه هو ده اليوم اللي اشتريته فيه و علشان جبت فون احدث منها بحاجه بسيطة حرفيا كانت مضايقة موت هي طبعا كانت بتحاول متبينش بس انا اخدت بالي
و مره كنت مخططين نفصل لبس المدرسة زي بعض و كده فالمهم انها قالتلي انها اشترت بنطلون و بلوزة و كده و المفروض اننا كنا مبطلين لبس بناطيل فزعقتلها و قلت لها مينفعش و اننا كنا مخططين نفصل دريس و إن احنا مش هنرجع نلبس بناطيل تاني احنا بطلناها من سنه فالمهم انا رحت و فصلت دريس و كده كان شكله حلو اوي و بعتلها صورة و انا لبساه كانت مضايقة موت المهم لقيتها راحت فصلت واحد زيه تاني يوم
و غيره بقى من حاجات كتيرة حتى شكل الجسم كانت بتغير منه لان هي تخينه شوية
رحت و كلمتها فانها ليه بتغل مني و كده و انا احنا مش في سباق و ان حرام الحسد و مينفعش تبقي بصورم معايا لقيتها تهلل و تعيط و حسبي الله و نعم الوكيل و انا مش مسامحاكي و انا عمري ما غرت منك وقالتلي بيني و بينك السلام و مش عاوزة اكلمك تاني و كده
فمش عارفه بقى هي فعلا مش بتغير مني و دي مجرد وسوسه في دماغي و كده و لا دي فعلا علامات لغيرتها و غلها و حسدها؟ ياريت حد. يفيدني
انا في أولى ثانوي و احنا كنا صحاب من أولى اعدادي
و اتخانقنا ست شهور في تالته اعدادي
السلام عليكم، هي ممكن تكون فعلا بتتصرف زي ما بتقولي وممكن كل ده يكون حساسية من ناحيتك وتحليل لكل تصرف أو نظرة منها. في الحالتين لا أعتقد إنه ينفع تكملوا مع بعض لأن دي مش صداقة أصلا. سواء هي كانت بتغل ناحيتك فعلا أو إنك حاسة ناحيتها بكل الشكوك دي... إما إنها بتظلمك أو أنتِ بتظلميها فمينفعش دي تكون صداقة أو علاقة صح عامة. تصرفاتها مثلا ممكن حد تاني يشوفها إنها بتحبك قوي وعشان كده بتحب تقلدك حتى في ذوقك... ممكن تكون الحالات اللي مبتتوفقيش فيها زي مثلا شراء الموبايل دي صدف مش أكتر. ممكن الحاجة مش بتم مش عشان هي بتحسدك لكن عشان أنتِ حاطة في دماغك الحسد والتوقعات السلبية فبالتالي توقعاتك بتحصل. فزي ما قلت في كل الأحوال دي مش صداقة ومينفعش تكملوا فيها. الصداقة ثقة متبادلة وارتباط قوي مفيهوش مجال للشكوك والإحساس طول الوقت إن فيه سكينة في ظهري وعدم أمان مع الصديق اللي اخترته. ما دام خلاص واجهتِها وقالت لك مفيش بينكم غير السلام، تابعي حياتك وادعي لها ولكِ، إذا كان في قلبها غل ناحيتك يزيله ويهديها وإنه يغفر لك إذا كنتِ ظالماها.
تم النشر الأربعاء، ٢٢ يناير ٢٠٢٥
طيب منتي كمان بتغيري منها ...سبحان الله هيا بتشتري من فلوسك متسبيها تشتري زيك يمكن بتثق في زوقك يمكن شيفاكي شيك وحابه تقلدك عشان تبقي حلوه زيك ليه الكبر وحب الذات والانانيه في ان الحاجه اللي اشتريها محبش حد قريب مني يشتري زيها تلفوني لازم يبقي مختلف عنهم اكسسواراتي كارثه لو وحده اشترت من نفس المكان او نفس القطعه وتفضل الوحده تاكل في نفسها وتترجم ده انه حقد وانه حسد وان الناس بصالي ومحدش سايبني في حالي والشيطان يهيئلها انها محور الكون والبشر كلهم بيقلدوها طبعا انا بتكلم بصفه عامه مش قاصد صاحبه السؤال بشكل خاص عشان المشكله دي متفشيه في البنات بشكل لا يصدقه عقل ...ربنا يهديكم علي نفسكم
تم النشر الأربعاء، ٢٢ يناير ٢٠٢٥
عزيزتي، أفهم تمامًا مشاعرك تجاه العلاقة التي تجمعك بصديقتك، ومن الواضح أنكِ تشعرين بالتوتر والقلق حيال تصرفاتها. في بعض الأوقات، قد تثار مشاعر الغيرة أو عدم الرضا بين الأصدقاء، وهذا شيء طبيعي. ولكن من المهم أن نكون حذرين في كيفية التعاطي مع هذه المشاعر. من الواضح أنك قمتِ بخطوة شجاعة حين تحدثتِ معها عن مشاعرك بشكل مباشر، وهذا يدل على نضوجك، ولكن رد فعلها قد يعد دليلاً على وجود مشاعر صعبة لديها. أحيانًا، قد يكون من المفيد الابتعاد قليلاً وترك المساحة لبعض الوقت، حتى تتمكنوا من التفكير في الأمور بشكل أفضل. يمكن أن يكون من المفيد منك أن تعيدي تقييم هذه العلاقة. إذا كانت هذه المشاعر المتبادلة مع صديقتك تؤثر على راحتك النفسية، فقد يكون من الأفضل أن توازنِ بين المحافظة على صداقتك وأيضًا حماية نفسك من التأثيرات السلبية. تذكري أن الصداقة الحقيقية يجب أن تكون مبنية على الدعم والاحترام المتبادل، لا على المقارنة أو الغيرة. إذا بدأ توترك يؤثر على حياتك اليومية أو دراستك، فقد يكون من الجيد مناقشة مشاعرك مع شخص موثوق، سواء كان أحد الوالدين أو معلمًا أو مستشار. من المهم أن تعرفي أنه ليس لديكِ أي خطأ في شعورك، وأن الصداقة يجب أن تجلب السعادة والاستقرار. أسأل الله أن يرزقك حكمة في اتخاذ القرار الصحيح.
تم النشر الثلاثاء، ٢١ يناير ٢٠٢٥
" سيبيها "
تم النشر الثلاثاء، ٢١ يناير ٢٠٢٥
انا بردوا بقول اولا اتأكدي ثانيا سيبيها علشان لو هي اللي جابت البنطلون عن اقتناع ممكن مره ورا مرة تخليكي ترجعي تلبس بناطيل
تم النشر الأربعاء، ٢٢ يناير ٢٠٢٥
لعرض السؤال في فدني اضغط هنا