ازاي اتخلص من التسويف و اكون شغوفه ازاي اقدر اتمسك بحلمي و اسعي في ظل كل الظروف اللي حواليي بتحبطني
اهلا بيكي، يارب تكوني بخير. طيب نبدأ واحدة واحدة، التسويف بيحصلنا كلنا، ولكن في عدة حاجات ممكن تساعدك على علاج الكسل والخمول. هاتي ورقة وقلم وابتدي رتبي يومك بكره هيبقى عامل ازاي كل يوم قبل ما تنامي. (جدول كده لتنظيم اليوم). قسمي المهام اللي فعلا هتعمليها، يعني لازم تكون مرتبة على حسب الأهمية والأولويات. لو لقيتي نفسك عايزة تضيعي وقت، وهتقولي لا خلاص بكره اعمل كذا أو كذا، تراجعي فورا وابدأي، لا تؤجلي أي شئ، انظري لكم الراحة اللي هتحسيه بعد ما تنجزي كل اللي وراكي. كأفي نفسك، قولي مثلا لو خلصت اللي ورايا النهارده هكافيء نفسي ب شيكولاته مثلا، أو أي حاجه بتحببها مثلا، زي ما انتي عايزة. نيجي بقى ل إزاي تتمسكي بحلمك في ظل الظروف المحبطة اللي حواليكي. طيب علشان اكون صريحة معاكي، مش كل الحياة حوالينا هتكون فراشات وبتطير، أو الحياة هتبقى وردي وزي الفل. لأ طيب لأ ليه؟ علشان هي ديه الحياة بكل بساطة، احنا مش في الجنة. طيب هو الواحد هيعمل ايه؟ هو مش لازم الواحد يكون عايز الدعم الخارجي طول الوقت علشان يعمل الحاجة اللي نفسه فيها، لأنه لو اعتمد عليها هيخسر، لأن ممكن الحاجه ديه متبقاش موجودة طول الوقت معاه، أو هي مش متاحة في الوقت ده، طيب نعمل ايه؟ نسكت، أو نفشل، أكيد لأ. الواحد لو وراه مسؤوليات لازم ينجز اللي وراه، ميعتمدش إن فيه حاجه تبقى وراه علشان تدعمه، لأ هو اللي يدي الدعم ده لنفسه. إحساسه بالمسؤولية اللي وراه هتخليه يلتزم غض النظر عن اللي بيحصل حواليه. يعني لو فيه ناس من البيئة المحيطة حواليكي بتحبطك، متسمعيش، لأي كلام من ده. لازم تعرفي أنهم مش صح، اعرفي أنك انتي اللي صح. لأن مفيش حد هيبقى صح ويحبط حد تاني، ديه حاجه لازم تكوني مقتنعة بيها. انتي صح، وكملي، ولا تنظري إلى كمية التعب اللي موجودة دلوقت، لأ ... شوفي النجاح اللي هيجي بعد كده. اتمنى ليكي كل التوفيق
تم النشر الأربعاء، ٣٠ نوفمبر ٢٠٢٢
التخلص من التسويف اهم حاجة انك اول ما تفكرى تنفذى فورا...كأنه تحدى او جرس انذار . فكرت اقوم اعمل بحث عن حاجة مثلا...مش هينفع بعد الاكل ولا بعد المسلسل تنفيذ فووورى
تم النشر الثلاثاء، ٢٩ نوفمبر ٢٠٢٢
استعيني بالله الاول وتوكلي عليه وشوفي أولوياتك واهدفاك في الحياة والسعي بكل السبل والأسباب المتاحه معاكي ولما تستنزفيها ادعي ربنا يراضيكي ويرضيكي
تم النشر الثلاثاء، ٢٩ نوفمبر ٢٠٢٢
تصدقى حلمك اكتر من كده وتؤمنى بنفسك تؤمنى بالسعى والنتيجة على ربنا الحلم عاوز مجهود عشان يطلع للنور لو مش قد المجهود نبطل نحلم بقى الظروف بقى دى فى ايد ربنا ...واللى مش فى ايدينا نسيبة للى يقدر عليه وربنا اكيد مش هيظلمنا بس احنا ممكن نظلم نفسنا بالتسويف
تم النشر الأحد، ٤ ديسمبر ٢٠٢٢
حمسي نفسي بطموحك حتي لو حياتك روتينيه نمي من هوايتك وحققي اللي كنتي بتكسلي تحققييه هتلاقي في تغيرر
تم النشر الأحد، ٨ يناير ٢٠٢٣
التخطيط والارادة لو خططت بالظبط ان ليك هدف كبير وتعمله خطة ان كل يوم هعمل من الهدف دة كذا وكذا وهياخد من يومي ساعة مثلا هتلاقي هدفك مبقاش كبير ويخليك تسوفه
تم النشر الاثنين، ٢٨ نوفمبر ٢٠٢٢
تعالي نرتب اهدافك الاول واحلامك الاهم ف المهم وبعد كده نمسك هدف هدف نشوف هنحققه ازاي ونشوف الطرق الممكنه لتحقيقه وايه الظروف الي بتحبطك نحتول نتجنبها ونخلق ظروف جديده تحفزك انتي تقدري تحققي الي نفسك فيه
تم النشر الخميس، ٥ يناير ٢٠٢٣
لعرض السؤال في فدني اضغط هنا